الجزء [15] من قصة أحبك لو بغيت إنساك مقدر

حمده: اميه؟؟!!
ام عمر ماردت عليها : ......
حمده: ام.. اماااايه
ام عمر: شو تبين؟
حمده: بنظهر الحين
ام عمر: الله يحفظكن
حمده: ما بتين معانا
ام عمر: وانا شو يظهرني معاكن بعد
حمده: بنحوط رباعه
ام عمر: هب سايره
اليده: وين بتسيرن؟
حمده: بنتشرى و بنحوط في المحلات
اليده: هيه
حمده: شي في خاطرج يدوه
اليده: جانكم بتسيرون الحديقه بخاويكم
حمده: هب مشكله بنسير جان بتين
اليده: زين
حمده: وانتي امي... ما بتغيرين رايج
ام عمر: قلتلج هب سايره

حمده صدت اطالع خواتها...

ريم ( وهب تحب راس امها): فديت ام عمر انا
ام عمر: بلاج؟
ريم: ماشي ... حرام اتفداج
عذابه ( وهي تلوي على امها): يعلي ما خلا منج يا احلى ام في الدنيا
ام عمر: بلاكن.... هب صاحيات
خلود ( وهي تحب راس امها): نحبج انزين... ما فيها شي
ام عمر: اسميكن هب صاحيات
حمده: يالله عاد ... فرحينا بضحكتج

وجان تبتسم ام عمر ..

ريم: ها اميه... وين تبينا نسير؟
ام عمر: ومن قال اني بسير
خلود: اكيد بتسيرين... عيل بتقعدين روحج هني...
ام عمر: لا لا .. مالي بار ض اظهر
حمده: عيل بتخلين ابويه يحوط... يمكن يحصله وحده ...
ابو عمر: بسم الله عليه.... حمدوه امج روحها شابه ضو... لا تزيدين علينا
حمده: هههههههههههههه.. لازم اخبرها...
ريم: لو سمحتي لا تتبلين على ابويه
ابو عمر: فديت ريماني انا
عذابه: ها ام عمر ... شو رايج نحوط و نتشرى و نخسر ابو عمر اليوم
حمده: هيه والله فكره
اليده: لا حووول... نشي عاد خلنا نستانس


وعقب عدة محاولات.. اقتنعت ام عمر و قرروا يظهرون رباعه... حاطوا في الاسواق و عقبها تمشوا في الحديقه و على الساعه 9 تعشوا في مطعم قريب عالفندق... وصلوا الفندق الساعه 10 الفليل ... دخل ابو عمر مع حرمته و اليده .. و عقبهم البنات .. حمده تمشي مع عذابه .. و وراهن ريم و خلود...

اول ما دخلن الفندق شافن سيف قاعد عالكرسي اللي حذال الاستقبال .. يوم شافهن وقف و تم يطالعهن بنظره و عقبها شل عمره و دخل اللفت بيروح غرفته...

حمده: بلاه هذا يطالعنا جيه؟
ريم: مادريبه
خلود: خيبه .. زين ما كفخنا..
عذابه: يمكن توله الحبيب
ريم: صدق ماعندج سالفه.. ما تشوفين من يومين هب معبرنا .. و على فكره هاي اول مره يحط عينه في عينا من يوم ما رمسته خلود
حمده: وانتي شو عرفج انه ما كان يطالعنا
ريم: ها... مادري
حمده: واضح انج ما تدرين. هب جنه عينج عليه اربع و عشرين ساعه..
ريم:......


سيف كان معصب و منقهر... استغرب يوم ما شاف هل القبيسي في الفندق... كانوا ظاهرين من الظهر و ما رجعوا الا الفليل... اتحراهم ردوا الامارات .. بس عقب ما نشد اللي في الاستقبال عنهم .. زادت ظنونه و شكوكه... هو شاف ابو عمر تعبان من يومين فخاف انه صابه شي و هن حريم محد بيوقف معاهن... و قرر يترياهم تحت .. بس يوم شافهم داخلين ارتاح.. ويوم شاف الريم تضحك و الابتسامه على شفاتها انقهر... هو اللي تم يحاتيهم من ساعات و بالاخص شال هم الريم .. قلبه عندها وحياته بين ايدها و هي ولا على بالها...



***52*** الومك .. مــاالومك .. لا ..الوم وقتي الخوان
عطيــــتك الف معنى حــب وهذا الي تجازيني

دبي..


بيت خليفة القبيسي..

علياء: عبووووووووووود... ان ما اصطلبت والله لا اقوم لك و اقطعك بهالخيزرانه
ام خليفة: انتي ما تستحين... ياهل حليله ما يعرف شي
علياء: لا والله... يروح يقعد على اللاب توب ...
ام خليفة: انتي الغلطانه اشحقه فارتنه هني
علياء: كيفي افره وين ما ابا.. اشحقه هو يدوسه و يقعد عليه... عبوووووووووووود.... انا حالفه اضربك... اصبر عليه شوي

وجان يدق جرس بيتهم... وكان صدق الصوت مزعج .. تموا يدقون الجرس كمن مره و لا بعد باب البيت شوي و بينكسر من الدق

الهنوف ( وهي نازله من الدري): بسم الله... من هذا اللي يدق الباب جيه
ام خليفه: مادريبهم.. علياء روحي طاعي منو
علياء: ليش انا ... الخدامه روحها بتسير..
ام خليفه: هاي خدية .. ساعه لين ما توصل.. البسي شيلتج وطاعي منو ...

ولا دقايق و يدخل عليهم عمر و هو شاب ضو و عيونه حمر .. واضح انه داخل البيت و الشر في عيونه

ام خليفه: خير ... بلاك محتشر
عمر: وينها الخايسه؟
ام خليفه: أي خايسه بعد
عمر: منو غيرها ... بنتج
ام خليفه: ثمن رمستك .. ما تستحي انت داخل لا سلام و لا شي .. و ياي تسب بعد
عمر: بسب على راحتي ... وهاي هي رمستيه عيبتكم ولا لا
ام خليفه: صدق انه ما عندك مذهب
عمر: انا اللي ما عندي مذهب .. عيل بنتج عندها... لو تستحي جان ما حاطت الفريج ليل نهار
الهنوف: عــــــــــــــــــــــــــمــــــــــــــــــــــ ــــر .. احترم نفسك و لا تغلط اكثر
عمر: انا اللي احترم نفسي... لج ويه ترمسين بعد.. احترم نفسك اونه... وانتي اشعنه ما تحترمين نفسج و هلج
الهنوف: الحمدلله... محترمه نفسي قبل ما شوفك.. تتحرى الناس شراتك..لا مذهب ولا اخلاق
عمر: انا ما عندي اخلاق ؟؟
ام خليفة: استهدى بالله يا ولديه.. عيب اللي تسويه
عمر: لا تقولين ولدج... ماتشرف اكون ولدج.. ربوا بنتكم اول شي
الهنوف: متربيه احسن عنك.. ولو سمحت اظهر برع..
ام خليفه: اصبري يالهنوف .. خلينا نعرف شو السالفه
عمر: ماتدرون اونكم... انتي ما تستحين اطرشين ربيعج صوبي..
الهنوف: أي ربيع
عمر: ولا بعد يبغي يخطبج مني ... تتحريني هندي جدامج ماعرف... لو فيج خير جان ما سويتي اللي سويتيه
الهنوف ( وهي مستغربه وجان تصد اطالع امها): شو يقول هذا... شو السالفه
عمر: لا تستهبلين عليه... انا قلتلج قبل و برد اقولج ياها الحين... لو تموتين ما بتاخذين حد و انا حي..
ام خليفه (وهي معصبه): انت وشلك... هب حرمتك هاي تتحكم فيها.. وانت مالك شور عليها.. ويوم بتعرس محد بيشاورك ولا بياخذ رايك
عمر: لازم بتوقفين معاها... سمعتها واصله البلاد كلها
الهنوف: عمر... اطلع برع
عمر: بظهر عيل تبيني اجابل شيفتج.. بس انا براويج.. شرات ما خليتهم يطردونج من الشغل .. انا ماذليتج ماكون انا عمر
الهنوف: انت لو فيك ذرة رجوله جان احترمت نفسك و لا فكرت تدخل هالبيت مره ثانيه

وهذيج الساعه صفعها عمر .. و كانت الظربه قويه ... و جان يمسكها بشعرها ..

عمر: انا مافيه ذرة رجوله .. انا تقوليلي هالكلام... تتحريني بسكتلج... انا حالف ماخليج في حالج... والله لا اراويج ..
الهنوف: هدني.... يالحقير هدني اقولك.... انت مالك حق تصفعني ... ااااااااااااااااااااه ..
ام خليفه: خلها لا بارك الله فيك و في اليوم اللي وافقنا عليك... اظهر برع ... اظهر برع.. حسبي الله عليك و نعم الوكيل...
عمر: اطولين لسانج عليه بعد.. تتحريني ماروم اسوي شي .. مطرشة واحد يخطبج ولا بعد ياي عندي...انتي ما تستحين و لا تخيلين... بس انا اللي بأدبج .. جان هلج ما علموج الادب انا اللي بعلمج .. و شرات ما قلتلج.. بتموتين ولا انج تكونين لواحد ثاني...
الهنوف: ااااااااااااااااااااااه .. شعري .. قوم عني ... اماااااااايه... هدني اقولك هدنــــــــــــــــــــي
ام خليفه (وهي تصيح): لا بارك الله فيك... اظهر برع.. اظهر.. عنبوك داخل على حريم و تمد ايدك بعد.. لا بارك الله فيك ...

تم عمر ماسك شعر الهنوف و يسبها .. و عقبها دزها عالارض و ظهر من البيت... و حالتهن حاله... الهنوف تمت تصيح عالارض وام خليفه تمت لاويه عليها و تصيح من صوب وتدعي على عمر من صوب ...

اما علياء فتمت منصدمه من اللي صار و الدموع في عينها... وجان تتصل في خليفه و تخبره بللي صار ...
وصل خليفه البيت و معاه فيصل...

خليفة: شو استوى؟
الهنوف ( وهي ميته من الصياح): الحقيــــــــــــــــــــــر... ااااااه... مابغيه... يا ناااااااااااااااااااااس ماريده خلاص.. تعبـــــــــــــــــــــــــت.. والله تعبت .. خليه يبتعد عني .. خليفه ... ابغي ارتاح..

ام خليفه: بس يالهنوف .. بس فديتج.. ما عليج منه .. ما بيرد ... الله لا يوفقه لا دنيا ولا اخره

فيصل عوره قلبه على بنت عمه و حالها.. ماتوقع انه عمر لهالدرجه قاسي.. وجان يصد صوب خليفة.. وعقبها شل عمره و ظهر من البيت وهو معصب

خليفه اانقهر يوم عرف اللي سواه عمر... و تم يشوف امه وهي تصيح على اخته... و جان يقرر انه يروح عند عمر... بس امه ما خلته...

خليفه: هديني يا اميه.. والله لا اراويه النذل..
ام خليفه: والله انك ما تسير له...
خليفة: شو ما اسير له.. يدخل بيتنا و يسبنا ولا بعد يمد ايده على ختيه و تبغيني اسكت..
ام خليفه: والله يا خليفه ان سرتله يا اني مارضى عليك لين يوم القيامه..
خليفه: بس يا اميه...
ام خليفه ( وهي تصيح): قلتلك ما تسير ... و عيال عمك تنساهم ...هذيله ما وراهم الا الشر.. ماشفت اللي سووه في ختك... خلنا نبتعد عنهم ابرك...
خليفه (وهو مستغرب): نبتعد عنهم... و عمي ...؟؟
ام خليفه: قلتلك ما نبغيهم... ابعدنا يا بويه عن المشاكل
علياء: لا يا اميه.... بنات عمي شرات خواتي ماروم اودرهن..
ام خليفه: تبدينهم على ختج ... ما تشوفين اللي صار...
علياء ( وهي اطالع خليفه): و عذااااااابه
ام خليفه: قلتلكم عيال عمكم تنسونهم... مابغي اسمع طاريهم في هالبيت... يكفينا مشاكل... ما فيهم خير... خليفه يا بويه البنات تارسات البلاد.. و الف من تتمناك
خليفه (وهو منقهر): وانا مابغي غير عذابه
ام خليفه: انت ما تستحي... عقب اللي صار تبغي تاخذها بعد...
علياء: مالها خص
ام خليفه: سكتي انتي... قلتلك يا خليفه تنسىعذوب...
خليفه: بس يا اميه
ام خليفه( وهي معصبه): وان خذتها... لا انا امك ولا اعرفك..

خليفه انصدم يوم سمع رمسة امه... و تم منزل عيونه عالارض... عسب محد يحس بدموعه... دموعه على موت قلبه...

(( ااااااااااااااااااااااااااااااااااااااااه يا زمن.. ليش تبعدني عن اغلى الناس... ليش يا دنيا تقسين عليه ليش... عذابه ... يا اغلى من في الوجود... خلاص ... خلاص .. انتهينا.. انتهى حبنا .. و كل شي بينا غدى مستحيـــــــــــــــــــل... عذابه.. احبج.. مابقى عندي غير هالكلمة... احبج ))


____________________

انا ماأملك الا قـلب .. لكن للاسف تعــبــــان
كفاني منبع الاحزان تفجر به شرايـيــــــــنـي

سويسرا...

عذابه كانت تصارخ و هي راقده...
ريم ( نشت من الرقاد وهي زايغة): عذوووووب بلاج؟؟.. عذوب نشي ... الا هو حلم... عذوبه حبيبتي ...
عذابه: بسم الله الرحمن الرحيم
ريم: بلاج زيغيتيني... الا هو حلم
عذابة: ناوليني كاس ماي..
ريم: يودي ( وهي تعطيها الماي)..
عذابه: والله هب جنه حلم..
ريم: خير ..
عذابة: أي خير... حلمت بكابوس فضيع
ريم: شو ؟
عذابه: ها .. لا ماشي
ريم: شو ماشي بعد... وعيتيني من الرقاد عالفاضي .. شو حلمتي
عذابه: حلمت بخليفه
ريم: ماااااااااااااااااااااااااالت... صدق ماعندج سالفه
عذابه: بس والله زياغ
ريم: شو انزين
عذابه: حلمت انه توفى
ريم: بسم الله عليه.. لا لا عيل بيكون عمره طويل ان شاء الله
عذابة: بس تدرين.. شفته و هو يغرق في البحر.. و انا كنت اطالعه و اصارخ عسب يمد لي ايده و اساعده.. بس هو تم يطالعني بنظره و ما تحرك او حتى حاول ينقذ عمره.. جنه وده ي...
ريم: وده شو؟
عذابه: وده يمووت..
ريم: شو هالاحلام التافهه... ارقدي احسن. تصبحين على خير
عذابه: وانتي من هله

تمت عذابه تفكر في الحلم... و طبعا اللي شاغل عقلها و قلبها خليفه...
(( يا حليلك يا خليفه... والله تولهت عليك واااااااايد... وانت ؟؟ تولهت عليه .. لا لا اكيد تولهت عليه.. ادريبك يا نظر عيني تحبني... بس المشكله انك ماتدري اني انا امووووت فيك... يا رب تجمعنا .. يا رب لا تفرقنا ولا تكسر قلوبنا .. اميـــــــــــــــــــــــــــن))


الفليل...

موعد رجوع قوم القبيسي الامارات... الكل مرتبش.. و اولهم عذابه.. حليلها طايره من الفرحه بشوفة اغلى انسان في حياتها (( خليفة)) .. ظهروا من الفندق مع المرشد السياحي فضل.. و اللي لفت نظرهم تغير سيف .. يا صوبهم و سلم على بو عمر و حرمته و اليده و عقبها روح عنهم... و عينه ما طاحت على حد من البنات.. ريم اضايجت من هالشي .. و تاكدت هذيج اللحظه انه سيف خلاص ما يبغيها...

ريم: شفتيه... والله انه تغير
خلود: عيل تبينه يلاحقنا و يطالعنا
ريم: لا هب جيه... بس عاد هب يعطينا بو لابس
حمده: لانه طلع على حقيقته.. كلهم مغازلجيين ..
عذابه: كلهم عاد؟
حمده: الا واحد
خلود: ومن يكون ؟
حمده: منو غيره يعني... فديته والله .. تولهت عليه
عذابه: انتي ما تستحين .. فديته اونه... لو سمعتج امايه جان زغدتج و عليقتج على باب الفندق تذكار..
ريم: اوووص... اسمه ابويه يرمس عن سيف...
_______________
ام عمر: حليله... اشعنه ما سافر ويانا
ابو عمر: مادريبه... البارحه قالي انه حجز في نفس الطياره.. و الحين يقول انه بيتم كمن يوم بعد..


خلود: محترم نفسه
حمده: غصبا عليه بيحترم نفسه.. عقب ما هزبتيه.. ولا بعد اذكر هاك اليوم في المدرسه ... يوم واجعته الريم... وافضيحتاااااه
خلود( وهي مستغربه): ومتى هزبتيه بعد؟
ريم ( وهي اطالع حمده): يا لسانج الطويل هذا
خلود: ممكن اعرف السالفه
ريم: ماشي ... مره هزبته و لعنت الخير فيه جدام البنات و بس
عذابه: لو انا بداله جان اتنقبت عسب محد يعرفني عقب الفضيحه
الكل: هههههههههههههههههههههههههههههه


___________________
دبي ..الصبح
بيت عبدالله القبيسي

فيصل قاعد في الصاله يتريا عمر ... و هذيج الساعه دخل عمر البيت

فيصل: تو الناس
عمر: شو عندك؟
فيصل: انا ماعندي شي اقوله .. بس اتريا ابويه يوصل و بخبره
عمر: خبره انزين
فيصل: ولا بعد مفتخر بللي سويته
عمر: ما سويت شي غلط
فيصل: و اشحقه تمد ايدك عليها
عمر: لانها غلطانه و تبغي حد يربيها
فيصل: الف مره قايليلك انت مالك حق عليها... ما تستحي ساير بيتهم و تسب هلها و لابعد تمد ايدك عليها جدام امها.. يوم ما تحترم نفسك احترم غيرك
عمر( وهو معصب): وانا الف مره قايلك لا تتدخل
فيصل: هب مشكله... انا مابدخل .. بس اتريا ابويه يوصل الفليل
عمر: اليوم بيوصلون؟
فيصل: هيه.. ولا تفكر تشرد
عمر: جيه حرامي .. و اشعنه اشرد.. انا قلتلك ما سويت شي غلط
فيصل: على راحتك...(( شل عمره و ظهر من البيت))


عمر انسدح عالكرسي و تم يفكر بللي صار .. و فكر بكل اللي استوى في بيت خليفه . وجان يرن تلفونه...

عمر: الو
بدور: تو الناس .. عنبوه اتصلبك من يومين ... وماحصلك
عمر: مشغول
بدور: مشغول و لا ما تبغي ترمسني
عمر (وهو معصب) : تراج متفيجه .... مالي بارظ ارمسج .. يلا باي ( وصك التلفون في ويهها)

وطبعا بدور كالعاده عصبت و حرقت اعصابها .. و عمر ولا على باله.. عمر اسلوبه جيه.. ما يفكر في حد ولا يراعي شعور غيره حتى لو كان اقرب الناس له..


___________________

ا حاول اكرهك لكن فؤادي ماكـــره انســان
غريبه كيف هذا القلب يحب الي جرح فــيني ***52***

بيت خليفة القبيسي...

خليفة من يومين وهو قاعد في حجرته... لا داوم ولا يرد على اتصالات فيصل او ربعه.. وتدخل عليه علياء..

علياء: خليفه.. قم نتعشى
خليفه: مابغي
علياء: بس
خليفه: قلتلج مابغي اتعشى
علياء: انزين بغيت اسالك
خليفة: شو ؟
علياء: قوم عمي بيردون اليوم؟
خليفة: هيه
علياء: ما بتسير
خليفه: لا.. علايه.. فديتج ما فيه على حشرتج الحين... صكي الباب وراج

وجان يسمعها و هي تصيح ... و صد وراه و شافها يالسه عالشبريه و الدموع في عينها

خليفه: بلاج؟
علياء ( وهي تصيح): نحن مالنا خص.. والله حرام... هذيله شرات خواتي .. ليش انحرم منهم .. ليش
خليفه: محد حرمج منهم
علياء: وامايه..؟؟
خليفه: ما عليج.. يومين و بترضى
علياء: ادريبها عدل.. عقب اللي سواه عمر.. خليفه محد يرضى بللي سواه عمر .. حتى انا.. مارضى على اختي.. بس ( وتمت تصيح)
خليفه: لا حووول... هذا وقت صياح...
علياء: انا ما اصيح على عمري
خليفه ( وهو يبتسم): عيل تصيحين على منو
علياء: عليك
خليفه ( وهو مستغرب): عليه انا .؟؟ ليش
علياء: ادريبك تحب عذوب و خاطرك فيها من زمان.. وحرام عقب اللي اتصلح بينكم تتفارقون لذنب انتو مالم خص فيه..عذوبه تحبك و تباك.. وانا متاكده من هالشي... حليلها.. اتخيل لو عرفت انكم خلاص ... ( وزاد صياحها)
خليفه ( وهو يحاول ما يبين اللي في خاطره): ما عليج انتي .. الدنيا نصيب.. و عذابه بتم بنت عمي لو شو ما استوى .. انزين ممكن تروحين تغسلين و يهج.. لاني ابغي ارقد..

ظهرت عنه علياء... بدال ما تخفف عنه زادت هم على همومه... بس مع فرق بسيط... قبل ماتدخل علياء حجرته كان يفكر كيف بتكون حياته لو تزوج و خذله وحده ثانيه... بس الحين عقب ما رمس علياء... تم يفكر كيف بتكون حياة عذابه يوم بتعرف انه حبها مااااات....

مطار دبي.. الساعه 8 الفليل

وصلوا هل القبيسي مطار دبي... و سبقهم بو عمر عسب يخلص سوالف الجوازات و غيرها... الابتسامه كانت مرسومه على ويوهم كلهم ..

ام عمر حليلها مستانسه بردتها للبلاد.. خلاص بتشوف عيالها وخاصه عمر اللي طول الوقت تحاتيه ..

خلود طايره من الوناسه بردتها .. طبعا بتشوف عبدالعزيز .. اول مره تحس بقيمته.. اول مره تحس انه فعلا هو الانسان اللي تتمنى تعيش معاه طووول عمرها

حمده محد قدها... حبيب القلب يترياها من زمان ... و هي تدري بشوقه و لهفته عليها... بس محد يدري انه شوقها و حبها لمحمد اكبر بوااااااااااااااااااااااااااااااااايد...

ريم حاولت قد ما تقدر تشل سيف من تفكيرها... ريم واقعيه اكثر عن خواتها... وتدري في قرارة نفسها انه الحب اللي يكون بهالنوع عمره ما بيدوم ... وانه نادر ما يستمر الحب بين الطرفين لو بدا غلط.. وهمها الوحيد نتيجتها في الثانويه.. وهي حاطه في بالها تدرس في جامعة زايد شرات خواتها...

عذابه الوحيده اللي الابتسامه ما فارقتها ولو ثانيه... تدرون ليش؟؟؟!!!
لانها تدري انه بيترياها .. تدري انه مشتاق لها.. تدري انه اول ما تظهر بتشوفه واقف و يطالعها بنظرته الحلوه...

اتبطل باب القادمون... بس الشي الوحيد اللي المفروض الكل يؤمن به.. انه ((( ليس كل ما يتمناه المرء يدركه.)))

ام عمر ويمت و غيمة الحزن ارتسمت على ويهها يوم شافت ولدها فيصل .. و طبعا عمر هب معاه...
سلم فيصل على هله و تم يضاحك مع خواته...
عذابه تمت تتلفت يمين و يسار ... بس خاب ظنها يوم ما حصلته.. استغربت ... و سالت اخوها فيصل ..

عذابه: وينه؟
فيصل ( وهو مستغرب من سؤالها... كيف تجرأت و تساله عيني عينك): خليفه؟
عذابه: هيه
فيصل: في بيتهم
عذابه استغربت ... (( في بيتهم... وانا الي متوله موت عليه.. وهو يالس في بيتهم ))

بس المفاجاة اللي محد يتوقعها .... انه فيصل ما يا روحه... في حد ثاني معاه... الكل تفاجا يوم شافه..

منو تتوقعــــــــــــــــــــــــــــــــون ؟؟


احبك؟!.. ليه احبك ليه واتوه بعالمي حيران
واشوف الناس من حولك تشوفيهم وتنسيني




عبدالعزيز: الحمدلله على السلامه...
بو عمر: الله يسلمك
عبدالعزيز: اشحالك عمي؟
بو عمر: بخير ربي يعافيك... ما شاء الله متى رديت؟
عبدالعزيز: من اسبوعين ... اشحالج عمتيه.. عساج بخير ..
ام عمر: بخير و سهاله الغالي...ان شاء الله تعافيت
عبدالعزيز: الحمدلله .. هذا انا جدامج..
ام عمر: تستاهل تستاهل...


طوووووووووووول الوقت و خلود منزله راسها... اكيد من الحيا .. ما توقعت انه تشوفه يترياهم في المطار.. عبدالعزيز اصر على فيصل انه يخاويه و يستقبل هله... ما شاء الله تعافى و صار عن احسن عن اول بوااايد... و اكثر عن جيه ... زاد حلا على حلاته و فعلا ما ينعاب بشي...

حمده: سلمي عليه انزين
خلود: حمدوه الله يخليج سكتي عني ...
ريم: اكيد اكيد.. خليها تتامل في الغالي.. من زمان ما شافته..
حمده: مادريبه حلو جيه
خلود: انتي ها اللي يهمج.. سكتن لا يسمعنا...


عبدالعزيز تم ملزم انه يركب معاه بو عمر و حرمته وحتى خلود... في البدايه خلود ما طاعت بس مع اصرار عبدالعزيز خلاها تلين شويه... و البنات ركبن مع يدتهن في سياره فيصل...

وفي سيارة عبدالعزيز .. تم بو عمر يسولف معاه.. و خلود تتامله و هو يضحك و يسولف ويا ابوها... اما عبدالعزيز فكان خاطره يرمس خلود او حتى يروي شوقه و حنينه بنظره .. بس ما قدر .. ماقدر حتى يرفع عينه و يطالعها مع انه المسافه بينهم قريبة ..

اما فيصل فطول الوقت تم متلعوز باسئلة عذابه... كل شو ي تساله عن عيال عمها و بالاخص خليفة .. و هو منحرج هب عارف كيف يرد عليها ... بس ما بغى يخبرها بللي صار مع عمر... يمكن لانه لاول مره حس بحب عذابه لخليفة ....

وصلوا البيت بالسلامه... نزلهم عبدالعزيز و ترخص عنهم ... دخلوا البيت واول ما دخل فيصل...

ام عمر: وينه اخوك؟
فيصل: اشوفكم الا متولهين على عمر .. ولا انا محد معبرني
اليده: يعني انت ماتدري بامك ...
فيصل: اتحريت الغربه بتغيركم
ام عمر: يوز عن حركاتك و خبرني وينه اخوك
ابو عمر: وين بيكون يعني ...في الشارع و في هالسناتر ... ماتعرفينه يعني
ام عمر: مايدري انه اليوم بنوصل
فيصل: يدري..
ام عمر: عيل اشحقه ما يا؟
فيصل: فديتج يا امايا لا تاذيني بسوالف عمر .. يوم بيوصل روحج اتخبريه

ودخل عليهم عمر ...
عمر (وهو يحب راس امه): الحمدلله على السلامه الغاليه
ام عمر: تو الناس .... توك تذكر انه عندك اهل تسال عنهم
عمر: والله يا امي مشغول
فيصل: وشو هو الشغل اللي يمنعك تتصل في ابوك و امك و تسلم عليهم
عمر ( بعصبيه): انت مالك خص.. انت ما تفهم عربي... هب جني محذرنك تدخل فيه
ابو عمر: قم اصفعه احسن
عمر: ما تشوفه شو يقول
ابو عمر: صدقه .. ما غلط بشي
عمر: انت دومك جيه... لازم تظهرني انا الغلطان.. لازم انا اللي العيب فيني و لا غيري ما ينعابون بشي
ام عمر : عنبوكم تونا رادين.... ما تستحون تظاربون
فيصل: قولي هالكلام لولدج... هذا لو يعرف الحيا جان ما ظرب....( وجان يسكت)
ابو عمر: كمل ... ظرب منو ..؟؟

ونزلن البنات على الحشره في الصاله...خلود و حمده دخلن الصاله... وريم واقفه عند الباب ... اما عذابه فكانت واقفه عالدري...

ام عمر: فيصل.. ( تحاول تسكته)
ابو عمر: سكتي عنه.... فيصل.. كمل
فيصل: ماشي
ابو عمر: اقولك كمل ... ضرب منو؟؟
فيصل: مد ايده عالهنوف

الكل اندهش ... و صدوا يطالعون عمر ..

ام عمر: صدق اللي يقوله فيصل... رد عليه بلاك ساكت ؟
عمر: ............
ابو عمر ( وهو معصب): ضربت بنت عمك ؟؟؟
عمر: ... ابويه انت ماتدري... هي ما تستحي ولا تخيل .. مطرشه واحد صوبي يبغي يخطبها و ..

قبل ما يكمل كلامه .. ياه طراااق من ابوه ... ام عمر حست بتعب في قلبها و يلست عالكرسي ... و فيصل حاول يهدي ابوه ... و حمده و خلود ركضن عند امهن .. و الريم حاطه ايدها على ثمها و مب مستوعبه اللي يصير.. اما عذابه يلست عالدري و تذكرت خليفة... عرفت ليش ما يا المطار ... و الشيء الوحيد اللي طرا على بالها ... هو انه حبها لخليفة غدى حلم صعب انه يتحقق في يووووم.....


الجــــــــــــــــــــــــــزء (((( 30 ))))





(((... والله ما يسوى اعيش العمر دونك... لا ولا تسوى حياتي بهالوجود.. دامك انت اللي رحلت و كيف بصبر عالبعاد و كيف بنثر هالورود...)))

يت الضربة على ويه عمر مثل اللي طعنه في قلبه... الضربه وصلت لقلبه قبل ما تاثر على ويهه... عمر تم منزل راسه.. يمكن عرف انه غلطان.. او يمكن ما تصور انه ابوه في يوم بيرفع ايده عليه مره ثانيه.. ماعرف شو يسوي و لا شو اللي لازم يقوله... اصلا حتى كلامه ما عاد ينفعه...

ام عمر حليلها اللي تعبت وايد... تم اطالع ابو عمر و هو يواجع ولده و يفتن عليه... الكل سكت .. وابو عمر بعده يفاتن على عمر... ام عمر من تعبها ماقدرت تنطق بحرف.. حست انه لسانها ثقل عليها و مارامت تنطق بكلمة..

فيصل: ابويه... خلاص
ابو عمر: انت جاب... مالك خص.. محد فيكم فيه خير ...انت لو فيك خير جان خبرتني بسواياته.. مستقوين على الفقيره و هلها.. ما تخافون ربكم انتو...
فيصل: خلاص يا بويه.. اللي صار من الماضي.. وان شاء الله كل شي بيتصلح
ابوعمر( وهو معصب): شو اللي بيتصلح.. ( ويصد صوب عمر). انا كمن مره قايلك مالك خص فيها... ما تفهم.. تتحرى اللي تسويه هذا صح... انف عليك يالخام... عنبوك فاضحنا بين العرب .. و الحين بين هلك.. اظهر برع البيت... برع.. لا بارك الله فيك ...

ام عمر: ابو عمر .. حرام عليك هذا ضناك.. هب زين اللي تسويه
ابو عمر: سكتي انتي... لا هو ولديه ولا انا اعرفه.. دامه جيه مابغيه..
خلود: ابويه فديت روحك.. هذا عمر ولدك.. هد نفسك..
حمده: مالك غيرهم يا بويه.. هذيله عيالك..
ابوعمر: الله لا يحوجني لحد... دامه بيتم جيه لا ابغيه ولاني بحايه له.. اطلع برع يلا... لا بارك الله فيك.

عمر ساكت.. حتى مارام يرفع راسه و يطالع ابوه... حس الدنيا ادور به..

ام عمر: عمر .. فديتك .. استسمح من ابوك.. قوله ما بيصير الا كل خير..
ابو عمر: مابغيه يستسمح..
ام عمر( وهو تصيح): حرام عليك
ابو عمر: حرمة عليه عيشته... اسمعني عدل... بنات عمك مالك خص فيهم... و هالبيت ماطيحه دام اني حي... اظهر يلا... ( و دخل حجرته)

ام عمر تمت تصيح بصوت عالي.. وحولها حمده و خلود اللي يحاولن يهدنها... و فيصل قعد عالكرسي و هو متلوم (( يا ربي شو اللي سويته... ليتني ماخبرت ابويه... الله يسامحك يا عمر.. كم بنسكت عنك !!))

وريم واقفه حذال الباب و هي اطالع اللي يستوي.. كانها هب مستوعبه.. تحس عمرها في حلم.. ما مدالهم توهم واصلين من السفر ..وانها تحصل المشاكل واقفه عند باب بيتهم... بس اللي طرا على بالها في هاك الوقت اختها (( عذابه)) .. عذابه كانت يالسه عالدري... صدت الريم بطالعها بس ما حصلتها... وجان تنتبه لصوت امها ..

ام عمر: عمر... عمر وين بتسير...

عمر ما رد عليها ... شل عمره وركب سيارته و ظهر من البيت... كان صدق معصب ... عصب من ضربة ابوه... ما عطاه فرصه يدافع عن عمره او حتى يفهم السالفه... كانه يتريا يمسك عليه الغلط و يعاقبه..
(( ليش يا بويه... ليش احس انك تكرهني.. انت ما سمعتني ولا عرفت السالفه.. ليش احس انك تحب الغرب اكثر عني.. عمري ما حسيت بحبك ولا بطيبتك معايه... خواتي و فيصل لهم كل شي .. و انا بالنسبه لك ولا شي... ))

ام عمر: فيصل.. طالع خوك.. خوفي يستويبه شي.. لا حول ولا قوة الا بالله.. شو هالمشاكل اللي حلت علينا ..
فيصل: ما عليه شر يا اميه
ام عمر: شو ما عليه شر.. ما شفت حالته انت... انت .. هيه انت السبب.. اشحقه تخبر ابوك ها...
فيصل تلوم اكثر يوم سمع امه ...
ريم: امايه.. لا تلومين فيصل... هذا عمر السبب... و المفروض حد يوقفه عند حده...
ام عمر: انتي مالج خص... بنت عمج الغلطانه
خلود: حرام عليج لا تظلمين الهنوف... الكل يعرف انه عمر دوم يلعوزها و ياذيها
ام عمر: صدق ما تستحين.. بدال مادافعين عن خوج
خلود: اخويه غلطان... و المفروض..
ام عمر: سكتي بس... يا ويل حالي عليك يا عمر... الله يعينك..


الكل يلس يفكر بللي صار... مرت الساعات و كانها ثواني... بس وحده عايشة في عالم ثاني...و الدقايق غدت في حياتها سنيـــــــــــــــــــــن...

عذابه انسدحت عالكرفايه وهي تفكر ... الكل يفكر في اللي بيستوي .. الكل يفكر بالحاضر.. الا عذابه.. يلست تفكر في ماضيها و يا ولد عمها خليفه... حست انه الماضي هو الشي الوحيد اللي يخفف عليها.. اما الحاضر بالنسبه لها استوى حلم صعب ان يتحقق...




((( ... ما وعدت انك تقاسمني المحبة .. و تبقى لي حب و لدروبي دليل.. بس حسافة الموت كان اقرب و ارحم حسبي الله وحده و نعم الوكيل...)))


عقب يومين...

حمده: ما طاعت تاكل
خلود: حاولي ... حليلها من يومين ما كلت شي
حمده: يالسه عندها من ساعتين و هب طايعه تحط اللقمه في ثمها... تدريبها امايه.. ما تعبرنا
ريم: حليلج يا اميه... والله غامضتني
خلود: الله يسامحك يا عمر.. لازم تيب لنا المشاكل و عوار الراس
ريم: هذا دومه جيه... عنبوه عيال عمي و محرومين من شوفتهم.. شو هالحاله
حمده: محد حرمج
ريم: لا والله... عقب اللي سواه عمر لج ويه تتصلين و تسلمين على علايه و لا الهنوف.. انا الصراحه مالي ويه
خلود: صدقج...

وسكتن مره وحده...

حمده: بلاكن صخيتن مره وحده
ريم: افكر
خلود: حتى انا
حمده: اكيد في عذوبه
خلود: منو غيرها.. غامضتني الصراحه
حمده: انا مستغربه من شي... من يومين ماستوت الظرابه بين عمر و بويه .. وهي ما نزلت دمعه وحده على اللي صار
ريم: حليلها .. دومها تكتم حزنها و ما تبين لحد... فديتج يا عذوب.. والله ما تستاهل
خلود: بتخبرج يالسه هني شرات العيوز ليش؟؟ انت هب جنج مخلصة امتحانات الثانويه
ريم: هيه
خلود: شو هيه... هب ناويه تتخبرين عن نتيجتج
ريم: تو الناس
حمده: شو تو الناس بعد... كملنا اكثر عن شهر ...
ريم: ما عليه ما عليه.. لاحقين عالنتيجه
خلود: ريمو... شو هالبرود اللي فيج... اللي يشوفج ما يقول هاي اللي كانت تقطع عمرها من الدراسه
ريم: انا سويت اللي عليه... و ان شاء الله اتوفق
حمده: ان شاء الله... بسير اطالع عذوب..( وظهرت عن خواتها)

___________________

حمده: عذوب.. راقده؟
عذابه: لا ..
حمده: ما بتتعشين؟
عذابه: لا
حمده: بلاج؟
عذابه: ماشي ..
حمده: شو تسوين..؟؟
عذابه: ماشي
حمده: بلاج ترمسين بالقطاره
عذابه: تراج تساليني و ارد عليج
حمده: اها.. انزين قومي يلسي معانا بدال القعده روحج...
عذابه: مالي بارظ
حمده: ليش
عذابه: ان يلست بتم امايه تردد لنا نفس الموال عمر و عمر.. وانا الصراحه مالي بارظ اسمع شي عنه
حمده: ليش جيه ترمسين عنه؟
عذابه: انا ما قلت شي ..
حمده: احس بج بديتي تكرهينه
عذابه: انا ما كرهه.. مهما صار هذا اخويه و بيتم اخويه و ما يهون عليه... بس الحق حق.. هو غلط و عليه انه يعترف بغلطته... ما تشوفين امايه شقايل حاطه على عيال عمي... تحط الغلط على الهنوف و الكل يدري ان مالها ذنب... بس امج ما تبغي تعترف بهالشي... تتحرى ولدها الصح و الباقي غلط.. و شرات ما يهون عمر عليه.. حتى عيال عمي ما يهونون عليه... و خاصه..
حمده: خاصه منو... ؟؟
عذابه ( والحزن في عيونها): خليفه... ما يهون عليه ينحط في هالموقف السخيف... و السبه منو اخوج... هب جنه ولد عمه و الفروض يداريهم و يهتم فيهم .. هب يسبهم و يقاطعهم.. هب يغلطون و نحن اللي نتحمل النتايج.. بذمتج هب ظلم هذا
حمده: أي نتايج... عذوبه.. اللي بينج و بين خليفه عمره ما بينتهي
عذابه ( وهي تضحك بضحكه الم): ما بينتهي... تحاولين تواسيني و لا تتجاهلين الواقع
حمده: ابا اعرف انتي ليش حاطه في بالج انه خلاص ما بيخطبج و اللي بينكم انتهى
عذابه: لانه الواقع... انا اعرف خليفة عدل... ما بيرضاها على خواته... خليفة له عزة نفس عمري ما شفتها في غيره... المهانه بعيده عنه ... تعتقدين ليش طول الوقت ما تكلم و لا اظارب مع عمر ؟؟!!.. هذا هب جبن ولا ان خوف... هاي رجوله يا حمده... ما نزل راسه لحد .. ولا نزل مستواه لمستوى عمر .. قال في خاطره مهما كان هذا ولد عمي و حسبة اخويه... بس عمر ما قدر هالشي .. و الحين عقب اللي صار .. ما ظن انه كرامته تسمحله يتقدم لي مره ثانيه...
حمده: لو يحبج ما بيهدج
عذابه: انا واثقه انه يحبني... واثقه بعد انه يدري انه انا احبه زود.. بس كل شي بحدود... ما انكر انه خليفه نزل كرامته عشاني اكثر عن مره.. بس عمره ما بينزل كرامة هله.. عشاني ولا عشانه ...

حمده تمت ساكته... ماعرفت شو ترد عليها.. اول مره تحس بواقعية عذابه... اللي قالته صح.. اول مره تحس بحب خليفة و عذابه الكبير...

عذابه: بلاج ؟؟ اللي ماخذ عقلج يتهنى به
حمده: افكر فيج... غريبة ما نزلن دموعج
عذابه ( وهي تحاول غير الموضوع): وانا اتحراج تفكرين في الريل
حمده: محمد
عذابه: جيه في غيره.. غريبه ما يا يسلم من ردينا من السفر
حمده: اتصل و سلم على ابويه و امايه... و يقول انه مشغول و يمكن بالخميس بيشرفنا
عذابه: و ليش ترمسين عنه بهالاسلوب
حمده: احس به متغير ... بس محد مصدقني
عذابه: يمكن لانكم ابتعدتوا فتره عن بعض
حمده: يمكن
عذابه: ما عليج.. الحين يوم بيشوفج ما بيرد بيته.. بيتم متفيزر عند باب بيتنا كل يوم... شو رايج نشغله ناطور هب احسن..
حمده+ عذابه: ههههههههههههههه

حمده تمت مستغربه من عذابه... تدري باختها و تدري انه تخفي شعورها عنهم... و انه الابتسامه اللي على ويهها مجرد قناع... قناع تخفي وراه جبال من الحزن و الالام...



بيت خليفة القبيسي..

يلس خليفة و خواته وامه يتعشون ....

ام خليفه: خليفة
خليفة: لبيه
ام خليفه: سرت تسلم على عمك
خليفه( بتردد ): هيه نعم
ام خليفة: واكيد سرت له البيت
خليفة: لا.. سلمت عليه البارحه في المكتب
ام خليفة: زين سويت
علياء: يا اميه لين متى بنتم على هالحاله.. مهما كان هذيله عيال عمنا
ام خليفه: وانا ما قلت شي... عمكم على عيني وراسي.. بس عياله ابتعدوا عنهم
خليفة: صدقها علايه... عيال عمي ما نروم نقطعهم
ام خليفه ( بعصبيه): واللي سواه ولد عمك
الهنوف: امايه حرام تظلمينهم .. اذا عمر غلط هم مالهم ذنب.. وانتي ادرى بهالشي
ام خليفه: نسيتي اللي سواه فيج...
الهنوف: لا ما نسيت و عمري ما بنسى... بس خواتي هن خواتي ... ولو هو غلط عليه انا ما بسير احمل خواته الغلط..
ام خليفه: والله مادريبكم .. سووا اللي تبونه ( ونشت عنهم)

وعقبها بدقايق نشت الهنوف بتلحق امها...و يلس خليفة يسولف ويا اخته و عيال الهنوف( عبدالله و سلامه).. مشاعره شرات عذابه... بارده و جافه.. ابتسامته و ضحكته باهته... كانه قلبه تجمد .. و مشاعره اندفنت..


في حجرة ام خليفة

الهنوف: اميه.. بغيتج في سالفه
ام خليفه: خير
الهنوف: الخير في ويهج.. بغيت ارمسج عن خليفه
ام خليفه: بلاه
الهنوف: لين متى بتعاملينه جيه
ام خليفه: جيه شو سويت له
الهنوف: حرام عليج.. هذا ولدج و هب زين تقسين عليه
ام خليفه: وانا بشو قسيت عليه
الهنوف: ليش تحرمينه من بنت عمه
ام خليفه: كمن مره اقولج لا تطرينها جدامي.. و السالفه هاي مابغيج ترمسين عنها مره ثانيه
الهنوف: يحبها و يباها... لا تحرمينه عذابه
ام خليفه: شو شكالج
الهنوف: تدريبه عدل.. كتوم ومايحب يظهر اللي في خاطره
ام خليفه: هذا ولديه واعرفه عدل.. لو فيه شي جان خبرني.. بس انتي اللي تيبيلنا المشاكل.. ما كفاج اللي ياج
الهنوف: كفاني.. و مابغي اكثر.. بس اخويه و اشوفه حزنان.. والله ما يهون عليه.. مابغي اكون انا السبب في حرمانه اعز الناس عنده
ام خليفه: يوزي عن هالخرابيط.. جان في خاطره يعرس تراني خطبت له
الهنوف ( وهي مستغربه): خطبتي له... منو !!!؟؟؟
ام خليفه: بنت يرانا.. شمسه
الهنوف: بس هو ما يباها.. وانتي ما شاورتيه اصلا
ام خليفه: بخبره خلاف
الهنوف: اميه حرام عليج...لا تظليمنه ... والله ما يستاهل
ام خليفه: ويديه انا.. جيه بخطبله وحده من الشارع.. حليلها بنت عرب ما عليها قصور و الف من يتمناها
الهنوف: ما قلت شي.. بس خليفه هب من هالالف اللي يتمنونها
ام خليفه: تراج عورتيلي راسي... اظهري و صكي الباب وراج...
الهنوف: بس ..
ام خليفه: لا بس ولا شياته... برمسج خلاف.. صكي الباب عدل



ظهرت الهنوف من حجرة امها... و حست بضيق .. حست انها السبب في اللي يستوي بخليفة ... كان خاطرها تساعده و تقربه من عذابه... بس الظاهر الزواج مثل ما يقولون قسمة و نصيب

خليفه: تحيرتي عند امج
الهنوف: ليش .. شي في خاطرك
خليفه: شلي ولدج هذا.. عيزني..
الهنوف: ههههههههه ان شاء الله
خليفة: بلاها امايه؟
الهنوف: ها .. ماشي
خليفة: ادريبج رمستيها عني
الهنوف: وانت شو عرفك
خليفه: ادريبج
الهنوف: وتبا تعرف شو قلتلها
خليفة: لا ابغي اعرف هيه شو قالتلج
الهنوف: ماشي
خليفة: متاكده..
الهنوف( بتردد): هيه
خليفه: برايج عيل
الهنوف: وين بتسير
خليفة: عند فيصل
الهنوف : صدق
خليفة: هيه... حاشرني .. بسير اتمشى وياه وبرد.. يلا مع السلامه
الهنوف: الله يحفظك

الهنوف ما بغت تخبر خليفة بللي دار بينا و بين امها... يمكن كانت خايفة من ردة فعله... بس اللي كان في خاطرها تنشده عن عمر و عن حاله... و هي تفكر فيه حطت ايدها على خدها و تذكرت الضربة ..
(( شو اللي يخليني افكر فيك يا عمر... يالله على هالقلب.. مهما تجرح فيه و تطعنه .. بعده يحبك و ينبض باسمك... بس حسافة يا عمر ... حسافة يوم يكون الحب لشخص ما يعرف معنى الحب ))

من مواضيع ورد جوري
0 .. ][ ديل بييرو يرشح فرنسا للفوز بكأس العالم ][ ..
0 بولندا وأوكرانيا تفوزان بتنظيم كأس أوروبا 2012
0 الحلا المفضل
0 كولومبيا × البرجواي تقديم
0 ^_^ ناس فسقانه بس فنانه^_^

توقيع ورد جوري

مشكورة من القلب ورد جوري

من مواضيع شموخ العز
0 قصيدة رائعة لناصر القحطاني لرجال الهيئة
0 طائر يسجد لله في الحرم المكي
0 أنشوده مضحكه خخخخخخخخ
0 حوار مع سيجاره
0 مواقف محرجة من الأطفال!!!