الجزء [16] من قصة أحبك لو بغيت إنساك مقدر

بيت عبدالله القبيسي...

ام عمر: الله يهديك بس.. ما بيستوي شي جان رمسته
ابو عمر: قلتلج الف مره مابغي ارمسه
ام عمر: هذا ولدك.. وهب زين عليك اللي تسويه
ابو عمر: لا مب ولديه... يوم بيغدي ريال و بيعتدل حاله هذيج الساعه بقول عنه ولدي
ام عمر: لا تكسر بخاطري يا بو عمر.. رمسه عشاني
ابو عمر ( وهو معصب): ما تشوفين حالته.. لا يسال عن هله.. و لا ينشد عن حال عياله.. عايبنج اللي يسويه..
ام عمر: بس
ابو عمر ( وهو يغير الموضوع): ها فيصل.. وين دارك
فيصل: بتلاقى ويا خليفة و بنحوط رباعه..

عذابه اول ما سمعت طاري خليفة فز قلبها... الود ودها تسمع أي شي عنه ..

ابو عمر: زين... سلم عليه...
فيصل: ان شاء الله.. شي في خاطركم
ام عمر: سلامتك.. جان بتتخبر وين عمر زين بتسوي
فيصل ( وهو يحاول يرضي امه): فالج طيب... وداعة الله
ابو عمر: حليله خليفة...
ام عمر: بلاه
ابو عمر: ماشي
ام عمر: واشحقه تذكرته
حمده: خليفة حسبة ولده.. اشحقه ما تبينه يذكره
ام عمر: يا لسانج الطويل هذا.. المشكله يدتج في العين .. و انا هب متفيجتلج.. و لا جان ادبتج و قصيت لسانج هذا...
ريم: امايه بلاج على خليفة... كل ما طريناه عصبتي.. هذا النسيب..
ام عمر: فال لله ولا فالج

الكل استغرب من رد ام عمر .. واولهم بو عمر

بو عمر: جيه هب عايبنج
ام عمر: اكيد عايبني..بس ماله نصيب عندنا

عذابه تمت مستغربه اطالع امها.. هب فاهمه اللي تقوله.. معقوله امها تغير رايها ...

ابو عمر: واشعنه ما له نصيب عندنا
ام عمر: يا بو عمر المشاكل زادت.. و يكفي اللي يانا
ابو عمر: شو تقولين انتي ... عذوب محد بياخذها غير خليفة
ام عمر: هو يا عندك و طلبها
ابو عمر ( وهو متردد): لا ما يا... بس ادريبه عدل
ام عمر: لا ماتدري.. الحين كل شي تغير.. و ماظن امه بترضى ...
ابو عمر: و اشعنه ما ترضى
ريم: عقب اللي سواه عمر تبانا اناسبهم...

عذابه بعدها ساكته.. يمكن لانه ما حصلت كلمة تعبر فيها عن مشاعرها الدفينه ... و جان تروح حجرتها

ام عمر: حرام عليك تكسر قلب البنيه
ابو عمر: ما تشوفين رمستج انتي
ام عمر: يا بوعمر انا ادريبها ام خليفه... ما تبا عذوب... لا تعشم بنتك بشي...



(((... روح انا راضي بغايبك يا حياتي.. هذا قمسة لي و هذا لي نصيب.. كنت شمعة تضوي و تشرق لي حياتي .. انطفيت و رحت في وقت المغيب...)))


ثاني يوم الصبح....

خلود: حشا ما تعبتي من كثر ما تهذربين في التلفون
حمده: لا ما تعبت .. ارمس ربيعتيه حرام
خلود: لا هب حرام...
حمده: ثواني و بخلص
خلود: من الصبح جيه تقولين

حمده: خلا ص مهرة... اذا الله راد يوم الاربعاء بنتلاقى
مهره: خلاص غناتي.. اشوفج على خير...
حمده: اوكي.. باي

حمده: تفضلي.. حشرتينا..
خلود: زاد فضلج....
حمده: ماقلتي بترمسن منو.؟
خلود: الهنوف..
حمده: اها...

خلود: مرحبا الساااع
الهنوف: يا مرحبا بج زود... اشحالج يالقاطعه
خلود: انا القاطعه
الهنوف: هيه نعم انتي...
خلود: بخير يسرج الحال... العلوم من صوبج
الهنوف: بنعمه و عافيه...
خلود: اتولهت عليج..
الهنوف: هههههه واضح
خلود: اشحالهم العيال ... و علايه و امج
الهنوف: الكل بخير و سهاله...
خلود: دوم ان شاء الله
الهنوف: وياج... شو السفر؟
خلود: الحمدلله استانسنا... بس الحلو ما يكملش... ناقصنا وجودكم
الهنوف: خيرها في غيرها..
خلود: انزين
الهنوف: شو
خلود: ماشي.. بس الصراحه مادري شو اقولج... عقب اللي سواه عمر احس مالي ويه حتى ارمسج
الهنوف: لا تقولين جيه... مهما صار انتو حسبة خواتي ..
خلود: تسلمين والله... شو حاله خليفة
الهنوف: الله يعينه
خلود: خير
الهنوف: حليله .. الوحيد اللي متاذي من السالفه.. والله ما يستاهل
خلود: ليش شو اللي صار
الهنوف: اميه الله يهديها... خطبتله وحده
خلود: شـــــــــــــــــــــــــو
الهنوف: مابغيج تخبرين حد
خلود: بيعرس يعني
الهنوف: على ماظن
خلود: ومن بياخذ
الهنوف: امايه خطبت له بنت يرانا..
خلود ( لا اراديا): و عذوب
الهنوف:........
خلود: صدق اللي تقولينه
الهنوف: هذا اللي صار
خلود: و خليفة شو رايه... مستحيل يوافق.. الكل يعرف انه يبغي عذابه
الهنوف: خليفة لين الحين مايدري... بس اكيد اميه بتقنعه
خلود: مستحيل. و عذابه يالهنوف... وعذابه؟
الهنوف: الصراحه... اميه حرمت عليه عذابه... و حلفته ما ياخذها
خلود:.....................
الهنوف: خلود.. وينج
خلود: اسمع... بس هب مستوعبه...
الهنوف: خلود والله صدقيني ما بايدي حيله..
خلود: ادري... اللي غامضتني عذابه.. شو بيستويبها لو عرفت.. انتي ما تشوفين حالتها الحين... تسوي عمرها قويه و هي اصلا متحطمه..
الهنوف: قسمة و نصيب
خلود: شو تقولين انتي .... الهنوف .. نحن نرمس عن عذابه و خليفة ... وانتي ادرى بللي بينهم... ماعرف شو اسوي.. كيف اخبرها..لا لا ماقدر اقوللها.. والله ماقدر


الجزء (31 )

لي حبيبٍ حيل حبيته ** و صار عمري و سيد خلاني
انسى همي لو انا ييته ** و يفز قلبي لو تلاقاني

يلست خلود تفكر في اللي قالته الهنوف عن خليفة... هب قادرة تصدق اللي بيستوي ... و كل همها كيف بتكون ردة فعل عذابة يوم بتعرف السالفة ... و قررت خلود تنزل ترمس امها عن عذابة

خلود: اميه..؟؟
ام عمر: هني هني .. في المطبخ
خلود: شو تسوين في المطبخ... ليش اتعبين عمرج... خلي البشكاره تشتغل .. شو خانتها..
ام عمر: شو عرفها الخدامه... يوم انتن ما تشتغلن منو بيشتغل غيري
خلود: انزين حد بيينا اليوم؟
ام عمر: هيه
خلود: منو
ام عمر: منو يعني... عبدالعزيز و هله
خلود ( وهي مستغربه): اليوم بيوووووووون؟؟؟؟؟؟!!!!!!!!
ام عمر: هيه
خلود: متـــــــــــــــــــــــــــأكده؟؟؟
ام عمر: ويديه... اقولج هيه
خلود ( وهي معصبه): و اشحقه محد خبرني؟.. توكم تخبروني... لا حوووول... شو اسوي الحين...
ام عمر: بلاج تخبلتي ؟؟؟ .. العرب يايين يسلمون علينا بس
خلود: لا والله
ام عمر: هيه بعد شو
خلود: انزين .. المفروض تخبريني عسب اتلبس و اتعدل.. و اساعدج
ام عمر: مابغيج تساعديني ... الاكل زاهب و الفواله موجوده ... شو تبين اكثر... حليلها عذوب ما قصرت.. من الصبح تعابل في المطبخ
خلود: انزين و انا
ام عمر: انتي شو ؟
خلود: المفروض تخبريني من الصبح.. هب تخليني جيه
ام عمر: ويديه انا... الحين انتي محتشره لانج ما تعدلتي ولا اتلبستي.. يا اميه الجمال هب في الويه بس.. الجمال جمال الروح و النفس... و بعدين ما شاء الله عليج.. ما عليج قصور.. اللي يسمع رمستج يقول انج خسفه وما تشاهدين الا بالمكياج..روحي يالله و ودري عنج هالخرابيط... روحي تلبسي العرب بيوصلون عقب شوي...
خلود ( وهي مستحيه): ان شاءالله

خلود ياية بتظهر من المطبخ.. بس في خاطرها تسال امها .. بس مستحيه... و عقب ترددت و قررت تسالها

خلود: امايه
ام عمر: خير
خلود: بغيت اسالج
ام عمر: شو
خلود: منو.... حد.... ( وهي متردده)
ام عمر: بلاج.. ارمسي عدل
خلود: حد وياهم .. ولا بس الحريم
ام عمر: اكيد ولدهم بييبهم..
خلود: اها
ام عمر: وليش تسالين؟
خلود: لا لا ... ماشي... بسير اتلبس.. ( روحت عن امها)

حست خلود بفرحه كبيرة .... الود ودها تصارخ و تعبر عن فرحتها... خلاص .. ا يام الصبر و الانتظار بتنتهي في دقايق ... و ايام الفرحه و السعادة اعلنت وصولها في حياة خلود القبيسي.... من فرحتها نست سالفة عذابة ... اللي شاغل تفكيرها و قلبها ...(((( عبدالعزيز ))))

خلود: حمدوه... حمدوه... الحقيني
حمده ( وهي زايغة): بلاج.. شو استوابج...؟؟
خلود: ااااااااااااااااااااااخ يا حمدوه... قلبي .. قلبي ما روم اشله
حمده: و اشحقه تشلينه... فريه في الزباله احسن
خلود: ويا ويهج... احس قلبي بيطير من الفرحه
حمده: الا انتي اللي بطيرين من الفرحه هب بس قلبج... بشري ؟؟
خلود: اااااااااااااااااااااااااااااااااااااااااااه ... انا احساسي صدق ولا توهم اذا شفتك تفز و تحتفيبي .. انا فاهم و طبع الحر يفهم ... ولكن ودي اسمع يا حبيبي
حمده: الله الله الله... قمنا نغني بعد... لا حبيبتي اشهد انج هب صاحيه... هاي خلود اللي يضربون فيها المثل .. خلود الهادية .. خلود الرزينه... خلود العاقل... ظهرتي اخس وحده فينا
خلود: لا تلوميني يا حمده .. لا تلوميني ... والله هب قادره اوصفلج اللي احسه فيه الحين
حمده: لا فديتج... لا اتعبين عمرج و توصفين ... كل شي واضح... السالفه فيها عبدالعزيز
خلود: و من غيره سبب فرحتيه و سعادتي بهالدنيا
حمده: نعم نعم نعم....؟؟؟ شو هالحب
خلود: بسير اتلبس...
حمده: ليش؟
خلود: هله بيوونا اليوم
حمده: وانا اقول بلاها الحبيبه مستانسه... اثري روميو بيوصل اليوم
خلود: اطنزي على راحتج...
حمده: برايج عيل.. بسير اطالع عذوب ... من الصبح ما شفتها
خلود: ذكرتيني..
حمده: بشو
خلود: ......
حمده: شو تبين تقولين..
خلود: عذوب
حمده: بلاها؟
خلود: .........
حمده: بلاج انجلبتي مره وحده
خلود: ما بتصدقين
حمده: بصدق... بسج عاد.... خبريني
خلود: تقول الهنوف انه امها خطبت بنت يرانهم... لخليفة
حمده ( وهي مستغربه): قولي والله
خلود: والله
حمده: لا لا .. ما صدق... تخرفين انتي
خلود: جيه عيوز اخرف... الهنوف روحها خبرتني

جان تدخل عليهن الريم...........

ريم: نجــــــــــــــــــــــــــــــــــــــــــــــــ ـــــــحـــــــــــــــــــــــــــــــــــــــــت
حمده: اتخبلتي انتي... ليش جيه اتصارخين
ريم: اقولج نجحت ...
خلود: وكم نسبتج
ريم: كم تتوقعون
حمده: على مذاكرتج.. اتوقع 70%
ريم: جيه كلهم شراتج...لا حبيبتي هذا هب مستوايه
خلود: عيل
ريم:90.1%
حمده: وليش بعد واحد
ريم: مادري والله... بالغلط يمكن
خلود: ههههههههههههههههههههههههههه... مبروك.. تستاهلين والله
ريم: ادري
حمده: ادري اونه....
ريم: وانتي ما تبين تباركيلي يعني
حمده: افا عليج.. كم ريم عندنا.. الا هي وحده و مظهرتلنا قرون.. مبروك
ريم: الله يبارك في حياتج.... بسير اتصل في ابويه و ابشره...( طلعت عنهم)

وهذيج الساعه دخلت عذابه

عذابه: خبرتكن الريم
خلود: هيه.. تستاهل حليلها
عذابه: هيه والله... انزين خبرتج اميه انه عرب بيونا
خلود: هيه خبرتني... وانتي يوم تعرفين اشعنه ما خبرتيني
عذابه: مادريبهم هل عبدالعزيز.... بلاكن اطالعني جيه؟؟
حمده: ها .. لا لا ماشي
خلود: بسير اتلبس...
عذابه: بلاها خلود
حمده: ماشي.. انزين عذوب شو رايج نسير بيت ربيعتيه مهره
عذابه: ليش
حمده: بس جيه.. عازمه ربيعاتنا في الجامعه
عذابه: مادري والله.. طاعي ريم جان بتسير
حمده: اوكي

في الصاله

ريم: اميه.... امايه وينج؟؟؟؟ اماااااااااااااااااااااااااااااااااااااااااااااااا اايه
ام عمر: بلاج اتزاعقين شرات الخبايل... وطي صوتج...
ريم: كيفي
ام عمر: كيفج بعد... ترادين يا مسودة الويه
ريم: يحق لي... محد اليوم يرمسني.. خلاص راسي كبر
ام عمر: لا حول ولا قوة الا بالله... بنات اخر زمن
ريم: تدرين بلاني
ام عمر: تخبلتي بعد شو
ريم: نجحت
ام عمر: نجحت بشو؟
ريم: نسيتي امتحانات الثانويه انتهت من فتره
ام عمر: هييييييييييييييييييه... بشري ... كم يبتي
ريم: اول شي خبريني..شو بتعطيني ؟؟؟
ام عمر: يا ويلي منج... بعطيج اللي تبينه... كم نسبتج؟؟
ويدخل عليهم بو عمر.........

ريم: هلا والله ...... هلا بالغالي ... هلا باحلى ابو في هالدنيا ... هلا باغلى انسان ... ( وتحب راس ابوها)
ابو عمر: يا مرحبا بج... خير .. بلاج...
ريم: فديت ابويه انا..
ام عمر: يوزي عن حركاتج و خبريني شو هي نسبتج؟
ابو عمر: طلعن النتايج
ريم: هيه...
ابو عمر: بشري؟؟
ريم: شو تتوقع
ابو عمر: ادريبها الريم... اكيد بتنجح
ريم: الحمدلله نجحت
ابو عمر: زين زين... مبرووووك
ريم: بس مبروك....
ام عمر: لا حووول... بتقولين كم نسبتج
ريم: انزين
ابو عمر: و من خبرج بالنتيجه
ريم: ظهرتها من النت... نسبتيه طال عمرج يا ام عمر 90.1%
ام عمر: بس
ريم: بس اونه... كم تبين اييب
ام عمر: و اشحقه واحد بعد
ريم: مادري
ابو عمر: تستاهلين تستاهلين
ريم: انزين
ام عمر: شو
ريم: ... و الهدية
ام عمر: أي هدية
ريم: هدية نجاحي....
ام عمر: شو تبين
ريم: عقد الماس
ام عمر: الماس مره وحده.. خبري ابوج
ريم: لا لا ... هديتج غير .. و هدية ابويه غير
ام عمر: كدت شقرو عيل...
ابو عمر: هديتج جاهزه
ريم: لا والله...شو ؟؟؟
ابو عمر: يايبلج ريل
ريم ( وهي مستغربه): ريل..... شو اسويبه
ام عمر: صدق ولا تتمصخر
ابو عمر: صدق

ريم جنه حد عاطنها كف.... الصراحه هاي اخر هديه تتوقعها.... ريل مره وحده...

ابو عمر: ترى الريال طيب و ما عليه قصور... و لد عرب و ما شاء الله عليه ما عليه كلام.. و انا خلاص رديت عليه و وافقت
ريم: ابويه... كيف توافق دون ما تخبرني
ام عمر: اشحقه ترد عليه... انزين شاورنا...
ابو عمر: وليش ما وافق... ما شفت شي عليه... و بعدين وايد صبر علينا الريال.. كم بنخيسه
ام عمر: ومنو هو؟
ابو عمر: سيف الكعبي...

ريم حليلها استانست من خاطر.... سيف اللي يا و خطبها... اتحرت انه نساها و شلها من تفكيره و قلبه... بس الواقع اثبتلها انه بعده يباها .. و بعده متمسك فيها...

ام عمر: زين عيل يوم رديت عليه... ما شفنا منه الا كل خير
ابو عمر: ها الريم... جانج ما تبينه . ترانا بعدنا عالبر و ما صار الشي... و كل شي نصيب في هالدنيا... و اذا انتي ما تبينه .. برد عليه و بستسمح منه .. شو رايج
ريم: لا لا .... ( جان تستحي .. )... اللي تشوفه ابويه... اذا الريال زين... اووووه... بسير فوق ... ( و ربعت عند خواتها)
ابو عمر: هههههههههههههههههه
ام عمر: ههههههههههههه.... اول مره اشوفها تستحي.. ولا هي وين والحيا وين...
ابو عمر: كبرن البنات و بيعرسن
ام عمر: هيه والله... انزين اتصلت في عمر
ابو عمر: كمن مره اقولج لا تبين طاريه
ام عمر: يا بو عمر هب زين اللي تسويه.. اليوم بيونا العرب يخطبون اخته وهو مايدري...
ابو عمر: نفاد... شو تبيبه
ام عمر: بعده ترى ولدنا ... هذا ولدك و من لحمك و دمك
ابو عمر: بس هو اللي ما يعرف هالشي ... و انتي تشوفين اللي سواه زين ... هب عيب عليه يظلم بنت عمه و يبهدلها جدام العرب... شو بيقولون عنه ها... فاضحنا في كل بقعه بسواياه الشينه .. و تبيني ارمسه بعد.. لو فيه خير جان يا و اعتذر بس هو اللي راسه يابس.. ما يخاف ربه في عياله.. فارنهم هناك لا يسال عنهم و لا يصرف عليهم... و فوق ها كله البنيه ساكته... الحين في حرمه في هالزمان ما تشتكي في المحاكم جان ريلها ما يصرف على عياله... بس الهنوف اللي قلبها طيب.. ما هان عليها تبهدل ولد عمها في المحاكم... و لا بعد سار يمد ايده و يضربها دون أي حق....

ام عمر سكتت و ما رامت ترد عليه ... يمكن حست انه اللي يقوله صح... و حست بغلط ولدها ...

ابو عمر: بتخبرج اشعنه ما تسيرين تسلمين عليهم؟
ام عمر: وابويه انا.. نحن اللي رادين من السفر ما يووا يسلمون علينا.. تباني انا اسير و اسلم
ابو عمر: ما فيها شي ...
ام عمر: و بعدين يا بو عمر مالي ويه اسير... و انا اشوف عوشه ( ام خليفه) زعلانه... و ماظن تبانا نزورهم
ابو عمر: ودري عنج هالخرابيط.. و من باجر سيري ويا بناتج وسلمي عليهم
ام عمر: أي باجر الله يهديك... خل الامور تهدا و عقبها يصير خير...

حب غيره ابد ما تمنيته ** والله اني فيه هيماني
ويل حالي يوم لقيته ** خزني بالعين و رماني

بيت خليفة القبيسي...

علياء: خليفة ... خليييييييييييييييييييييييييييفه؟؟
خليفة: بلاج؟
علياء: امايه تبغيك.
خليفة: ياي الحين ..
علياء: الله الله ... شو هالزين ... متكشخ و متعدل.. وين ان شاء الله
خليفة: ساير بيت عمي
علياء: والله؟؟
خليفة: هيه
علياء: ودني معاك
خليفة: تبين امج تذبحج
علياء: والله حرام عليكم.. تدرون عدل انه مالي ربع غير بنات عمي.. تحرموني منهم بعد
خليفة: والله يا علايه الود ودي ما يصير هالشي .. بس امي الله يهديها.. بسير اطالعها..

ونزل الصاله عند امه ... و شافها يالسه ويا الهنوف

ام خليفة: وين بتسير؟
خليفة: بيت عمي...
ام خليفة ( وهي مغيظة): اشعنه تسيرلهم بعد
خليفة: عمي يباني.. يقول ناس يايين يخطبون خلود
الهنوف: صدق... تستاهل حليلها
ام خليفه: و انت وشلك...
خليفة: امايه فديت روحج لا تردين تفتحين السالفه الجديمه.. انا قايلج عيال عمي هب قاطعنهم.. اللي طلبتيه منه سويته.. عذابه و خلاص نسيتها... تبين تحرميني حتى من شوفتهم
ام خليفه: بشو بتفيدك شوفتهم ها.... يا ابويه استهدى بالله و ابتعد عنهم... ما وراهم الا المشاكل
خليفه: و انا راضي بمشاكلهم
ام خليفة: ادريبك... ادخل الرمسه من هني و اظهرها من هناك... لو ارمس من اليوم لين باجر ما شي فايده
الهنوف: امي عاد... خلاص ... كم بنرمس في السالفه.. اللي صار صار.. و ماله داعي دوم نظارب
ام خليفه: شو اسويبكم... ما تفهمون... انزين خليفه بغيتك في سالفه
خليفه: هب الحين... مستعيل .. يوم برد برمسج
ام خليفه: جيه خطبتك ولا خطبة بنت عمك
خليفه: جان زين لو خطبتيه
ام خليفه: خلاص الغالي... ترانا خطبنا لك
خليفه: منو؟؟
ام خليفه: شمسه بنت علي... بنت يرانا
خليفه ( وهو منصدم): وانا ماحيد قلت ابغي اعرس
ام خليفه: لين متى بتم جيه... العرس خير و بركه
خليفة: شقايل تخطبيلي دون مادري... اصلا حتى لو فكرت اعرس ما باخذ هاي .. شمسه
ام خليفه: بلاها شمسه... ما شاء الله عليها.. علم و جمال و اخلاق
خليفه: ما قلت انه فيها شي.. بس مابغيها
ام خليفه: خليفة .. ردينا للطير يللي... توك تقول نسيت بنت عمك.. اشعنه ما تبا تاخذ شمسه
خليفة: تبين الصدق يا اميه... تراني ما نسيتها.. و لا بنساها في يوم... يوم قلتلج اني نسيتها ترى بس عسب ارضيج... بس انتي يا امي مادري ليش تحاولين تعذبيني ... وانا من الحين اقولج لو بعرس ما باخذ غير عذابه... لا شمسه ولا غيرها بيسدن شعره من راس عذابه

ام خليفة: و ان قلت انها تحرم عليك ... و انا لا امك ولا اعرفك جان خذتها ...

خليفة سكت ماعرف شو يرد على امه.... ماتوقع انها بتكون قاسيه عليه لهالدرجة .. معقوله امه تعامله بهالطريقة ...

الهنوف: لا يا اميه.... حرام عليج... ليش تحرمينه من عذابه... هي شو ذنبها...
ام خليفه ( و الدمعه في عيونها): و انتو هب حرام عليكم اللي تسوونه... هب كفايه اللي يانا منهم... يا خليفه لو ما انا احبك و اعزك و اتمنى لك السعاده جان ما قلتلك خذ وحده غير عذوب... يا بويه عذابه ما بتسعدك ... ما تناسبك... اسمع شوري ...

خليفه ساكت ... ما يبغي يرد على امه لانه يدري مهما قالت كلامها ما بيغير شي ... هو يحب عذابه و يتمناها من يوم هو صغير... و في الاخير يتركها لذنب هي مالها خص فيه..

ام خليفه: خليفة ... فرحني قبل لا اموت... فرحني بشوفة عيالك .. انت البجر.. انت ولديه الوحيد.. يرضيك اللي تسويه فيه

خليفة: وانتي يرضيج يا اميه اعيش حياه انا ما اتمناها... ليش تبعديني عن الفرحه يوم هي جدامي...
ام خليفه ( وهي تبوس ايد خليفه): فديت روحك يا خليفه... اسمع كلامي... اسمع شوري.. عذابه ما بتسعدك... خلني افرح بشوفتك معرس.. خلني استانس بشوفة عيالك يلعبون حولي...

خليفة ما رد على امه... لين متى بيتم يجامل الناس و يرضيهم.. لين متى بيتجاهل حياته و سعادته عشان سعادة و رضا غيره... متردد ما يعرف شو المفروض يسويه... هو حاول يرضي هالايام امه و يبين لها انه خلاص نسى عذابه ... بس لا ... هالشي ما صار و عمره ما بيصير... عذابه محفوره في عقل خليفة و في قلبه.. و لو شو ما صار عمره ما بينساها ..

((( شو المفروض اسويه.. ارضي اميه و اعيش طول عمري حزنان على فراق قلبي ... ما قدر... هاي اميه و ماريد ازعلها... ليش يا زمن اهتم لمشاعر غيري .. و غيري ما يهتم فيه... ليش المفروض ارضيهم .. و محد يحاول يرضيني او حتى يسعدني... ليش افكر في سعادة غيري.. و غيري ما يدري انه سعادتي بين ايدج يا عذابه.. عذابه... غناتي .... احبج يا اغلى انسانه في هالوجود... احبج و ما اتخيل حياتي دونج.. احبها ... يا نااااااااااااااااااااااااااااااااس احبها )))

العين
في الكوفي شوب

عيسى: ها شو قلت...؟؟؟ بتسير دبي بالخميس ولا شو؟
محمد: لا .. اكيد بسير... ولا بتذبحني الحرمه.. و بعدين لهم وحشه الصراحه
عيسى: انت على منو تجذب.... لهم وحشة الصراحه ( وهو يقلد عيسى).. انت لو صدق متوله عليهم جان سرتلهم من زمان..
محمد: ياخي اشغال.. و روحك تدري ابويه ما عنده حد غيري .. و انا اللي دوم اجابل شغله
عيسى: بدا الحين... ادريبك و ادري بسوالفك.. و لا تحيدني بتاني ما افهم شي
محمد: ههههههههههههههه بتاني مره وحده
عيسى: محمد... انا تعبت من كثر ما رمسك... محمد انت الحين متزوج و في ذمتك حرمه .. و اللي تسويه هذا ما يرضي حد
محمد: لا حوووووووووووول... تراك حشرتنا... شو سويت انا...
عيسى: مول ما سويت شي... بس ترمس 20 بنيه .. و تواعد 30 .. و تغازل 50 .. بس ها للي سويته
محمد: هههههههههههههاااااااااااااااااااي
عيسى: اضحك... اضحك يوم بيطيح الفاس على الراس ما بتنفعك ضحكتك هاي
محمد: تحيدني تيس.. اونه بيطيح الفاس على الراس... اسميك متفيج اليوم.. اشعنه ما تفتح لك مؤسسة اجتماعيه تساعد فيها الخلق
عيسى: الكلام معاك ما منه فايده..
محمد: بتخبرك انت شو حارنك ها... انت مالك خص.. و لا تعور راسك بمشاكلي
عيسى: صدقك ما لي خص... انا ما افتكرت فيك اصلا.. انا اللي غامضتني البنيه اللي خذتها... قاص عليها احبج و ماروم اعيش من دونج... و الحين هب مخلي وحده في الخليج هب بس في الامارات هب مرمسنها... تذكر انت يوم كنت تيني و تشكالي على فراقها قبل... تذكر شقايل كانت حالتك يوم ما كنت ترمسها يوم.. ولا الحب عندك ينتهي عقب الزواج
محمد: عيسى ... الصراحه هب متفيج الحين... برد ارمسك خلاف... يلا وداعة الله... ( و ظهر من الكوفي شوب)

القلب و الروح اهديته ** مثل ما هو حبه اهداني
صاحبي في العين ضميته ** عن حسود و قول عدواني

دبي...

بيت عبدالله القبيسي

وصلوا هل عبدالعزيز .. و يلسن الحريم في الصاله و تمن يسولفن ... و في الميلس يلس عبدالعزيز و يا بو عمر و خليفه و فيصل... و عقبها رمس عبدالعزيز و طلب ايد خلود ... و طبعا من دون أي نقاش وافق بو عمر ... و قرروا انه الملجه و العرس بيكون في نفس اليوم... بس يتريون خلود تحدد الموعد...
تعشوا الضيوف و عقبها روحوا ... و دخل خليفة الصاله داخل عسب يسلم على ام عمر و بنات عمه ...

خليفة: السلام عليكم ....
ام عمر: عليك و السلام و الرحمه.... اقرب اقرب .. محد غريب تفضل
خليفة: دام فضلج عمتيه... اشحالج
ام عمر: بخير و سهاله... اشحالك و اشحالك عربانك
خليفة : بنعمه و عافيه.. مبروك عليكم خطبة خلود
ام عمر: الله يبارك في حياتك...

وعقبها دخلن البنات يسلمن عليه ... واولهم عذابــــــــــــــــــــــــــــــــــــــه

عذابه ( وهي تبتسم): حياالله خليفة
خليفة ( و الفرحه في عيونه): الله يحييج... اشحالج
عذابه: بخير ... و انت؟
خليفة: بخير يوم انج بخير
عذابه استحت و مارامت ترد عليه
ريم: هلا واللــــــــــــــــــــــــــــــــــــــــــــــ ـــــه
خليفة: اهلين
ريم: انا اقول بلاه البيت منور...اثري خليفة عندنا
خليفة: البيت منور بوجود العروس.... اشحالج خلود
خلود: بخير ربي يعافيك
خليفة: مبروك عليج
خلود: الله يبارك في حياتك.. عقبالك ان شاء الله

خليفة سكت و تم موخي ...(( عقبالي ؟؟!!! يالله ليش اللي نباه ما نروم نحصله.. ليش الفرحه و السعاده واقفه جدامي و ماروم امد ايدي و اخذها.)) و جان يصد يطالع عذابه... جنه متوله عليها ... يلس عندهم و تم يسولف و ياهم... و طول الوقت عيونه في عيون عذابه .. الشوق و الحنين اللي في داخله كان كبيــــــــــــــــــــــــــــــــــر... شوقه لعذابه ما خلاه ينزل عينه عنها ولو ثانيه.. تم يسولف و يضحك معاها .. تمنى شي واحد في هذيج اللحظه... تمنى لو الوقت يوقف .. تمنى الدنيا و كل شي حوله يوقف .. بس عسب يعيش هاللحظه مع عذابه...يمكن كان حاس انها بتكون اخر مره يشوف فيها ضحكة عذابه..

و عذابه من صوب الفرحه مرتسمه على شفاتها... الصراحه كانت متولهه على خليفه واااااااااااايد...و خاطرها بس تسمع صوته.. بس حظها الحلو خلاها تسمع صوته و تشوف ابتسامته و تتامل عيونه الوسيعه.. اول مره تحس ان الحاجز اللي بينهم انكسر...

دخلت عليهم حمده

فيصل: ها شرفت ... تو الناس وينج من الصبح
حمده: يالله.. متوله عليه يعني
فيصل: جيه ما عندي حد اتوله عليه غيرج
حمده: وانا اقول بعد... هلا خليفه
خليفه: هلا وغلا... اشحالج
حمده: ممم.... اظن هب بخير
خليفه: افا ... ليش عاد
حمده: ملل... من يومين و نحن في البيت
فيصل: عنبوج توج راده من السفر.. ما شبعتي
حمده: لا ما شبعت لازم اظهر و استانس.. ولا انتو بس اللي تظهرون
فيصل: نحن غير.. البنات مكانهن البيت
حمده: لا والله..
خليفه: لا لا ... المفروض تظهرون و تستانسون... عشان نجاح الريم
ريم: صدقك.. المشكله محد عبرني
فيصل: وين تبن تسيرن؟؟ شو رايكن نظهر نتعشى باجر
حمده: لا فديتك باجر ما ينفع
فيصل: و ليش ما ينفع
حمده: معزومه في بيت ربيعتيه.. خلها ليوم ثاني
خليفه: انتي احمدي ربج انه عزمج.. بعد تشرط

و يلس خليفة عندهم لين الساعه 12 الفليل.. ما حس بالوقت .. لانه طبعا طول الوقت يلس يسولف ويا عذابه.. فيصل روح حجرته بيرقد.. و ظهرت عذابه مع خليفه عند الباب..

خليفة: يلا عاد ادخلي داخل لا ييج حرامي و يخطفج
عذابه: منو ها للي امه داعيه عليه و بيي يخطفني انا
خليفه: صدقج ... هب بس امه داعيه عليه. الا متبري من عمره بعد
عذابه: ليش ان شاء الله
خليفة: ما يدري انج ملكي و اللي ياخذج عني مصيره الموت
عذابة ( تحاول تغير الموضوع): اوكي.. تصبح على خير
خليفه: هههههههههههههههههه... استحت عاد
عذابه: خليفه ادل وين سيارتك ولا ؟؟
خليفه: يلا... مع السلامه
عذابه: الله يحفظك.... خليفه
خليفه: عيونه
عذابه: لا تنساني
خليفه: حد ينسى روحه.. حد ينسى عيونه.. حد ينسى قلبه و فوق هذا كله تبيني انساج.. يلا جدامي .. ادخلي داخل ما عندى بنات يظهرن يوقفن عند باب البيت دون غشوه..
عذابه: بعد يتحكم..ع كيفك هو
خليفه: اكيد.. مع السلامه
عذابه: الله يحفظك

ركب خليفه سيارته... و ياااااااااااااااااااااااااااااااااااااااااااااالله كيف كان مستانس... و جان يذكر امه... معقوله يفقد حب حياته عشان ذنب هو ماله خص فيه... قبل كان متردد في قراره.. بس الحين لا .. خلاص ... لو شو ما صار عذابه هي الوحيده اللي يتمناها.. و هي الانسانه اللي خاطره يتزوجها.. لو ما طاعت امه ما بياخذ غيرها... هذا كان قرار خليفه.. بس يا ترى يمكن يغير رايه؟؟؟


ليت خلي يروف يا ليته ** و يرحم اللي فيه تعباني
لي حبيبٍ حيل حبيته ** و صار عمري و سيد خلاني..


الجزء (32)

ما عاش الصدق في ذاتك مثل ما عاش في ذاتي **** ملامح الكذب في وجهك في كل كلمه حكيتها

يوم الخميس الظهر..

ام عمر يالسه في الصاله ويا بناتها ... و حمده تحاول تقنع امها تسير بيت ربيعتها مهره

ام عمر: قلتلج ما شي سيره ... ما تفهمين
حمده: اميه عاد... ليش ماسير.. ربيعتيه و ما شفتها من بندت الجامعه .. اشعنه ما تبيني اسير؟
ام عمر: خلها تيج هني ... لازم تسيرين انتي
حمده: شو فيها لو سرت.. من ردينا من السفر ما ظهرنا
ام عمر: المفروض ربيعتج تيج.. هب انتي تسيرين
حمده: كله واحد.. المهم قولي هيه و ريحيني
ام عمر: لا حول ولا قوة الا بالله... مادريبج والله.. يوم بيوصل ابوج خبريه.. انا مالي خص فيج
حمده: جان قلتيلي جيه من الصبح... حشا حلجي عورني من كثر ما ارمسج و اقنعج وفي الاخير تقوليلي مالي خص
ام عمر ( وهي اطالع حمده بنظرات): صدق ما تستحين... وان قلتلج ماشي سيره
حمده: اماااااااااااااااااايه.. فديت روحج .. خلاص خلاص.. اسمحيلي
ام عمر: انتي ما ينفع معاج الا ها الاسلوب
خلود: تستاهلين اللي ياج
حمده: اتشمتي انتي بس
خلود: انتي لو ما تعاندين الناس جان الكل وقف معاج
حمده: خلدووو... هب وقت فلسلفة الحين
عذابه: شقايل بتسيرين و محمد بيينا اليوم..
حمده: خير يا طير.. خله يي... جيه بيوقف عند باب البيت هو.. تراه بيدخل الميلس
ريم: لا والله... هب جنه ياي يسلم عليج انتي
حمده: والله انا ما بأجل اشغالي و زياراتي عشانه..
ام عمر: و اشحقه ما بتأجلين... خافي ربج.. حليله ياي من العين عسب يسلم عليج
حمده: غصبا عليه يي... انا حرمته و لزماً عليه يسلم عليه و يسال عني
ام عمر: يا ربي كيف اللي بلاني بهالبنيه... عنبوج تستقوين على ريلج بعد
عذابه: عيب عليج حمدوه... باجر سيري بيت ربيعتج
حمده: عنادا فيه بسير اليوم...نحن بنكمل اسبوع الحين من ردينا من السفر.. هولا اتصل ولا سلم.. الا هي مره وحده اتصل فيها و قالي بيي يوم الخميس.. ولا بعد قال يمكن يي يعني مب اكيد.. اشحقه اعور راسي .. بسير ازور ربيعتيه و اشوف ربيعاتي و اسلم عليهن و استانس ابركلي
ام عمر: انا مالي خص... ابوج يوم بيوصل رمسيه.. انتي الرمسه معاج ما منها فايده

وجان يدخل عليهم بو عمر و ياه فيصل

خلود: ها ابويه وصل... يالله بتنهزبين اليوم عدل
بو عمر: خير بلاكن؟؟
فيصل: اكيد السالفه فيها حمدوه ولا الريم
ريم: حليلي انا .. مالي خص
فيصل: عيل محد غير ام الدويس.. حمدوه
حمده: ام الدويس هاي حرمتك انزين
ام عمر: بسم الله عليه
حمده: هيه تخافين عليه.. و نحن يعني مالنا رب
بو عمر: بلاج محتشره
حمده: ابغي تسير بيت ربيعتيه
فيصل: لا
حمده ( وهي مستغربه): نعم ... و اشحقه لا ..
فيصل: بس جيه.. ما شي سيرة
حمده: لا والله... اولا هب انت اللي تقرر.. و ثانيا انا ما رمستك انت .. انا ارمس ابويه
فيصل: وانا برد بدال ابويه.. و بعدين اصطلبي و عدلي رمستج
بو عمر: بسكم... فيصل خلها في حالها
حمده: ابويه ... لو سمحت ..ربيعتيه عازمتني و مابغي اردها
بو عمر: برايج
حمده: يعني اسير
بو عمر: اقولج برايج
حمده: فديتك والله... الله لا يحرمني منك
فيصل: بتخليها تسير
بو عمر: شو فيها.. ربيعتها و نعرفها.. اشعنه ما تسير
فيصل: لا والله.. روحها بعد... لا لا ما تظهر روحها
حمده: انزين عذوب بتسير معايه
عذابه: انا.. من قال.. لا لا مافيه اسير مكان
فيصل: عيل يلا قري في البيت
حمده: انزين ريماني
فيصل: الريم ما بتسير
حمده: انت مالك خص.. ( وتصد صوب ريم).. ريم بتسيرين صح
ريم: ممممممم.. مادري
حمده: شو ماتدرين.. بتسيرين ادريبج.. يالله عيل انا بسير اتلبس.. ( و تشل الريم معاها)

فيصل: على فكره تراكم مصختوها... عاطينها ويه هاي.. اشوفها ما قامت تحترمنا ولا تعبرنا
خلود: قصدك ما تعبرك انت.. حمدوه من زمان جيه
ام عمر: والله هالرمسه قولها لابوك.. هو اللي مدلعنها
بو عمر: برايهن.. خلهن على راحتهن..
فيصل: بسير اتسبح ابركلي...تعالوا.. هاي مسودة الويه شقايل بتسير و الرميثي بيينا اليوم....
عذابه: لا لا ... بترد بسرعه ما بتتاخر
ام عمر: يالله عليكن انتن.. عالشر متعاونات...
خلود + عذابه: هههههههههههههههههههههههههه
بو عمر ( وهو يرمس ام عمر): تراني بغيتج في سالفه
خلود: خير.. شو عندكم من ورانا
ام عمر: انتي اشلج
بو عمر: شو عندنا يعني... ترى سيف بييب اهله بالجمعه
ام عمر: أي جمعه... لا لا ... عنبوه توها البارح خطبة خلود.. اصبر شويه ... عقب ما تعرس خلود هذيج الساعه خلهم يوون
بو عمر: والله انا رمسته .. بس هو مستعيل.. و صدقه الريال.. وايد ابطينا عليه
عذابه: ابويه عن منو ترمس
بو عمر: سيف الكعبي.. ما تعرفونه.. ما تذكرون الريال اللي كان معانا في السفر

عذابه و خلود مستغربات.... ما صدقن انه سيف بيرد .. و لا بعد رد خطب ريم...

عذابه: بس الريم ما تدري
ام عمر: ويديه انا.. البارحه مرمسينها .. و ما قالت شي
عذابه ( و هي تصاصر خلود): شفتي ختج... كله من ورانا
ام عمر: مثل ما قلتلك.. عقب ما تعرس خلود.. خلهم يملجون
ابو عمر: الريال ما يبغي غير انه يملج و العرس خلاف
ام عمر: والله مادري... سو اللي تباه

تعبت اسال عن اخبارك في روحاتي و جياتي ***** قطعتني ولا ادري وش ايامك حصل فيها ...

و على الساعه 5 العصر ظهرت حمده و يا الريم و سارن بيت مهرة السويدي.... حمده كانت معصبه و منقهره من تغير محمد صوبها.. حست انه هب هو الاولي... هب هو اللي تعلقت فيه و حبته... شافته دوم يتجاهلها و ما يسال عنها و خاصه في الفتره الاخيرة ....

فيصل تلبس و مر بيت خليفة و شله و ظهروا رباعه يتمشون...

في السياره...

فيصل: انزين ... شو رايك بالكندوره... زين و لا ارجع البيت و اغيرها
خليفه ( وهي يطالع فيصل بنظره): ما بلاها شي ... ليش انت وين بتسير
فيصل: وين بسير يعني.. ترانا بنتمشى رباعه.. عيل ما تباني اتعدل
خليفه: اتعدل انزين حد ماسكنك..
فيصل: مادري ليش احس بك ترمس شرات ابويه...

من مواضيع ورد جوري
0 كماتشو : عروض البلوي كلام فارغ...
0 ||::|| (( Germany Vs Poland )) والـمــهــمــة الــمــســتــحــلــيــة ||::||
0 الخط الفاصل بين الليل والنهار
0 حصريا : شاهد ( كأس آسيا 2007 مجانا على النت ) !!!
0 خاص وحصري : Art تضع 4 معلقين على النهائي الآسيوي المثير

توقيع ورد جوري

لاعدمناك الغلا

الله يجمع من بين عذابه وخليفه

من مواضيع شموخ العز
0 اسطوانة رائعة جدا تضم جميع منتجات شركة الكاسبرسكاي لسنة 2006 رائعة جدا
0 إن كيدهن عظيم !!
0 لاب توباااات رووووعه
0 الجنين فلاش
0 المرأة وعبادتها في رمضان