يقول من عدا على راس عالي=رجم(ن)طويل يدهله كل قرناس
في راس مرجوم عسير المنالي=تلعب به الارياح مع كل نسناس
في مهمة قفرمن الناس خالي=يشتاق له من حس بالقلب هوجاس
قعدت في راسه وحيدا لحالي=براس الطويل ملابقه تقل حراس
متذكرافي مرقبي وش غدالي=وصفقت بالكفين ياس على ياس
اخذت اعد ايامها واللـيـالـي= دنـيـا تـقـلـب ماعرفنا لهاقياس
كم فرقت مابين غـالي وغالي=لوشفت منهاربح ترجع للافلاس
ياما هفا به من رجال مدالي=ماكنهم ركبواعلى قب الافراس
ولاقلطوهن للكمين الموالي=ولاصارفوق ظهورهن قطف الانفاس
ولارددوا صم الرمك للتوالي=كل يبي من زايد الفعل نوماس
من بينهم سمر القنا والسلالي=مثل البروق برايح ليله ادماس
يقطعك دنيا مالهااول وتالي=لو اضحكت للغبن تقرع بالاجراس
المستريح اللي من العقل خالي=ماهوبلجات الهواجيس غطاس
ماهوب مثلي مشكلاته جلالي=ازريت اسجلهن بحبر وقرطاس
حملي ثقيل وشايله باحتمالي=واصبر على مر الليالي والاتعاس
وارسي كماترسي رواسي الجبالي=ولايشتكي ضلعاعليه القدم داس
يــابــجـاد شـب الـنـار وادن الـدلالـي=واحمس لنا يابجاد مايقعد الراس
ودقــه بــنـجـريـاظـريـف الــعــيـالي=يجذب لنا ربع على اكوارجلاس
وزلــه الى منه رقــد كـل ســالـــي=وخله يفوح وقنن الهيل بقياس
وصــبـه ومـده يـاكــريـم الـسـبالي=يبعدهمومي يوم اشمه بالانفاس
فنجال يغدى مــاتـصـوربـبـالـــي=وروابع تضرب بها اخماس واسداس
لاخاب ظـنـي بالــرفـيـق الــموالـي=مالي مشاريه على نــايـد الناس
لـعل قـصـر مـايـجـيـلـه اظـلالـــي=يـنهـد من عالي مبانـيـه لـساس
لاصـارمـاهو مـدهـل للــرجالـــي=ومـلجا لمن هويشكي الظيم والباس
بحـسناك يامنشي حقوق الخيالي=ياخالق اجناس ويامفني اجناس
تجعل مقره دارس العهد بــالــي=صحصاح دو دارس مابه اونــاس
البوم في تالي هدامه يـلالــي=جزاك ياقصر الخنا وكر الادناس
متي تربع دارنا والـمـفالـي=وتخضرفياض عقب ماهيب يباس
نشوف فيها الديدحان متوالي=مثل الرعاف بخصر مدقوق الالعاس
وينثرعلى البيداء سوات الزوالي=يشرق حماره شرقة الصبغ بالكاس
وتكبر دفوف معبسات الشمالي=ويبني عليها من الشحم مثل الاطعاس
قصيده الشاعر الامير محمد الاحمد السديري رحمه الله
آخر المواضيع
( لاخاب ظني بالرفيق الموالي) 
