لاتلوموني في حبه الاجزاء (3-4-5-6-7)

الجزء الثالث

طافن اشهور وشهوروفي هاي الفتره عبدالله سافر امريكا لانه يشتغل في كلية زايد العسكرية وطلعة له سفره بس عبدالله ما كان في خاطره انه يسافر ويترك بلاده كان امني نفسه انه بيلقى اي اثر او خيط ايدله على عنوده(( امني خاطري بأمال وياسي ينصب خيامه واشوف الحظ عوده مال.. وصبري)) ، هاي القصيده كانت دايما تحز في خاطر عبدالله الانسان اللي ابدا ما نسى عنوده اول بنت تسلب له عقله وتخلي فكره يعاف الحريم الا هي..لانها تربعت على عرش قلبه..


في شهر رمضان احلى الشهور المفضله عند عنوده من ايام السنه...كانت عنوده في اواخر ايام شهر رمضان
عندها اجازه والجامعه مأجزه...فكانت اواخر الايام عنوده تسير ويا اخواتها وحرمة اخوهن السوق علشان يشترن شيل ونعول وشوية ثياب ...وعقب ما خلصن كانت الساعه 12 ونص..

اسما حرمة بطي: عنوده غناتي بغيت اشتري نعال حق بطي ابا افاجأه به هديه ...

عنوده واخواتها : يا عينــــــــــــــــــــــــــي ع الحب..

اسما حست بالاحراج: حرام عليكن كله ولا بطاي حبيبي لا خلاني الرب منه شارلي نعال هالعيد ..وانا ما اشتريتله شي وهو كان في خاطره نعال من هاييلا النعول اليداد...اللي فيهن كعب اشوي..

فطيم: اخيـــــــــــــــــــــــج شو تبيبه النعال اليديد تشترينه لريلج روحه طويل وانتي عداله عكه ...حق شو بعد ما يستاد طول..

عنوده: وانتــــــــــي اشلج يام لسانين ادخلين عصج في شي ما يخصج ليش؟؟؟

اسما: يا بنت الحـــــــــــلال خليها ..عادي والله ما ازعل فطوم اللي في قلبها على السانها...وعمري ما ازعل على حد يكفي عمتي وعمي امهنيني وميوزيني بطاي الله يحفظه.........والله لو لفيت الدنيا كلها ما الاقي مثل بطي ولا مثل عمي وعمتي...

عنود وفطيم وشويخ: واحنــــــــــــــــــــــــــــــــــــا؟؟؟؟؟؟؟؟؟ ؟

اسما: ههههههههههههههههههههه وانتن بعد ...

فطيم تلوي على اسما : فديتج والله انج غاليه وفي ذمتي انج دوى المعتاق..هب انتي حظج بخويه ..الا خويه حظه العود بج...

تمن يضحكن ..واتذكرن انهن ما قالن للدريول يسير صوب فارس والمندوس..

عنوده: محي الدين اقولك سير شارع الرقه نبا هناك اندور نعال حق بابا بطي...

فطيم: عنبوج زاد حتى هاذا بتبلغينه ليش احنا سايرين وشو نبا نشتري؟

اسما: برايه خله يدري يمكن في خاطره نعال..

عنوده: لا ابشرج خذتله انا نعال وقميصين ووزارين وللطباخ بعد خذت..

اسما : الله ييزيج خير واللـــــــــه ....عيل انا باخذ للبشكارات..

شويخ: لا غناتي لا تشيلين هم امايه خذتلهن ثياب وفصلتلهن جلابيتين عند ها الخياط فريد خياط الفقع...

اسما: فديتج يا عمتيه اسميها عبلت على عمرها...

فطيم: لا عبلت ولا شي حلو التشارك غناتي...

عنوده: اكيد حلو يالجحته..كلهم بيشاركون وبيساعدون الا انسه طمطم...

فطيم تحط ايديها على ويهها وتطالع اختها بنظره بريئه.......: فديتني انا والله روحي فقيرة مسكينه بشو تبيني اساعدكم؟ ما عندي حلال غير هوش وبوش امايه وابويه..تبيني ابيعه..........حاضـــــــــــــــــــــــره وما طلبتي...هههههههههههههه...اقول عنوده جلبي ويهج عطيناج ويه وايد ترانا..

اسما وشويخ يتضاحكن ..وعنوده: زين ما عليه الحبصيه بتشوفين انتي في البيت ..وهاي المره اخر سيره اتسيرنها ويانا يكون بعلمج...

فطيم: ما عليه منج انـــــــــــا..غناتي اتويكلي على شويخ هب علايه...وقفت السياره وين الباركنات ، ونزلن اسما وخوات ريلها وسارن في البدايه صوب محل فارس للاحذيه والصراحه المحل كان هاذيج الليله مزدحم بالناس والشباب فيه متروسين لازم كل واحد يتنافس علشان يدورله لبسه حلوه ويكشخبها حق اول يوم عيد..دخلن البنات واول ما دشن حسن بالعيون كلهن عليهن..

اسما بصوت واطي وهي منزله عيونها وملتفته اشوي صوب عنوده: والخيبه اشياهم هاييلا يطالعونا جيه عنبوه قطايع؟؟؟؟

عنوده: بالله عليج خلينا ناخذ حايتنا ونظهر بسرعه ..اخاف حد ايي من هلنا ويشوفنا...

اسما: انزين ابرايهم جيه احنا مسوين منكر لا سمح الله؟ يايين مثلنا مثل غيرنا بنشتري حايتنا وبنسير ..

فطيــــــــــــــم الملقوفه: شويخ اللـــــــــــــــــــــــــــه شوفي بالله عليج هاذاك الريال اللي لابس شال بنيه...ياااااااااااااااي اسميه خبال....والا هاذاك الاسماراني اللي ويا ولده...خسه الله حد ياخذ حرمه جيه؟

شويخ: والخيبه اتخيبج لله وين تبين اطالعين؟! حرام لو شافتج عنوده لتذبحج.. تعرفينها ما اداني هالحركات...
وبعدين شو تبين اتذمين الحرمه ؟؟ الريال راضبها شو يخصج انتي؟؟

فطيم: اووووووه يا لوعة الجبد حد ايرمسج انتي...غير يوم اتسير لك ويا حد يسليلك فواده برمسته ..هب انتي..

شويخ: هيه انتي ما يعيبج غير مطالع الفروخ...

فطيم: فرووووخ؟؟؟ فرووخ في عينج يالياهل اقول قولي شباب ولا تفشلينا...عنبوه يالسه انتي في زريبه؟؟

عنوده: اخبركن جنكن نسيتن عماركن وين انتن؟؟ شوها الحشره وبعدين يا انسه فطيم يام لسانين ممكن اتقصرين ع الفوليوم شوي؟؟.... حشا مستويه لعلوع...

في هاذيج اللحظه دشت المحل عايله ..والعايله اللي دشت كانت راشد و ومنى وعذيجه وبنات منى.. بس عنوده ما انتبهت الهم.. يلسوا كل من راشد وحرمته يتنقون احذيه للبنات ويشوفون اذا في مقاسات على قد قياس بناتهم وعذيجه ما انتبهت لقوم عنوده ..

شويخ: عنوده تعالي بنسير صوب قسم الاحذيه النسائيه برايهن اسما وفطيم بيتنقن ارواحهن والله فشيله جدام الرياييل..

عنوده: اوكيه.. يالله
سارن عنوده وشويخ لين ما وصلن عدال عذيجه ويلسن ايشوفن النعول جدامهن .. وعذيجه كانت رافعه غشوتها تبا اطالع.. صدت شويخ صوبها..وقالت في خاطرها اللهم صلي وسلم على سيدنا محمد ماشالله عليها ..

شويخ: عنوده بالله عليج شوفي هالبنت محلاها .. يالله واغمي عليها اللي ما يوزها حميد اخويه..
عنوده صدت صوبها وحست بشي غريب اول ما شافتها ..هالويه مب غريب عليها..تم قلبها ايدق ابقو ..واطالعها
فجأه صدت عذيجه صوبها ..عذيجه في خاطرها تبا تعرف هاييلا البنات شو بلاهن شكلهن يرمسن عنها...

عنوده في خاطرها..يالله يالقدر شقا راد نجتمع ولا قبل العيد بعد عشان تكون فرحتي بالعيد فرحتين..سارت عنوده بتسلم على عذيجه وعذيجه مستغربه شو بلاها هاي البنت يايه صوبها... بس العنود في خاطرها تقول والله ما اخلي هالفرصه تضيع مني لازم ارمسها واخذ رقمها...

عنوده: السلام عليكم عذيجه..

عذيجه وهي مستغربه: وعليكم السلام..هلا والله ختيه..

عنوده: شكلج ما عرفتيني بس ما عليه انا عاذرتنج غناتي اصلا هي الا مره وحده شفتيني فيها واكيد ما بتتذكريني...

عذيجه بعدها ساكته ما تذكرت مني هالبنت اللي سلمت عليها.. وتمت تحاول تسترجع بذاكرتها بس للاسف ذاكرتها خانتها هالمره...

عذيجه: اسمحيلي الشيخه والله اني ناسيه ..(( وهي مستحيه))

عنوده: مسموحه غناتي انا العنود اذا تذكريني ..من دبي واحنا تلاقينا بس في المطار..مره وحده ما غيرها..

عذيجه قبضت ايد عنوده وهي فرحانه وبحركه اقرب للهستيريه تعبيرا عن فرحتها: عنــــــــــــــــــــــــوده...!!!!! يالله واخيرا ..قولي والله انج عنوده...يا ربي ما اصدق هالشي ..

عنوده: وهي بعد فرحانه وتشققه من الفرح: هي والله عنوده..بس انا عتبانه عليج جيه بهالسهوله تنسيني؟؟
يالله ما هقتها منج يالظبيانيه...

عذيجه: هههههههههههه والله ان الدراسه منسيتني كل شي اسمحيلي عنوده ...والله ما نسيتج ..انج دوم ع البال..بس الدنيا فرقتنا واحنا تونا متلاقين...

عنوده: ما عليه غناتي صار خير..قل لن يصيبنا الا ما كتب الله لنا..وكل شي مكتوب لنا...ومقدر علينا..
شويخ من الجانب الثاني تقرص عنوده في كوعها ...تباها تسويلها اعتبار ع الاقل وتفهمها السلفه وتعرفها ع البنت..

عنوده: اسمحيلي عذيجه تراها ختيه ذبحتني بتقريصها ...بعرفكن على بعض..شويخ هاي عذيجه الظاهري من ابوظبي...عذيجه هاي اختي شيخه واللي اتشوفينهن هناك وحده حرمة اخويه والثانيه اختي ...
عذيجه: مرحبا شيخه هلا والله هلا بريحة الغالين..هلا بهل دبي...

شويخ: هلا والله بهل بوظبي ...تشرفنا والله بهالمعرفه..بس انتن وين تعرفن بعض؟

عنوده: والله اتلاقينا في المطار يوم كنت سايره اييب قوم امايه ...في الصيف اتحيدين يوم ايسيرون الهند؟؟

شويخ: هيه هيه ..بلاني ما احيد...

عذيجه: ههههههههههه والله انكن سوالف..المهم غناتي عطيني رقمج وانا بعطيج رقمي...علشان نتعارف عدل ...
وكل وحده منهن تطلع موبايلها وتخزن رقم الثانيه عندها...عذيجه في خاطرها يالله يا فرحتك يا خويه اسميك بتطير من الفرح...والله اسميه القدر مخبلك احلى مفاجأه...واخيرا بيبرد افوادك...

راشد ريل منى يأشر لعذيجه علشان انهم بيروحون هبابهم يوصلون لبوظبي...عذيجه صدت على عنوده علشان اتودعها: عنوده غناتي اشوفج على خير انشالله ولا تقطعيني الغاليه...والله بتريا اتصالج ولو ما اتصلتي انا اللي بتصل..

عنوده: من عيوني الغاليه انتي اصلا ما يحتاي توصيني ..اشكر ربي اللي جمعنا ، برايج الغاليه موافجه خير وانشالله بينا التليفون.. وردي السلام على هلج...

عذيجه: انشالله يوصل الغاليه.
اتقربت عذيجه علشان بتسلم على عنوده وشويخ..وسارت صوب اختها وريلها وبناتهم وظهروا بيسيرون...
عنوده في خاطرها ربي يسلمهم ويكفيهم كل شر...
خلصت اسما واشترت لريلها لبسة نعول..وظهرن بيردن البيت..في السياره اسما تتخبر عنوده عن البنت ،

اسما: عنوده مني هاي البنت اللي شفتج واقفه ترمسين وياها...

عنوده وهي تتنهد: اه يا ام حمد ..هالبنت سلمج الله تعارفت عليها في المطار..ولقيتها الليله من عقب ما تفارقنا في المطار..

اسما: من وين انزين؟؟

شويخ: اسامي هالبنت من بوظبي...يالله اول مره نتعرف على ناس من بوظبي...حلــــــــــــــــــــــو...بخبرج عنوده عزميها تي بيتنا...دخيلج خليها تي..

عنوده يت هالفكره في بالها..واستانست ...هيه والله جيه ما اعزمها ...: انشالله بعزمها انشالله في العيد وبشوف تقدر تي ولا بعد عندهم منقود...تعرفين انت بعد هالشي عيب عندنا وما اظني انهم يختلفون عنا...

فطيم: اسميج يا عنوده لا ترمسين جيه لازم تسدينها في ويوهنا؟؟انشالله انها بتي...

شوي الا ويوصل مسج لموبايل عنوده، فتحت عنوده شنطتها بتطالع منو اللي ذكرها الحين..!! لقت ان عذيجه امطرشتلها مسج...""" تصدق كل ما جيت اكتب عن روعة غلاك***اشطب حروفي واقول لا لا ما تليق بك""" شوي والا مسج ثاني بعد وصلها من عذيجه"""ليت العرب "مثلك" ويمشون ممشاك= = => كان الردي ماله مع الناس - - طــــــــــــــــــاري - - " ويلست عنوده اتدور في موبايلها عن احلى المسجات وطرشتلها """مهديك يا صاحبي قلبي،، تكفى ارفق عليه،، ماهمني قلبي ،،، همني انته فيه""" وردت اطرش لها مسج ثاني بس هالمره المسج اللي مطرشتنه الها كان في خاطرها انه يكون لعبدالله ..""" يا صاحبي لك صاحب ما تناساك*** يذكر ملامح ضحكتك في عيونه""".....سرحت عنوده في دنيا ثانيه وهي تفكر في عبدالله..تقول في خاطرها يمكن عذيجه اتخبر اخوها شافتني..لا لا ما اعتقد عذيجه تفكر اني انا واخوها نحب بعض ..زين شودراني انه يحبني يمكن اعجب بي..لا لا انشالله انه يحبني...المهم انا بوطد علاقتي بعذيجه وبشوف يمكن اخذ منها علوم....

الجزء الرابع..

رجعن البيت حوالي الساعه 2 وعلى طول فطيم وشويخ ربعن المطبخ الداخلي و بركن عند الصينيه يايات هلكى ..وفجن الطبق علشان يغرفلهن اكل ..بس عنوده سارت اول شي حجرتها وفصخت عباتها وغسلت ويها ويديها و سارت صوب شبريتها وقبضت دميتها المفضله وعطتها بوسه..وطتها وظهرت برع بتاكل ويا خوياتها..اول ما دشت المطبخ الداخلي انصدمت يوم شافت خواتها ما ترينها هي وحرمة اخوهن...

عنوده: عفاني الله حشمن بعد ..ترانا كلنا ميتات يوع يعني ما فيكن صبر..

فطيم: انا عني ما فيني صبر ابدا والله انا اول ما وصلنا البيت قلتلكن اني ما بتريا حد وسيده باكل وبسير ارقد..

شويخ: وانا بعد كنت ميته يوع...شو اسوي يعني اترياج انتي وحضرة الانسه اسما لين ما تن؟؟؟ اسفه غناتي هالمره انا مافيه صبر...

عنوده: انشالله دوم ما فيكن صبر..

اسما دشت عليهن..: بسم الله عنكن عنبوه يايات هلكى؟؟؟

فطيم: والله احيد يوم نسير السوق وحده تتبرع وتقول بشتريلكم اكل...بس هالمره غدت بخيل و يودت فلوسها بس عشان تشتري لريلها نعال ...

عنوده: هههههههههه وايد اتضحكين...تعالي اسما بنيلس وبناكل..

اسما: امبوني بيلس وباكل..
يلسن ياكلن ويسولفن مع بعض وعقب استأذنت اسما من خوات ريلها بتسير عند ريلها وعيالها .. نشن البنات وسارن الصاله بيتابعن مسلسلهن الكويتي المفضل على قناة الام بي سي ..طاف الوقت وهن ايشوفن المسلسل ومن يت الساعه 4 نشت امهن علشان توعيهم حق السحور...

ام بطي يت صوب الصاله وهي اطالعهن بضيج وفيها غيظ عليهن: سودالله هالوييهات ..شو هالرغده ..عنبوه جان بتن في السوق ..عيب عليكن ابوكن واخوكن يلسوا يتريونكن متى بيتن ...يا غير انا ما يخصني فيكن ابوكن فيه ضيجه عليكن...واباه يهزبكن..انزين اتصلن وقولن بتتاخرن..

فطــــــــيم ام لسانين: والله ها كله من بناتج ما يخلصن من مشتراهن وبعدين شوفيها والله احنا في شهر رمضان والناس متعوده ع السهر..والله واحنا رادين ان العرب توها سايره السوق...

عنوده اطالع اختها بنضره علشان اتلم حلجها...: امايه الغاليه والله ما كان قصدنا بس تاخرنا شوي..وتعرفين انتي الدنيا زحمه وخاصة ايام العيد..وبعدين الدنيا ضباب وكنا نساير والا تبين نطير السياره..

ام بطي: لا ما قلت جيه..ع الاقل يا بنيتيه يوم انتي عندج تلفونج وحرمة اخوج عندها تلفونها جان اتصلتن..وانا اتعرفني حرمة عيوز ما عرف للتلفون.. وانتن كلكن سايرات لو خليتن شويخ..ولا فطيم عندي ماعليه..بس انتن كلكن زريتن..

شويخ: فالج طيب يا امايه انشالله المره اليايه ...

ام بطي: فالج ما يخيب بنت محمد...

عنوده:هههههههه هاذا يوم بتكون فيه مره ثانيه..ماشي سيره ازيد...

فطيم: لا والله؟؟؟ انا ابا اسير باريس جاليري ابا لي شوية روجات وتحاديد ...ابا شي يناسب فستاني اللي بلبسه اول يوم عيد..

ام بطي: شو تبين غناتي؟ وحق شو تموصين شواربج بهالحمر فديتج حلاة الجمال على طبيعته...هب هالخربطان اللي يخرب الويه ويخلي الويه جنه شرات الجرشه...

عنوده واخواتها يضاحكن...

عنوده: اسميج سوالف يامايه لا خليت منج...

ام بطي: فطيم يا بعدي....

فطيم: امري اما يـــــــــــــه..

ام بطي: غناتي سري وعي ابوج علشان ايي يتسحر وياكله لقيمه..

شويخ: مافي داعي توعينه هاذوه حمودج نش..يا حظك يا بويه والله ولك ناس يحاتونك..
تم بو بطي يطالع بناته...: خس الله هالوييهات اللي خليتنا نترياكن...وانا قلبي محروق عليكن ...عنبوه مافيكن خير تتصلن البيت اتخبرنا...

فطيم: ابويه انته تراك عندك تلفون ليش ما اتصلت واطمنت علينا..

بو بطي: جب انتي ام لسانين والله انا لو تبن الصدق ما عرف للتلفون الا زينه قلتلكن مليون مره ما ابا تلفون انتن حشره ...انا يا بناتي ماعرفله هالتلفون..

عنوده: يالله يابويه الله يهديك كم مره بعلمك على التلفون؟؟؟

بوبطي: علمتيني واللي فهمته يوم حد يتصلي اضرب هالفص وبس ...والا الباجي اللي ديلتيني به ما اذكر منه ولا جلمه...

العنود: هههههههههههههه...فديتك الغالي...
نشت العنود واستاذنت بتسير حجرتها... واول ما دشت حجرتها على طول قفلت الباب...وسارت صوب كبتها وظهرت الصندوق اللي تحفظ فيه اشيائها ومذكرتها و فتحته... واول ما ظهرت من صندوقها البني كان الورده اللي كانت اول ذكرى من اغلى الناس (( عبدالله)) و حطتها على شفايفها وهلت دمعتها..بس قالت لازم ما ابكي لازم اكون فرحانه اليوم لاني عرفت اخيرا وين بلقى عبدالله...وطت الورده وظهرت ظهرت ورقة الكلينكس وقرت الكلام..يالله يالدنيا مقساج على بني أدم..خذت العنود دفتر مذكراتها وفتحت الدفتر ويلست تكتب كلام في خاطرها تقوله لعبدالله وكلام يبين حبها لعبدالله وتبين قسوة الزمن اللي فرقهم ..كتبت العنود وكتبت لين ما تعبت وختمت كلامها اللي كاتبتنه بابيات شعريه (( لو تبكي اعيوني الدمع دم... مغرم ان بك حيل مغرم ... لو الثمن بالحب روحي ما اندم انا ع الحب مندم ... صابر على اللي منك ياني مهما تعذبني واعاني ... يفداك كل قاصي وداني.فدوتك قلب بك متيم .... )) اخر شي كتبت التاريخ 26 من رمضان..الساعه 4 و خمسين دقيقه... بندت دفتر مذكراتها وردته في الصندوق..وقبضت القرأن ويلست تقرا علشان تختم القران هالسنه مثل كل سنه..


عبدالله رد البلاد لانه خلص دورته ورد وهو متوله على ثلاثة اشياء ، بلاده الامارات وامه ، وحبيبته اللي دوم طيفها في باله...المهم عبدالله عرف من عذيجه احلى اخبار وهي انها التقت بالعنود وكل وحده تعرفت على الثانيه وكل وحده تتصل للثانيه واخيرا بيتحقق حلم عبدالله...

في يوم العيد نشت عنوده الصبح وصلت الفير وطلعت برع بتسير اطالع امها وحرمة اخوها بتساعدهن..مع انها هي واخواتها وحرمة اخوهن مرتبات الميلس حق الناس اللي بتي اتسلم عليهم في العيد...بس بعد بتشوف اذا هناك شي ناقص.. بس الحمدالله ماكانن يبن شي ..وظهرت المدخن اليديد اللي اشترته من محل أدم وحواء وعطته البشكاره علشان اتحط اليمر فيه وادخن البيت...

تعدلت عنوده ولبست فستانها الوردي وكانت مثل الغزال.. فاجه شعرها الطويل الكستنائي اللي واصل دون ركبها ومتجحله وما حطت روج قالت بسير اسلم على بويه واخواني ما فيه ايحشروني يوم ايشوفوني صابغه شفايفيه..
المهم حطت دهن عود وظهرت بتسلم على ابوها وامها واخوانها...ظهرت للصاله ولقت ابوها وسارت اتسلم عليه..
عنوده : امباركن عيدك بويه...( وحبته على خشمه وراسه)

بو بطي: وانتي من العايدين والسالمين بنتي عيل وين خواتج زقريهن بسرعه بسلم عليهن وبعايدهن قبل اسير اسلم على عربانا..

عنوده : والله يا بويه..........( وقطع كلامه دخول اخوها بطي وياه ولد عمها سعيد وانصدمت وربعت حجرتها ..وهيه متلومه ..الله يغربل هالحاله شو يايبنه هاذا من صباح الله خير جان يسلم على هله قبل ايينا...اكيد الحين بطي بييني وبيحتشر عليه.. وهيه اترمس نفسها حدر عليها بطي..

بطي: انتي ليش يايه الصاله وانتي بلا لحاف جان لبستي شيلتج؟؟؟ وبعدين ليش فاجه شعرج شو هالمذهب الماصخ؟؟؟
عنوده اول شي سارت اتسلم على اخوها وحبته: امباركن عيدك الغالي..اسمحلي والله حبيبي ما ادري انك بتييب حد من عيال عمي وياك...ما احيد حد من عيال عمي ايي يعايدنا من صباح الله خير ...

بطي شوي انفردت اسارير ويهه من رد اخته: وانتي من عوادته..المهم لبسي شيتج ولفي شعرج وزقري اخواتج وتعالن سلمن على ولد عمكن.. تراه سعيد يترياكن..

سارت عنوده وزقرت اخواتها وتلحفن عدل وسلمن على سعيد بس سعيد طول الوقت عينه كانت على العنود..اول مره سعيد يشوف العنود عقب مارد من فرنسا ...والحين عقب غربه دامت سنين وسنين رد سعيد وكانت اول مره يشوف العنود من بعد يوم كانوا صغار..
عنوده سلمت على سعيد وبسرعه ردت داخل من شافت عيونه زايغه جيه..تمت اتقول في خاطرها اللله يستر من سعيدان ...
دشت فطيم عليها: هاه عنود شفتي سعود شقا كان يطالعج؟؟ يا عيني سحرتيه ...انشالله بس يخطبج وتعرسين ويستوي عندنا عرس...الله بكون فرحانه ...بحتل غرفتج عقب ما تعرسين..

عنوده وهي متضيجه: اتهبين هبيتي انتي وسعيدان انشالله ياخذج انتي ..لو على قص ارقبتيه ما خذته يالله انجلعي عني ..

فطيم: بسم الله الرحمن الرحيم ..شو قلت انا.. حرام عليج اليوم العيد استانسي وفرفشي مب اتمين مبوزمه جنج غادية جليب الدو..

عنوده: جليب الدو في عينج ..خذيه انتي انا ما اباه ..قصوري بعد اخذه هالشيفه...

فطيم: والله اني اباه لو هو يباني بس نظراته كلها صوبج..والا انا اصلا اتمناه..

عنوده ارتاحت اشوي: زين غناتي لو انتي تبينه تقدرين تخلينه يلتفت صوبج وتستميلينه..يالله راوينا شطارتج وفكيني منه...

فطيم: ما طلبتي حبوبه من عيوني بسوي اللي ما يستوي..لازم اخليه يحس بوجودي...انزين اخبرج خلينا انسير بنوايج على الرياييل وبنشوفهم من خبق الباب...قومي فديتج..

عنوده: الله يغربل عدوج اكيد حد بيزخنا ..لو يلسنا نوايج..

فطيم:لا انشالله اصلا ما حد في البيت الرياييل ساروا كلهم ايسلمون..وامايه واسما في الميلس يقربن باللي ايي يعايدنا...

عنوده: يالله عيل ويهنا...

سارن عنوده وفطيم ايوايجن من فتحة الباب علشان ايشوفن اللي ساير واللي ياي من شباب شعبيتهم...ويتهن شويخ من وراهن بتزيغهن...

شويخ وهي تمشي بشوي شوي: بوووووووووووووووو...

فزن البنات وردت عنوده على ورى ولطمت فطيم على ويهها وهي ما تدري...
تمت شويخ تضحك عليهن وهن يدعن عليها ..

فطيم: الله يعدمج عنبوج زاد فلختيبنا ..الله يخسج يا هادمة اللذات ..خلينا نطمش ع الغزلان..

شويخ: زين جان زقرتني..

عنوده : اطمشن ارواحكن انا بسير ارمس اربيعتي...
سارت العنود ومسكت تلفونها واتصلت لعذيجه..تبا تعايدها. اتصلت وما حد رد عليها في البدايه وعقب شلت التلفون الخدامه ..

العنود: الو السلام عليكم..

الخدامه: واليكم سلاما ماما..

استغربت العنود وقالت يمنك مغلطه : اقول هاذا تلفون مال عذيجه ؟

الخدامه: هي ماماه صبر شوي انا بيزقر حقها هي في داخل مجلس الحين..

بينما كانت الخدامه ترمس العنود دش عبدالله بيغير ثيابه علشان بيسيرون هوه وخوانه يسلمون ع الشيوخ..وشاف الخدامه ميوده تلفون اخته وتخبرها: امينه.منو تكلمين؟؟

الخدامه: هاذا فريند مال ماما عذيجه..

عبدالله : هاتي التلفون بشوف..

العنود تسمع الرمسه بين الخدامه وريال ما تعرفه بس اول انسان يا في بالها انه يكون عبدالله..

عبدالله شل التلفون عن الخدامه: الوو..

العنود وهي مرتبكه: الو...السلام عليكم...

عبدالله حس ان هالصوت يحرك في شحون.: هلا اختي وعليكم السلام..

العنود: والله اخوي بغيت عذيجه..

عبدالله تم ساكت وو يسمع حس العنود..اكيد هاي العنود ما حد غيرها له هالنبره غيرها نبرتها كانت شجيه

العنود: الووو...

عبدالله انتبه للعنود انها ترمسه وقالها: اسمحيلي اختي ..والله عذيجه الحين في الميلس ويا بنات خالها واخواها بخلها تتصلج..منو اقولها؟؟

العنود: ما عليه انا بتصللها بعدين...سلم عليها وبارك الها بالعيد...

عبدالله ما يعرف اشياه: اقول........

العنود: نعم..

عبدالله وبكل رقه :انتي العنود صح؟؟

العنود صخت واحمر ويهها:.........

عبدالله: خيلج ما تسكتين وجاوبيني..

العنود: سلم على اختك..وفي امان..

قاطعها عبدالله بل اتكمل: العنود لا تحرميني منج ..اليوم عيد ...حرام عليج والله اني متعذب لا تسوين فيني جذيه..

العنود: ...............

عبدالله: انزين رمسي ..حتى مباركن عيدك ما قلتيلي..

العنود...م...بااا..رك...ان...عيدك...((العنود كانت ميته من المستحى وبسرعه سكرت التلفون في ويهه))

عبدالله برايج مادام سكرتي في ويهي والله عاذرنج ادري انج حشيم عن طبع المدانيس..فديت الرب اللي خلقها..ويلس ايدور رقمها في تلفون اخته وحصله ..وسيفه عنده في الموبايل ..هوه واعد عمره وحلف يمين ما يتصل الها ...ولا يطرش الها مسجات ولا شي...هوه يباها على سنة الله ورسوله..سار صوب اخته وزقرها من برع الميلس...

عبدالله: عذيجه..............عذيجه..

عذيجه ظهرت من الميلس : هاه الغالي امر فديت روحك...

عبدالله وهوه فرحان: غناتي ربيعتج اتصلتلج اندوج تلفونج اتصليلها...بسرعه تراها اترياج..

عذيجه وهي مستغربه: وانته شدراك؟؟؟ ما احيدك اتجييك تلفوني ...

عبدالله: لا والله هي اتصلت والبشكاره ردت عليها..وانا يوم شفت امينه ترمس في التلفون اتحسبتها تتصل لاهلها والا لحد ثاني بس يوم خذت التلفون ظهرت ربيعتج صدق..

عذيجه خلني بجييك منو متصل...ويوم طالعت وين المكالمات المستلمه لقت ان العنود اتصلتلها...: فديتها هاذي العنود..عبدالله هاذي العنود..تعال تعال بنسير نتصلبها...

يودت عبدالله وعبدالله كان قلبه يدق بقو..اخاف لا العنود تخبر عذيجه..والله ما ابا العنود اطيح من عين اختي لانها هي الوحيده القادره انها توفق من بينا..


*********************************************

**الجزء الخامس**


دشت الصاله واتصلت لعنوده وعنوده كانت يالسه جدام تلفونها واول ما رن موبايلها اتنافضت قالت ما برد يمكن عبدالله ..لا لا يمكن هوه خبر اخته اني انا متصله ..وهي يت تتصللي ..اخافه خبرها اني رمسته ..يا ويلي يا سواد ويهي جدامها..لا لا عبدالله ما احس انه راعي هالسوالف..
ردت العنود على اتصال عذيجه..

عذيجه تبا تسبق العنود: مباركن عيدج وكل عام وانتي بخير.......ههههههههههه غلبتج

العنود: مرحبا الساع اكبار ....مرحبا الساع ملايين ولا يسدن وانتي من عوادته الغاليه ..غلبتيني هالمره بس المره الياييه انا اللي بغلبج...

عذيجه: مرحبتين فيج والله...حي هالصوت الغاوي..والله صوتج خطير بعد...

عنوده: هههههههههههه عن المجامله لا خطير ولا شي...خلي عنج لا تسويلي مسكه باليس...اتريا العيديه تراني ..

عذيجه: من عيوني والله الغاليه واحلى عيديه بعد...

عبدالله عدالها يهمس لها...:خليني بسمع شويه..فديتج..

عذيجه تأشر له بيديها على انه يصبر..بس عبدالله تم يتحرقص جنه على نار ... مره يغير يلسته ومره يحط اذنه على سماعة موبايل عذيجه ومره اير اخته علشان يسمع عدل صوتها يعني اللي يشوفه ايقول جنه ياهل ...بس اخته عذيجه ضربته على راسه وقالت بصوت عالي علشان تسمعه للعنود: عبدالله يلس عاد شوفيك...حشى اول مره اشوفك عندي يالله فارج...

العنود: عذيجه اذا مشغوله بخليج ...

عذيجه: لا والله ما تسكرين مب مشغوله بس هاليني عندي مب مخلني في حالي..

عبدالله من الصوب الثاني : الله واكبر عليج انا مب مخلنج في حالج؟؟؟ خلاص ماشي سيره دبي يوم الجمعه..سيري خلي أي واحد من خوانج يوديج...

عذيجه: غناتي العنود انا انشالله بييج دبي بسلم عليج وبعايدج وبييب لج عيديه..

العنود وهي مب مصدقه: لا والله صدق بتين دبي ...رمسي صدق ..والله جان ييتي دبي رفجه عليج تزورينا ..والله بترياج خلي اخوج اييبج..

عذيجه وهي تضحك ومستانسه مب مصدقه ان عنوده خذت رمستها على محمل الج: لا فديتج اسولف وياج بس وإلا احنا ما يخلونا هلنا بعد تراها الكلمه المعتاده عندنا بعد((منقـــــــــــود))..

عنوده:هههههههههههه حتى انتو ..واحنا الحال نفس الشي...عيل كيف بنتلاقى ...
عذيجه: اقول عنوده صبري شوي بظهر هالصخل برع...
عبدالله: يالسباله انا صخل وتقولين جدامها بعد...وهو يحط ايده عند لحيته ماعليه يالزطيه اللي يعاطيج ويه...

عذيجه:ههههههههههههه يالله يالله فارج ولا ما ........

عبدالله ايأشر الها تسكت عشان ما تحس عنوده بشي..
ظهر عبدالله وسار يبدل اثيابه عشان يطلع...عذيجه عقب ما طلع سكرت الباب وردت اتكلم عنوده وتمن سوالف تقريبا نص ساعه وعقب سكرت عنوده عنها علشان بنات عمها ين بيسلمن عليها...

خلص العيد وردن الجامعه علشان ايكملن دراستهن ويستعدن لامتحانات منتصف الفصل والعلاقه بين العنود وعذيجه تقوى يوم ورى يوم.. في يوم من الايام عذيجه اعترفت لعنوده ان اخوها عبدالله متخبل عليها من اول ما شافها وانه يفكر فيها لين الحين ...وانه يباها على سنة الله ورسوله بس كانت هناك مشكلة صغيره وهي كيف عنوده بتقنع اهلها وكيف عبدالله بيقنع اهله وامه بانه ما يبا حد من هله ...

..وطبعا عنوده ما تخبي شي على مريوم اقرب الناس الها وكانت مريوم هي دوا المعتاق بالنسبه للعنود ..كاتمة اسرارها.

.وعقب ما خلصن اخر امتحان لهن اتصلن لعويش وتخبرنها وين هي ،، كانن مقررات يسيرن يتحوطن اشوي في مركز صحارى ويتغدن هناك..وطبعا الكل بيتوادع لانه الجامعه بتبند...

عويش : هلا مريوم شو فيج؟؟؟
مريوم: عويش يالله بنسير صحارى بنتغدى هناك اليوم اخر يوم ..

عويش : من عيوني بس وين عنوده؟؟انا مب سايره اذا عنوده ما سارت...

مريوم: ويا ويهج يعني انا ما اسدج...المهم عنوده بتي ويانا لانها هي اللي طلبت مني هالشي...

عويش : لا ما تسديني ........هههههه خلاص عاد ميمي لا تزعلين ....والله انج ع العين وع الراس..انزين اخبركن انتن وين؟؟؟
مريوم: احنا في bulding N

عويش : خلاص تعالن عند البوابه A انا بترياكن في سيارتيه..

مريوم: اوكيه يالله باي بنتنقب ويايينج...

عويش: اوكي باي

مريوم وهي متشققه من الفرح: يالله يالله بتودينا عويشات قومي بنسير الحمام ...

عنوده: حشا يا مريوم اللي يقول جنج من زمان ما طلعتي..

مريوم: يالله لا تتخبرين الصراحه مر عليه العيد والعرب كله تينا ولا رمنا نظهر من البيت...وانتي ما احيدج تظهرين ؟؟؟يالله بنسير خلينا نستانس..ونجحل اعيونا بشوفة الغزلان.......

عنوده : تبين الصراحه انا والله بعد في خاطريه الحواطه ...

مريوم: يالله عيل تراها عويش تتريانا في سيارتها...انقفضي ما فينا تسير عنا...ادريبها ما عندها طقّــــــــــــه...

عنوده: اصبري بجحل اعيوناتي تدرين بي ما اداني اسير جلحا ملحا...

اتجحلت عنوده وظهرن بسرعه واتذكرن ايحطن شنطهن مالة الكمبيوتر في اللوكر...وسيده ع البوابه وطلعن ...ركبت عنوده جدام ومريوم ورى العنود...

عويش: ليش ابطيتن حظراتكن؟؟؟ الدريول مالكن انا ؟؟؟ يالله حبيباتي قرقعن مخابيكن...وحده تمزرلي السياره بترول واباه التانكي فوووول...والثانيه عليها الغدا تسمعن..؟؟؟؟

عنوده وهي مبطله عيونها: حشى مذله تراج عتيش؟؟؟ يالله والا تراني بدعي عليج بريال عور واصلع وما يسر الخانه....

عويش : اهبي هبيتي والله ...عوذ بالله منج يالساحره انتي ...يعني ما بتدفعن؟؟؟

مريوم : بندفع بس ع البترول والا الغدا الصراحه انا عني مب شاله الا خمس واربعين في بوكي...

عنوده: ما يهمج يا مريوم وانتي يا بنت حسن تراه كله عليه...

مريوم : لا البترول انا بدفعه والغدا انتي دفعيه عنوده..اوكيه..

عويش: توكن حريم وتعيبني... هيه جيه اباكن...

عنوده: زين سوقي انتي واتقفي تراني جدام اخاف اكون الضحيه..

عويش: شو تتحريني دريول جوله؟؟؟ والله ان سواقتي فنانه ...
مريوم: اخبرج عويش سوقي ولا ترمسين...

يلست عنوده ادور شرايط ولقت شريط منوعات ...وحطته في المسجل ..وفي هاذيج اللحظه زودت عويش على السرعه... ارتبشت من الاغنيه وكانن حاطات اغنية(( حافظ عليك ويعل ربي يخليك...اتميز لعدلك..ولا تحيد عنها..عديم من مثلك..ومن هو شراويك..يامن تعلى بالشوامخ سكنها))

عنوده ومريوم مرتبشات ...وعويش اتدق بيديها على السكان مال السياره...وكان الجو رهيب والدنيا ممطوره والرعود اتذن.. وخطفت عدالهن سيارة رنج من اليداد اسود وعليه عاكس..وكان فيها شلة شباب ومنزلين درايشهم ويسايرون عدالهم ...وعلى طول عويش طولت على صوت الاغنيه مرتبشه ومتخبله عليهم... وزادت من السرعه وهم يبارونهن...ويوم يقتربون منهن عويش اتزيد من سرعة السياره وهم بعد ويسوون حركات ...
والعنود امبونها متحرطمه على عويش وحركاتها بس بعدين طوفت وقالت يالله الا اليوم ..وهاي اخر ايامنا في الدراسه وعقب اجازة الربيع يالله خلنا نرفه عن نفوسنا شوي.. ومريوم من ورى مرتبشه...شوي الا وينطر بهن تاير السياره ويالله يالله لين ما قدرت عويش تتحكم فيها..وعنود ومريوم شالنهن الخوف شل ..ومريوم اتقول بتنجلب بنا السياره...!!! يالله تسلمنا..
العنود من الصدمه تمت اتباغم...والحمدالله سيطرت عويش على السياره ووقفت...بس الشباب ما دروبهن ..ووقفت وراهن سيارة ..وياهن الريال يربع...
وفجت عويش الباب..وحولت وهيه تتنافظ...

خالد: سلاماات اختي سلااامات..ما تشوفن شر ...عسى بس ما حد صابه شي...

عويش: لا والله يا خويه ما حد صابه شي..والله يسلمك اسمحلي تراني من الخوف قمت اخبص بالرمسه..

خالد: ما عليج اختي الحمدالله قدرتي اتسيطرين على السياره...خلني ببدللكن التاير...

عويش: بس انا ما عندي سبير...

خالد: ولا يهمج انا عندي في دبة السياره...

عويش: مشكور اخوي بنعبل عليك..

خالد: افا اختي اذا احنا عيال البلاد ما نخدم بلادنا وهلها عيل منو بنخدم؟؟؟

عويش: طال عمرك...يعلك ذخر انشالله وليت الشباب كلهم مثلك..

عنوده نزلت من السياره وهي بعدها خايفه...اما مريوم بعدها تصيح في السياره ...وكانت عاقه النقاب...وفجت عنوده الباب الوراني ويلست وياها..

عنوده: يالله مريوم الحمدالله ما صار شي احمدي ربج انه سلمنا...

مريوم وهي تصيح: اه يا عنود ما تعرفين قد خوفي من الحوادث ما اداني السرعه الله يهديها عويش مصممه تسرع..

عنوده: فديتج لا ترمسين جيه جدام عويش واللي صار مقدر ومكتوب...((قل لن يصيبنا الا ما كتب الله لنا)) ما تامنين بربج..

مريوم: استغفر الله..ولا اله الا الله..شو تسوي عويش برع ؟؟ ومنو هالريال؟؟؟

عنوده: والله مخاوي شما....يبدل النا التاير الخربان...

مريوم: الله ييزيه خير...انا ابا ارد الجامعه مب سايره صحاري عله الخيبه اللي تخيبه من مركز...
وتضحك عنوده من خاطرها على كلام مريوم: هههههههههههههههه تراج اتصيحين الحواطه...يالله بنسير ويالله بنسير...

مريوم: تطنزين عليه يالباهسه...اسميج تتشمتين فيه...

عنوده وهي تحضن مريوم : لا فديتج بس ابغي الطف الجو...ما اباج تحسسين عويش بشي ولا تعاتبينها ادري انها روحها مضيجه من عمرها ...وهيه اكيد تلوم عمرها ع اللي استوى اليوم...

مريوم: لا اطمني من هالناحيه ما بقولها ولا كلمه...

ونزلن من السياره وخالد ايركب التاير...ويعق التاير المنطر...

عويش: مشكور اخوي والله تعبناك ويانا..

خالد: افا يا ختيه...ما يطيع زينج انتن خواتي...واجب عليه اساعدكن..

عويش والبنات شكرنه وادعله بالخير..ركبن السياره وعويش ساكته كانت بترد الجامعه بس عنوده ما خلتها ..

عنوده: عويش ما عليه منج انا قايله بغديكن ليش تبين تردينا الجامعه..؟؟ ما يخصني سيريبنا صحارى يالله...

مريوم وهي غاصبه على عمرها : عويش يالله خلينا نسير ما نبا يخطف الوقت على الفاضي دخيلج..

عويش: يعني بعدكن مصرات...((كانت متلومه منهن)) اسمحلي يا خواتي..

قاطعتها عنوده: انسي عويش...

المهم سارن مركز صحارى وتغدن ودشن ايشوفن فيلم هندي يديد في السينما..ردن الجامعه تقريبا الساعه 4 وكل وحده ودعت الثانيه على امل انهن يتلاقن الكورس الياي... ردت عنوده ويا خواتها البيت..واول ما وصلت ودشت حجرتها حطت راسها ورقدت.

الجزء السادس



ابتدت اجازتهن وطبعا في هاي الاجازه قرروا يسيرون العمره..ويتمون هناك اسبوعين وسار بطي ريل اسما يحجز الهم تذاكر...وحجز الهم على طيارة يوم الخميس وبيسيرون في البدايه المدينه...وطبعا بيكون وياهم في هاي الرحله المشؤومه في نظر عنوده سعيد ولد عمها ...واول ما عرفت ان سعيد بيسير وياهم ما بغت اتسير مع العلم ان سعيد كان يسوي المستحيل عشان عنوده تلتفت له ولو بنظره بس عنوده كان قلبها مشغول بحب عبدالله عشان جيه ما تبا سعيد ولا تفكر فيه من الاصل..

قبل السفر باربع ايام وصلها مسج من عند عذيجه(( اطيب من الطيب....واصل الطيب من طيبك...مابك عذاريب...ولا عاش منهو يعيبك)).. قامت العنود واتصلت لعذيجه ..

العنود: الو السلام عليكم..

عذيجه: مرحبا الساع وعليكم السلام...هلا والله هلا بهل دبي...

العنود: هلا بعذيجه..اشحالج الغاليه عساج بخير .؟؟ والله تولهت عليج بس ما رمت اتصلج الا لين ما خلصنا امتحانات قلت اكيد بتكون هيه بعد مشغوله بامتحاناتها...

عذيجه: فديتج والله ..امس كان اخر امتحان لي...والحمدالله الامتحانات هالفصل كانت سهله وايد...بس انشالله هالدكاتره يحطولنا a او b...

العنود: انشالله يا رب الله يسمع منج...وعلومج بعد ما بتسافرون مكان ؟؟؟

عذيجه: قبل لا اخبرج حبيت اقولج في ناس دوم يتخبرون عنج ...

العنود احمر ويهها وما عرفت شو تقول وعلى جذيه تمت ساكته..

عذيجه : عنودتي حبيبتي والله ما اقولج هالكلام الا عشان تحسين بحال اخويه ...

العنود:وهي تتنهد: اااااااااااااااااه يا عذيجه والله اني احبه من خاطري اقول هالكلمه...ولا ابدل في البشر غيره...والله انه يستاهل كل حب الدنيا ...
عذيجه: حاولي تحسسينه بهالشي ما دامج تحبينه خلي الحب ايكون من طرفين.. لازم كل واحد منكم ...

العنود: شوه يا عذيجه...

عذيجه: لا تفهميني غلط عنودتي والله انج اغلى من الغلا نفسه..وما ارضى لج اي شي يمس سمعتج بشي بس انا اقول ما دام اخويه يحبج ويباج على سنة الله ورسوله فليش ما تصارحينه بحبج...

العنود: ما ادري انا بفكر في هالموضوع يوم بسير السعوديه..

وهني عذيجه قاطعت رمسة عنوده: شووووووووووووه تقولين وليش ما خبرتيني حظرتج؟؟؟؟

العنود: والله مسويتلج علشان هالشي بغيت اسلم عليج قبل انسافر..

عذيجه بكل لهفه: ومتى بتسافرون؟؟متى؟؟

العنود وهي مستغربه: يوم الخميس بسم الله الرحمن الرحيم شو ياج عذيجه بلاج؟؟؟

عذيجه: حبيبتي بسكر عنج الحين بس برد اتصلج انشالله جريب..واتاكدي اني بسوي المستحيل علشان اجمعكم..

العنود: انشالله يارب..
سكرت عذيجه عن العنود وردت شلت السماعه علشان تتصل حق اخوها عبدالله...اتصلت وماشل التلفون واتصلت له مره ثانيه ونفس الشي مارد عليها وقالت خلني اسمي باسم الله وبتصل له في المره الاخيره وبشوف ايرد ولا لا ..اخاف يكون ويا ربعه وانا مأذيتنه..بس برايه هالشي اللي بسويه بيكون لصالحه...اتصلت له للمره الاخيره وشل التلفون...

عذيجه: الو السلام عليكم..

عبدالله : هلا وعليكم السلام ..خير شو فيج ؟؟حصلكم شي؟؟؟

عذيجه:لا الغالي بس بغيت اطلبك طلبه؟؟

عبدالله: وهاي الطلبه ما ترومين تتريين بها لين ما ارد البيت لازم تتصلين لي وانا عند ربعي...

عذيجه: عبدالله سمعني ولا تحشرني..اقولك انا ابا اسافر السعوديه ولازم تي تقنع امايه انسير السعوديه ولازم جريب على طيارة الخميس...فهمت

عبدالله: حووه حووه صبري عنبوه بالعه راديو انتي...وليش يعني لازم انسير السعوديه شو الامر الملح نازل عليج الوحي؟؟؟

عذيجه: اقولك لازم نسافر يعني لازم نسافر...تسمعني ويالله رد البيت الحين علشان نقنع امايه...

عبدالله : ليش عاد..امس رادين من استراليا ما واحالنا الا كمن شهر..

عذيجه: ياربي منك اقولك تعال انته...

عبدالله : اقولج ماشي سفره...ويالله سكري الحين بسير ايلس عند ربعي...

عذيجه: انزين عبيدان هب تيني بعدين وتقولي اتصلي لعنوده تراها بتسافر ...والحين يالله باي...

عبدالله رد عليها بسرعه: عذووج صبري لا تسكرين..قولي والله بتسافر ..وين بتسافر؟؟خبريني شو بلاها؟؟؟عسى ما فيها شي؟؟الله يغربل عدوج طاح قلبي..

عذيجه: عبدالله بلاك مخترش انته؟؟؟اقولك قوم عنوده بيسيرون العمره وانا بغيت اجمعكم رباعه...وجانك ما تبا برايك...

عبدالله: الحين ياي وبقنع العيوز...ترييني زين؟؟

عذيجه: زين بس انته افتح الموضوع بسياسه ويا العيوز اخافها اتقول لا...

عبدالله: ما بتقول دام السالفه فيها العمره هي بتسير بيت الله ..يعني ليش تعترض؟؟

عذيجه: انزين انزين انته لاتبطي...

نص ساعه الا وعبدالله داخل البيت...سار الصاله وسلم على امه ...وحبها على راسها...

عبدالله: سلامي عليج الغاليه...يا غناة عبادي والله..

ام عبدالله: وايه مرحبتين بالغالي ...وايه فديتك متى ييت ما شفت سيارتك جدام واقفه؟؟؟

عبدالله: لا سيده وديتها صوب الكراجات اللي ورى ..

ام عبدالله:فديتك والله علني ما اخلى من ريحتك...

عبدالله حضن امه وحط خشمه عند رقبتها..ويلس ايشمها ...:اااااااااه ياامايه محلاة ريحتج..

ام عبدالله: امر غناتي...بس لا تدلع...

عبدالله رد وحد راسه على ريولها: امايه ابا اسير وياج العمره فديتج ما تردين طلبيه..ابا اسير اعمر...

ام عبدالله وهي مستانسه: وايه فديتك وفديت ابو يابك..انا روحي بغيت اقولك انه في خاطريه اسير بيت الله...

عبدالله وهو فرحان: فديتج حبيبي...

وتدخل عليهم عذيجه : خير شو السالفه جنه عندكم اجتماع مغلق؟((طبعا مسويه عمرها بريئه وما تعرف السالفه))..

ام عبدالله: لا اجتماع مغلق ولا غيره...اخوج يبانا نسير العمره...شو رايج؟؟

عبدالله وهو يغمز لعذيجه: شو رايج؟؟؟

عذيجه مسويه عمرها اونها مندهشه وفرحانه: قولوا والله؟؟؟الله اكيد ابا اسير اليوم قبل باجر..تقولولي سفره واقولكم لا؟؟ معقوووله ..الا انا وحده بتلقوني مرتزه قبلكم في المطار..هههههههههههه

عبدالله: اهبي هبيتي ثرها تباها من الله السفره..انزين لا تخبرين خواتج لين ما احجز..انشالله باجر بطالع جان بنلقا حجز على طيارة الخميس..

ام عبدالله: وين تبا اصبر لين ما تخبر خالتك شيخه جان بتسير ويانا هيه وبناتها..

عبدالله هني ايعفس ويهه: لا اله الا الله انتي لازم كل مره تودينا ويا خالتي شيخه وبناتها؟؟؟

ام عبدالله: يا وليدي كل ما اطريلك خالتك شيخه تغديلي جيه..يا ولديه انا ابالك بنت خالتك منا وفينا ....

عبدالله: امايه فديت خشمج ما ابا حد من هلي موول ..وهالشي أأكدلج اياه ويوم بعرس روحي بختار البنت اللي اباها تكون شريكتي..

ام عبدالله وهيه متضيجه: اتهبي انته ما بتيمعلي غير هاللوث..البنات لحشام واللي من هلك ومنك فيك ما تباهن بتربع للمرغد..

عبدالله: امايه لا اله الا الله ...دخيل والديج لا تفتحين لي هالسالفه..نفسيتي تعبت..

ام عبدالله: شوف عبود جانك ما بتاخذ بنت خالتك مره ما برضى عليك..

عذيجه: امايه فديتج هدي اعصابج وبعدين هاي حياته وهو اللي بيعيش مع البنت..

عبدالله: اايه الحين لا تيبيلي هالطاري خلينا نسافر العمره وبعدين بيصير خير..

ام عبدالله: خلاص عيل ..


بالباجر سار عبدالله بيحجز بس في البدايه لقاه فوول وماشي مقاعد وقالوا له في طياره يوم الاثنين الياي..هو رفض وحاول وياهم علشان يطالعون له حجز على يوم الخميس...وبعدين عقب كمن ساعه يلسها عبدالله في مكتب السفريات وعقب محاب اخشوم لقالهم حجز يوم الخميس على نفس الطياره..وعلى طول سار واكد الحجز واتصل لامه وخواته علشان يتجهزون لانه باجر السفر بيكون...وسار هو يشتري له احرام وشوية اغراض...

في يوم السفر طبعا عبدالله وعايلته يو دبي علشان بيسافرون من مطار دبي الدولي...والرحله بتقلع الساعه 6 اامغرب..علشان جيه يو قبل الوقت بساعتين علشان الشنط...في المطار عبدالله يلتفت يمين ويسار يدور...ويدور ويدور....عاد منو يدور؟؟؟ يدور الحمامه الراعبيه اللي شلت فواده ولا ردته...

من الصوب الثاني عنوده كانت متحنيه هي وخواتها واختها فطيم اتخبرها اذا بتحط جحال
فطيم: عنوده بتحطين جحال في عيونج؟؟

عنوده: هيه بس خفيف احنا بنسير اول المدينه ما بنسير مكه علشان جيه عادي بحط..

فطيم تسمع هرن سيارة اخوها : يالله عنوده انقفظي بياكلولنا فوادنا...

عنوده: زين زين...يالله نطلع..شليتي كل شي؟؟؟ما نسيتي شي؟؟اتذكري ما بنرد..

فطيم: ياهاي اسأله مليون مره سألتيني..خلاص يا ماما ما نسيت شي...انسير يالله..

ظهرن اخر ثنتين من البيت وركبن السياره ويا امهن وابوهن واخوهن وحرمته وعيالهم...وطبعا سعيد في سيارته ويا حميد اخو عنوده...وصلوا المطار الساعه 4وربع...ويوم وصلوا وحولوا يا سعيد بيسلم على عمته وعمه وبطي والكل...واول ماشاف العنود عرفها من عيونها...سلم عليها وهوما نزل عيونه عنها...بس فطيم اتجربت منه شوي وهيه عيونها في عيونه...

فطيم بصوت واطي: سلام عليك ولد عمي ..شو مالنا رب احنا وياهالويه...والا مب مازرين عيونك؟؟

سعيد مرتبك ويضحك ما تعود على حركات فطيم لانه ما يعرفها عدل: وعليكم السلام اسمحيلي غناتي ...

فطيم: لا مابسمحلك شو بتسوي؟؟؟انا اباك ترضيني(( واتجربت منه شوي بعد)) شو رضوتي انا زعلااااااانه...

سعيد وهو مرتبك: ما ادري انتي طلبي وانا بلبيلج اللي تبينه...كله ولا زعلج عاد انتي وايد تتدلعين..

فطيم بدلع: انسير داخل المطار اخاف الطياره اتطير وانته هني متفيزر واونك بتراضيني...

ودخلوا المطار بس لين الحين ما تلافت عنوده ويا عذيجه لانها اصلا عذيجه ما خبرت عنوده انهم بيسيرون حبت اتسويلها مفاجأه ... وطاف الوقت ويا موعد اقلاع الرحله وكانت عايلة عبدالله من اوائل الناس اللي ركبوا الطياره...وكانت مقاعدهم في مقدمة الطياره ..كان هوه عدال الدريشه والكرسي اللي عداله فاضي وامه وخواته كانن في الكراسي اللي في النص بس كانوا في نفس السطر...ويلس عبدالله يتريا وبشوف في الركاب لين ما شاف اخر شي بطي اخو عنوده وعرفه لانه كان شايفنه قبل...وعقب اشوي كمن ريال واخر شي البنات ...شاف عنوده ..شافها كانت قبل اخر بنت...شافها وفز فواده..هيه ما كانت منتبهه له لانها تطالع تحت ...وخطفت عداله وماشافته..وتمت عينه معلقه عليها لين ما خطفت وساروا ويلسوا على كراسيهم...وكانت هيه عدال الدريشه بعد ووياها اختها..

شويخ: عنوده والله شفتلج ريال تم يطالعج ..ما خوز عينه عنج..حشا...

عنوده وهي مستغربه: وين شفتيه ؟

شويخ: هنيه في الطياره راكب جدام...بس الصراحه غااااااوي بشكل...اووف هب حلاه عليه...بغيته يصد صوبي بس ما صد للاسف..

عنوده:ههههههههههه عنبوج يانتي ...حاسده الفقير موتة الجمعه...

شويخ: امحق...

عنوده: سكتي الطياره امتزرت ماشالله وايدين اللي بيسافرون عمرة الربيع...يا سلااام والله ربشه...ليتني خبرت حد من ربيعاتي انهن يسافرن ويانا..

شويخ: ويالله عيل ربيعاتج تحت شورج....

عنوده: لا ما قلت جيه بس انسوي شوية ترتوب وياهن...علشان نتلاقى والله حلو جيه..

بعد ما كملوا نص ساعه ...انطفت انوار الطياره والطيار يلس ايقول ارشادات السلامه ويقولهم انهم يربطون احزمة الامان...شوي الا وابتدت الطياره بالمشي على المدرج وابتدت تسرع لين ما ارتفعت وحلقت في الجو..
شويخ: يالله فديت دبي ما حلاها يا عرب

عنوده: محلاج ما غلاج ما اجملج يا داري...

شويخ: استغفر الله سايره اتعمرين حجيه ..استغفري ربج ..

عنوده: استغفر الله العظيم من كل ذنب عظيم..بس فديت داري يا ناس فديت عربي اللي خليتهم هني ...اااااااه
((هني عنوده يلست اتفكر بعبدالله ..اه يا ليتني اعرف رقمه جان طرشتله مسج من غير ما يعرف رقمي...))

وبعد اشوي اضيئت الانوار في الطياره ورمست المضيفه في الميكرفون انه بامكانهم يفتحون الاحزمه...وفي هاي اللحظه عبدالله فز من محله يبا يسير ايشوف عنوده بس متذرع انه بيسير الحمام...سار شوي شوي وهو يتهادى بمشيته في الممر بين الكراسي...وشاف عنوده وهيه ما كانت منبهه له من بعيد..وكانت في هاي اللحظه تفج نقابها ويالسهه تتحجب..واول ماشافها فز قلبه..تم واقف اشويه قبل يوصل عدال كرسيها..في هاييج اللحظه شويخ شافته..

شويخ: عنوده عنوده..شوفي هاذوه الريال اللي كان ايطالعج امساعه..شوفي اشقى مسنتر ايطالعج...

عنوده رفعت راسها وشهقت من الصدمه: تمت اتطالعه مب مصدقه في حلم والا علم..ابتسم الها هو ومشى بيكمل طريجه وهيه نزلت راسها ولما خطف عدالها ريله لا مست ايدها...وهو يمشي...شهقت بصوت خفيف من القشعريره اللي حستها من هاييج اللمسه...

شويخ: ما انتبهت: شواريج فيه والله حلو وغزال...

عنوده وويها محمر: الله يغربل عدوج سكتي يالفشله((سوت عمرها مضيجه))لا تطالعينه ولا ترمسين افرضي اخويه حميد ولا بطي شافنا والا كان هوه يعرف خواني..

شويخ ارتبكت وزاغت: ااااه ..والحزن..الله يغربل العاثر ...صدقج والله ..اخافهم يعرفون بعض..

لمت العنود السالفه..اما عبدالله عقب ما كمل طريجه ودش الحمام يلس ايفكر بالاحاسيس اللي حسهن من هاللمسه الغير مقصوده..حتى انه حس انه ويهه احمر من هالاحاسيس..ونزل ويهه في المغسله ورش ويهه بالماي علشان يهدي عواطفه...بعد شوي طلع وقال بسير ولا برد هنيه مره ثانيه....المهم انه خلاها اتعرف انه موجود هنيه على الطياره...سار ورد يلس على كرسيه وخبر اخته عذيجه انه عنوده ورى اذا تبا اتسير اتسلم عليها...بس كان يأشر الها علشان ما تفهم امه وخواته الباجيات..

شوي ونشت عذيجه وسارت اتدور عنوده.شوي الا عنوده عرفتها ونشت الها..سلمت عليها ويت عدالهن ويلسن ايسولف ..

عنوده: غربالله عدوج ما خبرتيني انج بتسافرين ويانا العمره..

عذيجه وهي تضحك شوي شوي: ربج بعد اسرار المهنه...

عنوده: لا والله ليش ما خبرتيني...

عذيجه: بغيت اسويها لج مفاجأه..بس انتي اول خبريني بتسيرون المدينه والا مكه قبل...؟؟

عنوده: المدينه وانتوا؟

عذيجه وهيه مرتاحه من رد العنود: الحمدالله واحنا بعد المدينه...انزين في أي فندق قررتوا تحجزون؟؟؟

عنوده: والله كل ما نسير نحجز في فندق الاندلس اللي مجابل طيبه...وبعد بابه مجابل الحرم مال المدينه...

عذيجه: زين زين الحمدالله خبرتيني عشان اخبر عبدالله...بقوله فندق الاندلس...

عنوده: هيه هب تنسين الاندلس تراه واحد ثاني اسمه درة الاندلس علشان ما تتخالطون...

عذيجه: ما يهمج جدع بو حميد...يعيبج في هالامور..((وتغمز الها))انزين غناتي بخليج وانشالله بنتلاقى يوم بننزل انشالله...تعالي بتخبرج صق انتو بتسيرون المدينه بالطياره؟؟؟

عنوده: هيه وانتو...؟

عذيجه وهيه مبتسمه وفرحانه : واحنا بعد..الله ...ياللله بنتلاقى بعدين فضحه هنيه انتم...

عنوده: زين غناتي ربي يحفظج ..
واول ما سارت عذيجه نط حميد لعنوده...

حميد وهوه عينه على عذيجه: اخبرج عنوده من هاي السولعيه..؟

عنوده اتطالعه باستغراب: وانته شتبا؟؟؟

حميد ايطالع عنوده بزعل ودلع: حرام عليج انا شو بسويبها بس انتي خبريني مني هاي؟؟؟فديتج اتخبريني؟؟

عنوده: اربيعتيه...

حميد: ادري انزين شفتج ترمسينها..بس من وين من شعبيتنا والا من وين؟؟؟ وشو معرسه والا لا؟؟

عنوده: أي شعبيتك انته الثاني ...بويه هاي من دار بو زايد..دار الاصايل...

حميد: والله في ذمتج..وانا اقول هالجمال يستحيل ايكون مثله في دبي...هاويلي عليها..زين بعد خبريني عنها..

عنوده: شو اخبرك ينيت انته...يالله فارج لا ازقرلك ابويه..حشى اسميك غادي شرى حصاة الروز...

حميد : مالت عليج حد ياخذ منج انتي معلومات؟؟يالله جلبي هالويه...

سار حميد عن عنوده وشويخ وبعد شوي يابولهم العشا بس عنوده ما كلت غير الكراميل....وخلت الباقي...فطيم من الصوب الثاني اتشوف عنوده ما كلت اكلها...

فطيم: عنوده؟؟؟جيه ما كلتي؟؟؟

عنوده: ما اشتهي

فطيم: عيل غناتي فديتج هاتي لي صينيتج باكل انا عني ميته يوع...والله عشيهم عشا فقير لا يسمن ولا يغني من جوع..

عنوده ناولتها صينيتها...وماشالله عليها فطيم على طول ما واحت الها خلصت الاكل...بعدين يو ورفعوا الصياني وطلبت العنود الها جاهي حليب...لانه اتعرف انه بيخوز الصداع عن راسها...وطاف الوقت وردن انطفن ليتات الطياره علشان يعلنون ان الطياره وصلت مطار جده الدولي..وان الطياره بتهبط الحين ويطلبون منهم ربط الاحزمه....


الجزء السابع

وصلت الطياره مطار جده وبطي طلب من خواته انهن يترين شويه لين ما ينزلون الناس من الطياره ما يبا على اخواته وحرمته وامه ايزاحمون الناس...شوي وأشر بطي على سعيد وحميد اينشون علشان يسبقونهم وخلا ابوه يتجدمه ويود امه وسار وياها بينزلها وسارن البنات وهن يمشن عنوده كانت تتحسب انه قوم عذووج نزلوا بس ثرهم بعدهم لان عبدالله ما كان يبا اخواته يزاحمون الرياييل بعد والشي الثاني انه كان يبا يشوف عنوده...ولما خطفن اخوات عنوده قال عبدالله لامه وخواته انهن ينزلن وياهن وعنود كانت تمشي اخر وحده وعبدالله نش وراها لان خواته جدام ويا خوات عنوده...في ممر الطياره كان عبدالله ورى عنوده..وكان يمشي وهو قلبه ايدق بسرعه...كان ايشوف ايديها وهي تحطهن على كل كرسي لما تتجدم..وكان في صراع مع نفسه وهو بشوف ايديها البيض المحنايات..كان عبدالله وده ايحط ايده على ايديها ...بس ما قدر وفجأه حط ايده على ايدها..
عنوده في البدايه كانت ميته من المستحى والخوف وهي تدري انه عبدالله وراها وما يفصل بينهم شي في هالطياره...بس يوم حط ايده على ايدها ماتت من الخوف...تم قلبها يدق ابسرعه حتى تنفسها اختلف..وشلت ايدها تبا تستردها بس عبدالله كان يشد على ايدها..اخر شي فج ايدها ..وسارت بسرعه بتطلع من الطياره ونزلت على الدرج...واول ما نزلت كان الجو حلو مهب ومطر خفيف ..وقبضت نقابها عن يطير...ونزلت الدرج شوي شوي..كانت ما تحب تنزل من سلالم الطياره اييها خوف...بس عبدالله سبقها ...علشان يسير عند امه ويساعدها على نزول الدرج....في هاييج الساعه عنود حست باحاسيس غريبه..حست بالوحده وبالغيره من امه...بس الصراحه عجبها تصرفه حتى ولو انها حست بهالاحساس عرفت انه ريال فيه خير لاهله واللي فيه خير لهله شي اكيد انه بيكون فيه خير للناس...نزلوا وركبوا الباص علشان يسيرون صوب المطار ...وفي الباص الناس مزر الدنيا..ودورت عنوده عبدالله بس ما لقتلهم شوف...يمكن ركبوا الباص الثاني...ساربهم الباص لين المطار ودخلوا وحميد وسعيد عندهم الجوازات..وتكفلوا بكل شي وساروا على طول عقب ما خلصوا من التفتيش ياخذون شنطهم..

بو بطي: بناتي تعالن شوفن شنطكن وحطن عليهن لزقه...

فطيم: ابويه اسمها ستيكر مب لزقه...

بو بطي: ماعندي شكر ولا سكر..طالعي شنطتج وخلي خواتج يشوفن شنطهن وين يالله هبابنا نلحق ع الطياره ..

اسما: عنوده لقيتن شنطكن؟

عنوده وهي تلتفت وتدور عبدالله وهله: هي هي...

اسما: يالله عيل..

سعيد يا بيشل الشنطه عن عنوده بس عنوده ما عطته ويه ، تم ايطالعها وهو متكدر من نفسه...ما درى الا بحد يظربه ظربه على جتفه خلته يفز...

فطيم: ويا هالويه وين اللي بيراضيني...حتى شنطتي ما قلت لي بشلها والا تسأل اذا ابا مساعده...

ومثل ما يت فجأه سارت فجأه بلا أي كلام عقب الكلام اللي فرته..تم مستغرب منها...وعقب سار وتبعهم عقب ما شل حميد وياه باقي الشنط وحطوهن في الترولي... سعيد تم يفكر في العنود بس بعد تقتحم افكاره فطيم بتصرفاتها الطفوليه بس لا هو لازم ياخذ عنوده خلاص اول ما يرد من هاي السفره بيطلب من ابوه يخطب له العنود من عند عمه...

عبدالله كان يدور شنطة اخته نوره بس ما لقاها ...وبعدين ظهر انه ناس متلخبطين في الشنطه ما خذينها...وبعدين خذ شنطة اختها وشلوا شنطهم وحطوهن في التورلي وساروا صوب الباص علشان يركبون الطياره الداخليه اللي بتوديهم المدينه...

وصلوا الطياره وركبوا وهالمره كانت الطياره صغيره وكانت خاليه والناس اللي فيها شويه يعني يمكن عشرين واحد بس...سعيد من الضيج اللي فيي قلبه سار ويلس في كرسي بروحه...حميد ما نتبه لسعيد انه مضيج علشان جيه سار ويلس في حيالله كرسي وحط راسه وسدح الكرسي ورقد بسرعه...فطيم الوحيده كانت منتبهه لسعيد وتعرف معاناته لانها نفس معاناتها علشان جيه قررت انها تنسيه عنوده وتخليه ما يفكر غير فيها...نشت من عدال حرمة اخوها وسارت صوبه..

فطيم: ها سعودي ليش حظرتك سرت بعيد عنا والا مب عاجباتنك الكراسي اللي جدام..لا ما اظني جيه..اعتقد الناس اللي يالسين ع الكراسي مب عاجبينك....

سعيد وعلى ويهه ابتسامه: لا فطيم شو هالرمسه...بغيت ارقد و........و تعرفين قلت احسن اسير ورى علشان ارتاح في نومتي..

فطيم يلست عدال الكرسي اللي هوه يالس فيه: هيه ...........سوري ما دريت عيل اخافني غاثتنك....

سعيد: لا والله ما غثيتيني ...افا عليج يا بنت العم...

فطيم جربت راسها منه : اقول سعودي...

سعيد: امري((وهوه مستغرب من تصرفات فطيم اللي تحرجه))..

فطيم: وين رضوتي ؟؟؟؟والا تباني اطالب ابها العمر كله؟؟؟يالله الحين ما يخصني...

سعيد: شو تبين انتي؟؟؟؟ امري وادللي يا بنت العم...

فطيم: ابا ثلاثة اشياء...((ورسمت ابتسامه عريضه على ويهها))...

سعيد اول مره يموت من الضحك جيه: حشا مسوتلي اعلان سيجنل تو...انزين طلبي وكلي سمع وطاعه...

فطيم: اول طلب يا باشا.....اباك تشتريلي اسورة ذهب مني....

سعيد: من عيوني ...يالله طلبات الحريم معروفه الذهب على راس القايمه...انزين والطلب الثاني...

فطيم: لا اطمن الطلب الثاني سهل ..بغيتك تطلعلي بطاقه وتلفون....فديتك سعودي قول زين...

سعيد: حشا ريلج وانا ما ادري يا انسه فطيمات...

فطيم حست بشي من الاحراج بس ما بغت تبين له شي : والله ؟؟ عاد ما لقيت غيرك باخذك انا قلوا الرياييل ..انته ولد عمي واقرب لي من حميدوه وبطيوه...

سعيد: تم بس لازم تشاورين اخوانج اول اذا عادي بيخلونج تستخدمين الموبايل...

فطيم: لا اطمن موافقين بس هم قالوا لي يمعي من مصروفج واشتريلج وانا الصراحه ما اروم احرم عمري من الاكل....

سعيد يلس ايطالع جسم فطيم لاول مره: الله يعين اللي يقول عاد من متنج...شو تاكلين انتي بالله عليج غاديه يابسون...اكيد ديدان في بطنج ياكلن اكلج...

فطيم مسويه عمرها اونها بتصيح بس بدلع : سعوووووووووود...والله ما كلمك حرام عليك زدت كيلو من ايام وانا في سبيل الحصول على كيلو ثاني...

سعيد نقع من الضحك: تدرين فطيم ان روحج حلوه....خفيفة دم...يا حظه اللي بياخذج...

فطيم: وايه مالت على ذاك الطاري....لا تيب لي طاري العرس...العرس ويع راس وحشره وأي ريال في الدنيا بيكون متطلب ويبا عيال..

سعيد: يالله فديت العيال اصلا اموت عليهم انااا ولو امهم حشره بعض الاحيان بس ما نقدر ما نحبهم...

فطيم: هيه والله حتى انا اموت فيهم ولو اني بعض الاحيان اضرب علوه ولد بطيوه اخويه....هههههههههههه

سعيد: انزين فطيمات خانم الطلب الثالث؟؟؟؟يالله بسرعه صدق انج لغب...

فطيم: ما ابا خلاص بسير عنك انا...(( وسوت عمرها بتنش بس سعيد قبضها من ايدها علشان تيلس))..خلني بسير ما احبك انا سعيدان واحد...

سعيد: هههههههههههه يلسي اقولج والله بلبيلج كل طلباتج........اسميج كم اسم زقرتيني لين الحين...

فطيم مسويه عمرها زعلانه: كيفي يالشيبه اقول اللي اقوله ...

سعيد: خلاص فطيم قولي الطلب الثالث...

فطيم: الصراحه اباك تعلمني السواقه.....

سعيد بطل عيونه وحلجه وارتبك: اعلمج....شو؟

فطيم تبربش بعيونها: تعلمني السواقه...شو فيها...

سعيد: لا اسف هالشي ما اقدر له...وما عندي استعداد له...

فطيم: والله لتعلمني ما يخصني انا من الزم على شي لازم يتنفذ...يالله الشيبه حرام عليك...

سعيد: تعالي هني بعدين شو الشيبه والله ان عدتيها مره ثانيه بجلج وزوالج.....

فطيم: كيــــــــــــــــــــــــفي ما تروم تمنعني...

سعيد: يالله منج يالعنيده.....المهم سالفة السواقه شليها من بالج ما ابغي اي رمسة بهالخصوص...

فطيم باصرار عنيد: مستحيــــــــــــــــل..اذا ما بتعلمني انته روحي بشل السياره وبدعم ابها خلق الله.....والله اسويها وقول بعدين فطيم بنت محمد هب قد كلمتها........

سعيد: دخيلج هب تغدين مينونه...

فطيم: اذا ما بتعلمني بسوي اللي قلتلك عليه...

سعيد: خلاص امري لله بعلمج بس بعدين بنرتب وقت يوم بنرد البلاد زين؟؟؟

فطيم: ياااااااااااااي انزين شيبتي.........

سعيد:ايه الحماره شو قلنا.......

فطيم بابتسامه: والله انك شيخي يا ولد عمي...الحين بسير عنك ...

سعيد: وين تبين يلسي؟؟؟

فطيم: وين تبا انته عيبتك السالفه جنها....جان تباني ايلس عطني فلوس((وجدمت ايدها علشان يعطيها فلوس))

سعيد: تبين فلوس؟؟؟ من عيوني ما طالبتي وجدم ايده وظربها ظربه على كفها...

فطيم: والخيبه خيبتك لله...اهب اهب عنبوه ايدك طن حديد...

سعيد: اذكري ربج فطيمات....والله ما حد بياكلني غيرج في هالرحله....

فطيم: حرااااااااااااام عليك انا باكلك؟؟؟انزين انا الصراحه صدق اكل...

سعيد مبطل عيونه :صدق والله انتي تاكلين؟؟؟اهبي هبيتي...

فطيم تأكدله: والله العظيم اني اكل.....................اكل ثلاث وجبا ت يوميا .........هههههههه عيل كيف تباني اعيش يالخديه اذا ما كلت وتغذيت...

سعيد: والله انه عليج علووم ...

تحياتي




تم التعديل بواسطة الملكة

من مواضيع شموخ العز
0 ردة فعل الشباب الخليجي اذا طاحت بنت قدامهم
0 أدخل وشوف حرفك مع العصافير ^_^
0 صالونات التجميل النسائية "قصص واقعية "
0 اختراعات حد
0 لاتلوموني في حبه (8-9-10-11-12)

حياتي القصة روعة بس بليز كبري الخط شوي ...
انا البس نظارة ارحمي عيوني....

شقـــــاويــــــة

من مواضيع شقـــاويـــة
0 انظروا ماذا فعلت الاميرة السعودية بكتاب الله !!!!
0 من غرائب الزواج ....!!!!!!
0 شوفوا دعوة الوالدين شتسوي!!!!!!!
0 الاجزاء 2و3و4من قصة لاخوي ولامخاوي ولا لاقيت اللي اهتويت
0 غرائب الزواج!!!!!

توقيع شقـــاويـــة

من مواضيع شموخ العز
0 يمه وينك ؟؟
0 لاتلوموني في حبه (8-9-10-11-12)
0 أنواع الشعراء والى اي مدرسه ينتمون ؟
0 لا تنظر الى الأوراق التي تغير لونها !!
0 لاتلوموني في حبه من الجزء 13 الى النهايه

انا في الجزء الرابع بصراحة حلوووه القصة اما عذيجة استانست يوم خذت رقم عنوده ياللة اكمل وارد لج شموخ