بعض قصايد حمدان
أنا عنواني اشعاري واسمي في معانيها
وأوّل بيت أنا قلته غدا تاريخ ميلادي
إذا تنشِدْ عن أخباري من اوّلْها لتاليها
أنا اشعاري هي اخباري على ما اْريد تنقادي
وانا أمّي إماراتي ولِدْت وعشت أنا فيها
وابوي أمجاد عرباني وطاري ماضي اجدادي
واخواني أنا المليار مسلم في أراضيها
وانا القرآن والسِنّه غَدَوا زادي وزوّادي
أعيش هْمومي وفَرْحي ولا لي نيّه أخفيها
وأكبر همّي المقدس وطفلٍ جنبه يْنادي
يهزّ بْصَرْخته أرضٍ نوى الصهيون يمحيها
من التاريخ والعالم وقَفْ مكتوف الايادي
وانا ايّامي هي اسْتاذي تعلّمني لياليها
فلا خيرٍ بإنسانٍ يِفادْ ولا بَعَدْ فادي
و(زايد) قِدْوِتي (زايد) و(زايد) من يزهّيها
بلاده شانها عالي باسمهْ دايمْ تْشادي
وروحي (محمّد المغوار) ابن راشد يغذّيها
من أشعاره من أفكاره، بنيت بْمجدهْ امجادي
مرَبِنّي على الجودْ وعلى المعروف واحميها
بلادي حبّي الأول ولا لي غيرها بلادي
مستحيل أنساك
مستحيل أنساك هذا مستحيل مستحيل أنساك والله للأَبَدْ
من يعاشِرْ شخص مثلك ما يميل لا ولا ينوي على غيرك أحَدْ
يا جميلٍ في جميلٍ في جميل يا فريد اللون في جيدٍ وْخَد
ترتسِمْ في وجنتك شمس الأصيل وجمرتينٍ بينهن صَفّ الَبَردْ
والعيون الدعج والرمش الظليل ونور وجهك منّهن نور اسْتِمَد
تهت في حبّك مثل تُوْه الضليل وزادت جْروح الَحَشا جْروحٍ جِدَدْ
ولا ولا عن حبّك أرضى بالبديل وْكَنّ باقي الخود تكمالة عدَدْ
لي يسير الدرب يوصَلْ لو طويل أو مِثِلْ ما قِيْل من (جَدَّ وَجَدْ)
ثلاث أيّام
ثلاث ايّام مرّن في حياتي غير ثلاث ايّام عشت الحبّ واغليتك
ثلاث ايّام واتهجّى كلام الطير كلام أعْذَبْ من اعْذبْ من تفدّيتك
رسالة حبّ شاهدْها غلا وْتعمير على فْوادي تربَّعْ واسْكنْ فْـ بيتك
أقول إشْ قد انا عطشان وانت البير دَلو فكري نَضَحْ من كلمتي ليتك
أقول الـ(ما يصير) لْعينك انت يْصير ولو حتى بْثرّيا الكون حطّيتك
حبيبي والغلا صوره بلا تصوير صوَرْها بكل رَمشة عين أنا ريتك
حبيبي والعطا يحتاج للتقدير إذا صرّحت أنا اللي حّيك وْمَيْتك
ثلاث ايّام مرّن في حياتي غير ثلاث اّيام عشْت الحب واغليتك
ثلاث ايّام لكن ما ادري شِ التفسير بس.. ادري من ثلاث ايّام حبّيتك
لعبة زمن
لعب الزمن ما هو مثل باقي العاب إلعب على كيفك واذا تروم لا تْتوب
بَيْجيك يوم وْتندفن تحت لِتْراب عقب الدفن بَتْعَرْف وش يعني لْعوب
لو نك فَتحت أبواب لك غَالقٍ باب ولو نك تعرف العيب العيب عَذروب
بديت أكتب واجلب كْتاب بكْتاب آخذ معَانيهن واخلّيهن بْصوب
إذا الشِّعر يا ناس قِدْ جاب ما جاب وان جاك شِعري بالفعِل جَاك مَكْتوب
هذا وانا أرقى على كل مرقاب أسري بليل الضدّ من فوق عَرقوب
هذا وانا أشّر وهي تطير أسراب بيض الحَمام تطير ما تحمل ذْنوب
هذا وانا تايب وإبليس ما تاب هذا وانا أنعَت وهو ضَيّع دْروب
هذا وانا أضحَك وهو يضحك بْناب ثوبي ستير وصاحبي عَاري الثوب
هذا وانا اعدّ الخَطا عَد لِتْراب ينعد كيف انعد وهو كان محسوب
بعض البشر تحسب على كيف الاسباب وبعض البشر من دون سِبّه ومطلوب
كلٍّ يحَسْب احساب وآنا احسب احساب وْكلٍّ يجي باسلوب وآنا لي اسلوب
بَابٍ فتح من بَاب والباب كَذّاب بَابٍ إذا يفتح ترى الباب مَكْذوب
هذا وانا اغنّي وانا اقول سَحّاب سَحّاب يَمطر صوب وانا أمطر بْصوب
مثل العروق تجيس وتدق الاعصَاب أو مثل سَاحِر طار في الجو مجلوب
من هو يأمِّن يمشي بْليل في غَاب بعض العَسَل يا صاحبي سَمّ مَشْروب
هذا هَدفيه صبته وْصَاب بصواب صوب الذي صَوَّب ولا صاب مَصيوب
بحرٍ غزير وْطامي البحر عَبّاب ونَارٍ تطَفّي نَار من حَرّ لاهوب
حَدٍّ عليه عيون والناس رقّاب وْحَدّ اختفى لو كان بالحيل مَرقوب
حَدٍّ يشلّ سلاح وْحَد شايل حْراب حَدّ يعشق شْروقٍ وْحَد يعشق غروب
حَدٍّ يشيل الهَم في ضَرب الاصحاب كل من ضَرب في يوم له يوم مَضروب
أنا معَادِل آخذ الحُب لاحباب وْكلٍّ يحب الطيب .. الطيب محبوب
قالوا سَهَل إنّي أنا أفتح الباب وانا هويت الصعب لو دارت حْروب
لعبَه وانا ألعَب على كل الالعاب طبعي أنا غَالب ولا آكون مَغْلوب
روح وروح
روح و روح ابعد بدنياك …
يا متعب قلبي بصــدك …
الدرب لي ضحك بكـاك …
موت تكوى بنار حقـدك …
كم في العذارا ناس شرواك …
بحر الجــمال يفوق مدك …
اليوم الي بيصـــير وياك …
باكر معاك الايــام ضدك …
تذكر زمان كــنت اهواك …
انت الوحيد ومـــين قدك…
ودك ادور غير لقيــــاك …
ودك ادور غــــير ودك …
انا نســيتك قبل لانساك ...
وحتى خـفوقي اليوم هدك …
وبكل صــراحة واتحداك …
اوقف مكـانك عند حدك …
لقياك اصــبح مثل فرقاك …
والبـــحر مده غير مدك…
والـدرب لي ضحك بكاك …
موت وتكوى بنار حقـدك
دموع المحبين
منابع دموع المحبين عيني
تبكي على نفسي و تبكي على الغير
و عن الغلا يا ساريه خبريني
هل عاد له فب القلوب الحباب تاثير
قلب الفراق اللي غدى له حنيني
ظميلن و القصه ماهي جمة البير
لكنها شوق يدفه ضنيني
يا لله عساها ما تطول المشاوير
نوارتي..تجمعي و اجمعيني
و تغطرسي على جميع النواوير
مالي عذر حتى اقول اعذريني
بس احفظي تركيبة البيت الاخير
اشرف مثل مقاصده تحتويني
قل العطا ... و لا كبار المعاذير
خلي علاملت الشقا في جبيني
عطر و بساتين وورود و عصافير
ابي اشوف العيد في مقليتني
و اركب لقلبي جنلحين و اطير
و ابي اعيش العمرما عاد فيني
اصادم الايام والا المقادير
يا مشغله خط الغرام اشغليني
تراي جوال بليا فواتير
تمردي على النظر وسط عيني
و تعددي على وجيه الجماهير
لان المنام اللي بغيته يجيني
عيا يجيني لين مسيت بالخير
قنبله
يا وقت يا شاري الفرح من نفسي المخدوعه
أبيع لك وارجى الأمـل فـي البسمـه الخداعـه
إذا حسبت اللي عطيتـك ضعـت فـي مجموعـه
أعطـي ولا حصلـت مــن ذاك العـطـا أربـاعـه
يا قنبله وسـط الحنايـا فـي الحشـا مزروعـه
دايـم اداريهـا واخـاف إن تنفجـر فـي سـاعـه
مــا دامــت الفـرحـه عـلـي بسبـتـك ممنـوعـه
يا وقت وش يفرقك عن فعل الردي واطماعه
سبـة هنـوف لا سـرت ليلـي ســرى بجمـوعـه
شـوق وولـه مـع عبـرة فـي خافـقـي نـزاعـه
خـل ملكنـي فـي مياديـن الـهـوى وشـروعـه
عيني له مصيفه وفـي روض الحشـا مرباعـه
طيبه جذبني لـه وماشـي راضـي فـي طوعـه
والا لغيـره لا حشـا مـا لـي أبــد مــن طـاعـه
يــا عـيـن حــر قدتـحـقـق م الـبـعـاد طـلـوعـه
في رمـش عينـك عاشقـك متحـدي مضياعـه
والعنق هو عنـق الدمانـي لا انفـرت مفزوعـه
والا غــزال سـامـع صــوت القنـيـض وراعــه
قلبـي لشـوفـك كــم يـفـز وينـصـدم بضلـوعـه
بتشتت شعوري ويصعب يـا ضنينـي رجاعـه
محـبـتـك لا هــــي بمـنـحـوتـه ولا مـطـبـوعـه
تسري بدمي ثم تغذي لي الجسـم بـا جماعـه
نفسي مـن بعـادك تراهـا يـا الغـلا موجوعـه
مـن هـو يحـس بحالـة محـب تـزيـد اوجـاعـه
ما هـوب انـا اللـي تفضحـه عينـه ولا دموعـه
لـو ان عينـي مـن صــروف حكايـتـك دمـاعـه
الفصول الأربعة
أنساك كلمه مالها أيّة وجود بمرجعي والقلب لامنّه نوى غيرك حبيبي بامنعه
تنتابني ذكراك ما بين الوعي واللا وعي ما كنّك الاّ بحر حلمي والمشاعر الأشرعه
من وين تطلع كنّك الاّ تقول يا شمس اطلعي يتنفّس الفجر بنفس حسنك ويشرق مطلعه
مع إن فرعك لو رميت الشمس به عيّت تعي إن الدجا يسري لها من دون ما تتوقّعه
إن الدجا يكنز عبيره للنسيم المطلعي كلّه على شان النسيم المطلعي يلعب معه
يمتد ليلي واشعلك شمعة غلا بين اضلعي ويمر بي طيفك ويتناثر بصدري واجمعه
تحتاج تتعبني وأنا أحتاج لك وأنته معي بعض المشاعر تتعب المشتاق لكن ممتعه
موقعك من قلبي تدلّه بس حدّد موقعي وبعدين خذ قلبي وفي دنيا غرامك ضيّعه
وإن طاب لك شوقي وطاب لصوت همسك مسمعي القلب لك والشوق في عروقي بكيفك وزّعه
القلب ملكك والفصول الأربعة من مطمعي دام التقت في مبسمك كل الفصول الأربعه
ورد جوري
آخر المواضيع
قصايد حمدان بن راشد 
