الجزء [17] من قصة أحبك لو بغيت إنساك مقدر

خليفه: على طاري ابوك.. اشحاله؟
فيصل: الحمدلله بخير و سهاله.. حليله متلعوز ويا بناته
خليفه: ههههههههه ليش عاد
فيصل: ترى عبدالعزيز يبغي الملجه و العرس في يوم ... و سيف يبغي يملج بسرعه
خليفه ( وهي مستغرب): منو سيف بعد
فيصل: اووووووووه .. نسيت اخبرك... ترى واحد ياي يخطب .. ( و قبل ما يكمل كلامه قاطعه خليفه)
خليفة ( وهو يصارخ): و انتو اكيد وافقتوا... و اشحقه الحين تخبرني ها... المفروض تخبرني من البدايه.. و بعدين عذابه محيره من زمان . يعني المفروض تشاوروني.. و اصلا هي ما بتوافق..
فيصل: بس بس... حشا .. ما يسوى عليك... بلاك تخبلت
خليفه: لا والله .. و اللي تقوله شو تسميه هب خبال
فيصل: يا بويه ترى الريم اللي انخطبت هب عذوب.... و بعدين بلاك انت جيه ميت عليها.. اثقل شوي
خليفه: ما عليه منك انا... انا من زمان مرمس عمي و قايله
فيصل: ابويه يدري...بس يترياك تفتح الموضوع مره ثانيه

خليفه عاد سكت و ما رام يرمس... ما عرف شو يقول لفيصل... يقوله عن امه و موقفها من عذابه.. و لايقوله انه خطبو له وحده ثانيه ... انحرج وايد و ماعرف ينطق بحرف...

فيصل: بلاك صخيت مره وحده
خليفه: ها.. لا لا ماشي.. انزين ما قلتلي من هو اللي ياكم
فيصل: سيف جان تعرفه
خليفه: منو سيف
فيصل: سيف الكعبي.. ما عرفته
خليفه: وافقتوا
فيصل: ابويه ما رفض.. و شاور البنيه و ما قالت شي
خليفه: بس هذا عليه رمسه ما تسر
فيصل: من قالك
خليفه: روحي سامع.. ياخي شو تبوبه... انا الصراحه هب عايبني.. ما شوفه يناسب الريم
فيصل: ليش يعني شو شفت عليه
خليفه: ما شفت شي عليه.. بس سمعت عنه... و يمكن اللي سمعته غلط
فيصل: زيغتني يا ريال
خليفه: والله دام عمي وافق اكيد سال عنه و عرف انه زين..
فيصل: هيه والله صدقك..

الساعه 7....
بيت مهره السويدي..

تيمعن البنات و تمن يسولفن ... و حمده نست محمد و نست مشاكلها معاه و تمت تضحك و يا ربيعاتها...

حمده: هند الصراحه اللي تسوينه هب زين
هند: شو سويت عاد... تراها الا سوالف و مصخره
مهره: بس احسبج مزودتنها.. يعني قلنا ماسنجر بس عاد هب توصل للتلفون و المواعد
هند: حبيبتي انا يوم اسوي هالشي اكون واثقه من هالانسان
حمده: يعني انتي واثقه انه بياخذج
هند : هيه نعم
حمده: هو قالج هاالشي
هند ( بارتباك): لا بعده.. بس من كلامه و اسلوبه فهمت
مهره: ما عليج منهم كلهم جذابين.. وانتي الخبله تصدقين رمستهم

وريم طول الوقت اطالع هند و مستغربه من رمسة هالبنيه.. اول مره تشوف بنيه جريئة مثلها تعترف لربيعاتها بعلاقاتها مع الشباب و كانه هالشي عادي بالنسبه لها...

هند: اووووووف... لعوزني هذا
مهره: منو .؟؟
هند: واحد حشا ملعوزني تلعويز... ماريد ارمسه الحين هب متفيجتله
حمده: ههههههههههههههه اخاف هو اللي هب متفيلج لج
هند ( بمكر): لا والله.. هذا بيموت جان ما سمع صوتي لو يوم... لو تدرين شو يسوي يوم يعرف اني ظهرت دون ماخبره.. شوي و بيموت.. ما تصورن كيف يغار عليه
حمده: ما عنده سالفه...
هند: لا و بعد ازيد من الشعر بيت... مال و جمال و كـــــــــــــــــــــــــل اللي تتمناه البنيه فيه..
مهره: اخاف الا شيخ و انا مادري
حمده: صدق؟؟؟؟؟
هند: حبيبتي كل واحد شيخ على عمره... انتو بس لو تشوفون سيارته... الـــــــــــــــــــــلــــــــــــــــــه تجنن... و الصراحه راعيها احلى بواااايد... كفايه انه رميثي
حمده: حليلج والله قاص عليج .. رميثي اونه... تحصلينه يسوق كرولا
هند: لا فديتج شفت السياره روحي
مهره: قولي والله
هند: هيه شفتها و ركبتها
ريم: صدق ما تستحين

الكل التفت صوب الريم.. و البنيه تمت اطالعها بنظرات

هند: ليش عاد.. تراني بتزوجه.. عادي يعني ..لا حووول رد اتصل ... اوووف
مهره: و اشعنه ما تردين عليه.. ولا تتغلين يعني
هند: فديت حمود.. ما يهون عليه...
ريم ( وهي تصاصر حمده): حموووود اونه.. كفايه انه رميثي... ( هي تقلد هند).. هاي من وين ملقطينها
حمده: ريمو.... هب جنها تطري محمد الرميثي
ريم: انزين شو فيها... جيه محد غير ريلج.. تراهم وايد
هند: انتو لو تشوفون رقمه بس... اسمعوا *******

صبرت و قلت يمكن يوم اغير فيك نظراتي ****** نصحتك للاسف مرات ولا كنك سمعتها

هذيج الساعه حمده حست انه الدنيا ادور بها... كانه العالم انتهى و وقفت الساعه عند الرقم اللي طرت هند.. حمده بعدها هب مستوعبه السالفه.. حست انه في حلم.. مستحيل ... وتمت تذكر ..(( كفايه انه رميثي .... فديت حمووود..... و الرقم ... )) هو .. خلاص تاكدت انه هو.. هذا محمد... محمـــــــــــــــــــــــــــــــــــــــد

حمده تمت مرتبكه و ما تعرف شو تسوي ..و جان تمسك ايد الريم...

ريم: بلاج
حمده: هذا محمد
ريم: منو
حمده: اقولج هذا محمد
ريم: متاكده
حمده: متاكده... والله انه محمد..
ريم: بس
حمده: شو بس... اقولج هو ... راسي يعورني
ريم: لا تظلمينه يمكن هب هو..
حمده: بثبتلج
ريم: شو بتسوين
حمده: براويج

حمده: هند
هند: هلا
حمده: وانتي هلج يدرون انج تظهرين معاه
هند ( بارتباك): هيه اكيد.. تراه خطيبي و الكل يعرف هالشي.. يلا بترخص عنكم.. يترياني برع
حمده: حتى نحن بنسير .. الدرويل برع
مهره: افا ما يلستوا
حمده: ما عليه بنيج في غير هالوديه
مهره: مع السلامه...

وظهرن من بيت ربيعتهن... سلمت عليهن هند وروحت لانه حبيب القلب يترياها برع

ريم: ما يا الدريول اشحقه تجذبين.. تعالي وين بتسيرين... حمدووووه

حمده ما ردت على اختها و ظهرت اطالع برع الباب ... واول ما شافته انخشت ورا الباب و هي حاطه ايدها على ثمها... و عيونها حمر.. و يهها منتفخ.. ما تعرف شو تسوي... حاسه انه خلاص ما تروم حتى توقف .. طلت مره ثانيه و جان تشوف السياره بعدها واقفه

(( الحقير.... يالس في السياره وياها... اااااااااااااااااه.... صدق انه نذل... لا لا .. كلمة نذاله شويه عليه... ما عليه يا محمد.. و الله لا اروايك و اخليك تندم على الي سويته فيني ))

وجان تسمع صوت ه سيارتهم .. و جان تمسك عمرها و ظهرت.. ظهرت من دون ما تتغشى .. يمكن لانه كانت تباه يشوفها او حتى يلمحها... و الصدفه انه سايرتهم موقفه حذال سيارة محمد.. يعني المفروض تمر جدامه.. و هذا الشي اللي كانت تباه... و فعلا.. ظهرت و رفعت راسها و كانه شي ماستوى ... ظهرت بخطوات ثابته و جان تمر جدام سيارة محمد... و مشت دون ما تلتفت وراها و ركبت السياره...

اللي كان منصدم صدمة العمر هو (((( محمد الرميثي ))))
اخر شي توقعه انه يشوف حمده... انصدم و تم فاج حلجه و هو يطالعها تمر جدامه... ما تخيل في يوم انه يمر بهالموقف ..

محمد: تعرفينها
هند: هيه
محمد: منو
هند : و ليش ان شاء لله تتخبر عنها
محمد ( وهو معصب): ردي عليه
هند: حمده القبيسي
محمد: بتخبرج ربيعاتج يدرن انج راكبه معايه
هند: هيه اكيد.. قلتلهم انك خطيبي...
محمد : شــــــــــــــــــــــــــــــــــــــو؟؟
هند: بلاك... انت خطيبي و ما فيها شي
محمد: لا فديتج فيها شي ... اقول.. يلا انزلي... انزلي بسرعه
هند ( وهي منصدمه): محمد.. شو فيك
محمد: اقولج نزلي ما تفهمين انتي ... انزلي بسرعه...

و نزلت هند من السياره و هي مستغربه من اللي صار ...و جان ترد تدخل بيت مهره عسب تتريا سيارتهم...و هي داخله شافت ريم واقفه برع

ريم: هند.. وينها حمده؟
هند: شو عرفني انا .. تشوفيني ناطور... ( وجان تدخل داخل )

ريم استغربت من موقفها ... شافتها معصبه و ويهها متلون بالوان قوس قزح.... ريم بعدها تتريا ختها و ماتدري انها ركبت سيارتهم ... و شافت حد ياي صوبها .. و انتبهت انه ريال.. جان تتغشى

سهيل: خير ختيه.... تتريين حد
ريم ( وهي منحرجه): ابغي اتاكد جان سيارتنا برع ولا لا
سهيل: شو من السيايير لانه في كذا سياره برع
ريم: كروزر اسود
سهيل: هيه نعم موجود
ريم: تسلم اخويه
سهيل: وداعة الله

و ظهرت ريم و هي حاسه انه ويهها متكسر .... و شافت محمد واقف عند باب سيارتهم و هو يرمس حمده.. سلمت عليه و جان تركب السياره

محمد: حمده دخيلج سمعيني...
حمده: ممكن طلب
محمد: عيوني جان تبينها
حمده: خوز عن السياره عسب انروم نتحرك...

وجان تمشي سيارتهم و محمد متحسف عل كــــــــــــــــــــــــــــــــــل اللي صار .. حس انه خلاص ماشي امل.. هو يعرف حمده عدل و يعرف طبعها و يدري انه مستحيل تسامحه على اللي سواه...

ريم: اشحقه ما قلتيلي ان الدرويل وصل
حمده: نسيت
ريم: لا والله.. حلوه يعني تخليني اوقف هناك شرات الهبله
حمده: اسمحيلي
ريم: وش يسوي محمد هني غريبه ... اوووه... لا يكون ...
حمده: هيه ... ظهر النذل ربيعها
ريم: شو ربيعها بعد .. قوية الصراحه
حمده: عيل شو تسمين العلاقه اللي بينهم
ريم: يمكن صدق خاطبنها
حمده: لا فديتج... محمد هذا اعرفه عدل...
ريم: شو بتسوين..
حمده: مادري

حمده كانت ماسكه عمرها.. ماحبت انه تبين لاختها ضعفها و حزنها على اللي صار.. طول الوقت حاولت تمسك عمرها ... و هيه حاطه في بالها شي واحد.. كيف ترد لمحمد عقب اللي صار !!!!!!

وصلن البيت ...

عذابه: ما بغيتوا تردون
حمده: وينها اميه؟
خلود: سلمي انزين
حمده: اقولج وينها اميه؟
خلود: راحت بيت يرانا... تراه محمد تاخر وايد.. و تحرته ما بيي .. جان تشل عمرها و تروح تسلم على يرانا
عذابه: حمدوه بلاه ويهج محمر...؟؟
ريم: لا تسالين
خلود: ليش شو اللي صار
حمده: انزين ابويه وينه
عذابه: ظهر بعد.. مادري وين سار.. بلاكم ؟؟؟
حمده: شوفوا ان يا الحقير
خلود: منو الحقير بعد؟؟
ريم: محمد...
حمده: ان وصل مابغيكم تخبروني انزين.. خلاص ماريد اشوفه و لا ابغي اسمع أي شي عنه.. و يوم بيوصل ابويه خبريني... خلاص انا ماريد اتزوجه... مابغيـــــــــــــــــــــــه
خلود: حمدوه بلاج... تعالي

حمده شلت عمرها و روحت حجرتها... ما رامت تيود عمرها اكثر .. حست انها لو يلست مع خواتها اكيد دموعها بتنزل غصبا عنها..

عذابه: بلاها حمدوه؟؟
ريم: شافته اليوم راكب مع وحده
خلود: مع منو
ريم: وحده تعرفها من الجامعه
خلود: حسبي الله عليه.. متاكده
ريم: هيه. روحها شافتهم
عذابه: حليلج يا حمدوه...

عقب دقايق وصل محمد.. بس ظهرت له الخدامه و قالت انه محمد في البيت... حس عقبها انه حمده هي اللي ما تبغي تشوفه... ركب سيارته و وقف عند باب بيتهم ...و جان يقرر يتصل في حمده و يستسمح منها ..

حمده: شو ؟؟؟
محمد: حمدوه اسمعيني
حمده: حمده لو سمحت
محمد: انزين اباج تسمعيني
حمده: انا مابغي اسمع شي...
محمد: صدقيني انتي فهمتيني غلط
حمده: لا مافهمت شي غلط.. لانه كل شي واضح جدامي... شو تبغي تقولي ها.. تبغي تقول انك متعرف على فلانه و علانه.. تبغي تقول انك ما خليت وحده ما واعدتها.. تبغي تقول انه اللي بينك و بينهن مجرد لعبه ... تبغي تقول انك خنتني بعد ما عطيتك ثقتي.. تبغي تقول انك طعنت قلبي بعد ما اهديتك ياه.. تبغي تقول انك جرحتني و ذبحتني ...
محمد تم ساكت و ما عرف شو يرد عليها
حمده: اسمع يا محمد... اللي بينا مستحيل يستمر.. انا كنت ادري بسوالفك من زمان .. بس مع هذا وثقت فيك و قلت اكيد بيتغير... بس الظاهر ما شي فايده...
محمد: صدقيني يا حمده اني بتغير ... عشانج انتي بتغير
حمده: و انا مابغيك تسوي شي عشاني ... ولو سمحت خل اللي بينا ينتهي بهدوء دون أي مشاكل
محمد: حمده
حمده: محمد تراني لين الحين ماسكه عمري.. ماريد اغلط عليك باي كلمه
محمد: بلاج انتي.. خلاص عاد... صدقيني هالشي انتهى وما بيتكرر..
حمده: اصلا انا اللي ما بسمحلك تكرره...
محمد: انزين انسي السالفه
حمده: الظاهر ما شي فايده.... (( وجان تصك التلفون في ويهه))


الجزء (33)


سالتك بالذي حطك على راس المحبة تاج*** تحبني و لا تتسلى باحاسيسي و وجداني..
و تحتاج لغلا قلبي مثل ما انا لك احتاج *** او اني بعد ما فارق حدود الشوق تنساني ..

يوم الجمعة
بيت عبدالله القبيسي

ام عمر مستغربة من حالة حمدة.. من ردت البارحه وهي حابسة عمرها في الغرفة و هب راضية تظهر .. بناتها ما خبرنها بشي لانه حمده طلبت منهن هالشي ..

ام عمر: خلود.. قومي طاعي ختج.. ماحيدها جيه..قومي الله يرضى عليج
خلود: ما فيها شي.. روحها بتنزل
ام عمر: الحين بيأذن المغرب و هي بعدها من البارحه على هالحاله.. لا لا . هالبنيه هب طبيعية .. اكيد فيها شي..
عذابه ( وهي تصاصر خلود): لازم نخبر اميه..
خلود: حمدوه روحها بتخبرها..
ام عمر: اشحقه تصاصرينها ها.. شو عندكن
عذابه: ها .. ماشي ... ما عندنا شي... شو بيكون عندنا يعني... اوه التلفون .. بسير اطالع منو متصل ( وجان تنش اطالع من اللي متصل)

عذابة: الو
علياء: هلا والله
عذابه ( وهي مستغربه): علايه؟؟
علياء: افا ... ما عرفتيني
عذابة: فدييييييييييييييييييتج يا علاااااااااايه.. اشحالج..
علياء: بخير و سهاله... اشحالج انتي
عذابه: الحمدلله.. شو هالمفاجأة الحلوه
علياء: والله يوم انتي ما تسالين قلت بتصل و انا بسال عنج
عذابه: تدرين انه الود ودي ارمسج.. بس.. علايه .. دقيقه خلج عالخط.. برد ارمسج من فوق اوكي..
علياء: اوكي

نشت عذابه و راحت فوق ترمس علياء.. حبت ترمسها دون ما امها تسمعها

ام عمر: بلاها نشت
خلود: مادري
ام عمر: اشعنه ما ترمس جدامنا
خلود: يمكن في خاطرها تقول شي و ما تبانا نعرف
ام عمر: هيه.. ما تبانا نعرف.. شو عندهن هذيله
خلود: امايه بلاج... بنت عمها و ما رمستها من زمان.. شو فيها لو رمستها بعيد عنا
ام عمر: خوفي تخبرها عن خطبة خليفة
خلود( وهي مستغربه): منو قالج
ام عمر: الخبر واصل العين جان ما تدرين.. عنبوه جان الا ما بتم حد في البلاد ما عرف
خلود: و صدق خطبو له؟؟؟!!

ام عمر سكتت وما ردت على خلود... ام عمر ما كنت تبغي تبين لحد موقفها من قوم خليفة ,,, بس هي حاسه انه علاقة خليفة و عذابه مستحيل تستمر.. و ما بغت عذابه تحط امل على شي ممكن في أي وقت ينتهي

عذابه: هلا علايه
علياء: هلا و غلا
عذابه: والله تولهت عليج
علياء: هيه واضح.. عسب جيه تلفون البيت ناقع من كثر ما تتصلين و تنشدين عني
عذابه: والله اني هب بايدي هالشي .. و انتي تعرفين عدل.. المشاكل هي اللي فرقتنا
علياء: انزين حتى انا انجبرت اني ما ارمسج.. بس مع هذا ما طعت
عذابه: والله يا علياء مالي ويه اتصل.. كل ما اقول بتصل اخاف امج ترد عليه.. و انا الصراحه ما لي ويه ارمسها
علياء: يعني اميه بتصك التلفون في ويهج مثلا
عذابه : لا هب جيه.. بس اكيد هي تغيرت علينا ... و ما ظن انها بتنسى اللي سواه عمر
علياء: صدقج.. ما بتنسى .. عذوب ., اميه وايد تغيرت.. كلامها معانا.. اسلوبها... و اكثر واحد متغيره عليه هو خليفة ..
عذابه: ما تنلام يا علايه.. يعني لو انا مكانها بسوي اكثر من جيه... اتخيلي تشوف بنتها تنهان جدامها.. اكيد ما بتسكت
علياء: صح كلامج.. بس هب لدرجة انها تعاقب خليفة .. خليفة ماله خص في اللي صار
عذابه: كيف يعني تعاقبه
علياء: مادري شقايل اقولج.. بس اميه وايد قامت تقسى عليه.. يعني حرام انها تعاقبه لذنب هو ما ارتكبه..
عذابه: يمكن هب قصدها ... يمكن ما قدرت تخفي شعورها..
علياء: انزين بس هب لدرجه انها تخطبله ( وجان تسكت)
عذابه: ليش سكتي.. تخطب لمنو
علياء: لا لا ماشي ... انزين ما خبرتيني شو علوم خواتج
عذابه: علايه.. كملي كلامج... تخطب لمنو
علياء: انسى السالفه...
عذابه: تخطب لخليفة صح؟؟؟
علياء:...........
عذابه: علياء الله يخليج ردي عليه..
علياء: هيه
عذابه ( وجنه حد عاطنها كف): خطبتله منو؟
علياء: بنت يرانا .. شمسه
عذابه: متاكدة؟؟
علياء: اكيد متاكدة.. روحها اميه مخبرتنا..
عذابه: و خليفة يدري
علياء: هيه
عذابه: شو قال
علياء: رفض طبعا... و ما طاع
عذابه: و امج
علياء: عذوب.. هب وقته الحين... انا ابغي اسولف معاج
عذابه: علايه... امج شو موقفها
علياء: ماشي .. هب قايله شي .. غيري الموضوع احسن
عذابه: حرام عليج... خبريني ... تبيني اعرف من غيرج يعني... لا تحطييني في هالموقف المحرج.. مابغي اكون الغبية اللي ما تعرف شي حولها.. حرام عليج .. خبريني كل شي..علياء لو انه غاليه عنج خبريني.. و لا تخبين شي
علياء: عذابه... خليفة يحبج و يبغيج و قال هالكلام حق امايه.. بس اميه هب طايعه.. اميه تحاول تقنعه انه ياخذ شمسه.. عسب جيه اقولج اميه متغيره.. ماحيدها تعاملنا جيه..الله غامضني خليفة .. والله حرام يضيع حياته و يفقدج لذنب انتي و هو مالك خص فيه
عذابه: امج مصره انه ياخذ شمسه؟؟
علياء: هيه.. بس اباج تعرفين انه خليفة مستحيل يغير رايه.. خليفة يباج انتي
عذابه: علايه.. ما طول عليج.. برمسج خلاف اوكي
علياء: عذوب.. مابغيج تفكرين في شي.. ان شاء الله الامور بتتصلح
عذابه: ان شاء الله.. مع السلامه

حبيبي عايش بحيرة و اقلب صفحة الابراج **** و ضعت بعدل ميزانك و صمت و ظلم ميزاني

صكت عذابه عن علياء... و تفكيرها كله عند خليفة .. ((( انا اللي بعدني حاطة امل.. و اثري الامل ضاع من زمان و مستحيل يرجع مره ثانيه.. )))

ريم: عذووب... قومي نتعشا
عذابه: مابغي
ريم: وان قلتلج انه خليفة بيتعشى معانا
عذابه: قولي والله
ريم: والله..
عذابه: الحين بنزل
ريم: طاعي حمدوه جان بتتعشى
عذابه: اوكي

عذابه بعدها تفكر في السالفه.. ما تعرف شو المفروض تسويه... بس اللي متاكده منها انه الموضوع لازم ينتهي .. لازم يكون له حد في اقرب وقت

عذابه: حمدوه افتحي الباب
حمده: شو تبين
عذابه: افتحي انزين
حمده ( عقب ما فتحت الباب): شو
عذابه : ما تبين تتعشين
حمده: لا
عذابه: شو تسوين
حمده: ماشي.. يالسه اتصفح هالمجلات الجديمه
عذابه: بعدج زعلانه
حمده: من شو؟
عذابه: محمد
حمده: لازم تطرينه.. اوف كرهت هالاسم
عذابه: شو بتسوين ؟؟
حمده: في شو
عذابه: في سالفتج ويا محمد
حمده: ما بسوي شي
عذابه: بلاج ماخذه السالفه ببرود
حمده: و ليش اعور راسي ... انا خلاص فكرت و خلصت
عذابه: شو
حمده: مابغيه
عذابه: بالسهوله
حمده: حتى بهالسهوله نسى اللي بيني وبينه و راح يواعد البنات و يرمسهم.. حتى انا بهالسهوله بنسى اللي بينا
عذابه: بس احيدج تحبينه
حمده: حتى هو كان يحبني .. و طاعي شو اللي صار...
عذابه: بس
حمده: لا بس ولا شياته... صدقيني البارحه تميت افكر في اللي صار.. تدرين هب محمد الغلطان.. انا الغلطانه اللي وثقت فيه... انا كنت ادري انه سوالف الماسنجر و الجات و هالخرابيط ما وراها الا اوهام و مشاكل.. مع هذا وثقت فيه و حبيته و في الاخير طاعي شو سوا...
عذابه: صدقيني انه بيتغير
حمده: يوم بيتغير .. يتغير عشانه هو .. هب عشاني انا.. و انا خلاص ماريده.. و لا اتخيل حياتي مع واحد مثله
عذابه: هذا هو قرارج..
حمده: هيه.. و ان شاء الله باجر برمس ابويه و بخبره
عذابه: لا تتسرعين
حمده: تراني تسرعت يوم وافقت اخذه.. و الحين ابغي افتك من الحشره و المشاكل
عذابه: .....
حمده: و انتي بلاج مويمه
عذابه: تدرين انه خليفة خاطبيله وحده
حمده: منو قالج
عذابه: يعني تدرين
حمده: من كمن يوم عرفت
عذابه: و ليش ما خبرتيني
حمده: ما كنت متاكده من السالفه.. بس لا تفكرين بشي.. خليفة اعرفه عدل... من يومه و هو يحبج و مستحيل حد يفرقكم
عذابه: بس امه هب طايعه
حمده: ويعني
عذابه: انا ماريد اتزوج واحد اهله ما يبوني..و الصراحه امه ما تهون عليه يا حمده.. و انا ااتفهم موقفها
حمده: يعني شو بتسوين.. يا ماما لا تتخبلين... احمدي ربج انه يحبج و يباج.. يقولون خذي اللي يحبج ولا تاخذين اللي تحبينه
عذابه: تاخير خليفة يدل انه متردد.. و انا مابغي اخليه يختار بيني وبين هله
حمده: والله ماعرف شو اقولج... بس اباج تعرفين انه الزواج نصيب.. و ان كان من نصيبج محد بيفرقكم
عذابه: و ان ما كان بينا نصيب
حمده: اكيد الله بيعوضج بواحد اخير منه
عذابه: بس انا مابغي غيره
حمده: عذوب... ما عرفتلج.. تبين تاخذينه من دون رضا امه..و لا تبين تتركينه واتمين حزنانه عليه طول عمرج
عذابه: مادري...

انا مثل الذي تايه و ينظر من بعيد سراج **** فلا نوره وصل دربي ولا ملقاه دفاني...


نزلت عذابه تحت.. و شافت الكل متيمع ابوها و اخوها فيصل و خليفة .. حتى امها اللي كانت ماخذة موقف من خليفة و هله يلست وياهم و تمت تسولف معاهم..

خلود: وينها حمدوه
عذابه: ما تبغي تتعشى
ام عمر: يا بو عمر.. عقب العشا طالع حمدوه بلاها.. هذا حالها من البارحه
فيصل: برايها انزين ... خلها تقعد في حجرتها.. تفكنا شويه من حشرتها.. ولا شو رايك خليفة
خليفة: حرام عليك.. اصلا محد غير البنات اللي مونسينكم في البيت
ابو عمر: صدقت يا خليفة.. وخاصه الريم
ريم: فديت ابويه انا
فيصل: فديت ابويه انا ( وهو يقلد الريم).. مادري ليش ادلعونها.. خلاص.. قد البعير و بتعرس الحين.. شو حاية الدلع بعد
ريم: انت مالك خص.. قول انك تغار
فيصل: اغار من منو .. منج انتي..
ريم: هيه مني انا.. اصلا انت ما تحصل نص الدلع اللي احصله
فيصل: ما يحتاي.. انزين اسالي امج...
ريم: امايه... منو اللي غلاته اكثر عنج .. انا ولا فصول
فيصل: فيصل يالحماره.. فصول اونه... تبيلج كف عسب تعدلين رمستج
ام عمر: محد شرات الريم..الريم محد يسواها اصلا
ريم: ههههههههه... لقط ويهك يلا
فيصل: افا يا ام عمر.. جيه عاد... تفشلينا
ام عمر: والله يوم بتصطلب و بتسمع رمستيه و بتعرس هذيج الساعه محد يسواك عندي.. بس الحين يوم بتم على هالحاله.. لا بويه لا انت بغالي ولا شياته
فيصل: ايييييييييييهييييي.. ردينا لسالفة العرس.. عندج هالبنات يوزيهن على راحتج... شو تبيبي
ام عمر: البنات كل وحده فيهن بتسير بيت ريلها.. و انا منو بيتم عندي غيرك.. ما تباني افرح بشوفة عيالك
فيصل: ما عليه.. يصير خير
ابو عمر: هاي هي رمستك.. ما عليه و يصير خير... قول ان شاء الله . من باجر بعرس..
فيصل: باجر عاد.. اخاف العروس ورا الباب تترياني
ام عمر: ما عليك انت من العروس ... بس قول هيه و خل الباجي عليه
فيصل: لا ... انا يوم بعرس باخذ اللي في بالي
ريم: و منو الي في بالك
فيصل: مالج خص
ام عمر: شوف .. بتيبلي وحده من الشارع انسى العرس
فيصل: من الشارع عاد
ام عمر: هيه عيل وين تتعرف عليهن انت
فيصل: لا تخافين .. بييبلج وحده محد يسواها من بناتج..
عذابه: احلف انت بس
فيصل: والله


عقب العشا... روح خليفه عنهم.. بس لاحظ انه عذابه هب على طبيعتها... صح انها كانت تسولف معاه.. بس حس انه شي في خاطرها تبغي تقوله ... اللي كان خايف منه انه وصلها خبر شمسه بنت يرانهم..

عقب ما روح خليفة دخل عليهم محمد... و كان ياي يسلم عليهم عقب ما ردوا من السفر... يلس في الميلس .. و عقبها دخل الصاله يسلم على ام عمر... كان خاطره يشوف حمده.. بس هي طبعا ما طاعت تنزل و قالوله انها راقده.. بس هو حس انها هي اللي ما تبغي تشوفه

تعال اصير لك شاطيءاذا حزنك يصير امواج *** تعال و خذ فرح قلبي اذا قلبك بدا يعاني

مر اسبوع .. و بعدها حمده هب راضية تشوف او حتى ترمس محمد... محمد عاد كان طول هالاسبوع مطيح عندهم... و كل يوم يسير بيتهم على امل انه يشوفها.. بس هيه ما طاعت

المغرب....

فيصل: ريموووو
ريم: شو
فيصل: روحي ازقري امج.. قوليلها محمد ياي يسلم .. تراه الحين بيدخل الصاله الثانيه.. و يا ويلكن ان شفت وحده نازله.. بسرعه يلا
ريم: انزين
فيصل: هيه.. وازقري حمدوه بعد
ريم: ماظن بتنزل
فيصل: على كيفها هو... روحي ازقريها
ريم: انزين

عقبها دخل محمد الصاله و دخلت ام عمر و سلم عليها... و تموا يالسين يتريون حمده.. و طبعا حمده ما طاعت تنزل .. محمد حس انه حمده بعدها زعلانه... المهم شل عمره و روح .. و فيصل عصب من حركة حمده و موقفها ...

فيصل: حمدوه بطلي الباب.. اقولج بطلي الباب.. بلاها هاي ما ترد
ام عمر: خلها في حالها.. حليلها راسها يعورها
فيصل: علينا هالكلام...
ابو عمر: ما عليك منها .. روحي برمسها
فيصل : تراها وايد اتمادت.. عنبوه الريال من اسبوع مطيح عندنا
ام عمر: يا بويه خلك منها الحين.. روح حجرتك ابركلك. ابوك بيرمسها

دخل ابو عمر حجرة حمده.. و قرر انه يفهم منها السالفه

ابو عمر: حمده .. بلاج...
حمده: ما بلايه شي
ابو عمر: اسبوع ما نزلتي الصاله و لا يلستي ويانا...
حمده: يوم احس بيوع تراني انزل
ابو عمر: و اشعنه ما تبين تسلمين على محمد
حمده: مابا
بو عمر: ليش عاد...
حمده:..........
بو عمر: شو اللي في خاطرج
حمده: ابويه انت عمرك ما غصبتنا على شي...صح
بو عمر: اكيد
حمده: انزين .. وانا مابغيك تغصبني على شي الحين
بو عمر: على شو اغصبج
حمده: انا مابغي محمد
بو عمر ( وهو متفاجئ): شو يعني ما تبينه
حمده: ها الانسان ما يناسبني ولا انا اناسبه.. ما ظن نصلح لبعض
بو عمر: شو هالخرابيط بعد
حمده: ابويه الله يخليك افهمني.. خلاص انا ماريده.. ماريده
بو عمر: ليش عاد
حمده: بس جيه
بو عمر: ما يستوي جيه.. اقوله خلاص ما نباك طلق البنيه من غير سبب
حمده: انا ما اناسبه
بو عمر: يوزي عن هالخرابيط... ترى اللي بينكم هب بس خطبه.. هاي ملجة يا حمده... استهدي بالله... و اتعوذي من ابليس.. و ان شاء الله ما بيصير بينكم الا كل خير
حمده: بس يا بويه
بو عمر: شوفي .. انا ما بغصبج على شي.. بس ما يستوي بعد اقوله طلق البنيه من غير سبب... اباج تفكرين عدل... فكري و خذي وقتج... يوم بتقتنعين بهالشي خبريني.. بس تين و تقولين ابغي اطلق من غير سبب لا . هالكلام ما يوزلنا...هذا عرس يا حمده... هب لعبه ( و عقبها ظهر عنها)

بيت مهره السويدي...

سهيل ( اخو مهره): مهره
مهره: هلا
سهيل : بغيتج في سالفه
مهره: خير
سهيل: تحيدين البنتين الي جد ين بيتنا قبل
مهره: منو
سهيل: احيدهن بنات عبدالله القبيسي
مهره: هيه بلاهن
سهيل: بغيت اتخبرج جانهم معرسات ولا لا
مهره: اها... و ليش ان شاء الله
سهيل: ليش بعد... ابغي اعرس
مهره: والله... مبروووووووووووووك
سهيل: هب وقته الحين.. ما صار شي بعدنا
مهره: اوووه.. بس حمده مالجة
سهيل: منو حمده.. أي وحده فيهن
مهره: مممممممم.... احيدك شفت وحده فيهن
سهيل: هيه
مهره: اللي شفتها هي الريم
سهيل ( وحس انه ارتاح): يعني هب اللي مالجه
مهره: لا هب هي
سهيل : الحمدلله
مهره: ليش يعني
سهيل: لانها هي اللي في خاطري من زمان
مهره: و اشحقه ما خبرتنا
سهيل : حبيت اتريا اشويه
مهره: بس احيد حمده تقولي انه في واحد ياي يخطب الريم
سهيل : متاكده
مهره: هيه .. بس مادري جانهم وافقوا و لا لا
سهيل: خلاص عيل
مهره: شو خلاص...
سهيل: انسي السالفه
مهره: وايد غيرها.. بندورلك وحده ثانيه
سهيل: المشكله انه هاي اللي انا اباها ( وظهر عن اخته)

حرام نعيش في دنيا الخجل و الصمت و الاحراج **** و احبك كلمة على لساني و ملت تسكن لساني

شو سالفة سهيل,,!!! يمكن يكون له دور في حياة الريم ولا لا !!!؟؟؟


الجزء ( 34)

ألا ياليت تذكرني حبيبك مانسى ذكراك
غدت احلامه احزانه وغابوا عنه خلانه


الزواج قسمة و نصيب .. هالجملة مرت علينا وايد.. لها تاثير ايجابي في البعض.. و سلبي في البعض الاخر
ناس يستانسون بحياتهم و قسمتهم .. و ناس الحزن و الالم ما يفارقهم طول حياتهم... لسبب واحد ... وهو ان (( الزواج قسمة و نصيب))..

بعد ما كانت الحياة بسيطة و الامور سهلة في حياة عيال عبدالله القبيسي... صارت الدنيا صعبة و التفكير في المستقبل يرافقه الخوف و الحسرة و الالم...

خلود يمكن تكون الوحيدة اللي الحياة ابتسمت لها و بدت خطواتها في طريق السعادة مع عبدالعزيز... خلود اللي كانت الانسانه اللي تفكر في مستقبلها المهني متجاهله سالفة الزواج... غدت وحدة ثانيه املها الوحيد الزواج بانسان يحبها و يقدرها و يتمنى انه يعيش معاها طوووول عمره... يمكن لهالسبب تجاهلت خلود سالفة الشغل .. و اصبح همها الوحيد عبدالعزيز


بقى في يوم الفرح بسمه تدور مسكن بدنياك
وابعدها ظلام الليل واصبح قلبك اوطانه


حمدة ... البنيه الحالمة.. المغرورة .. اللي همها الوحيد الزواج بانسان غني يوفر لها كل اللي تتمناه.. تغيرت افكارها عقب ما تعرفت على محمد... يوم حبته ما اهتمت لاي شي فيه غير انه يحبها.. ما همها بيزاته و لا اسمه و لا مستواه... مع انه ما عليه قصور عنده الخير و المال.. بس هالشي ما فكرت فيه.. لانه باختصار تحبه.. وثقت فيه .. عطته قلبها .. ومن الناحية الثانيه. محمد بعد كان يحبها و ما تصور حياته بدونها.. لعبه و مغامراته مع البنات ما انتهت.. بالعكس استمر ت .. محمد كان واثق من حبه لحمده.. و بعد كان واثق انه علاقاته ما بتاثر فيه و لا في حياته المستقبلية ... بس الحياة اثبتت له شي ثاني.. الماضي اكيد له دور في الحاضر و في المستقبل.. الحب اللي بينهم ما انتهى .. بالعكس زاد في قلب محمد .. بس المشكلة تهدم في قلب حمده.. محمد اصبح غير عن قبل.. ما يقدر يتخيل لحظه انه حمده مستحيل تكون له في يوم من الايام... و بدا الندم يتسلل في حياته ... و بدت مشاعر الحسرة تنبت في قلبه... بس بعد ما تكسر معنى الحب في قلب حمده..

تعال وشوف لي دمعه ابحبسها الين القاك
لعلك تمسح الدمعه يغيب الحزن واشجانه


عذابة ... الحيرة ترافقها في كل لحظه... يا ترى شو المفروض تسويه.. تبتعد عن خليفة و ترضي امه .. و لا تقبل به و تبعده عن امه... حاولت تفكر بحل لهالمشكلة ... بس ترجع و تقول ليش افكر بحل لمشكله انا مالي خص فيها... يعني شو ذنبها.. شو ذنبها تنحرم من انسان يحبها و تحبه... بس خلاص .. اللي صار صار .. المفروض تفكر في المستقبل بدل الماضي.. بس الشي الوحيد اللي واثقة منه.. انها مستحيل تترك خليفة لاي سبب ... مستحيل تبتعد عنه..


انا ياصاحبي مدري ذكرتك يوم جيت انساك
وذكرت انك رحلت وقلت هذا الحب واحزانه

ريم.. كبرت.. و تغيرت افكارها .. قبل ما تقهر سالفة العرس... ما تحب أي حد يرمسها عن العرس و سوالفه.. بس الحين غير.. سيف غير اشياء كثيرة في حياتها.. هو الانسان الوحيد اللي دخل قلبها دون استئذان.. ما تقدر تنكر بمحبته و شعورها تجاهه.. دوم تذكر اللي صار بينهم... كيف عاملته في البدايه... تذكرت اليوم اللي شافته فيه عند باب المدرسه.. و كيف اهانته جدام البنات... تذكرت كمن مره طلبها من ابوها و هو رفض.. كمن مره تجاهلته .. و مع هذا بعده يباها.. و يمكن هالشي اللي خلاها تتاكد من حبه.. و ما درت انه في واحد ثاني يتمناها.. وهو سهيل .. ما درت انه يفكر فيها ليل و نهار بالرغم انه ما يعرف شي عنها..و مع هذا قلب سهيل ما عاد ينبض الا باسم ريــــــــــــــم

فيصل بدت ملامح التغير تظهر فيه.. عقب اللي استوى لاخوه عمر.. تغير فيصل و تغيرت شخصيته.. غدا انسان ثاني يقدر يتحمل المسؤولية .. حتى سالفة العرس بدا يفكر فيها.. و طبعا الوحيدة اللي خطرت في باله هي بنت عمه علياء.. هي الوحيدة اللي تمت في خاطره .. بالرغم من هذا الا انه بعده ما تنازل عن سوالفه مع البنات..


الين ابعدت الاقي العمر يجيب اخطاي لما اخطاك
تاخذني دروب الشوق ولاصل الين بيبانه

والحيـــــــــــــــــــــــــن ...وصلنا لانسان فقدناه ... بالرغم من كلامه و اسلوبه الجارح فقدناه.. اكيد عرفتوه... عـــــــــــمـــــــــــــر.. اللي ابتعد عن هله .. و ابتعد عن اللي يحبونه.. و تجاهلهم كلهم.. عقب اللي مر فيه.. عمر انسان صارم و قلبه قاسي.. بس محد درى انه في هالقلب بذرة حب محد سقاها.. الكل يتوقع انه بليا شعور و احاسيس.. بس الواقع غير هالشي ... عمر اكثرهم حساسية .. مشكلته انه ما يروم يعبر شعوره لحد.. ما يقدر يبين حبه لاي انسان.. الحب في نظره يدل على الضعف .. ما يدري الحب اصبح الوسيله اللي توصلك لقلوب الناس .. عمر عاش حياته في هالفترة في شقة.. طبعا فكر اكثر عن مره انه يرد البيت.. بس يغير رايه يوم يذكر موقف ابوه.. حاول كمن مره يتصل في امه بس الغرور يمنعه... ما درى الغرور بيخليه اتعس انسان في الدنيا.. بس الوحيدة اللي ما غابت عن باله هي الهنوف .. يحبها.. هيه نعم يحبها.. بس مشكلته ما يبين هالشي.. ما يبين معزتها و غلاتها في قلبه.. و طبعا السبب كان الغـــــــــــــــــرور.. علاقته مع بدور ما زالت مستمرة .. في اعتقاده زواجه من بدور هو الشي اللي بيرضي غروره .. يعتقد انه هالشي بيغيض هله و اولهم الهنوف..

من مواضيع ورد جوري
0 ( أحـــقـــر خــيــانــه )
0 برج جديد في دبي كل طابق يدور حول نفسه !!
0 كيف تتغلب على العطش في رمضان
0 كيف اعلم ان الله قد تقبل صيامى ؟؟
0 هولندا

توقيع ورد جوري

انتظر الباقي

لاعدمنا تواصلك غناتي

من مواضيع شموخ العز
0 طريقه وضع الماكياج بالصور " عجيب "
0 صورة حيرتني !!!
0 دعواتكم الصادقة
0 لاتلوموني في حبه ( الجزء الثاني )
0 يمه وينك ؟؟