الجزء [14] من قصة أحبك لو بغيت إنساك مقدر


	1


	الجزء [14] من قصة أحبك لو بغيت إنساك مقدر
	08-17-2006, 06:50 صباحاً
	خليفه: مرحبا السااااع محمد: مرحبا ملايين ولا يسدن خليفه: اشحالك؟ محمد: حيالله خليفه.. بخير و سهاله... اشحالك انت .. ربك بخير؟ خليفه: بنعمه... وين دارك محمد: شويهات خليفه: اوب.. شويهات .. شو عندك هناك محمد: ماشي والله.. ساير ويا الربع خليفه: هيه... انزين.. هب ياي دبي محمد: والله مادري.. خليفه: تعال بنظهر رباعه محمد: خلاص... برد اتصلبك خليفة: برايك عيل.. محمد: الله يحفظك عيسى: منو ترمس؟ محمد: نسيبي عيسى: فيصل محمد: لا خليفه عيسى: هيه... بلاه؟ محمد: يتخبر جان بنسير دبي عيسى: اها.... محمد: ياخي هاي ذلتنا ذل عيسى: هههههههههههه تستاهل محمد: عنبوه لا يوم ولا اثنينه.. اسبوع عاد عيسى: زين ما ياك محمد: لا والله.. مادري ليش تحقد عليه عيسى: انا... لا والله.. طالع انت شو تسوي .. وعقبها بتعرف محمد: جيه شوسويت عيسى: مول .. ما سويت .. محمد: ههههههههههه... تقصد البنيات اللي ارمسهن.. كمن مره اقولك هذيله الا لعبه.. و ما بيني و بين أي وحده فيهن شي.. انت ما تفهم عيسى: انا اخاف في يوم تندم على اللي تسويه الحين محمد: انت ليش مكبر السالفه... قم نسير دبي احسن.... ((عوضوك بغيابي لا تقول اني وحشتك لا تجامل دخيلك في شعوري عنيني بس يكفي كفايه لا تمادى عرفتك خاين الحب ماله في فؤادي حنيني)) في صحارى مول كانت الهنوف و عيالها و ختها يتمشن في المول... ودن العيال الالعاب... عقبها مرن عند المحلات... علياء: لو يبتي الخدامه وياج جان زين الهنوف: ليش علياء: ما تشوفين عيالج كيف مزعجين... اوف تعبت و انا الاحقهم الهنوف: شو خانتج انتي... علياء: لا والله.... الهنوف... الهنووووووو ووووووف الهنوف: بلاج؟ علياء: ما بتصدقين منو هني الهنوف: منو علياء: طاعي وراج.. الهنوف صدت وراها اطالع... الهنوف: عليووو... هب هذا عمر؟ علياء: هيه... الهنوف: شو هالحظ... قومي خلنا نظهر علياء: لا والله... انا بعدني ما اتشريت الهنوف: برايج عيل.. انا بشل عيالي و بظهر علياء: شو ها... اترييني انزين..الهنوف.. طاعي وقف مع منو الهنوف: منو تقصدين علياء: عمر واقف مع وحده الهنوف كانت تمشي يسرعه بس اول ما سمعت علياء وقفت و جان تصد اطالع عمر علياء: والله انه واقف مع وحده.... طاعي .. يلس معاها بعد.. ما عليه يا عمر.. صدق انه حقير الهنوف ( تحاول تخفي شعورها): نحن وشلنا.. يلا نروح.. علياء: وينه عبدالله الهنوف: توه كان حذالج علياء: مادريبه الهنوف( وهي معصبه): اكيد ما تدرين.. مندمجه اطالعين النااس علياء: الهنوف الحقي... ولدج ساير عند ابوه الهنوف: لا حوووووووووووووووووووووول عبدالله ولد الهنوف انتبه لابوه يوم سمع علياء ترمس ... و جان يروحله.. اما عمر فكان قاعد في الكوفي شوب مع بدور.. و جان يسمع صوت ولده عبدالله: ابويه.. عمر اتصنم مكانه يوم شافه.. يمكن حس باحراج لانه بدور معاه... عقب ماستوعب الوضع.. رد يطالع حوله . طبعا يدور على الهنوف.... و شافها واقفه بعيد.. يت علياء عسب تاخذ عبدالله... سلمت عليهم و جان تمسك عبدالله و سحبته معاها... و عبدالله تم يصارخ لانه يبا يقعد عند ابوه... وعمر ما تحرك .. ولا حتى رام يفتح ثمه... اما بدور فحست باحراج .. و خاصه انه ربيعاتها قاعدات عالطاوله حذالهم.. يعني اكيد شافوا اللي صار.. و جان تقوم و تروح عن عمر... و عمر شل عمره و روح ... في السياره علياء: ابا اعرف ليش هذا يصيح بعد... الهنوف: مادريبه علياء: والله عيالج حركات... يا ويلج من عمر.. الهنوف : هههههههههههههههه هههههااااااااااااي علياء: ليش تضحكين الهنوف: ماشفتي ويه عمر.. تقول اشارة مرور علياء: هيه والله.. هههههه الهنوف: يستاهل اللي ياه... وتمت الهنوف مستانسه على اللي صار... يمكن حست بفرحه يوم احرجت عمر جدام ربيعته.. و في نفس الوقت حست بغصه يوم شافت ولدها يصيح عشان ابوه.. و ابوه فار عياله و لا افتكر فيهم.. و عايش حياته الخاصه .. الجزء الثامن و العشرين (( يا اللي تيمني حبك مش خايف ليه من ربك باسبابي تكسب ذنبك ... والله خايف عليك...)) مرن الايام... و كلن على حاله... عمر الود وده يجتل الهنوف من الغيض اللي فيه.. كان منقهر بسبة االموقف في صحارى مول ... تم يتصل في الهنوف عسب يواجعها و يظهر حرته بس هي طبعا ما ردت عليه... اما بدور فتمت زعلانه من عمر ... عمر ( وهو يرمس بدور في التلفون): بلاج ما تردين عليه؟ بدور: اشحقه ارد عليك.. شو تبا بعد.. هب كفايه اللي استوى اخر مره امبينا.. لازم بعد تفضحني اكثر عمر: شو تخربطين انتي ... الحين انا فضحتج؟ بدور : هيه فضحتني.. عيل شو تسميه اللي صار في المول.... عمر: صدفه بدور: لا والله... صدفه.. وتباني اصدقك عمر: وليش ما تصدقيني ... انا ماجذبت عليج بشي بدور: انزين خبرني وين اودي ويهي الحين... انت ماتعرف كيف ربيعاتي يرمسن عني... انا اللي سويت كل شي عشانك... حتى يوم ييت الشارجه خبرتك و يوم قلتلي بشوفج وافقت بس عشانك...في الاخير تجازيني بهالطريقه عمر: انتي ليش مكبره السالفه... وانا قلتلج مادري انهم في المول.. بدور: بس انت ما خبرتني عن عيالك عمر: شو تبين تعرفين عنهم بدور: ماحيد اصلا خبرتني انه عندك عيال عمر: لا والله... احيد خبرتج اني متزوج... و انا اللي اعرفه انه اللي يزوج من خمس سنين لازم يكون عنده عيال بدور: خلاص خلاص.. مابغي اسمع شي.. انا اللي مستغربه منه انه عذرك دومه جاهز عمر: لاني ماجذب عليج... و اظن الحقيقه دوم تسبق بدور: ........... عمر: بلاج سكتي بدور: ماعندي شي اقوله عمر: بعدج زعلانه بدور:......... عمر: والله اللي عليه سويته.. و انا الحين من كمن يوم اراضيج... بس انتي اللي تعاندين بدور: اعاند من القهر اللي فيه ... انت والله ما تحس فيه.. ما تحس بشي عمر: احس بشو... زعلتي و راضيتج .. شو تبين اكثر بدور: ماشي ... المهم تراني مشغوله الحين عمر: برايج بدور: شفت... عادي عندك. .. ما قلت لا لا تصكين ابغي ارمسج.. او حتى متولع عليج عمر: والله انه الحريم.. بدور: شو عمر: ماشي سلامتج .. الحين شو بتصكين ولا؟ بدور: هيه... باي عمر: وداعة الله بدور منقهره من عمر من صوب... و عمر منقهر من الهنوف من صوب ... وجان يقوم يطرش مسج حق الهنوف عمر (( ردي عليه بسرعه)) الهنوف شافت المسج... جان تبتسم... ويرن تلفونها و طبعا المتصل (( سيد القلب)).. ماردت عليه... وقام طرشلها مسج ثاني.. عمر (( ردي عليه ولا والله لاييج لين بيتكم)) الهنوف ضحكت... بعده عمر ما بيتوب عن تهديداته السخيفه... و جان يرن تلفونها و هذيج الساعه ردت عليه الهنوف: خير عمر: انتي ما ينفع معاج الا التهديد الهنوف: لا والله.. انا مادريت عليك لاني زايغه... رديت بس لانك عورتلي قلبي من كثر ما تتصل عمر ( وهو منقهر): يمكن تقوليلي شو ها اللي سويتيه في المول الهنوف: شو سويت بعد عمر: لا تستهبلين... الهنوف: وانت ليش معصب... حبيبة القلب زعلت عليك... عمر: مالج خص.. انا ادري انج متعمده تسوين هالحركه.. الهنوف: جيه شو قالولك كلهم عمر... عمر: شو قصدج الهنوف: ماشي.... ابا اعرف الحين انت ليش متصل عمر سكت و ماعرف شو يرد عليها. ... روحه مستغرب ... ليش اتصل الهنوف: الو... شو بلعت لسانك عمر: يلا باي.. عندي خط ... ( وجان يصك في ويهها) الهنوف استغربت من حركته... بس عمر ما صك لانه خط... صك لانه ماعرف شو يرد عليها يوم سالتله ليش متصل.. تم يفكر... شو اللي خلاه يتصل بها... ((( ليتك دايم معانا و يحصل دايم لقانا الله ماحلى هوانا ما شرك بك شريك ))) في بيت خليفة القبيسي.... علياء دخلت على الهنوف في حجرتها... علياء: الهنوف... يلا عاد... الحين بيوصل اخوج ومعاه فيصل الهنوف: بتخبرج انتي من متى تدخلين المطبخ علياء: ها... ترى امايه تباني اساعدها الهنوف: لا والله... ولا لانه فيصل قام يتغدا عنا هاليومين علياء: شو دخله فيصل ... بتين ولا لا الهنوف: يلا ... نزلن الهنوف و علياء الصاله... و في نفس الوقت دخل خليفة معاه فيصل و عيال الهنوف ( عبدالله و سلامه) فيصل ( وهو يرمس عبدالله): يابويه انت هب ويه كشته الهنوف: يالله... أي كشته بعد.. الا هو دكان فيصل: ههههههههه... السلام عليكم الكل: عليك السلام فيصل: اشحالج عمتيه؟ ام خليفه: بخير الله يعافيك.. فيصل: ترى امايه تسلم عليج ام خليفه: هيه حلليها ضربت اليوم... علياء: اتصلوا ام خليفه: هيه اليوم الصبح علياء: جان خبرتيني... والله متوله على بنات عمي ام خليفه: مادريبج... اتحراج راقده علياء: لا حول... شو ها.. والله خاطري ارمس عذوب فيصل: ما عليه... بتصلبهم و بخليج ترمسينها الهنوف: اذا جيه... كلنا بنرمسها ( وهي تقصد خليفه بكلامها) خليفه: قومي حطي الغدا الهنوف ( وهي تبتسم): ان شاء الله.. يلا علايه علياء مشغوله... طبعا تهذرب ويا فيصل... ام خليفه: عليو... طاعي ختج تباج علياء: ها... اوكي في المطبخ الهنوف: زين يوم ييتي علياء: ليش الهنوف: انتي من تشوفين فيصل وحالج ينجلب علياء: كيف ينجلب بعد.. تراه حليله يسولف.. شو تبيني اقوله.. اسكت يلا مابغي اسمعك الهنوف: هيه ليش لا ... هههههههههههه علياء: لا والله الهنوف: اوه.. علايه حبيبتي علياء: نعم الهنوف: طاعي سلامه وينها... اخافها تلعب في الحوي روحها علياء: اوكي ظهرت علياء اطالع بنت ختها.... و هي تمشي جان تسمع حد يرمس بالتلفون... فيصل: هههههههههههه... احلفي انتي بس... انزين ما بتخبريني يعني.. خلاص عيل.. برايج الغاليه.. مع السلامه علياء ياها فضول تبا تعرف منو اللي يرمس .. حست انه فيصل بس حبت تتاكد.. و جان تصد واطالعه.. وفي هذيج اللحظه ظهر فيصل وجان يوقف جدامها فيصل: شو تسوين علياء: ها .. لا ماشي.. ييت اطالع سلامه فيصل: في الصاله عند امج علياء: اوكي ( وجان تروح) فيصل حس انه علياء سمعته... بس ماهتم.. لانه كان يرمس وحده ماذتنه من كمن يوم في التلفون... اما علياء فصدق حست بضيق.. (( حتى هو.. شرات عمر و غيره... صدق انه سخيف. . يرمسها في بيتنا بعد.. ما يستحي.. انا وشلي.. خله يولي.. اشحقه افكر فيه.. اصلا انا ليش حاطه امل انه في يوم بيحبني شرات ما انا..... أي حب و أي خرابيط.. )) الهنوف: علياء.. وين بتسيرين... و الغدا... علياء: مابغي اتغدا. ... ( وجان تروج حجرتها ) سويسرا.. ام عمر: والله انا تعبت من كثر مارمسها... هاي بتيبلي المرض حمده: يعلني فداج يا اميه.. لا ترمسين جيه ام عمر: شو تبيني اقول عيل.. انتي ما تفهمين.. كمن مره اقولج اللي تسوينه هذا غلط.. حمده: انزين شو سويت انا... ام عمر: قومي.. قومي يلا لا بارك الله فيج من بنيه.. روحي عند ابوج هو اللي بيتفاهم معاج اليده: ابوج اونه ... وين ابوها.. اربع و عشرين ساعه متفيزر تحت ويا الشواب ام عمر: شو اسوي عيل.. ذبحتني .. حشا تقولين ارمس يدار خلود: امايه.. ما يحتاي تعصبين.. ام عمر: ما تشوفين ختج اليده: انتي تعرفين حمدوه ... ها اللي تسويه هب شي يديد عليج.. اشحقه محتشره بعد ام عمر شلت عمرها و دخلت حجرتها عذابه: يعني لازم هالحركات حمده: ابا اعرف شو سالفتكم.. هاي حياتي و انا حره فيها عذابه: محد قالج شي.. بس يوم بنشوف الغلط ما بنسكت حمده: أي غلط خلود: حمدوه.. اللي تسوينه هذا هب زين.. الحين ابا اعرف شو بيفيدج ها اللي تسوينه حمده: اووووف... ما تفهمون ... مابغي ارمسه الحين.. يوم برد برمسه عذابه: محد بيخسر غيرج حمده: شو تقصدين عذابه: تتحرين انه اللي تسوينه بيقرب محمد.. لا والله.. بهالاسلوب بيبتعد عنج و بيهملج و بيعاملج شرات ما تعاملينه حمده: شو اسوي يعني خلود: رمسيه.. و ما بتخسرين شي حمده: مادري... بسير اطالع اميه جان تظهر ريم من الحجره ريم: امايه.. وينها اميه؟ خلود: في الحجره ريم: و ابويه عذابه: بعده ما وصل ريم: ابا اعرف شو يسوي تحت خلود: حليله خليه يستانس .. تبينه يجابلنا ظهرت ام عمر من الحجره و هي معصبه... ام عمر: ريمو... سيري طاعي وينه ابوج. خلاص ما شي يلسه هني.. باجر الصبح بنرد.. ريم: شو السالفه ام عمر: ما تسمعين... سيري زقري ابوج من تحت... يلا بسرعه ريم: ان شاء الله .... بلاها امج ( وهي تصاصر حمده) حمده: مادري ام عمر: بعدج واقفه.. اربعي يلا.. ريم: انزين.. عذوب تعالي معايه عذابه: اوكي (( حيرتني يا قاسي تجفينا و مره ناسي و القلب اللي حساسي ما يقدر يخليك )) نزلن عذابه و ريم يدوون ابوهم في اللوبي.. عذابه: تصاصرين عمرج انتي؟ ريم: يالسه ادعي .. مابغي اشوفه اليوم عذابه: هههههههههههه.. حليلج والله ريم: عذوب.. هذا ابويه اللي يالس هناك.. عذابه: هيه.. يلا .. ازقريه ريم: نعم.. وانتي ليش ما تسيرين عذابه: امايه قالتلج انتي .. ريم: بس عذابه: برايج.. قومي نروح.. واذا اميه عصبت عليج مالي خص ريم: لا لا مافيه.. تدرين امي يوم تعصب شو تسوي عذابه: عيل يالله ازقري ابوج ريم: اوكي.. اترييني هني عذابه: انزين ريم تمت تمشي ببطئ يمكن يشوفها ابوها من بعيد.. بس الظاهر بو عمر كان مشغول بسوالفه ويا ربعه.. ريم ابتسمت يوم شافت ضحكت ابوها .. (( حليلك يا بويه.. شو بيستويبك شو بتشوف اميه)).. وجان تلاحظ شباب قاعدين مع ابوها و ربعه.. استغربت . ما تحيد ابوها يعرف شباب في الفندق.. وجان توصل.. ما قدرت تتجدم اكثر.. و المفاجأه الحلوه.... شافته... شافت سيف قاعد حذال ابوها و يالس يضاحك معاهم.... ريم ما استوعبت اللي يصير... (( هذا شو يسوي عند ابويه. .. كل ماسير مكان لازم يعني اشوفه)) .. وقفت مكانها و تمت اطالع ابوها عله و عسى يلتفت صوبها... بس هب ابوها اللي شافها.. سيف اللي لمحها... و جان يقوم و يمشي صوبها... ريم شافته و هي ياي عندها .. سيف ( بابتسامته الحلوه): السلام عليج ريم ( وهي مرتبكه): انت ما تستحي.. ابويه يالس هناك و انت عيني عينك ياي صوبي سيف: هههههههه.. جيه يردون السلام ريم: عليك السلام و الرحمه.. يمكن تذلف سيف: ههههههه.. خيبه اذلف مره وحده.. ولو ما ذلفت شو بتسوين ريم: انت ليش جيه.. ما تخاف.. سيف: اخاف من شو.. ريم: اذا انت تبا تفضح عمرك برايك.. بس لو سمحت لا تفضحني معاك سيف: لين متى حبك بيتم كتوم.. لين متى عني بيمنعك الحيا ريم: أي حب انت بعد... والله انك هب صاحي سيف: انتي السبب ريم: لا حول انا شو موقفني هني سيف: وين بتسيرين ريم: انت وشلك ( جان تمشي عنه) سيف ( وهو يلحقها): بلاج معصبه... فديت روحج لا تعصبين ريم كانت تمشي بسرعه بس يوم سمعته يتفداها وقفت و جان تصد صوبه ريم: ايه انت مصختها تراك ... فديت روحج اونه( وهي تقلده).. قلة ادب.. سيف: اوكي.. اسف ريم: سامحتك.. يمكن تذلف الحين سيف: ان شاء الله.. نسيت اسالج؟ ريم: شو سيف: بغيتي ابوج انتي ريم: هيه سيف: اوكي ريم روحت عنه... سيف : انزين ماشي مع السلامه ولا حتى باي ريم: لا ما شي... سيف ضحك يوم سمع ردها... وجان يرد عند الشواب... سيف: بو عمر بو عمر: هلا سيف: الاهل يبونك بو عمر: أي اهل؟ سيف: هلك يبونك فوق بو عمر: هيه... ما عليه . يلا عيل بترخص عنكم.. عذابه: وبعد شو قالج ريم: تراج حشرتيني... روحي زايغه و انتي تزيديني عذابه: انزين ابغي اعرف شو قالج ريم: ما قال شي... يلا ادخلي في الحجره ام عمر: شو قال ابوج ريم: ها ام عمر ( وهي معصبه): اقولج شو قالج ابوج.. ما تسمعين ريم: ما قال شي.. بيي الحين عذابه: اميه ليش معصبه.. ما في شي يرزى ام عمر: ليش معصبه .. ما تشوفين حالتكن شقايل... انتو من صوب و عمر من صوب ريم: شو يخصه عمر اليده: امج دومها جيه... تيمع الخرابيط كلها ام عمر: شو بيوصل ابوج خبريني ( ودخلت حجرتها) خلود: عايبتنج حالة امج حمده: شو تبيني اسوي... اصلا هي منقهره من عمر و يت حطت حرتها عليه خلود: بس لا تنكرين اللي تسوينه غلط حمده: شو الغلط فيه... كيفي .. مابغي ارمسه.. غصب هو خلود: ليش تغيرتي عليه مره وحده حمده: ... خلود: ردي حمده: هو اللي متغير خلود: محمد.. لا ما صدق حمده: هو اللي متغير هب انا... مادري ليش احس انه هب شرات قبل ... احس عادي اذا رمسته ولا لا .. خلود: حرام عليج.. لا تظلمينه برمستج هاي... مادري من منو تلفونها ناقع اربع و عشرين ساعه حمده: ماعرف .. بس احس هب هو الاولي خلود: اذا هو تغير حتى انتي تغيرتي... حمده: ...... وجان تدخل عليهن عذابه عذابه: ما بتصدقون شو اللي صار خلود: شو عذابه: سيف الكعبي هني حمده: ندري عذابه: اقولج تونا سايرين عند ابويه و انه نشوفه قاعد وياه خلود: والله عذابه: هيه.. ولا بعد يا يرمس ريم حمده + خلود: صـــــــــــــــــــــــــــدق عذابه: صدق حمده: وينها ريموو... ريم: انا هني.. شو تبن حمده: شو قالج سواف ريم: منو سواف بعد خلود: قصدها سيف الكعبي ريم ( وهي ترمس عذابه): ماسرع ما نشرتي الخبر حمده: خبرينا عاد شو قالج... ويلست الريم تخبرهن اللي صار بينها و بين سيف... و كل ماتذكر اللي صار .. تبتسم... الريم خلاص ما بتروم تنكر انها تعلقت فيه .. و كل يوم عن الثاني يزيد حبه في قلبها ..... بس يا ترى شو اللي بيصير بينهم...!! عذابه: امايه... ترى ابويه وصل ابو عمر: بلاها امج محتشره عذابه: مادريبها وجان تظهر ام عمر ام عمر: ما بغيت توصل ابو عمر: بلاكم ام عمر: من الحين اقولك ... تسير الصبح و تحجزلنا.. خلاص بنرد.. مالنا حايه نيلس هني.. كملنا شهر و اكثر بعد عذابه: 27 يوم هب شهر ام عمر صدت اطالع عذابه بنظره.. ابو عمر: و البنات ام عمر: بلاهن؟ ابو عمر: يبن يردن بعد ام عمر: هن وشلهن... من متى بعد نشاورهن.. ابو عمر: ما عليه يصير خير ام عمر: رمست عيالك ابو عمر: هيه... ام عمر: و عمر ابو عمر: بلاه بعد ام عمر: رمسته ابو عمر: تحيدينه يتصل و ينشد ام عمر: اشعنه انت ما تتصل ريم: هو المفروض يتصل ام عمر: جاب انتي... يوم ارمس ابوج لا تتدخلين.. و بعدين اشحقه يالسات هني.. يلا روحن داخل ابو عمر: وانتي ليش معصبه.. يوم ولدج لا يفتكر اشحقه تعصبين على بناتج... لو فيه خير جان اتصل و سلم. . ( وجان يدخل حجرته) ام عمر: الرمسه معاكم ما منها فايده.. لا معاك ولا مع بناتك.. ( ودخلت الحجره ) (( ماقدر اعيش بدونك و اموت انا في عيونك.... لا تلوم ولا الومك لاني مغرم ابيــــــــــــــــــــــــــك )) حمده عقب ما حست انه الحشره خفت في الصاله... ظهرت و جان تسير عند التلفون... و طبعا قررت تتصل بمحمد.. (( فديت روحك يا محمد.. مادري شقايل قسيت عليك في هالفتره. . والله تولهت عليك)) حمده: الو.. محمد: فديتج والله... تولهت عليج... حمده ضحكت يوم سمعته... محمد: فديت هالضحكه والله.. هب حرام عليج اللي سويتيه حمده: اسمحلي محمد: مايهمني... يوم سمعت صوتج نسيت همي و احزاني... توها الروح ردت فيه.. حمده: اشحالك محمد: بخير يوم سمعت هالصوت الحلو حمده: دوم ان شاء الله... محمد: وانتي اشحالج حمده: بخير ربي يعافيك... محمد: ما جنكم ابطيتوا... متى بتردون حمده: اسمع اميه تقول بنرد قريب محمد: زين والله... لان الظاهر انا اللي بييج جان ما رديتوا بسرعه حمده: هههههههه يعني متوله محمد: أي متوله.. الا مشتاااااااااااااااااااااااا ااااااااااااااق حمده تمت ترمس محمد... بس حست انه في شي بينهم تغير... صح انه بعده يحبها و حتى هي تحبه.. بس شي متغير بينهم.. . ما يندرى شو مصيرهم...!!! ثاني يوم الصبح... خلود: يعني بنرد الامارات بو عمر: امج تقول حمده: وانت شو رايك بو عمر: والله امج البارحه حاشرتني. اقول نرد احسن حمده: انزين شو رايك نسير فرنسا.. وجان تظهر ام عمر يوم سمعت حمده... ام عمر: وين تبين بعد. . حمده: ها ... لا لا ماشي... اسولف بس ريم : زغتي حمده: ماشفتي نظراتها انتي... بو عمر: خلود... فديتج.. جان بتنزلين ترمسينهم تحت في الرسيبشن عن الحساب خلود: ان شاء الله بو عمر: انا بسير ويا فضل و بحجزلنا خلود: اوكي ... ونزلت خلود ويا خواتها... محد فيهن يبا يقعد في الغرفه و امهن هناك محتشره... خلود: حليلها اميه... ها كله بسبة عمر ريم: انزين نحن وشلنا تحط حرتها علينا عذابه: ابا اعرف هذا عمر متى بيتغير... متى بيحس حمده: ما لقيتي عمر تبينه يتغير... تحلمين انتي وصلن عند الرسيبشن... و جان ينزل سيف من اللفت و شافهن .. مشى صوبهن و قعد يرمس العامله.. كان يبغي يغير غرفته .. وطلب انه الغرفه تكون في نفس الطابق الموجودين في هل القبيسي ... البنات تمن يتسمعن.. ريم: سمعتي.. خلود: ما عليج منه ريم: خلود... صدقيني هذا بيفضحنا... حمده: هيه والله... اذا ابويه ما لاحظ قبل.. الحين بيلاحظ يوم بيشوفه من صباح الله خير متفيزر عن باب الغرفه.. عذابه: المفروض انه نرمس ابويه و خله يتفاهم معاه ريم: شو يتفاهم معاه... البارحه قاعد حذاله و يسولف معاه خلود: انا روحي برمسه حمده: شوبتقوليله... خلود: مادري... اتريوني هني... وجان تمشي خلود ورا سيف.... خلود: لو سمحت ... انا ماكنت ابي عطرك .... ولاني للخطا عشــقان انا ماكنت ابي الا احس انك تحبـــيـــــــنـــــي خلود: لو سمحت !! سيف: هلا الغاليه.. شي في خاطرج؟ خلود (وهي مرتبكة): بغيتك في سالفة سيف ( بابتسامته العريضة): خير خلود (بتردد): الصراحه اللي تسويه هب زين.. وماظنك ترضاها على خواتك.. سيف (وهو منحرج): شو اللي سويته وما عيبج خلود: كل شي .. لاحقنا من مكان لمكان... والصراحه عيب سيف: اظنج تعرفين شو اللي ابغيه خلود: لا ماعرف .. اذا بغيت شي خبر ابويه و هو بيتصرف.. بس انك تفضحنا لا سيف: ما عاش من يفضحكن الغاليه خلود: واللي تسويه شو تسميه.. انت لو تستحي جان ما رمست اختي بهالاسلوب الوقح سيف ( وجنه حد عاطنه كف يوم سمع كلمة وقح): السموحه جان ازعجتكم خلود: كلامك ما يهمنا .. اللي يهمنا الفعل .. تصرفاتك اللي بتثبتلنا طيبة اصلك و رجولتك .. و على فكره .. جانك بتستحي على ويهك لا تفكر تلحقنا مره ثانيه او حتى تسكن حذالنا في نفس الطابق... مع السلامه سيف: الله يحفظج خلود روحت عن سيف و تحس ان ويهها محترق ... ماصدقت انها قدرت ترمس سيف بهالاسلوب .. صح انه كلامها كان جارح و اسلوبها هب حلو.. بس هي تعمدت ترمسه بهالطريقه عل و عسى يبتعد عنهم وما يسبب لهم مشاكل.. اما سيف (( الله يعينه)) .. خاطره ان الارض تنشق و تبلعه.. ما تصور انه في يوم ينحط في هالموقف السخيف.. تذكر اللي صار بينه و بين ريم ايام المدرسه.. و تذكر اسلوبها معاه. . تذكر يوم اهانته و ذلته بين البنات... والحين اختها خلود.. بس مع هذا قرر انه ما يتراجع .. ولو شو ما استوى ما بيبتعد عن الريم... __________________________ حمده+ عذابه: شو قلتيله...؟؟ خلود: اتصدقن اني يالسه ارتجف ريم: المفروض هو اللي يرتجف هب انتي خلود: مادري من وين يبت هالجرأة و رمسته بهالطريقة عذابة: بس الصراحه يستاهل.. لين متى بنتم ساكتين.. حمده: بس هب جنه قطعناه خلود: يستاهل.. حمدة: ولو كانت نيته طيبه و قصده كل خير!!؟؟ خلود: لو صدق نيته زينه ما بيتم يلف ويدور... هذا هو ابويه جدامه .. و دومه يقعد وياه.. اشعنه ما يرمسه عذابه: بس ابويه رفضه كمن مره خلود: لو شارنها بيرد يخطبها ريم: ولو ما رد !!! الكل التفت صوب الريم... استغربن البنات من رمستها.. يعني هي تبغيه شرات ما هو يباها... يعني الريم فعلا تحب سيف... عذابه: ما عليج منه.. بيرد ريم: لا ماظن... عقب ما رمسته خلود بهالاسلوب .. يعني الصراحه نحن ذليناه ذل .. و ماظن في حد يرضى بهالمذله حمده: ريماني حبيبتي... لو هو شارنج بيرد شرات ما قالت خلود ريم: انسوا السالفه احسن _________________________ سيف وهو ظاهر من الفندق شاف ابو عمر و هو توه داخل.. سيف: السلام عليكم ابو عمر: عليكم السلام و الرحمه .. سيف: اشحالك عمي ابو عمر: بخير الله يعافيك سيف: دوم ان شاء الله.. خير اشوفك تعبان ابو عمر: هي والله .. توني راد.. سرت احجز و ماشي حجز الا بالخميس سيف ( وهو مستغرب): شو حجزه؟ ابو عمر: بنرد ان شاء الله.. شو نسوي ملينا من القعده هني سيف: هيه.. عمي بغيتك في سالفه ابو عمر : خير ..لحظه .. فضل .. فضل... ( وهو يأشر على المرشد السياحي) تم ابو عمر يرمس المرشد السياحي و سيف قعد يترياه وهو متردد يقوله ولا لا ابو عمر: ها ابويه.. شو في خاطرك سيف: لا لا .. ماشي.. بس بغيت انشدك جان تبا حد يوديك المطار.. بس اظن فضل هو اللي بيوديكم ابو عمر: ماقصرت...يالله اترخص عنك.. مع السلامه سيف: مع السلامه دخل ابو عمر الغرفه و شاف ام عمر ترمس فيصل و البنيات حذالها ام عمر: ها هذو ابوك بيرمسك ابو عمر: شو السالفة ام عمر: يود التلفون رمس فيصل.. ابو عمر: شو يبا ام عمر: شو يبا بعد... بيرمسك __________________________ ابو عمر: الو فيصل: حيالله الوالد... اشحالك ابويه ابو عمر: بخير و سهاله فيصل: ها اسمع اميه تقول بتردون... ما بتيلسون بعد ابو عمر: والله انا عادي عندي ايلس.. بس امك الله يهديها ____________________ ام عمر( وهي تتحرطم): شو نيلس بعد.. وانت من متى تحب اليلسه برع البلاد... اللا عقب ما تعرفت على هالشواب .. اختربت حمده: ولا متعرف على حد من هالمزيونات هني ام عمر ( وهي اطالع حمده بنظره): انتي ما بتوبين يعني.. ما بتيوزين عن حركاتج هاي.. حمدوه تراج قاهرتني .. ولا اتخليني اقوم الحين و اقطعج حمده: واااااااااااااال... ليش ها كله.. تراني اسولف... خلود: وبعدين حرمه قد البعير و لا بعد معرسه تبين تظربينها حمده (وهي معصبة): انا تشبهيني بالبعير عذابه: بلاج انتي .. الا هو تشبيه.. احمدي ربج ادافع عنج ام عمر: لا حوووووووووووووووول و لا قوة الا بالله... كمن مره اقولكن لا تدخلن بشي... و بعدين اشحقه قاعدات هني.. يلا داخل .. لا بارك الله فيكن _________________________ فيصل: خيبه .. شو عندكم .. حرب عالميه ابو عمر: هاي امك مادري بلاها.. مشتطه علينا من يومين فيصل: هيه.. عسب جيه تبغي ترد.. وانزين متى بتردون ابو عمر: يوم الخميس الفليل بنظهر... وظني يوم الجمعه بنكون عندكم اذا الله راد فيصل: على خير ان شاء الله ابو عمر: وداعة الله ______________________ ام عمر: شقايل جيه يوم الخميس.. واشعنه ما نسافر باجر ابو عمر: ع كيفنا هو ام عمر: عيل ع كيف منو.. انت اللي ما تعرف ترمس... المفروض تخبرهم عن باجر هب الخميس ابو عمر: يا بنت الحلال ماشي حجز باجر.. جيه محد يبغي يسافر غيرنا.. و بعدين ما بقا شي .. الا هن يومين.. بتحتشرين على هاليومين بعد .. وهبتك اجمل احساسي وجيت من الوله عطشان لقيتك يابعد عمري حسافه ماتحســـــــــيــنـي *52* مرن يومين وكلن على حاله... ام عمر بعدها محتشره و الكل مستغرب من هالشي.. ام عمر تفكيرها كان عند عمر.. حست بضيج و حزن يوم شافت ولدها البجر متغير و حاله ما يسر... لا يتصل ولا يسلم ولا حتى ينشد عن والديه.. ابو عمر حس بهالشعور بس مع هذا ما بين لحد.. مع انه احساسه بالحزن كان اكبر بواااايد من ام عمر.. وسيف الكعبي الوحيد اللي تغير في هالفتره.. هب هو الاولي .. حتى بنات القبيسي لاحظن الفرق... هب شرات قبل يلحقهن .. حتى انه كل ما يمر صوبهم ما يرفع عينه و يطالعهن.. حاول انه يبتعد شرات ما طلبت منه خلود.. و حتى هو قرر انه يرد الامارات.. ريم لاحظت تغير سيف... و طبعا فسرت هالشي انه خلاص ما يبغيها.. حست بغيض .. (( يعني الحين هو من شهور يلحقني .. و الحين بهالسهوله ودرني... صدقها عيل خلود.. لو صدق يبغيني جان ما تردد و سار يرمس ابويه... يعني يوم بديت احبه تركني .. أي حب .. اصلا مافي شي في الدنيا اسمه حب.. )) حمده: ماشي وقت ... بالخميس بنرد... و انا الصراحه ابغي اظهر واحوط خلود: اذا انتي متبريه من عمرج تفضلي روحي رمسي امج حمده: يااااربي شو هالحاله.. انزين حد يتكرم و يرمسها.. ولا اقولكم رمسن ابويه.. حليله ما بيقول شي عذابه: انا مالي خص .. حمده: خلود انتي رمسيها... خلود: لا فديتج... مافيه على حشرة امايه.. يوم تعصب ما تشوف حد حمده: عيل الريم بترمسها ريم: نعم نعم نعم حمده: ريمو... ما تبين تظهرين؟؟ ريم: هيه حمده: انزين روحي رمسي ابويه ريم: و اميه؟؟ حمده: انتي جربي و ما بتخسرين ريم: و حياتي.. اكيد بخسرها.. امايه اكيد بتذبحني عذابه: نحن وياج ريم: واضح حمده: فديتج والله.. يلا قومي... ريم: امري لله.. ريم دخلت الصاله و جان تشوف ابوها و امها و يدتها .. ريم: احم احم ام عمر: شو تبين؟؟ ريم: ابا ارمس ابويه ابو عمر: تعالي الريم.. تعالي اقعدي عندي ريم: ابويه بغيتك في سالفه اليده: اكيد الحين بتقول ابغي اتحوط ريم: شو دراج يدوه؟؟ اليده: ادريبكن عدل... ريم: شو رايك ابويه...تدري بنسافر عقب باجر.. خلنا نستانس هاليومين ابو عمر: برايكن... ريم: فديت روحك يا بويه... ( وتحبه على راسه) وجان تظهر عنهم و هي عينها على امها... استغربت انه امها ما واجعتها شرات كل مره... خلود: بشري ريم: ماشي خلود: شو يعني ما شي ريم: ما تبن تظهرن حمده: اكيد ريم: عيل يالله.. وين بنسير عذابه: واميه ريم: مادريبها.. ما قالت شي... خلود: حليلج يا امايه... و الله كاسره خاطري.. شو رايكن نرمسها و نظهرها معانا عذابه: والله فكره حمده: انا ما برمسها.. روحها خاطرها تذبحني خلود: لا فديتج.. بترمسينها... وعقبها اقتنعت حمده... و قررت ترمس امها...


	من مواضيع ورد جوري 0 سـكـر و نـعـنـاع 0 طالب ترك ورقة الامتحان خالية ونجح 0 مكتبه مواقع المصارعين 0 –––•(-•( حـيـاتــــي .. بـصـلاتـــــي )•-)•––– 0 كيف تكتب قصة قصيرة ومشوقة


	توقيع ورد جوري

ورد جوري

الجنس :

الدولـة :

سيف البدو: . - السبب: شكراً لجهودكِ الكبيرة

أوسمة العضو: 2

رقم العضوية : 13

تاريخ التسجيل: Apr 2006

الإقامة: قطر

المشاركات : 5,249

المواضيع : 1333

عدد مشاركات اليوم :

نقد عربي: 1,549,629

المصرف: 0

المجموع نقد عربي: 1,549,629
تبرع

نقاط الترشيح : 350

المستوى : ورد جوري ماسي

الـــهدايـا :

اعلانات خاصة باعضاء البدو فقط:


	2


	رد : الجزء [14] من قصة أحبك لو بغيت إنساك مقدر
	08-18-2006, 03:36 مساءً
	تسلم يمينك ورد جوري


	من مواضيع شموخ العز 0 صالونات التجميل النسائية "قصص واقعية " 0 اجمع وشوف شخصيتك 0 مدينة البسكويت 0 إن كيدهن عظيم !! 0 سبع ستات تصل الى عشر ملايين !!!

شموخ العز

عضو ماسي

شمعــة الــبدوو

الجنس :

الدولـة :

رقم العضوية : 2121

تاريخ التسجيل: Apr 2006

المشاركات : 3,189

المواضيع : 134

عدد مشاركات اليوم :

نقد عربي: 1,164,031

المصرف: 0

المجموع نقد عربي: 1,164,031
تبرع

نقاط الترشيح : 203

المستوى : شموخ العز

الـــهدايـا :