دخلن البنات المركز...وتمن يحوطن من محل لمحل...ومروا حذال الكوفي شوب فوق... و الشباب طبعا مايقصرون... متفيزرين هناك...
عذابه: اوف ماكثرهم.. ماروم امر هني
حمده: شو بتسوين يعني... بتناقزين
ريم: ليش لا... يالله عذوب.. وانا بشجعج
خلود: لا والله... بتفضحونا انتن
عذابه: غشوتيه خفيفه... مادري اليوم الشباب بتيمعون..
حمده: هالموضه انزين...
عذابه: أي موضه انتي بعد.. جني هب متغشيه
ريم: ومن قالج تلبسين هالشيله
عذابه: وانا شو عرفني ان المركز متروس شباب.. واليوم السبت.. هب الخميس
خلود: عادي...السبت و لا الخميس.. دوهم متفيزرين هني..
اجدمن البنات ما عدا عذابه... الا كانت تستحي تمشي..و الشباب يناظرونها.. وهي تمشي جان يقوللها واحد فيهم...
... يا ويل حالي.... ماقتل قلبي سهام...ولا طعن جوفي رماح... ايه والله ماذبحني غير واحد.. قال احبك ثم راح....
وتموا الشباب يضاحكون على رمسته.. وعذابه شوي وبتموت من المستحى... حمده صدت اطالعها.. و شافتها شوي و بتطيح.. \
وبين الشباب... صد واحد يطالع البنيه اللي يرمسها ربيعه... و يوم شافها انصدم... عرفها.. واستئذن من ربعه و نش عنهم...
خلود: عذوب بلاج
عذابه: ماروم اصلب عمري... سمعتي شو قال...
ريم: ماعليج منه
عذابه: ياربي . يا فضيحتيه..
خلود: قومن نظهر عيل
ريم: بس ماشريت لي شي..
خلود: انتي اللي مايعيبج شي..
ريم: شو رايكن نسير الشارجه.. بنسير صحارى
خلود: الحين؟
ريم: شو فيها... توها الساعه 6
عذابه: لا لا .. بنرد البيت
ريم: شو نرد البيت... باجر الدريول مابنحصله.. امايه تحتايه
خلود: خلنا نسير السياره و نتفاهم.. حمدوه بلاج؟
حمده: مابتصدقون من شفت
ريم: وين؟
حمده: في الكوفي
خلود: منو؟؟؟
وتوهن وصلن السياره....
حمده: هذا .. (هي تاشر على الي واقف حذال سيارتهم)
ريم: رحنا فيها..
خلود: الله يستر.... هلا والله
خليفة: هلا وغلا.. اشحالكن؟
حمده: بخير الله يسلمك.. شو هالمفاجاه الحلوه .. توك واصل صح ( تستهبل اونها)
خليفة: لا والله.. اظنج شفتيني داخل
ريم: شو اخبارك خليفه... لك وحشه اتصدق
خليفة: شو تسون هني
حمده: نتشرا حق السفر
خليفة: رواحكن؟
خلود: منو بييبنا يعني.. امايه عندها عرب في البيت
خليفة ( وهو عيونه على عذابه طول الوقت.. وعذابه منزله راسها مابتغي تشوفه): كيف تمشن بين الشباب جيه؟
ريم: شو نسوي يعني... وبعدين ماسوينا شي غلط
خليفة: هب عيب اللي استوا يعني... كيف ترضن على عماركن تسمعن هالرمسه من الشباب
حمده: ما حصل الا الخير...
خليفة: انا صح مالي خص فيكن... بس مارضى الغلط عليكن
خلود: خليفة انت هب بس ولد عمنا.. انت اخونا و المفروض تحاسبنا اذا غلطنا.. بس تدريبنا عدل وتدري انه اللي استوى احنا مالنا خص فيه
خليفة: السموحه اذا ادخلت في شي ما يعنيلي.. بس حرمتيه بينكم... ومارضى عليها..
عذابه استانست يوم سمعت الكلمه منه... (((حرمتيه ))) فديته والله.... ااااااااااااااااه كيف احبه و احب صوته و اسمه و كل شي فيه... يارب متى بتجمعنا.. يا رب لا تفرقنا.. لا تبعدني عن اللي ملك روحي و قلبي. لا تبعدني عن اللي روحي بحبه شغوفه...
ركب خليفة سيارته... واللي كانت قريبه من سيارتهم.. واول ماشغل السياره شغل المسجل...
ماقلتي يالغلا وش حالها عيونك ترقب طيوفي او ان النوم غالبها
ما قلتلي انت تحب ومن هو مضنونك واللي تحبه احاسيسك يحس بها
و رو ح عنهم خليفة.. اضايج من اللي الموقف اللي صار... وخاصه انه عذابه هي اللي تعرضت لهالموقف..
يا من يبيعك و أنا بروح لك اشري..
أفديك بروحي يا عالي الشاني..
لا ما نسيتك لو العمر بي يجري..
إذا نسيتك قول مات و خلاني..
في السيارة
ريم : حرمتيه بينكم و مارضى عليها (تقلد خليفه)
عذابه: بسج عاد.... غاديه متو كل شوي تعيدين هالجمله
خلود: الصراحه عيبني خليفه
حمده: حتى انا.... يا حظج يا عذوب
عذابه: أي حظ هذا اللي تحسديني عليه
حمده: على خليفة... والله انه هالانسان بيموت عليج
خلود: وانا اشهد
عذابه: شو فايدة الحب دامه ما بيستمر
ريم: شو اللي ما بيستمر
خلود: عذوب... كمن مره اقولج خليفة يحبج و يباج
عذابه: مادري والله... عقب اللي صار بين الهنوف و عمر هب متاكده من شي
حمده: لا تخافين... اذا من نصيبج مافي شي في الدنيا بيفرقكم
الجزء الثاني و العشرين
شفتك ولا ظنيت بهواك
ماهو بكيفي غصب عني
لا والذي في الكون سواك
صدق المشاعر لك خذني
يوم الاثنين
في هاليوم موعد سفر قوم القبيسي... طبعا عمر ماطاع يسافر مع انه امه حاولت تقنعه و خاصه انه الهنوف و هلها مابيسافرون معاهم بس عمر ما طاع... و بعده كان يبات في شقته و مارد بيت هله...
في بيت عبدالله القبيسي
اليده: يا بويه اشعنه ما تبا تسافر ويانا هالبلاد.. شو يسمونها.. سوسرا .. شو بتسوي هني روحك في البلاد؟
فيصل:اسمها سويسرا .. وبعدين قلتلكم مابغي اسافر ويا حريم.. لو خليفه بيسافر جان سرت معاكم.. بس روحي لا
ام عمر: ويديه انا.. ترى ابوك معانا
فيصل: شو اسوي في ابويه؟؟ تراه طول الوقت بيتم معاكم و انا تبيني احوط روحي شرات الخبله
اليده: شو خانتك انت ها... المفروض تجابل خواتك بدال القعده هني
فيصل: ابويه عندكم و مابيقصر في شي...
ام عمر: الحين عمر هب طايع يسافر عسب الهنوف و انت ماتبغي تسافر يوم دريت انه خليفة هب معانا .. عنبوكم نحن الا مسافرين كشته .. و ليش الحشره هاي؟
فيصل: انشدي الهنوف .. انا وشلي يظاربون و يحطون حرتهم عليه.. بتخبركم اشعنه هي ما طاعت ترد ها.. صدق انه الحريم مشاكل مول ما يعيبهن شي
اليده: اسمعوا ها... هب جنه بتاخذلك عقب حرمه
فيصل: لا طبعا.. انا اعرس.. بعدني ما ينيت عسب اخذلي وحده تظهرلي قرون
ام عمر: هههههههههه الله يغربل ابليسك...
اليده: لا فديتك عرس بتعرس .. برضاك ولا بدونه
فيصل: جيه حرمه تحيديني... ليش اعور راسي و اتزوج
ام عمر: العرس هو اللي بيصلبك و بيخليك تودر خرابيطك هاي
فيصل: أي خرابيط الله يهديج يا امايه
ام عمر: نسيت اتخبرك... شو قايل حق ابوك عن سيف الكعبي
فيصل: منو سيف... هيه .. عرفته... بلاه
ام عمر: ابوك يقول انك سامع عليه رمسه
فيصل: الناس تقول
اليده: الناس دومها ترمس ... و اشحقه تتبلون عالولد
فيصل: والله يا اميه ما شفت شي عليه... بس اللي وصلني خبرتكم عنه وانتو عاد سووا اللي تبونه
اليده: انا اشوف ان الولد شارينا... و ما يحتاي نرفضه
ام عمر: ان شاء الله عقب مانرد بيصير خير..
ودخل عليهم بو عمر...
ابو عمر: زين يوم حصلتك هني.... خذت الاوراق من المكتب
فيصل: هيه عندي
ابو عمر: زين.... باجر اباك توديهن البنك هب تنسى
فيصل: ان شاء الله...
ابو عمر: ولا تنسى ترمس بن ضاحي عن المحل
فيصل: يصير خير
ابو عمر: هيه .. و الاوراق اللي فوق التلفزيون ابغيك توديهم عند علي الرميثي في العين
فيصل: ان شاء الله.... حشا هب سفر اللي بتسافره... تشوفني ياهل جدامك مافهم... انت سافر و ما عليك من شي
اليده: صدقه...جيه محد يشتغل غيرك يا بو عمر... خلاص اليوم بنسافر و انت تفتكر في الشغل
ابو عمر: شو اسوي... هذيله محد يعتمد عليهم... لو عمر ما بقوله شي.. بس فصول دومه مهمل و ما يفتكر في شي
فيصل: افا يا بو عمر... هذا ظنك فيه... بس ما عليه مقبوله منك
ابو عمر: انزين منو بيوصلنا المطار؟
فيصل: انا و خليفة بنوديكم
ابو عمر: زين
ام عمر ( و نبرة الحزن في صوتها) : و عمر ؟
ابو عمر تنهد يوم سمع اسم عمر
اليده: عمر ما عليه شر... ريال و يعرف شو يسوي
ام عمر: بس ما يهون عليه... هذا ولديه وماروم اشوفه يتعذب
فيصل: شو يتعذب يا امايه.. عمر عايش حياته و هب مفتكر في حد.. ولا تخافين عليه... مابيصيبه شي
ام عمر: الله يهديهم بس
اليده: بسج انتي و قومي طاعي بناتج...عنبوهن من الصبح متفيزرات في حجرهن..
في حجرة خلود
ريم: ها البنطلون وايد ضيج... مابروم البسه
خلود: لا فديتج... انتي ما ترومين تلبسينه لانه محد بيخليج
ريم: ليش يعني
خلود: توج تقولين ضيج
ريم: ابويه ما بيقولي شي
خلود: و يدوه اللي بتلعن الخير فيج
ريم: هههههههههههههههه صدقج والله.. انزين و هالقميص شو رايج فيه
عذابه: متى خذتيه؟
ريم: هاك اليوم في صحارى
عذابه: اتصدقين ما شفته
ريم: مالومج... عقب ما شافت حبيب القلب نست الدنيا و ما فيها
عذابه: والله انج متفيجه
ريم: ههههههههههههههههههههههه تذكرون هاك اليوم.. يا حليلك يا خليفه.. والله غامضني
خلود: انحرق ويهي يوم شفته واقف عند السياره.. بس الصراحه خليفه هذا مافي منه.. ريال وينظرب فيه المثل
ريم: صدقج
عذابه: يعني الحين ماعندكن شي ترمسن عنه غير خليفه
خلود: احيدج تفرحين اذا يبنا طاريه
عذابه: افرح بس
ريم: بس شو
عذابه: ماشي ... وينها حمدوه... شلت القميص و لين الحين ماردته
خلود: انسي القميص عيل.. الحبيبه ترمس روميو
ريم: اتصدقين من الصبح ماسكه التلفون و تهذرب وياه.. حشا هب حب هذا
خلود: انتي شو عرفج اصلا... حليله شهر ما بيشوفها
ريم: خير يا طير... شو فيها لو شهر ما جابلها بيموت يعني...
عذابه: محمد عادي يسويها
وتدخل عليهن ام عمر
ام عمر: ها زهبتن اغراضكن
خلود: هيه... متى بنظهر
ام عمر: عقب صلاة المغرب
ريم: و فيصل ماطاع يسافر
ام عمر: لا ما طاع .. يقول مايبغي يسافر ويا حريم روحه
عذابه: هذا ولدج سخيف... انزين منو بيودينا؟
ام عمر: فيصل
خلود: السياره ما بتكفينا
ام عمر : هيه .. خليفة بيي بعد... ( وظهرت عنهن)
ريم: سمعتي يا روح امج.. خليفه بيي
عذابه: اتخيلوا بشوفه .. لا لا ماصدق
خلود: صدقي.... انا بسير اطالع حمدوه ( ظهرت عنهن)
ريم: عذوب ... شو احلى .. القميص هذا .. ولا اللي فوق الشبريه
عذابه: مادري
ريم: عذوب التلفون يرن... روحي شليه
عذابه: ريمو هب متفيجتلج.. روحي انتي
ريم: اوووف
حاولت اصبر عنك و انساك
لكن روحي لك تحني
اتخيلك في يوم لقياك
يوم الصدف فيك اجمعني
و راحت ريم صوب التلفون
ريم: الو
سيف: مرحبا الساع
ريم تصنمت و مارامت ترمس او حتى تتنفس ((( هذا سيف ... يا ويلي انا ... هذا سيف )))
سيف: بلاج ساكته
ريم: خير
سيف: الخير في ويهج... بس حبيت اودعج قبل ما تسافرين
ريم (( يعرف اني بسافر بعد...))): و ليش تودعني بعد.. جيه اعرفك و لا انت تعرفني
سيف: اكيد اعرفج حد ينسى قلبه
ريم: لو سمحت اظنك مغلط في الرقم
سيف: ريم فديت روحج لا تصكين... خليني اسمع صوتج .. خليني اتهنى شوي قبل ما تفارقيني
ريم: ايه انت.. شو افارقك بعد... انت ما تستحي كل ماسير مكان اشوفك ولا اسمع صوتك... حتى في بيتنا
سيف: والله الود ودي مافارقج دقيقه
ريم: انت الصراحه قليل الادب.. شو هالرمسه بعد عيب عليك.. اللي ناقص تقولي بلحقج بعد...
سيف: والله لا اسويها
ريم: الصراحه ما ينفع ارمسك عدل
سيف: انزين اصبري
ريم: نعم
سيف: انا
ريم: انت شو؟؟؟
سيف: احبج
ريم ماقدرت تبلع ريجها.... و تمت تحرك عيونها عسب تشوف اذا كان حد عدالها ولا لا... و عقبها انتبهت للتلفون و جان تصكه في ويه سيف.... و دخلت الحجره
عذابه: منو اللي اتصل
ريم: ها...
عذابه: بلاج... اقولج منو اللي اتصل؟
ريم: مابتصدقين
عذابه: خليفة؟
ريم: أي خليفة انتي بعد....
عذابه: عيل منو؟
ريم: سيف
عذابه: صدق
ريم: هيه والله
عذابه: و اشحقه متصل؟
ريم: اونه يودعني
عذابه: وانتي شو قلتيله؟
ريم: شو بقوله يعني... ماشي صكيت في ويهه
عذابه: المفروض نخبر امايه عنه... هب حلوه كل يوم يتصل
ريم: شو تخبرينها ... لا لا مافيه عالمشاكل
عذابه: يعني عايبتنج اتصالاته
ريم: لا هب جيه.. بس مابغي اميه تفهمني غلط.. عقب مانرد بخبرها هب الحين
في حجرة حمده
كانت حمده يالسه عالكرسي و ترمس محمد عالتلفون...
حمده: المهم بخليك الحين
محمد: شو بتخليني ... تو الناس
حمده: شو تو الناس تدري انت من متى وانا ارمسك
محمد: شو فيها .. حرمتيه و بعدين انتو بتظهرون عقب الصلاه
حمده: انزين .. وانا بسير اتلبس
محمد: والله يا حمده مادري اشقايل بروم اعيش من دونج هالشهر
حمده: اللي يسمع الحين مابتصلبي
محمد: كل يوم برمسج .. بس بعد غير يوم احس انج قريبه مني.. ترى من الحين اخبرج عقب ماتردين بنحدد موعد العرس
حمده: محمد احنا رمسنا قبل عن هالسالفه... عقب ماخلص دراستيه بنحدد... و بعدين ما بقالي شي
محمد: ما عليه يصير خير... المهم اتحملي على عمرج
حمده: ان شاء الله غناتي... و انت بعد
محمد: حمدووه
حمده: هلا
محمد: خلاص ماشي
حمده: في خاطرك شي؟؟
محمد: سلامتج
حمده: مع السلامه
محمد: وداعة الله
و عقب ماصك عنها طرشلها مسج
((( المشكلة هب مشكلة اشوفك ولا اجيك... المشكلة بعد ما اشوفك كيف اخليك )))
و عقب صلاة المغرب تلبسوا وروحوا المطار .... في سيارة فيصل ركبوا ابوه و امه و يدتهم و خلود. و في سيارة خليفة حمده و ريم و ... عذابـــــــــــــه
في سيارة فيصل:
ام عمر: ماوصيك يا فيصل طالع اخوك... و قوله يتصلبي كل يوم
فيصل: ان شاء الله
ابو عمر: ولا تنسى الاوارق فوق التلفزيون... ودهن العين
فيصل: ان شاء الله
اليده: فصول... جانك بتسير العين شل الاكياس في حجرتيه وودهن بيت خالتك
فيصل: ان شاء الله.. و انتي خلود هانم .. ماتوصيني بشي
خلود: هههههههههههه سلامتك
فيصل: الحمدلله... مادري ليش احس عمري بشكاركم
اليده: اذا نفعتنا منو بينفعنا عيل
ام عمر: صدقج
فيصل: الحمدلله انه طلباتكم خلصت
ابو عمر: اوه نسيت اخبرك
فيصل: ( بصوت واطي) لا حول ... ها ابويه شو في خاطرك بعد؟
ابو عمر: اريدك تزور عيال اخوك و تطمن عليهم.. ولا تنسى تاخذلهم مصروفهم
خلود: الهنوف مابطيع تاخذ
ابو عمر: برايها.. المهم ان الفلوس توصلها و هي حره عقب تاخذهن ولا ترفضهن
ام عمر: الله يهديهم .. بس لو اعتدل كل شي جان ارتحت من هم فيصل
فيصل: شو يخصني انا؟
ام عمر: كنت بخطبلك علايه بنت عمك
فيصل: قلتلكم الف مره مابغي اعرس
اليده: واشعنه ماتعرس .. اللي اصغر عنك معرسين و عندهم عيال
فيصل: والله كل واحد حر بحياته .. والا انت شو رايك يا بو عمر؟
ابو عمر صد صوب عمر و طالعه بنظره و عقب صد الصوب الثاني
خلود: لا تغصبونه على شي
فيصل: صح لسانج
خلود: بس في يوم بتندم لانك فرطت في بنت عمك
فيصل استغرب من رمسة خلود
اليده: صدقها خلود... البنيه زينه و مافيها شي ينعاب... و اكيد وايد بيخطبونها
فيصل حب يغير الموضوع جان يقوم و يشغل المسجل ....
في سيارة خليفة
خليفة: ههههههههههههههه والله انج سوالف يالريم
ريم: توك تدري... شو تباني اسوي يعني .. من الصبح ساكتين تقول سايرين عزا... قلت اسولف ابرك
حمده: ماحيدك يا خليفة تسكت... احيدك راعي سوالف و ضحك
خليفة: والله ماعندي شي اقوله... ارمسن انتن و انا بسمعكن
ريم: ها.. هب انت اللي بس ساكت... حتى العفريته هاي ( و هي تاشر على عذابه)
عذابه طول الدرب ساكته و مانطقت بحرف... يمكن لانها منحرجه من خليفه من اخر موقف استوى بينهم.. او يمكن شافته مايعبرها و لا يرمسها شرات مايرمس خواتها.. كانت صاده صوب الدريشه
حمده: اقول خليفة ... ليش ما تسمعنا صوتك
خليفة: هب وقته الحين
ريم: انزين حطلنا أي شريط عندك
خليفة: فالج طيب
ظهر شريط و جان يشغله.. و طبعا بصوته الغاوي... اللي صدق كان حلو و مؤثر
انا الغريب انا الغريب انا الذي دمعي سكيب
انا المولع بالغرام يا عزوتي منهو يجيب
اهيم و الذكرى عذاب و ضاع الامل و اصبح سراب
خذ مني الوقت الشباب و شيبت انا قبل المشيب
وفيت خلي ماوفى صفيت و لكن ما صفى
ناس سعونا بالخفا و اصبح عالفرقا غصيب
شفته و عيني دمعت ونار الوفى ولعت
ودعوا روحي وودعت وقال الهوى قسمة و نصيب
عذابه كان سرحانه بافكارها بس يوم سمعت صوت خليفة انتبهت... تمت تسمع الكلمات عدل... و خنقتها العبره يوم سمعته يقول ((( الهوى قسمة و نصيب ))) ..
ماندري شو اللي يمكن يصير في حياتنا.... لانه دوام الحال من المحال... و يمكن الانسان اللي نتحراه بيتم معانا طول العمر... بنفقده في يوم و ليله ....
اشتاقلك و الشوق جدواك
و نظرات عينك شوقني
دايم علي اتمر ذكراك
ومن الشوق قلبي متعبني
ودي بشوفك لا عدمناك
في العمر تبقى ملازمني
وصلوا المطار ... و جهزوا تذاكرهم ... و يا وقت سفرهم... ودعوا فيصل و خليفة..
خليفة ما طاع يدخل معاهم.. يمكن قلبه كان يعوره يوم يشوف عذابه اطالعه بنظرات... و فيصل دخل معاهم .... و جان توقف عذابه... صدت حمده صوبها
حمده: بلاج
عذابه: نسيت شي
حمده: شو؟
عذابه: الحين برد ((( و ردت عنهم ... صوب خليفة)))
خليفة كان يطالع عذابه يايه صوبه... استغرب... بس نبضات قلبه تزيد كل ما تتقرب منه
خليفة: نسيتي شي؟
عذابه: هيه
خليفة: شو؟
عذابه : تفضل (( عطته ميداليه عالويه الاول عليه حرف خ و الطرف الثاني حرف ع ))
خليفة ( وهي يبتسم ) : تسلمين
عذابه: يسلم غاليك ( و مشت عنه )
خليفة: عذابه
عذابه: هلا
خليفة: اتحملي على عمرج
عذابه: ان شاء الله....
وطارت الطياره لسويسرا .... و القلوب متباعده ...
الجزء الثالث و العشرين
وصلت العائلة الكريمة مطار سويسرا وكان الوقت متاخر... روحوا الفندق اللي كانوا حاجزينه ... وحجزولهم جناح فيه 4 غرف وصاله
خلود: حشا... مابغينا نوصل سويسرا
عذابه: صدقج... خسنا في الطياره
ريم: صدق ما عندكن سالفه.. اصلا احلى شي في السفر الطياره
خلود: وين ياه الحلا .. انا بسير غرفة يدوه برتب اغراضها.. حمده قومي يالله
حمده ( وهي تتفرج عالعالم من الدريشة): شو؟
خلود: تعالي بنشوف يدوه اذا تحتاي شي
حمده: روحي روحج... لازم بعد مرافق
خلود: بلاج جيه... قومي ساعديني
حمده: خلود فديتج... انا مالي بارض اساعد حد... خليني ارتب اغراضي اول شي
خلود: ما عليه .. انا ماخبرت يدوه عليج
حمده: لحظه لحظه... كنت اتمصخر... خلوووووووووووووووود اترييني
وظهرن خلود و حمده صوب يدتهم
عذابه: حمدوه تغير حالها من يوم ما خذها محمد
ريم: لازم تتغير... الحب و عمايله على قولة اخوانا المصريين
عذابه: اشوفج وايد ترمسين عن الحب و هالخرابيط
ريم: ها ... لا طبعا.. مارمس عن الحب ولا شي... بس ... اقول.. شو رايج نسير نتعشى تحت؟
عذابه: وليش غيرتي الموضوع.... عالعموم واضح انج وايد متاثره بسيف ...
ريم: ما علينا الحين من سيف... خبريني الحين شو رايج نتعشى تحت؟
عذابه: ماظن امايه و ابويه بينزلون.؟
ريم: انزين بنسير رواحنا
عذابه: ومنو بيخليج يا ذكيه...
ريم: ما عليج انتي ... انا روحي بقنع ابويه... قومي يالله
وظهرن ريم و عذابه الصاله ..
ريم ( وهي تحب راس ابوها): فديت الغالي والله يوم انه يابنا هالمكان الغاوي الله لا يحرمني منك
ابو عمر: تراه كله علشانج انتي يالريم.... كم ريم عندنا الا هي وحده
اليده: ها بدينا اشوف بدا الدلع
ريم: خليني ادلع... اخر العنقود و يحقلي ادلع
ابو عمر: اكيد يحقلج تدلعين...
ام عمر: ريمو.. شو في خاطرج..
ريم: ها.. لا لا ماشي
ام عمر: اعرفج عدل... هالكلام كله مايي الا اذا شي وراه
عذابه: شو بيكون وراه يعني... نحن بس بغينا نعزمكم عالعشا
اليده: وابويه انا... الحين هالياهل بتعزمنا عالعشا
ريم: هيه بعزمكم... ولا بعد على حساب ابو عمر
ابو عمر + ام عمر: ههههههههههههههههههههههه
ام عمر: ماقلتلكم شي وراها
ريم: ها ابويه شو رايك... خلنا نسير نتعشى تحت في الفندق
ابو عمر: بس تونا واصلين...ومافيه حيل انزل
ام عمر: صدق ابوج... تونا يايين وين تبين تروحين بعد... اصبري لين باجر وعقب وين ماتبين روحي محد بيقولج شي
حمده: لحظه .... لحظه... جني سمعت شي عن العشا و الظهرة
عذابه: نحاول نقنع ابويه نتعشى برع
حمده: فكره حلوه... بسير اتلبس عيل
ام عمر: وين وين.. ينيتي انتي... محد بيظهر الحين
خلود: عنوه تونا واصلين و تبن تظهرن.. ارتاحن انزين شوي
عذابه: انا هب تعبانه.. والصراحه يوعانه
ابو عمر: ترانا بنطلب عشا .. و بيبولنا لين هني
حمده: انزين ابويه.. اذا تعبان هب لازم تروح معانا
اليده: شو.. شو تقولين .... بتتعشى بين الرياييل روحها بعد.. صدق انج ماتستحين
ريم: شو الحل الحين
ام عمر: ماشي طلعه... بتتعشن هني ... وبسكن من الحشره هاي
ودخلن البنات غرفهن.... وكل وحده فيهن تتريا الليل يمر بسرعه عسب يستانسون بسفرتهم...
في دبي...
خليفة: اكيد وصلوا الحين
الهنوف: غريبة ماتصلوا عيل
خليفة: الليل عندهم ... يوم بيصبح الصبح اكيد بيتصلون
علياء: ياحيهم والله.. هب احنا متفيزرين هني في الحر
الهنوف: تدرين ليش البلاد متروسه اجانب
علياء: ماعرف و مايهمني
الهنوف: السبة نحن... نحن رواحنا نسمحلهم انهم يون بلادنا و يصيفون عندنا .. بدال مانصيف في بلادنا ندور الراحه في بلاد ثانيه...وبعدين العالم كله يتمنون الامارات
علياء: هنوف فديتج... روحي ضايجه.. هب متفيجه اسمع مواعظ الحين ( نشت عنهم وراحت حجرتها)
خليفة: بلاها مضايجه
ام خليفة: تراها متعوده على بنات عمها... وحليلها من غابت عنها عذابه وهي روحها.. مالها حد غير عذوب بنت عمك
خليفة يوم سمع اسم عذابه تذكرها... وتذكر الميداليه اللي عطته ياها... ابستم يوم تذكر الموقف...
الهنوف: خير خليفة... ليش تضحك
خليفة: تذكرت شي
الهنوف ( وهي اطالعه بنظره): ان شاء الله الابتسامه ماتفارقك
ام خليفة: شو حاله عمر... مارد بيتهم؟
خليفة: لا ماظن.. بعده في الشقه
ام خليفة: واشعنه ماسافر ويا هله
خليفة: والله مادريبه..... يالله برخصتكم
ام خليفة: وين؟
خليفة: بظهر ويا فيصل
ام خليفة: الله يحفظك
ام خليفة: الهنوف... البارحه يقولي خليفة انه فيصل يابلج بيزات حق اليهال
الهنوف: هيه
ام خليفة: وليش رفضيتهن
الهنوف: انا قايلتلكم الف مره.. أي شي من طرف عمر ماباه
ام خليفة: بس يا اميه هذا حق عيالج.. وهو ملزم يصرف عليهم... وبعدين هب هو اللي يعطيهم.. هذا عمج
الهنوف: حتى لو كان من عند عمي... ماريده
ام خليفة: والله ماعرفنالج.. مره تقولين انج تبينه و مره ماتبين حتى تسمعين طاريه... ماقول غير الله يهديج بس.....
سويسرا
الصبح...
ريم: عذووووووووووووووووووووووووووووووووب...
عذابه ( فجت عينها على صريخ ريم): خير بلاج... شو السالفه... شو اللي صار؟
ريم: طاعي الجو ماحلاه
عذابه: مالت عليج... انا مادري شو اللي خلاني ابات معاج في غرفة وحده.. لو بت ويا خلود ابركلي
ريم: بلاج انتي.. نشي يالله
عذابه: الساعه كم
ريم: الوقت متاخر... الساعه 7 الحين
عذابه: والله.. والوقت متاخر بعد... عيل متى تبينا انش
ريم: الفير بعد متى... ماتشوفين كيف الاجانب عايشين حياتهم
عذابه: ريموووو... اظهري برع
ريم: هب ظاهره لين ماتنشين.. ياغبيه قومي بنسير نقول حق ابويه نتريق تحت
عذابه: مابيطيع شرات البارحه
ريم: جيه كل يوم العيد... لا فديتج غصبا عنهم بينزلونا
عذابه: اذا ظهرتوا خبروني
ريم: اوف منج.. ما منج فايده
ظهرت ريم من الحجره و سارت حجرة خلود و حمده
ريم: خلود.... حمده ؟؟؟؟
خلود ( وهي ترمس حمده): حمدووه تسميعن شي
حمده ( في سابع نوم): لا
خلود: جني سمعت صوت
حمده: تتوهمين
خلود: متاكده اني سمعت شي
حمده: ارقدي احسن
ريم: خلوووووووووووووووووود...... حمدوووووووووووووووووووووووووووووه يالله عاد حد يرد عليه
خلود: هب جنها ريماني
حمده: اوف...
خلود: صدقيني هاي الريم..
حمده: لا ماظن..
خلود: حشا هب رقاد فيج... بسير اطالع
وفتحت خلود الباب و شافت الريم و الابتسامه العريضة على ثمها
خلود: خير
ريم: صباااااااااااح الخير
خلود: بلاج
ريم: ردي انزين
خلود: صباح النور.. خير شو فيج
ريم: ماشي اواعيكم
خلود: ليش شو مستوي... يدوه فيها شي؟
ريم: لا مافيها شي
خلود: عيل اكيد ابويه
ريم: لا
خلود: اميه؟
ريم: لا لا لا
خلود: واشحقه تواعينا عيل الحين
ريم: خستن من كثر الرقاد... يلا نشن عاد
خلود: انتي صاحيه و لا شو
ريم: شو تشوفيني
خلود: صدق انج مدحوبه... توها الساعه سبع وين تبينا انش
ريم: شو تتحرن عماركن في البلاد... يا ماما هاي اجازه ولازم نقضيها في شي مفيد
خلود: يمكن تجلبين ويهج الحين.... ( وجان تصك الباب في ويه ريم)
ريم: ايه انتي.... شو هالحركات بعد... قومي يالله... حمدووووووووووووووووووه .. نشي ... شو هالحاله.. احنا يايين نستانس هب نرقد
ام عمر: ريمو....... ريمووووووووووو... شو هالزعيج بعد
ريم: اواعيهن
ام عمر: وبلاج محتشره
ريم: محد طاع ينش و الوقت متاخر
ام عمر ( تصد صوب الساعه): تخبلتي ... روحي ارقدي يالله
ريم: متى تبون تنشون عيل .. الساعه 1 الظهر
ام عمر : بسج من هالزعيج.. ابوج راقد... لمي ثمج يالله ( ودخلت الحجره)
عالساعه 9 الكل نش.... و حصلوا ريم متفيزره جدام التلفزيون و اتجلب في القنوات
ريم: تو الناس
ام عمر: حشا ... ينيه..
ابو عمر: بلاج محتشره من صباح الله خير
ريم: اواعيكم انزين
ابو عمر: يا بويه حد ينش الساعه 7 الصبح.. وين تبين تظهرين في هالوقت
ريم: نتريق تحت
اليده: هاي البنيه هب طبيعيه.... ينت و اقعدت
ريم: انزين يوعانه
حمده: ابويه نتريق تحت؟
خلود: فكره... خلنا نتريق تحت...
ام عمر: وينها عذوب
خلود: اظن راقده
ابو عمر: انزين حد يواعيها عسب ننزل تحت
ريم: ثوااااااااااااااااااااااااااااااااااااااااني
ونزلوا يتريقون تحت... و ماشاء الله الفندق تقريبا كله عرب.... جنهم في البلاد .. يلسوا يتريقون و طبعا الريم اقنعتهم يتمشون شوي ... ظهروا يتمشون برع بس مابتعدوا عن الفندق... عسب مايضيعونه... مروا حذال الحديقة .. قعدوا فيها و عقبها وردوا الفندق على الساعه 12..
في الفندق
ام عمر: بو عمر... ماتصلت في عيالك اطمنهم
ابو عمر: اتصلت بفيصل...
ام عمر: شو حالهم؟
ابو عمر: بخير ...
ام عمر: و عمر
ابو عمر: بلاه بعد
ام عمر: مانشدت عنه
ابو عمر: لا
ام عمر: مادري متى بتحن عليه
ابو عمر: يوم بيعتدل و بيتغير حاله هذيج الساعه بتغير معاه
اليده: والله محد مخرب عمر غيركم انتوا... هذا عمر مايباله الا العين الحمرا..
ام عمر: بسير اتصلبه
ابو عمر: شو بتقوليله
ام عمر: ويديه انا... بطمن على ولديه
ابو عمر: كيفج....
ام عمر نشت صوب التلفون وشافت حمده ترمس محمد
ام عمر: ماخلصتي... عنبوج من ساعه ترمسين
حمده ( وهي تصاصر امها): بصك الحين
ام عمر بسرعه يالله
حمده صكت عن محمد و جان تناول السماعه امها
ام عمر: اذا بتمين دوم جيه بخليه ابوج يمنعج ترمسينه
حمده: اشعنه
ام عمر: الناس تسلم و تتخبر عن الحال وبس... وانتي لا ...
حمده: يعني هو يسولف .. اقوله لوسمحت رمستك وايد... صك التلفون
ام عمر: مادري متى بسلم من لسانج الطويل هذا... ذلفي يلا
حمده: انزين
حمده: بلاها امايه معصبه
خلود: منو غيره السبب هذا عمر...
حمده: وتحط حرتها عليه
عذابه: والله صدقها اميه... انتي الصراحه وايد زودتيها
حمده: شو سويت بعد....
ريم: انا مستغربه من شي
خلود: شو
ريم: كيف ابويه سمحلج ترمسين محمد
حمده: ريلي انزين
ريم: حبيبتي انتو الا مالجين وبس... والعرس بعده
عذابه: حتى انا مستغربه....
حمده: لا تستغربن .. ريلي يعني مافيها شي
ريم: قلنا ريلج بس هب جيه عاد
حمده: ريموووو..... يمكن تغيرين السالفه
ريم: ان شاء الله..... وين بنسير اليوم
عذابه: مادري ....
ريم: ابوووووووويه
ابو عمر ( وهو مندمج يطالع التلفزيون): عيونه
ريم: وين بنظهر اليوم
اليده: وين تبين تسيرين بعد... تراج اليوم حطي لين ماقلتي بس
ريم: لا حوووول ... حمدوووه شوفي شغلج
حمده: يدوه فديتج... لازم نظهر.. ترانا يايين نغير جو... المفروض نظهر هب نحبس عمارنا هني في الحجره... وبعدين يالغاليه المفروض انتي اطالعين البلاد هاي.. و تشوفين الناس و تتمشين ..
اليده: انزين.. بس عاد وين بنسير
ابو عمر: اتريوا لين مايي الريال
اليده: أي ريال بعد
خلود: هيه... المرشد السياحي
اليده: أي مرشد بعد
عذابه: هذا اللي يدلينا الاماكن هني
اليده: ويديه.. بنركب ويا غريب
ريم: مافيها شي يدوه.. عادي
حمده: انزين ابويه متى قال بيي
ابو عمر: باجر الصبح
ريم: لا حووووووول.. يعني اليوم ماشي ظهره
والصوب الثاني من الحجره كانت ام عمر يالسه اترمس ولدها عمر
ام عمر: عمر... لا تعورلي قلبي اكثر عن جيه
عمر: والله انتوا اللي مكبرين السالفه...
ام عمر: ماتشوف حالتك انت.... عنبوك ماتستحي .. ماتقول بنشد عن والديه ولا عن خواتي
عمر: اتخبرت فيصل عنكم
ام عمر: ابوك الحين زعلان عليك
عمر: وليش يزعل... المفروض انا اللي ازعل.. ما كلف على خاطره يساعدني يوم بنت اخوه سوت سواتها... دومه ضدي... حتى لو غيري غلطان يوقف ضدي
ام عمر: هاي بنت عمك
عمر: اتهبي الخايسه... لا تبين طاريها مره ثانيه
ام عمر: يا عمر عيب اللي تقوله هذا.. مهما كان هاي في يوم كانت حرمتك و بعدها ام عيالك
عمر: ماعندي عيال... وبعدين خبري ابويه مايعطيهم بيزات ولا شي...
ام عمر: خاف ربك.. هذيله عيالك
عمر: عيالي بصرف عليهم يوم بيعيشون عندي... دام امهم راكبه راسها وما تبا ترد خلها تصرف عليهم
ام عمر: والله لو سمعك ابوك مادري شو بيسوي
عمر: اباه يعرف...
ام عمر: الله يهديك
عمر: اميه لا تزعلين عليه... بس انتي ماتدرين شو اللي فيه... محد فيكم يدري شو اللي احسبه... تتحرون ماعندي قلب و ماحس بشي... الهنوف كسرتني..
ام عمر: انساها... يوم هيه ما تباك لا تلحقها
عمر: اللي سوته هب شوي... وصدقيني مابنساه... و بتشوفون
ام عمر: قلتلك الف مره مالك خص فيها...
عمر: ما عليه... يالله برخصتج... سلمي عليهم
ام عمر: وداعة الله
عقب ما صك عمر عن امه.. تم يذكر اللي صار بينه و بين الهنوف اخر مره... عمر تغير وايد .. ما عاد شرات الاول... حس انه كل شي فيه تهدم... حس بمذله عمره مامر بها في حياته... ولا بعد من منو... من الانسانه اللي نزل راسه لاول مره لها...
وجان يتصل بواحد من ربعه..
عمر: مرحبا السااااع
حمد: مرحبا ملاااااااييين
عمر: اشحالك
حمد: بخير ربي يعافيك.. العلوم من صوبك..؟
عمر: والله ما من علوم... يا حيا الله بوشهاب
حمد: الله يحييك و يبجيك...
عمر: بغيت انشدك اذا تعرف رقم عبدالله اللي يشتغل في وزارة التربية
حمد: ممممم.... مادري والله... بطالع وبردلك خبر
عمر: اذا ماعليك اماره حاول تييبلي رقمه...
حمد: خير ... بغيت شي؟
عمر: بغيته في سالفه
حمد: خلاص فالك طيب..
عمر: فالك مايخيب.. يالله نشوفك عيل
حمد: ان شاء الله..... يالله وداعة الله
عمر: الله يحفظك.....
ويلس عمر يفكر.... يفكر كيف بيكون ردة فعل الهنوف عقب اللي بيسويه...... و جان يعلي على صوت المسجل
الروح دايم الى المحبوب مشتاقه شوق الذي يشتكي من بعد معشوقه
واذا تذكرت وصله و ساعة فراقه يفز قلب يدل للقضي شوقه
وتهل من ناظري عبرات دفاقه على الذي منفرد في حسنه وذوقه
خل تميز جماله و فاقت اخلاقه مهما وصفته تعدى الوصف و يفوقه
وجان يتصل بها...... طبعا اتصل في بدوور
الجزء الرابع والعشرين
سويسرا... الصبح
قعد ابو عمر مع اهله عند الريسبشن تحت يتريون المرشد السياحي...
ريم: ابويه نحن جاهزين
ابو عمر: انزين اترين الريال لين مايوصل
ريم: أي ريال بعد... اخاف الا بتغير رايك شرات قبل؟
ابو عمر: افا عليج يالريم... اصبري شوي والحين بيوصل
ام عمر: ريموووو ان ماسكتي ترى والله ماخليكن تظهرن
ريم ( وهي نافخه ثمها): انزين
حمده: ابويه..... اظنه وصل
فضل: السلام عليكم
ابو عمر: وعليك السلام والرحمه
فضل: السيد عبدالله القبيسي
ابو عمر: هيه نعم..
فضل: معاك فضل محمود .. المرشد السياحي
ابو عمر: حياك الله...
فضل: بستسمح منك يا اخ عبدالله.. بس تاخرت كرمال الزحمه
ابو عمر: افا عليك.. مايحتاي تستسمح
ريم: ابويه... يالله
ابو عمر: يالله توكلنا على الله
وركبوا مع المرشد السياحي اللي اجرلهم سياره خاصه... وفي السياره بدت الظرابه.. اللي تبغي تسير المحلات تشرالها و اللي تبا تسير الحديقه واللي تبا تحوط في السناتر...
اليده: لا حول... عيزتوني تراكم
ام عمر: ماعليه يا اميه.. الحين بنوصل
آخر المواضيع
الجزء [11] من قصة أحبك لو بغيت إنساك مقدر 
