الجزء [13] من قصة أحبك لو بغيت إنساك مقدر


	1


	الجزء [13] من قصة أحبك لو بغيت إنساك مقدر
	08-17-2006, 06:49 صباحاً
	في الصاله يلست الريم مع ابوها و امها ويدتها ... ابو عمر كان يرمس فيصل... ابو عمر: الله يخس ابليسك يا فصول... فيصل: ههههههههههههههههههه.. شو اسويلك يعني ... انت روحك ماتعرف شو تقول... من ساعه ماسك السماعه و ماتعرف شو تقول.. خساره بيزات عالفاظي ابو عمر: انت وشلك... اخاف انت اللي تدفع فيصل: هيه نعم انا.... انتو شو عليكم... مسافرين احلى مكان و ساكنين احسن فندق.. وانا اللي اصبح الصبح اسير الدوام و اجابل الشغل و اكرف ليل نهار عسب ايمع لكم هالبيزتين ابو عمر: بس بس ... عورتلي قلبي فيصل: والله ابو عمر: هيه والله فيصل: انزين تراني اتمصخر . ابو عمر: هالمشكله... تعورلي قلبي عالفاظي فيصل: هههههههههههههههههههه.... ابو عمر: بلاك تضحك فيصل: قول امين ابو عمر: شو ؟ فيصل: قول اميـــــــــــــــــــــــــــــــــــــــــــــــ ــــن ابو عمر: امين فيصل: الله لا يحرمني منك يا بو عمر ابو عمر ( والدمعه في عينه): ادري اكيد وراك شي فيصل: لا والله... بس الصراحه تولهت عليك بو عمر ( وهو يحاول يغيرالموضوع): انزين شحالهم عيال عمك؟ فيصل: بخير ..يسرك حالهم ابو عمر: وخليفة؟ فيصل: خليفة مادري بلاه هاليومين ابو عمر: خير ... شو فيه؟ فيصل: والله علمي علمك ... متغير مادري من شو ابو عمر: يمكن مضايج من شي فيصل: مادري.... انت الصراحه يابويه السبب ابو عمر: انا؟ فيصل: هيه انت... عنبوه الريال ذليتوه ذل ... ابو عمر: عن شو ترمس؟ فيصل: انت تدري انه خليفه خاطره في عذابه و هالرمسه من زمان... بس انت الله يهديك اللي دوم تاجل الموضوع ابو عمر: بس هو ما رمس و لا قالي فيصل: تعب من كثر ما رمس... بس انت اللي ماتعبره ابو عمر: لا والله .. لا رمس و لا شياته.. و بعدين الكل يدري انه محد بياخذ عذوب غير خليفه... فيصل: يوم انه السالفه جيه اشعنه اطولونها ابو عمر: يوم بنرد يصير خير... خله يطلبها و انا بشاور ختك فيصل: شو تشاورها بعد... عكيفها هو... لا تشاورها ولا شي.... ابو عمر: انزين ماعليه.. يصير خير فيصل: بنشوف ابو عمر: ............... فيصل: شو هب ناوي تصك... ولا عايبتنك سوالفيه ابو عمر: اشحاله اخوك؟ فيصل: بخير.. جيه ماتصل ابو عمر: ها .. مادري مادري... يمكن اتصل .. ماعرف ماعرف... يالله فامان الله فيصل ( وهو مستغرب): مع السلامه فيصل استغرب من كلام ابوه.... حس بضيج يوم عرف انه عمر ماتصل فيهم ولا نشد عنهم... حس بقهر ابوه و حزنه يوم تخبره عن عمر...وفي نفس الوقت.. كان معصب بسبة خليفة... خليفة تغير عليه من يوم ما رمس عمر... وفيصل طبعا ما يدري بشي.. اتحرى انه خليفه مضايج بسبة عذابه ... وقرر اول ما يرد البيت يتصل بخليفة .. يوم دخل الصاله شاف عمر... فيصل: السلام عليكم عمر كان يرمس بدور و أشر على فيصل عسب يترياه.... عمر: اوكي... برمسكم خلاف... يالله مع السلامه فيصل: ترمس منو؟ عمر ( استغرب من سؤاله): وانت اشلك؟ فيصل: عنبوه بدال ماترمس هالاشكال .. اتصل في والديك و اطمن عليهم و على خواتك عمر: أي اشكال بعد.. وانت شو عرفك ارمس منو او اتعرف على منو... وبعدين هلك بخير و بنعمه و عافيه و ما عليهم شر فيصل: ما بيستويبك شي جان رفعت السماعه و سلمت على ابوك عمر: انت شو مشكلتك... ابويه قالك تقولي هالرمسه؟ فيصل: محد قالي... بس شو اسوي بالضمير اللي يانبني ليل نهار وانا اسمع ابويه دوم ينشد عنك عمر: ضميرك هذا فره في البحر لانه ما بينفعك بشي فيصل: بلاك عمر... ليش حالك انجلب جيه... عنبوه ها كله لانه بنت عمك ما بغتك عمر ( وهو معصب): لا تطريها مره ثانيه فاهم... وبعدين انا ما تغيرت لا بسبتها ولا بسبة غيرها فيصل: هيه واضح.... عمر: شو قصدك؟ فيصل: الصراحه انا ما شوفك اتغيرت الا يوم رفضتك الهنوف عمر: ومن قالك انها رفضتني ... اصلا انا ما طعت ارجعها الا عسب ابويه و اميه.. ولا انا ما فكرت في يوم اردها فيصل: تخاف تعترف عمر: فيصل.... انت مالك خص... و لا تدخل في شي ما يخصك.. و الهنوف هاي ماريدك تطريها... فيصل ( ما اتريا لين ما يخلص عمر كلامه): بسير ارمس خليفة... عمر: هيه اكيد بتسير ترمسه... تراك تبديه على خوك... بدال ما توقف معايه توقف مع غيري فيصل( وهو مستغرب): شو تقول؟ عمر: سلامتك فيصل: ترى خليفة احسن عني و عنك عمر: عنك هيه.. بس عني يخسي الا هو.... لو فيه خير جان ما ياب الرمسه لنا... لو يستحي جان ادب خواته ( جان يظهر عنه) ((( قله وفقه بغيري .*. واني رحت في شري و خيري .. له مصيره ولي مصيري .. لا يعلقني بدربه))) فيصل تم مستغرب لانه ما يدري عن شو يطري عمر... استغرب لانه دخل خليفة في السالفه.. ولا بعد طرى خوات خليفة... و جان يرن تلفونه... فيصل: الو... الهنوف: السلام عليكم فيصل: عليج السلام و الرحمه الهنوف: اشحالك فيصل؟ فيصل: بخير ربي يعافيج... منو الشيخه؟ الهنوف: وياك الهنوف فيصل: حيالله بنت العم.... اشحالج ربج الا بخير الهنوف: بنعمه و عافيه... علومك فيصل: والله ما من علوم... اشحال اليهال..؟ الهنوف: بخير و سهاله.. وينكم قطعتنا؟ فيصل: تدري اشغال والله... ابويه مسافر ومحد يجابل الشغل الهنوف: الله يعينك.. شخبارهم قوم عمي و البنات فيصل: يسرج حالهم... الهنوف: سلم عليهم فيصل: يوصل الهنوف: فيصل؟ فيصل: هلا الهنوف: بغيتك في طلبه.. و ان شاء الله ماتردني فيصل: افا عليج... ترى اللي بتقولينه هب طلب.. هذا امر الهنوف: ههههههههههههه تسلم فيصل: يسلم غاليج.. خير .. شو في خاطرج؟ الهنوف: عمر فيصل: بلاه؟ الهنوف: بغيتك ترمسه فيصل: عن شو؟ الهنوف: بس هالرمسه اباها اتم بيني بينك فيصل: شو السالفه؟ الهنوف: عمر الصراحه ملعوزني... فيصل: بلاج سكتي... كملي الهنوف: عمر انت حسبة اخويه.. وانا يوم فكرت اخبرك بس لاني حسيت انك الوحيد اللي بتروم تساعدني فيصل: انزين انتي خبريني عاد الهنوف: اللي بيني و بين اخوك انتهى من زمان... بس الظاهر هب راضي يقتنع.. اول شي تم دوم يتصلبي و يواجعني و يسبني .. سكت عنه و ماقمت ارد عليه... وعقبها تم ييني الشغل و ماتصور شقايل انفضحت بين الموظفين و الموظفات... وفوق هذا كله يوزع رقميه عند ربيعاته عسب يتصلني و يخبرني سوالفه.. وها كله و محد من هليه يعرف... ما خبرت لا اميه ولا حتى خليفه بس عسب ما تكبر السالفه... و صدقني يا فيصل كل اللي صار ما يهمني ... خله يسوي اللي يبغيه... بس دخيلك قول له يبتعد عني و عن هليه... بستحمل منه أي شي الا انه يشوه صورتي عند اخويه... هب من حقه يظهر رمسه عليه.. مهما اللي صار بينا تراني بنت عمه... و المفروض قلبه يعوره عليه ولو شوي... المفروض هو اللي يستر عليه هب يطلع عني اشاعات... فيصل: واشحقه ما قلتيلي من قبل؟ الهنوف: مابغيت السالفه تكبر...فيصل ماريدك تظارب معاه او انكم تزاعلون بسبتيه... اللي اطلبه منك ترمسه بس.. قوله يبتعد عني و عن دربي... قوله خلاص انتهى اللي بينا و اللي خلقني خلق الف غيري... عنده بدال الوحده عشر.. اشحقه يلعوزني ... فيصل .. دخليك ترمسه.. والله تعبت.. انت ماتعرف شو اللي يسويه عمر فيه... انت ادرى بسوالفه و عمايله... وتعرفه عدل وتعرف اسلوبه و حركاته... خله يبتعد عني... لا يعلقني معاه اكثر عن جيه... فيصل: ما عليج منه... انا برمسه وما بيصير الا كل خير الهنوف: ماوصيك هالرمسه اباها اتم بيني و بينك فيصل: ان شاء الله الهنوف: مع السلامه فيصل: الله يحفظج فيصل انقهر وايد من عمر و من حركاته.. تم يفكر و عقبها عرف ليش خليفة اتغير هاليومين.... وجان يتصل بعمر عمر: الو فيصل: وينك؟ عمر: خير؟ فيصل: خبرني عاد وينك؟ عمر: ساير بوظبي فيصل: ومتى بترد؟ عمر: ليش؟ فيصل ( وهو معصب): اسمعني عاد... اذا خليفة سكت تراني انا ما بسكتلك عمر: بلاك؟ فيصل: اونك ماتدري.. انت ماتستحي ... عمر: فيصل ارمس عدل فيصل: اسمعني عدل... والله ان يزت عن سوالفك ويالهنوف لا يوصل خبرك عن ابويه ... عمر: اها.. بلاها بنت عمك؟ فيصل: عرفت حركاتك الخايسه... لو كانت ذرة رجوله جان ما سويت اللي سويته عمر: فيصل ثمن رمستك فيصل: ترى هالرمسه اللي تيوز لك... انت ما تستاهل حد يرمسك بادب.. لو تخاف ربك جان ما لعوزتها ولا فريت عيالك عمر: كمن مره اقولك لا تدخل في شي ما يعنيلك... ماتفهم فيصل: لا ما فهم... بستوي شراتك.. مافهم... يوم يقولولك ابتعد عنها ما تسمع تراك... ياخي البنيه ماتبغيك .. عافتك خلاص.. ماتواطنك... ما تبغي تعرف شي عنك.. ما تفهم.. ما تباك.. غصب هو... لازم تحشرها و تاذيها عمر ( وويهه محمر من الغيض): لو ما تباني مره انا مابغيها الف مره... جيه ماشي غيرها في الكون فيصل: روحك قلت... شي غيرها. انزين اشعنه عيل تاذيها... عمر: كيفي... الله اباه بسويه.. وانت مالك خص.. وهاي اخر مره اقولك ياها فيصل: انزين على راحتك.. وانا بعد هاي اخر مره اقولك ياها.. لا تتدخل في الهنوف ولا في هلها... وان صار شي عقب.. ابويه اللي بيتفاهم معاك ((( وجان يصك التلفون في ويهه &#61514 )) عمر انقهر من كلام فيصل... اول مره يكلمه بهالسلوب... عصب وايد يوم عرف انه الهنوف هي السبب... وجان يرن تلفونه وكانت بدور اللي متصله... عمر: الو بدور: هلا حبيبي عمر: اهلين بدور: اشحالك؟ عمر: بخير بدور: بلاك معصب.. شويه وبتظهرلي من السماعه عمر: تراج متفيجه اليوم بدور ( وهي مستغربه من طريقته): شي فيك؟ عمر: مافي شي بدور: عيل ليش ترمسني بهالسلوب عمر: قلتلج ما فيه شي... بدور: انزين خلاص.. بسم الله تقول جبريت عمر:......... بدور: حبيبي خبرني عاد بلاك... عمر: انتي ما تفهمين.. اقولج ما فيه شي... عبيطه ولا شو... اقولج ما فيه شي يعني ما فيه شي بدور انصدمت يوم سمعته يفتن عليها.... و ما رامت تنطق بحرف عمر: تراني مشغول...يلا باي ( وصك في ويهها التلفون) وجان يتصل بعبدالله ( اللي يشتغل في وزارة التربيه و التعليم) عمر: هلا عبدالله عبدالله: هلا ملايين و لا يسدن عمر: اشحالك؟ عبدالله: بخير يسرك الحال عمر: ها بشر؟؟؟ عبدالله: والله الموضوع صعب شوي عمر: لا تقول عبدالله : ترى هالشي هب بايدي... و لو ان الموظفه شغلها هب زين ها شي ثاني.. بس المشكله ما شفنا عليها شي عمر: بس يا عبدالله هالشي وايد يهمني... عبدالله: والله ماعرف شواقولك... بحاول بس ماوعدك بشي عمر: والله تباه مني تراني حاضر.. و مابقصر بشي.. ترى هالموضوع وايد يهمني.. عبدالله: ما يصير فالك الا طيب عمر: فمان الله.... عمر حس انه ارتاح نفسيا عقب ما رمس عبدالله.. وخاصه انه اللي بيسويه بيريحه و بيخليه ينتقم من الهنوف مثل ما يتصور.. وجان يذكر بدور وكيف رمسها باسلوب وقح... ورد اتصلبها و اعتذر لها كالعاده.. و طبعا وصل بوظبي عسب يشوفها..... ثاني يوم .... سويسرا... العصر.. اليده: ريم .. ريــــــــــــــــــــــــــــــــــــــــــــــــ ـــــــــــــم؟ ريم ( وهي تتعدل في الحجره): ها اليده: يون بتسيرين انتي ... الا هو مستشفى ريم: انزين الحين بخلص اليده: انا مادري شو اللي خلاني اسير وياها ام عمر: ترى ابو عمر قاعد ويا شواب اتعرف عليهم .. حليله ليه يستانس شوي.. و بعدين ترى الريم وحمدوه و عذوب بيسيرن وياج اليده: هاللي مزيغني... يوم انه ريمو معانا امحق وصلنا الدختر ام عمر: ما عليج منها.... ريموووو.... ترى والله ما بخليج تسيرين وياهن.. حمدوه قومي زقري ختج حمده ( وهي حاطه ريل على ريل و يالسه تقرا المجله): بتي الحينه ام عمر ( وهي اطالع حمده بنظره): عذوب فديتج طاعي ختج.... عذابه: ان شاء الله ام عمر: انتي ما بتوبين عن حركاتج هاي حمده ( بكل برود): نعم امايه ... ما سمعتج ام عمر: اقول مابتيوزين عن حركاتج حمده: ليش شو سوين ام عمر: خلود تقولي انه محمد خاس من كثر ما اتصل و انتي ماطعتي تردين .. ماتخبريني ليش؟ حمده: مممممممم.... مابغي ارمسه اليده ( فاتحه ثمها و مستغربه من كلام حمده) ام عمر: واشعنه ما تبين ترمسينه. حمده: مادري والله.. مالي بارظ ام عمر ( وعيونها تلبق): اتخبلتي انتي حمده ( ببرود): لا والله .. ما فيه شي اليده: يا مثبت العقل و الدين... قومي طاعي بناتج الخبايل.. حشا.. مابوصل الدختر جيه ريم: انا جاهزه ام عمر: وشو ها اللي حاطيتنه على ويهج ريم: ماشي ام عمر: روحي اغسلي ويهج يالله ريم: بس ام عمر: بسرعه ولا ما خليج تروحين ريم: اميييييييييييييه اليده: خليها انتي بعد.. بتاخر انا عن الدختور... يلا انجعلن جدامي وظهرن عذابه و حمده و الريم مع يدتهن المستشفى مع المرشد السياحي ريم: يلا حمدوه.. ادخلي ويا يدتج داخل عن الدكتور حمده:و ليش انتي ما تدخلين؟ ريم: لانج انتي الكبيره حمده: لا والله عذابه: بسكن عاد... حمده: اوكي.. بدخل.. ريم: ونحن بنسير الكافتيريا تحت حمده: لا والله عذابه ( وهي اطالع ريم): ليش نسير؟ ريم: شو بنسوي هني.. بنسير نترياهم تحت عذابه: اها و نزلن الريم وعذوب الكافتيريا... و استغربن يوم شافن العرب هناك... ريم: ماكثرهم العرب هني عذابه: هيه والله ريم: غربيه ما خلينا مكان ما سرناله و ماشفنا كثر اللي هني عذابه: صدقج.. ترى اغلبهم يايين علاج ريم: اذا جيه كل يوم بودي يدوه المستشفى عذابه: ههههههههههه... والله انج متفيجه ريم: شوفي شوفي اللي هناك... حلو عذابه: لا اطالعينه جيه... بيلاحظ ريم: اتامل خلقة ربج.. حرام عذابه: لا طبعا ... من قال حرام... و تاخروا البنات لين ما حل الليل... حمده: تاخرنا اليده: حشا... زحمه.. اكيد خستن من كثر يلستن عذابه: هيه والله ريم: لا لا عادي... اذا تبيني يدوه كل يوم بييبج اليده: انتي لو يقولوج اظهري عقي الزباله بتستانسين عذابه: هيه والله (( خذاني الشوق لعيونك و جيتك طرالي شي ما عمره طرالي على بالي ولا لحظه نسيتك اسولف فيك من حالي لحالي .. ))) وصلوا الفندق ريم: يدوه شو رايج نتعشى تحت اليده: حمدوه سانديني شوي... خليني ارفع عصاتي و اظرب مسودة الويه عذابه + حمده : هههههههههههههههههه ريم: ليش انزين.. ماقلت شي اليده: توني راده من الدختر.. ماروم امشي خطوتين وتبيني اتعشى هني جدام الخلق ريم: ما فيها شي.. خبرت ابويه و ما قالي شي حمده: يدوه اتعشي معانا هني اليده: مافيه .. روحي تعبانه.. اتعشن رواحكن.. انا وامج بنقعد فوق و نتعشى على راحتنا حمده: ريمو... يلا بسرعه وصلي يدتج و ازقري خلود .. انا و عذوب بنترياج في المطعم عقبها مشت حمده و سحبت عذابه وياها.. و ما خلت ريم ترد عليه... وريم غيظت على حمده.. وتمت اطالعها بنظره اليده: ريمو.. ريموو و الصمخ..يلا امشي.. ريم: ان شاء الله... ريم تمت متلعوزه... من صوب تمسك يد يدتها و الصوب الثاني تمسك شنطتها و الدوا ...ركبت اللفت وما انتبهت على اللي واقف حذالها في اللفت... ووصلت مع يدتها الطابق اللي فيه جناحهم... و يوم تبطل اللفت.. طاحن اغراضها .. اليده: لا حول.. شو اللي بلاني فيج ريم: يدوه عاد.... ماعرف شو امسك اليده: لمي اغراضج يالله... ويديه انا.. حتى دوايه فريتيه ريم: والله ما فريته.. روحه طاح اليده: طاحت الطوفه عليج... ريم: أي طوفه... وتمت اليده تتحرطم لين ما وصلت الغرفه.. و ريم يلست اتيمع اغراضها... وعقب ما شلت كيس الادويه... وقفت و يلست ادور اذا شي طاح بعد... وجان تسمع صوته .........: تفضلي شنطتج ريم ( وهي يالسه اطالع اذا نست شي ..): شكرا ..........: العفو جان تاخذ اغراضها و مشت صوب الغرفه... و عقب انتبهت انها ما شافت اللي ناولها الشنطه... و ردت صدت ورا ... و لمحته بسرعه ... بس ردت صدت عسب تتاكد من شي.. لكن اللفت صك... دخلت الجناح.... ام عمر: بلاها يدتج معصبه؟ ريم: ها.. مادري ام عمر: من اللي يدري عيل؟ ريم: مادري خلود: بلاج ريمو ريم: مادري ام عمر: وينهن خواتج ريم: ما... اوه.. تحت.. بيتعشن تحت ام عمر: واشحقه رديتي ريم: اخبر خلود خلود: يالله.. ثواني و بجهز ظهرت خلود مع الريم... و طول لوقت و ريم سرحانه بللي شافته في اللفت.. هب متاكده اذا كان هو لا لا...((( يا ربي .. ليش اتخيله.. يمكن من كثر ما اتخيله يتراوالي في كل مكان...بس نفس ملامحه.. حتى صوته))) خلود: ريماني فيج شي؟؟؟ ريم: لا خلود: واضح.. ونزلن من اللفت.... و مرن عالريسبشن عشان يوصلون المطعم... و جان تشوفه.. هالمره شافته عدل.... حتى هو ما نزل راسه... تم يطالعها بنظرات. كلها حب و شوق.. وهي من غير وعي تمت اطالعه بعد... طبعا مستغربه.. اخر شي توقعته... ما توقعت انه بيلحقها لين هني... و جان تشوفه يهمس بشفايفه ((( تولهت عليج))) ((انا وشلون اعيش ان ما لقيتك تذكرت الغياب و ضاق بالي * تعال و قلبي المشتاق بيتك.. فرشت الورد بقدومك يا غالي))) منو تتوقعون.....؟؟؟؟؟ الجزء السابع و العشرين ((كم سهرت الليالي و كم ليلة سهرتك....وكم ليلة خيالك ناض في وسط عيني كم قلي دخيلك بالدموع انتظرتك.....كم قلي تفضل كم صدك يجيني...)) سويسرا ... الفليل دخلن ريم و خلود المطعم .. ريم حالتها حاله عقب ما شافته ..(( اكيد عرفتوه )).. اخر شي توقعته انها تشوفه هني (( شو اللي يابه هني ... هذا شو عرفه اني مسافره سويسرا... يا ويلي انا .. اكيد عقب ما دل مكاني بيتم يلاحقني .. شو اسوي يا ربي... لا لا ... انا ما بعبره ولا حتى بعطيه ويه.. هالاشكال اصلا ما تنعطى ويه.. بس الصراحه هو حلو .. و كل شي فيه حلو... ريمووووو الغبيه يوزي عن خرابيطج... هذا جذاب و صايع و ضايع شرات غيره ..)) خلود: ريماني .. تشوفين خواتج؟؟؟ ادور عليهن و ما شفتهن لين الحين.. ريم طبعا ماردت على اختها لانها في سرحانه في عالمها الثاني... * عالم سيف ... خلود: ريمو... ( وجان ادزها بجتفها) ريم: بسم الله.. بلاج؟ خلود: انتي اللي بلاج.. ارمسج و انتي معطتني بو لابس ريم: انزين ما سمعتج خلود: عنبوه من بعدي عنج... ريم: انزين انزين ... هب وقت ظرابه الحين.. اشحقه واقفين.. خلنا نيلس خلود( اطالع ريم بنظره ): اشحقه واقفين؟؟ لانه يا ذكيه ادور خواتج و لين الحين ما شفتهن ريم: اوه... هذيج عذوب.. سارن صوب الطاوله اللي فيها عذابه عذابه: بلاكن واقفات جيه ... تقول نواطير ريم: هههههههههه... هاي ختج اللي موقفتنا خلود: لا والله... يوم انج تشوفينا جان اشرتي علينا عذابه: ما يا هالشي في بالي خلود: وينها حمدوه؟ عذابه: دخلت الحمام ريم: ما مدالها توها واصله.. اشحقه دخلت الحمام؟ عذابه: تقول بتعدل اللوك تبعها خلود: انتن الصراحه ماصخات... خلنا نطلب .. عسب نرد بسرعه قبل ما تفتن علينا اميه وصلت حمده حمده: شرفتن خلود: هيه حمده: يلا نطلب عذابه: اوكي خلود: ريم.. شو تبين؟ ريم ( سرحانه): مادري حمده: شو ماتدرين... اوكي انا بطلب عنج ريم: ولا اقولكم.. مابغي اتعشى عذابه: هب جنج كنتي حاشرتنا عسب تتعشين ريم: كنت .. فعل ماضي خلود: انزين .. لا تاكلين... اشربي شي ريم: اوكي ريم تمت تتلفت يمين و يسار ... طبعا تتريا تشوف سيف... ارتاحت لانها ما شافته.. يعني اكيد هب ياي يلحقها... لو كان بيلحقها جان دخل المطعم وراهم.... بس املها زال بسرعه يوم شافته داخل المطعم. ...سيف ما لحقها لانه كان توه واصل الفندق... وحط في باله انه بيرقد... بس عقب ما شاف ريم.. دخل حجرته و غير ثيابه و نزل (( يا حبيبي كملت... وصل .. الله يستر ... هذا شو اللي يايبنه هني )) سيف قعد عالطاوله اللي مجابلتهن .. ولا بعد اختار الطاوله اللي مجابله الريم.. و تم يطالعها دون ما ينزل عيونه ولو ثانيه... جنه هب ناوي يضيع ثانيه دون ما يشوفها... ريم (مرتبكه): يوعانه خلود ( وهي تاكل): توج تقولين ما تبين عشا ريم: مادري... يعت الحين حمده (ببرود): على حسب معلوماتي .. انتي ما تاكلين الا اذا كنتي زايغه او زعلانه .. او مرتبكه... ريم: لا .. يوعانه عذابه تمت اطالع الريم... شافتها متوتره و ترتجف... و تحرك ايديها... و جان تشوفها اطالع جدام... صدت عذابه بطالع .. وجان تشوف * سيف الكعبي عذابه: ما.. ما ... مااااااااا ااااااي خلود: بسم الله عليج... بلاج؟ عذابه( عقب ما شربت الماي): غصيت حمده : شو سالفتج انتي وهاي ( تاشر على ريم) عذابه: غصيت.. حرام حمده: لا هب حرام... ويلست عذابه اطالع ريم.... ويرمسن بعض بالاشارات عسب محد يفهم... عذابه : هو ؟؟؟ ريم غمضت عيونها: هيه حمده: شو السالفه؟ ريم: ماشي خلود: اشحقه عيل تاشرن على بعض عذابه: عسب محد يسمعنا خلود: لا والله... واشحقه ما تبين حد يسمعكن ريم: عسب ما نزعجكم حمده: هذا يسمونه الايتيكيت... عذابه: هيه هذا هو عقب ما تعشن... ريم: يلا نرد... عذابه: اوكي حمده: وين وين... تو الناس ريم: تعشينا و خلاص... خلنا نروح حمده: انا الصراحه خاطري في أي سكريم خلود: حتى انا... بناكله عقب بنروح ريم: هذا وقت أي سكريم.. تاخرنا... خلود: غريبه... ماحيدج تحبين اليلسه في الغرفه ريم: الحين تعبانه و ابغي ارقد حمده: انزين ما عليه... بناكل الاي سكريم و بنروح ريم: بسرعه.. ريم خاطرها ترد بسرعه بس عسب تفتك من نظرات سيف... طول الوقت و هو يتمنظر فيها.. حتى انه كل اللي حوله حس بهالشي.... بس طبعا هو ماهتم في حد... همه الوحيد ريم **.. عذابه( وهي تصاصر ريم): بلاه هذا يطالعج جيه ريم: شو عرفني انا ... عذوب ... بطني يعورني... احس اني ماروم اوقف حتى ... عذابه: ما عليج منه... كل الشباب جيه.. ريم: شو قصدج؟ عذابه: هالنوع من الشباب ما ينفع معاهم غير العين الحمره... ريم: شو يعني عذابه: يعني كل ما شفتيه عطيه نظره تبين له انج تحتقرينه و ما تواطنينه ريم: بس انا ما احتقره عذابه: عيل ريم: لا لا... يعني شقايل ... قصدي اني... والله ماعرف شو اقول...ايه انتو يلا عاد.. تاخرنا... خلود: اوكي... يلا ... وظهرن البنات من المطعم.. تمت عذابه تمشي ويا خلود و تسولف معاها... حمده تمشي مع الريم... حمده: بسج عاد ريم: شو ؟ حمده: اذا حس انج زايغه بيتم يلاحقج ريم استغربت ... يعني حتى حمده حست انه سيف يلاحقها ويطالعها من الصبح وصلن عند اللفت... ركبن اللفت بس سيف بعده وراهن... وصلن قبل ما يصك اللفت.. بس ريم بحركه لا اراديه صكت باب اللفت بسرعه.. خلود: ههههههههههه.... والله انج خبله ريم: عسب ما يدخل ويانا عذابه: ما ظنه كان بيدخل حمده: ما عليج منهم.. وصلن الحجره ... و دخلن غرفهن ... ورقدن.. ريم ( وهي منسدح عالشبريه): عذوبه رقدتي؟ عذابه: هيه ريم: عذوب ما صدق اني شفته اليوم عذابه: حتى انا.. هذا شو عرفه بمكانا ريم: مادري والله... عذابه: وايد جريء الصراحه... طول الوقت وهو حاط عينه عليج...ما نزلها ثانيه ريم: ااه عذابه: بلاج ريم: ها.. لا لا ماشي... يلا تصبحين على خير عذابه: وانتي من هله دبي... وزارة التربية و التعليم الهنوف ( وهي ترمس مسؤولة القسم): وانتي ماتدرين شو يبغي مني؟ نوره: علمي علمج... المهم لا تتاخرين الهنوف: ان شاء الله ميثة: خير؟ الهنوف: المدير يبغيني ميثه: ليش؟ الهنوف: مادري... الله يستر.. مادري ليش قلبي مقبوض ميثه: ما عليج... روحي طاعي شو يبغي الهنوف: اوكي دخلت الهنوف عند المدير... ما كملت خمس دقايق و ظهرت عنه... ويهها كان احمر من القهر و الضيق... و هي تمشي مرت على مكتب المسؤولة نوره نوره: بشري... شو يبغي منج؟ الهنوف: ماشي... استقلت نوره: ليش الهنوف: عطاني خيارين... يا اني استقيل او انطرد من الشغل... نوره ( وهي مستغربه): وليش يسوي جيه الهنوف: والله يا نوره مادري... ماعرف شو السالفه.. اترخص الحينه... نوره : وداعة الله دخلت الهنوف مكتبها... ميثة: شو قالج السخيف؟ الهنوف: قدمت استقالتي ميثه: ليش الهنوف ابتسمت لانه الموقف تكرر مرتين.. مره نوره و مره ميثه... وهي روحها ماعندها جواب مقنع لهالسؤال ميثه : شو قالج؟ الهنوف: اول شي تم يرمس عن مؤهلاتي و كفاءتي في الشغل.. و من كلامه حسيت اني ماصلح لهالشغل.. ميثه: بالعكس يالهنوف... انتي شغلج احسن عن وايد غيرج هني الهنوف: المهم... لاحظت من كلامه انه ما يباني اشتغل هني.. و انا الصراحه ماحبيت احط نفسي في موقف سخيف معاه.. قلت استقيل ولا اني انطرد.. ميثه: هو هب من حقه يسوي هالشي الهنوف: والله هو المدير... وما بينلام ميثه : شو بتسوين الحين الهنوف: ماشي .. برد بيتنا ميثه: و الشغل؟ الهنوف: تدرين.. زين يوم اني وردت الشغل.. افتك من مشاكل المدير من صوب .. و من حشرة اخويه من صوب وبعدين ان ما احتاي الشغل.. الحمدلله الخير عندي و هب ناقصني شي... انا يوم اشتغلت بس عسب املي وقت فراغي... بس يمكن هالشي يكون لمصلحتي.... عسى ان تكرهوا شيئا و هو خيرا لكم.. دخلت عليهم نوره... نوره: الهنوف.. بغيتج شوي الهنوف ظهرت من المكتب... عسب ترمس نوره الهنوف: خير نوره نوره: انا استغربت من موقف المدير... و حاولت اعرف السالفه .. وهذا اللي قدرت عليه ( جان تعطيها ورقه صغيره) الهنوف: شو هذا... نوره: السالفه فيها رشوه او واسطه .. والله ماعرف .. المهم انه الشخص الموجود اسمه في الورقه على ماعتقد له يد في الموضوع الهنوف: مشكوره ... بس خلاص السالفه ما تهمني... نوره: العفو ... يلا مع السلامه الهنوف: الله يحفظج ميثه: شفتي اسمه الهنوف: تسمعين رمستنا عيل ميثه: اصواتكن عاليه... الهنوف: ههههههههههه ميثه: انزين بطلي الورقه... الهنوف: ما يحتاي ميثه: ليش؟ الهنوف: لاني عرفته ميثه: شو يعني عرفتيه... الهنوف: يعني عرفت من هو ميثه: بس انتي ما بطلتي الورقه... هاتي الورقه ( جان تمط عنها الورقه) ميثه: عمر القبيسي... منو هذا.. حد من هلكم؟ الهنوف ( وهي منقهره ): يقولون ... يلا مع السلامه.... ركبت الهنوف سيارتها وبعدها منقهره من اللي سواه عمر (( ليش .. ليش ؟؟ .. اااااااه... عمر.. عمر ... عمر.. متى اقدر اعيش يوم .. يوم بس.. من غير مايطري ذكرك في بالي... يااااااااااااالله على قلبك القاسي هذا.. متى بيلين.. متى بتفكر في غيرك قبل ما تفكر في نفسك متى ....)) جان يوصللها المسج.. (( شو رايج بالهديه .. اكيد عيبتج ؟؟؟ لا تخافين غناتي .. مابقصر عليج بشي.. كل يوم لج هديه ..ولا تزعلين )) وطبعا المسج كان من عمر... احتارت الهنوف.. ترد عليه ولا لا ... وقررت انها ترد عليه ولو انه المسج يجرح (( كل ما جيت ارفعك للسما تنزل تطيح... وش اسويلك دام اصلك واطي )) عاد عمر... انجلب حاله.. يوم طرش للهنوف المسج.. شوي بيطير من الوناسه .. لانه اشبع غروره و كبرياءه... بس يوم وصل المسج من الهنوف... شوي و بيكفخ اللي حذاله.. عيونه محمره وويهه منتفخ وحالته حاله... وطبعا كالعاده لازم يتصل بالهنوف و يسمعها كمن كلمه تريح فؤاده... بس هي ما ردت عليه و لا عبرته.. و غلقت تلفونها.... وصلت بيتهم .. وجان تشوف عيالها يلعبون في الحديقه... الهنوف: السلام عليكم ام خليفة:عليج السلام و الرحمه... شو اللي يابج من وقت الهنوف: بس جيه.. تولهت عليكم.. عبدالله.. حبيبي لا تلعب في الرمل ام خليفه: خليهم يستانسون... الهنوف: وينها علايه عيل علياء( وهي ماسكه كيسة حلويات): انا هني.. من يباني وجان يربعون عيال الهنوف .. سلامه: انا اباج عبدالله: انا احبج اكثر عن سلامه.. علياء: ياللوتي انت... ماحيدك تحبني.. هيه اكيد يوم شفت الحلاوه نبض قلبك بحبي عبدالله: قلبي ما يحبج.. والله انا احبج.. عطيني كافي علياء: لا ما بعطيك.... بس بعطي سلامه حبيبتي... سلامه : هيه انا بس علياء: عطيني بوسه اول شي جان تحبها على خدها .. علياء: خيبه... خيستيني.. زين ما بلعتيني ام خليفه: ههههههههههه الهنوف: حرام عليج... احمدي ربج انهم يحبونج علياء: هيه والله.. انتي عيالج ما يحبون حد.. طالعين على ابوهم... ام خليفه: بسم الله عليهم... الهنوف ( تحاول اتغير الموضوع): انزين عطيهم يلا علياء: عبدالله ما بعطيه عبدالله: امااااااااااايه الهنوف: عليو... اصطلبي عاد علياء: ان شاء الله... ها خذ اللي تباه عبدالله( عقب ما خذ الحلاوه): انا اصلا ماحبج. .. انتي محد يحبج .. انتي شريره علياء: انا شريره يا مسود الويه... تعال هني.. والله لا اراويك ام خليفه: خليه في حاله... عنبوج لعوزتيهم علياء: شو اسوي .. روحي في البيت.. محد مونسني... احط حرتيه في عيال الهنوف الهنوف: لاوالله.. علياء: هيه والله الهنوف: ابشرج عيل... كل يوم بجابلج علياء: لا والله.. بتهدين الدوام علشاني.. الهنوف: هيه والله علياء: تتمصخرين حضرتج الهنوف: ماتمصخر علياء: شو هالحب المفاجيء الهنوف: مب عسبج انتي.. عسب عيالي... مابغيج تحطين حرتج فيهم.. ام خليفه: صدقج انتي .. بتودرين الشغل؟ الهنوف: خلاص ودرته ام خليفه: اشحقه؟ الهنوف: احسلي .. وبعدين مابغي خليفه يزعل ام خليفه: خليفه هب زعلان... و بعدين زين سويتي... الشغل ما بينفعج بشي علياء: انزين يالهنوف.. يا اغلى اخت في هالدنيا الهنوف: ههههههههه خير علياء: وين بنسير اليوم الهنوف: وين تبين؟ ام خليفه: قري في البيت... وين تبين تسيرين علياء: لا والله.. هب كفايه حارميني من السفر.. ما تبوني اظهر بعد.. بظهر يعني بظهر الهنوف: فالج طيب....بنسير صحاري العصر.. شو رايج... بنلعب اليهال و منها بنتشرى علياء: لازم اليهال بعد الهنوف: هذيله بيركبون قبلج.. علياء: امري لله... الهنوف: بسير اغير ثيابي عيل.... روحت عنهم الهنوف... طبعا ما بغت تقوللهم انه عمر هو السبب.. عسب ما تزيد المشاكل فيما بينهم... لانها تدري انه لا خليفة و لا حتى عمها بيسكتون لو عرفوا بللي سواه عمر...دخلت حجرتها... و جان تفتح موبايلها... و شافت العشر مسجات من عمر.. وكل مسج احلى عن الثاني . طبعا كل سب و مواجع.. تاكدت انه عمر عمره ما بيتغير... واسلوبه هذا ما بيتغير لو شو ماستوى .... فيصل ( يالس مع خليفه): ياخي بلاك... طفرتبي تراك. خليفة: ليش تتحرطم .. تقول عيوز فيصل: ما تشوف حالتك... طالع ويهك في المنظره. طالع خليفة: هههههههههههه فيصل: اخيرا ضحكت.. حشا ما طاعت تظهر خليفة: تباني استوي شراتك.. على كل شي اضحك فيصل: عيل شراتك انت... شال هموم الدنيا كلها على راسك خليفة:..... فيصل: انزين بسير البيت بتسبح و بغير ثيابي وعقبها بنظهر .. اوكي خليفة: لا لا ... نزلني البيت عقب روح بيتكم فيصل: عسب عمر؟ خليفة: بلاه عمر فيصل: ماتبغي تشوف عمر ؟ خليفة: شو دخله عمر فيصل: ادري شو قالك عن الهنوف خليفة ( وهو مستغرب): شو عرفك؟ فيصل: صدق انك ثور.. عنبوك تصدق رمسته خليفة: ماصدقته فيصل: خليفه انت تعرف عمر عدل.. و ماظن اللي يسويه شي يديد عليك.. و بعدين ياخي طنشه.. خليفه: كم بطنشه... الصراحه خوك زاد عن حده.. و ماظن بروم اسكتله اكثر.. لا تشوفني ساكت لاني خايف منه او انه ماعندي الشجاعه اني ارمسه.. لا والله... بس كل ما اقول بسوي شي... اذكر عمي... ابوك يافيصل هو اللي مربيني عقب حياة ابويه.. و انا ابغي اسوي شي يضايج عمي. فيصل سكت لانه ماعرف شو يرد عليه... يدري عدل انه كلام خليفه صح.. بس شو بيقول .. كيف يبرر عمايل اخوه ... وجان يغير الموضوع فيصل: انزين دوك التلفون.. اتصل في محمد الرميثي خله يينا.. خليفة: ليش فيصل: شو ليش؟؟؟ من زمان ما شفناه خليفة: اوكي


	من مواضيع ورد جوري 0 من تتوقع يفوز في مبارات اليوم 0 غريبه 0 [ رسمياُ ] الدوري الإسباني يستمر على الجزيرة الرياضية لثلاث سنوات 0 ابراهيموفتش يفضل مانشيني على كابيلو 0 صــور تذاكــــر الـ Euro 2008 \|\|


	توقيع ورد جوري

ورد جوري

الجنس :

الدولـة :

سيف البدو: . - السبب: شكراً لجهودكِ الكبيرة

أوسمة العضو: 2

رقم العضوية : 13

تاريخ التسجيل: Apr 2006

الإقامة: قطر

المشاركات : 5,250

المواضيع : 1333

عدد مشاركات اليوم :

نقد عربي: 1,380,122

المصرف: 0

المجموع نقد عربي: 1,380,122
تبرع

نقاط الترشيح : 349

المستوى : ورد جوري ماسي

الـــهدايـا :


	2


	رد : الجزء [13] من قصة أحبك لو بغيت إنساك مقدر
	08-17-2006, 11:45 مساءً
	شاكرة لك عزيزتي ورد جوري استغربت من سيف الحب أعمى الاحداث متطورة تسلم يمينك


	من مواضيع شموخ العز 0 تبون تنصدمون إدخلوا 0 تواقيع رمضانية 0 أدخل وشوف حرفك مع العصافير ^_^ 0 تعالوا شوفوا قصص عجيبه!!! 0 إعصار جونو "GONU"

شموخ العز

عضو ماسي

شمعــة الــبدوو

الجنس :

الدولـة :

رقم العضوية : 2121

تاريخ التسجيل: Apr 2006

المشاركات : 3,190

المواضيع : 134

عدد مشاركات اليوم :

نقد عربي: 1,141,356

المصرف: 0

المجموع نقد عربي: 1,141,356
تبرع

نقاط الترشيح : 201

المستوى : شموخ العز

الـــهدايـا :