الجزء [18] من قصة أحبك لو بغيت إنساك مقدر

عمر: خبريني انزين شو تبيني اسوي
بدور: يا عمر .. هاي هب حاله.. ليش متى تباني اترياك
عمر: و انا اظن اثبت لج اني اباج.. بس ابوج هب طايع
بدور: و انت تدري ليش ابويه رفض
عمر: ....
بدور: يعني حلوه تي تخطبني و هلك هب وياك
عمر: علاقتيه ويا هليه هالايام هب زينه
بدور: انزين ليش ما ترمس ابوك و تستسمح منه
عمر: كمن مره اقولج لا تتدخلين
بدور: و ليش ما ابدخل.. انت تهمني و اللي يخصك يخصني
عمر: مالج خص في هليه.. يوم بتدخلين ادخلي في شي يخصني انا..
بدور: يا سلااام... وانا اظن اللي بينا اكبر عن جيه
عمر: بدور .. جان هاي رمستج برايج.. تراني تعبان و مالي بارض ارمس الحين
بدور: لين متى بتتهرب
عمر: اتهرب من شو
بدور: من كل شي... من ابوك .. من امك .. مني انا.. و من نفسك
عمر:........
بدور: يا عمر انت غالي عليه ... و ما يهون عليه اشوفك بهالحاله
عمر: أي حاله بعد
بدور: تتحرى ما عرف اللي فيك... ما تشوف عمرك انت.. من يوم ما اتزاعلت ويا ابوك و انت متغير..
عمر: انتي ما تعرفين شي
بدور: اعرف.. صح انك ما تخبرني بشي.. بس والله احس فيك.. و انا متاكدة انك لو رحت استسمحت من هلك بترد شرات قبل..
عمر: اوووووهووووو... تراج وايد قمتي تتفلسفين
بدور: هاي هب فلسفة .. هذا الواقع.. ولو اني ما احبك و لا اهتم فيك جان ما قلتلك هالكلام..
عمر: خلصتي
بدور: هيه
عمر: خلاص عيل برايج
بدور: عمر
عمر: هاااااااااااااا
بدور: بسالك و اباك تجاوبني بكل صراحه
عمر: خير
بدور: بس اوعدني انك تصارحني
عمر: بجذب عليج يعني.. اسميج ذكية
بدور: اوعدني و خلاص
عمر: وعد
بدور: وعد شو ؟؟
عمر: بدور... تراني هب متفيج لج
بدور: قولي وعد اصارحج بكل شي
عمر: وعد اصارحج بكل شي
بدور: ههههههههههه
عمر: تضحكين بعد..
بدور: كيفي ...
عمر: بترمسين و لا لا
بدور: اوكي.. عمر
عمر: نعم
بدور: تحبني
عمر: بدور
بدور: هلا
عمر: تدرين شو خاطري
بدور: شو ..
عمر: اعلقج من رقبتج عند باب بيتكم
بدور: اووووووووووووووف... ليش عاد
عمر: الحين من الصبح حاشرتني ..صارحني و اوعدني .. في الاخير اونه تحبني
بدور: انزين هالشي يهمني
عمر: شي في خاطرج بعد
بدور: ما رديت عليه
عمر: لانه سؤالج تافه.. يلا باي
بدور: اصبر انزين
عمر: شو بعد
بدور: هب هذا الي كنت بقوله
عمر: شو عيل
بدور: عمر.. بعدك تحب الهنوف
عمر متفاجأ من هالسؤال
بدور: ما رديت عليه
عمر: و ليش تسالين
بدور: بس .. ابا اعرف
عمر: مالج خص
بدور: لا والله.. و ان قلتلك انه يهمني اعرف
عمر: شو بتستفيدين
بدور: مادري.. جاوبني و خلاص.. بس قبل ما تجاوبني تذكر واعدني تصارحني بكل شي
عمر: بدور.. فديتج.. هب وقته .. يلا مع السلامه

و طبعا ما عطاها فرصه ترد عليه.. صك التلفون في ويهها... بدور هذيج الساعه حست بان شعور عمر تغير عن قبل... في الاول كان متجاهل الهنوف .. بس عقب ما ابتعد عنها حس بقيمتها.. وحس انه يحبها و ما يقدر يمحيها من تفكيره و قلبه.. بدور حست بغصة .. تمت تفكر في حياتها مع عمر.. هيه حبته من قلبها .. بس الظاهر انه هو ماخذ علاقتهم ببرود.. حاولت تغيره بس عمر مستحيل يتغير بهالسهوله..

عقب ما صك عنها .. عمر تم يفكر في سؤال بدور...(( بعدك تحب الهنوف))

(( غريبة .. ليش سالتني؟؟ شو اللي بدر من مني و خلاها تعتقد اني احب الهنوف .؟؟ لا لا.. انا ما احبها.. انا عمري ما حبيتها.. اصلا انا يوم تزوجتها بس عشان خاطر ابويه.. و لا انا اصلا ما احبها و لا حتى اواطنها .. بس شو هالشعور اللي يخليني متردد في زواجي من بدور.. شو اللي يخليني دوم افكر في الهنوف ))

و عقبها شل تلفونه و قرر انه يطرشلها مسج..

(( لو التمني ينفع اللي تمنى .. ما كان صرت بلوم نفسي شقية .. اشوف كلن مع حبيبه تهنى .. و انا حبيب الروح صعباً عليه))

اترياها ترد عليه... مرت دقيقه .. دقيقتين.. ثلاث... خمس .. عشر... استغرب.. وينها ما ردت عليه.. ما تعود على قسوتها و جفاها... بس ليش يتريا ردها .. عقب اللي صار .. لازم يتاكد انها مستحيل ترد .. بس هالشي ما منعه من انه يتصل فيها و يسمع صوتها ..لكن الحظ خانه .. و لقى الخط مشغول...

بيت خليفة القبيسي

الهنوف: ما مليتي.. حشا من ساعه و انا ارمسج
خلود: لا والله.. احمدي ربج اني ارمسج.. بعد تذمر
الهنوف: ههههههههههه.. الحمدلله و الشكر.. بس عاد هب ساعه
خلود: ارمس منو يعني.. انتي لو تشوفين حالتنا في البيت جان زغتي
الهنوف: ليش
خلود: حمدوه وااااااايد متغيره و السبة محمد.. ما قامت تيلس معانا شرات الاول.. و عذوب هاي دومها في حالها.. و الريم اللي كانت ما تخلي حد في البيت ما تحشره استوت اهدأ وحده فينا ..و امايه من صوب تحتشر على أي شي.. و ابويه حليله ماله خص في حد
الهنوف: ها كله مستوي عندكم
خلود: هذا ترى الا موجز.. يعني الاخبار غير
الهنوف: خلود
خلود: هلا
الهنوف: وصلني مسج
خلود: ههههههههههه.. يا حليلج.. الظاهر اول مره يوصلج مسج
الهنوف: عن الطنازه.. لو تعرفين من منو
خلود: منو؟؟
الهنوف: عمر
خلود: صدق
الهنوف: اسمعي... (( لو التمني ينفع اللي تمنى .. ما كان صرت بلوم نفسي شقية .. اشوف كلن مع حبيبه تهنى .. و انا حبيب الروح صعباً عليه))
خلود: يا ويلي انا... انزين ردي عليه
الهنوف: لا لا.. ليش ارد عليه..
خلود: ردي انزين ..
الهنوف: لا فديتج.. مابغي ارد عليه.. حتى لو رديت عليه شو اقوله يعني
خلود: قولي له ان تولهنا عليه وايد.. و ان امه دوم تسال عنه .. و ان ملجة الريم قريب.. و ان حمدوه اظاربت ويا محمد.. و ان..
الهنوف: بس بس.. شو ها
خلود: شو اسويبج يعني...
الهنوف: انزين برايج
خلود: بطرشيله
الهنوف: مادري
خلود: على هواج... مع السلامه
الهنوف: الله يحفظج

تمت الهنوف متردده... اترد عليه ولا لا... بس الشوق كان اقوى من هالتردد

(( اخاف من خافقي لا حبك تخليه بوسط احلامه يعاني .. اخاف لا صرت مجنونك يصير الحب في قلبك اناني ))
و فجأة .. و بدو ن أي مقدمات ... ارتسمت الفرحة على شفة عمر يوم وصله المسج...
(( شقايل ما رمت ارد عليج يا بدور... كيف ما قدرت اجاوبج على سؤالج... كيف ما قدرت اقولج.. اني احبها ... احبــــــــــــــــــــــــــــــــها .. و ما عدت اقوى فراقها...))


انا قلب تعذب حيل من بعدك ومن جفواك..
انا جسم بليا روح غاب وغابت ازمانه

الجزء (35)

بدوا هل القبيسي يجهزون لملجة الريم... طبعا عقب اصرار سيف و حشرته قرروا انه الملجة اتم عقب اسبوعين تقريبا ... وبيحددون موعد العرس عقب... والريــــــــــم كانت صدق مستانسه و طايرة من الفرحه.. هب مصدقة انهاا قريب بتكون حرمة سيف.. سيف اللي تم شهور يلاحقها و يتمناها...

اما عبدالعزيز فقرر هو و خلود انه الملجة و العرس في يوم واحد.. و بيكون ان شاء الله عقب ملجة الريم..عبدالعزيز بدا يزور قوم القبيسي من فتره لفترة .. و بدت علاقته مع فيصل تتطور عقب ما كان عمر اقرب واحد منه..


***52*** خافقي الوجدان يخفق باسم خلي *** روحي الولهى من فراقة حزينة
حب صادق حب قلبي هب تسلي *** ضامي حبه و يرويني حنينه


خليفة بعده على حاله.. متعلوز من سالفة بنت يرانهم شمسه.. امه حاشرتنه الا ياخذها بس هو بعده هب طايع ... و في هالفترة حس بضيق من تصرفات امه .. حاول كمن مرة يقنعها بس هي هب راضيه..

بيت خليفة القبيسي

خليفة: دخيلج يا اميه افهميني..
ام خليفة: شو تباني افهم ها... انت اللي هب طايع تفهم .. انت اللي تسويه غلط و عيب
خليفة: اشحقه ما تبون تفهمون.. انا مب ماخذ لا شمسه و لا غيرها
ام خليفة: عيل تبغي تاخذ عذوب
علياء: بلاها عذوبه
ام خليفه: سكتي انتي... لمي ثمج يالحماره
علياء: امايه بلاج .. حرام اللي تسوينه...
ام خليفه: و اللي تسوونه انتو هب حرام.. ليش ما تبغوني افرح بعرس ولديه الوحيد
خليفة: و محد بيحرمج من هالشي.. بس عاد خليني انا افرح بعد.. يعني تبون تفرحون على حساب تعاستي انا
ام خليفة: لا حول و لا قوة الا بالله.. بتخبرك انت بلاك ما تفهم.. أي تعاسه .. هذا عرس يا خليفة..
خليفة: اللي تبيني اخذها بعيش معاها طول عمري.. و انا ماريد غير عذابه
ام خليفه: يعني عذوب هي اللي بتفرحك.. هب جنه خوها معلوز ختك و ماذنها.. تبغي تاخذها بعد
خليفة: عذابه مالها خص
ام خليفة: حتى ختك مالها خص. نصيبها اللي خلاها تاخذ ولد عمك .. و طالع شو اللي صار .. يا خليفة اسمع كلامي.. لا تعور قلبي اكثر
علياء: امايه... لا تقولين جيه.. عذابة طيبه و هي الوحيده اللي بتسعد خليفة
خليفة: دخيلج يا اميه افهميني
ام خليفة: اسمع يا خليفة.. انا رمستك وايد عن هالموضوع.. و خلاص ماعاد افتحلك ياه مره ثانيه.. بس ابغيك تعرف ان خذت عذابه لا انت ولديه ولا انا اعرفك...
خليفة: بس
ام خليفة: لا بس ولا شياته... انا رمست العرب و الحين تبغي تفضحني جدامهم... يا ريت لو البنيه هب زينه و لا فيها عيب.. بالعكس الكل يتمناها.. هاي يزاتي اني حصلتلك بنيه حشيم ما عليها كلام .. هاه يزاتي يعني
خليفة: شو تبيني اسوي.. افرحكم و احزن طول حياتي
ام خليفة: تتحراني ماحبك ولا اتمنى لك السعاده... يعني لو ما كنت ادري انه هالبينه هي اللي بتسعدك جان ما خطبتلك ياها ولا جبرتك تاخذها.. فديت روحك يا خليفة اسمع شوري.. تراني امك و اتمنى لك الخير.. يا بويه العرب عازمينا اليوم.. هب زين نردهم..

خليفة و هو حاس انه الدنيا ضاقت عليه... خلاص ما شي امل.. شو اللي المفروض يسويه.. كم بيتجاهل امه.. كم بيعاندها...

ام خليفة: ها خليفة .. شو رايك؟؟
خليفة: مادري
ام خليفة: يا بويه البنيه زينه... جمال و علم و اخلاق.. شو تبا اكثر.. صدقني انها بتسعدك... بس انت وافق
علياء (وهي اطالع خليفة): و عذابه
ام خليفة: عذابه الله بيسر عليها دنيا و اخرة.. لا تتحروني ما حبها.. مهما كان هاي بنت عمكم و حسبة بنتي .. بس يا بويه كفانا اللي يانا منهم.. لو ادري انها بتسعدك جان ما ترددت يوم اخطبها لك.. بس شوفة عينك.. طالع المشاكل اللي يتنا منهم... الباب اللي يي منه الريح سده و استريح.. الله بيوفقها بغيرك.. شوف حياتك و خلنا نفرح فيك.. انا لين متى بعيش.. الايام تمر و ابغي اشوف عيالك يا خليفة.. اباهم يملون عليه البيت.. انا مالي غيرك... مالي غيرك يا بويه.. حرام اللي تسويه فيه.. ( و تمت تصيح)

خليفة: دخيلج يا اميه لا تصيحين... والله ما يهون عليه اشوف دموعج الغاليه
ام خليفه: اصيح من حسرتيه عليك... لا تظن اني ماحبك و لاادانيك.. لا تظن اني يوم اجبرك انك تودر بنت عمك يمكن اكون اكرهها .. لا والله.. الله يشهد على غلاتهم عندي.. بس الظروف اللي خلتنا نبتعد عنهم.. و انت ادرى ... انا اتمنى لهم الخير مثل ما اتمنى لك و اكثر بعد.. عذابه ما تناسبك..ولا انت تناسبها.. كمل حياتك ويا غيرها.. و محد اخير عن شمسه

خليفة: اللي تشوفينه
ام خليفه: يعني موافق
خليفة ( بتردد): هيه
علياء: بس ... ( جان تسكت و مارامت تكمل كلامها)
خليفة: عقب صلاة المغرب بنظوي
ام خليفة: يعل ربي يفرحك في كل خطوة مثل ما فرحتني يا خليفة

و عقبها ظهر خليفة عنهم. ركب سيارته.. و قعد يفكر في اللي صار بينه و بين امه.. حس انه ماله خيار ثاني.. مستحيل ياخذ عذابه دون رضى امه... و مستحيل امه ترضى عقب اللي سواه عمر.. و مستحيل عمر يتغير.. شو هالدنيا اللي تفرق بين قلبين.. شو هالظروف اللي تمنعهم عن بعض... بس خلاص .. هو وافق ياخذ شمسه. بس عسب يرضي امه.. يمكن تكون شمسه انسانه طيبة و تقدر تسعده مثل ما تقول امه.. بس مستحيل تكون القلب اللي يتمناه خليفة .. مستحيل تكون عذابه... باختصار .. الزواج قسمة و نصيب

وجان يرن تلفونه..

فيصل: وينك عن التلفون من الصبح
خليفة: كنت يالس عند هليه و التلفون في السياره
فيصل: انزين بتمر عليه..و لا انا امر عليك
خليفة: لا ماروم الحين.. مشغول شوي
فيصل: شو اللي شاغلنك هاه.. لا تقولي متعرف على وحده من هالمزيونات
خليفه: هههههههه اسميك متفيج.. لا بويه تعرفني عدل .. انا هب شراتك
فيصل: حليلي.. شو سويت.. خلاص الاول تحول.. تحيدني شرات قبل
خليفة: ادريبك تغيرت
فيصل: اكيد بتغير... يوم انه عبدالله القبيسي ورايه ما تبغيني اتغير
خليفة: اشحاله ابوك؟
فيصل: بخير و سهاله.. بس زعلان منك
خليفة: افا .. ليش عاد
فيصل: عنبوك قاطعنا .. لا تي تسلم و لا تسال عنه
خليفة: اسمحلي عاد..
فيصل: بسامحك بس بشرط
خليفة: شو
فيصل:تمر عليه المغيربان و بنظهر نتمشى
خليفة: المغرب.. اليوم.. لا لا ماروم
فيصل: شو عندك
خليفة: بودي هليه
فيصل: وين
خليفه ( وهو متردد): ها ... مادري وين يبن يسيرن
فيصل: اوهوووو... برايك عيل
خليفة: بلاك
فيصل: اسال عمرك.. مادري بلاه حالك منجلب هالايام.. اخاف اللي عندك شي من ورايه
خليفة: شو عندي يعني
فيصل: هههههههههه اتمصخر ويا ويهك.. انزين ان خلصت اتصلبي
خليفة: تم ..
فيصل: مع السلامه

كان خليفة متردد... ماعرف شو يرد على فيصل.. شو يقوله.. يقوله انه قرر يعرس.. و بياخذ بنت يرانهم.. و عذابه.. عذابه اخته و اكيد ما تهون عليه.. اكيد فيصل بيضايق .. خليفة ما كان يبغي يشوف فيصل.. لانه ماله ويه يواجه.. ماله ويه يقوله .. خلاص انا بعرس..

كم تمنيته و ليته لو حصلي *** من تلاقى في الهوى عيني و عينه
حسنه الفتان و عيونه تخلي *** كل عين عاشقة تصبح رهينه
بيت عبدالله القبيسي

يلس فيصل في الصاله يطالع التلفزيون... و يلسن معاه خلود و عذابه و الريم.. و ام عمر ..

ام عمر: ابا اعرف .. ابوك هذا وين يروح؟
فيصل: حليله.. خليه يتمشى .. دوم حاكرينه في البيت
ام عمر: نحن اللي حاكرينه
فيصل: هيه نعم انتو.. خلو الريال يتنفس .. يشم هوا نظيف
ام عمر: مالت عليك و على رمستك الخايسه هاي
ريم: اخ عليك يا فيصل.. اصلا ابويه ما يروم يعيش بليانا.. اصلا ما يتخيل حياته بدوني
فيصل: ليش غناتي ... منو انتي يعني
ريم: الريم ... شيخة الحريم
فيصل: عدال لا يطيح حلجج.. انا بس مستغرب من شي واحد
خلود + عذابه+ ريم: شـــــــــــــــــــو
فيصل: اشقايل هذا سيف اتخبل و قرر يخطبج.. اسميه ماعنده سالفه
ريم: امايه.. طاعي فيصل
ام عمر: عيب عليك ترمس جيه عن ختك
فيصل: ما غلطت بشي
خلود: ههههههههههههههه... انت ما فكرت منو هاي اللي بتتخبل و بتاخذك
فيصل: يا ويلي انا... اللي بتاخذني بتكون اسعد انسانه في هالدنيا
ام عمر: خلاص عيل.. من باجر بندورلك
فيصل: لا لا .... يوم ابغي اعرس بخبرج..و بقولج سيري بيت فلان و اخطبيلي بنتهم
عذابه: اموت و اعرف من هي اللي خاطرك فيها
فيصل: بعد ربج... ( وهو يحاول يغير الموضوع).. وينها ام اربع واربعين لسان
خلود: منو؟
فيصل: منو غيرها يعني .. حمدوه
ريم: ان ما خبرتها.. اصبر عليه
فيصل: زيغتيني... خبريها انزين.. و لا اقولج ازقريها و انا روحي بخبرها..
عذابه: ما ظن بتنزل
فيصل: بتخبركم.. بلاها هاي ... من فتره متغيره.
ام عمر: علمي علمك.. مادريبها.. من يوم ردت من عند ربيعتها و هذا هو حالها

وجان يرت تلفون فيصل..
فيصل: حيالله هل العين
محمد الرميثي: الله يحييك و يبجيك.. اشحالك؟
فيصل: بخير ربي يعافيك.. وانت
محمد: الحمدلله.. وينك .. في البيت؟
فيصل: هيه نعم.
محمد: خلاص عيل.. انا ياي اسلم عليكم..
فيصل: حياك الله..
محمد: يالله دقايق و بكون عند الباب..
فيصل: اوكي...

فيصل: ايه انتي
عذابه: انا لي اسم انزين
فيصل: انزين عذوب.. نشي زقري حمدوه.. قوليلها محمد ياي في الدرب
خلود: لا اتعب عمرك.. ما بتنزل
فيصل: على كيفها هو... وايد سكتنا عن سوايها.. هب حاله هاي
ام عمر: خلها في حالها
فيصل: لا ما بخليها.. الحين الريال كمن مره يا بيتنا.. و دوم نرده.. الصراحه انا مالي ويه اشوفه.. ان ما نزلت قوليلها فيصل بيمطج من شعرج و بينزلج
ام عمر: هاللي ناقص بعد
فيصل: عيل اخليها على هواها
ام عمر: انا روحي بسير ارمسها
فيصل: ها .. وصل ... دقايق و ابغي اشوفها تحت .. و انتن يالله .. كلكن فوق.. مابغي اشوف حد فيكن تحت
خلود: وابويه انا.. قام يتامر بعد
فيصل: شو قلتي ؟؟؟
ام عمر: ما عليك انت.. قم سلم عليه و دخله داخل

ظهر فيصل عند محمد برع و سلم عليه و دخله في الميلس داخل.. و يلس يتريا حمده


ام عمر بغت تسير ترمس حمده.. بس شافتها في المطبخ تاخذلها عصير

ام عمر: الحمدلله يوم اني اشوفج تشربين و تاكلين
حمده: ههههههههههههه... ليش عاد.. اكيد يوم بيوع باكل
ام عمر: غناتي هب زين اللي تسوينه هذا
حمده: شو سويت
ام عمر: موول ما سويتي شي.. انزين روحي غيري ثيابج.. محمد في الميلس و ياي يسلم عليج.. لا تقولين ما ابا اشوفه.. هب كل يوم العيد.. هب زين تردينه .. يالله فديتج
حمده: اسمحيلي اميه.. ماريد اشوفه
ام عمر: ردينا
حمده: لا ما ردينا.. انا من زمان قايله مابغي اشوفه.. اشحقه اتعبون عماركم
ام عمر: حمدوه.. يوزي عن حركاتج هاي
حمده: فديتج يا اميه لا تجبريني على شي انا ماباه
ام عمر: انزين خبريني اشعنه ما تبغين تشوفينه.. شو اللي صار بينج و بينه
حمده: ما صار شي
ام عمر: تراج بتذبحيني.. يوم انه ما صار شي اشحقه الدلع هذا بعد.. حمدوه لا ترفعين ضغطي.. خوج فيصل روحه مغيظ..
حمده: نفاد
ام عمر: والله الرمسه معاج ما منها فايده.. خل اخوج يادبج
حمده: شو بيسوي يعني ..

و يدخل عليهم فيصل

فيصل: ما سمعتج حمدوه.. شو قلتي
حمده ( بتردد): ماشي
فيصل: لا لا .. عيدي اللي قلتيه
حمده: ما قلت شي .. ( مشت بتظهر من المطبخ)
فيصل: تعالي هني
حمده: نعم
فيصل: و ين بتسيرين
حمده: حجرتيه
فيصل: تغيرين ثيابج و تنزلين
حمده: مابغي
فيصل: شو ما تبغين
حمده: مابغي اشوفه.. خله يروح
فيصل: تراج مصختيها
حمده: ............
فيصل: ابا اعرف بلاج انتي
حمده: ماشي
فيصل: اشعنه عيل ما تبين تشوفينه
حمده: بس جيه
فيصل ( وهو معصب): تراني لين الحين ماسك عمري.. لا تقهريني اكثر.. بترمسين و لا لا
حمده: مااعندي شي اقوله
فيصل: عيل يالله.. غيري ثيابج و تعالي
حمده ( بتردد): ما ابا
فيصل و هو معصب.. مسك حمده من شعرها .. و تم يصارخ عليها

فيصل: حركاتج هاي هب عليه.. لا تشوفين ابويه ساكت و تتحريني انا بسكت بعد..
حمده: هدني... اااااخ شعري
ام عمر: فيصل... شل ايدك عنها
فيصل: لا ما بشل.. يوم بتتادب هذيج الساعه بسكت عنها
حمده: شو تبغي ... قلتلك ماريد اشوفه. مااااااااااااااااااااباااااااااا
فيصل : عطيني سبب
حمده:بس جيه كيفي
فيصل: حمدوه لا تخليني الحين امد ايدي و اعطيج كف محترم
حمده: هدني .. والله بخبر ابويه عليك
فيصل: خبريه.. تتحرين ابويه راضي عن اللي تسوينه
حمده: انت مالك خص فيه
فيصل: جاب ولا كلمة.. دلعج هذا هب علينا.. غيري ثيابج و انزلي بسرعه..و ان تاخرتي والله لا اييج لين حجرتج و بسحبج من شعرج عنده..
حمده: ماتروم
فيصل ( وهو يشد على شعرها): تبين تجربين
حمده: اااااااااااااااااااااااااااه.. امايه دخيلج طاعي فيصل.. امااااايه
ام عمر: فيصل.. شل ايدك عن ختك..
فيصل: بتنزلين و لا لا
حمده:.............
فيصل: بتنزلين؟؟؟
حمده:...............
ام عمر: خلاص بتنزل.. خلها في حالها
فيصل: ابا اسمعها .. بتنزلين و لا لا ؟؟؟
حمده: اوووف .. اوووف بنزل ... شل ايدك عني
فيصل: ثواني و ابغي اشوفج تحت
حمده: بس والله اخبر ابويه و دواك عنده
فيصل: خبريه...
حمده: و بتشوف يا فيصل
ام عمر: حمدووه.. بس .. يالله قومي غيري ثيابج
حمده: اوف.. شو هالحاله... غصب اشوفه
فيصل: لا حووول.. تبين اقطعلج شعرج عسب تتادبين
ام عمر: خلاص يا فيصل.. روح اقعد عند الريال و الحين بتيكم حمده
فيصل: بسرعه


ا لجوارح كلها بشوفه تهلي *** تبري جروحي و اعواقي الدفينه
غالي من دون أي صد و تغلي *** و الغلا يزداد من طيبه و زينه


دخلت حمده حجرتها.. و دخلت الحمام غسلت ويهها... ما صاحت جدام اخوها و لا امها.. و لا نزلت دمعه.. حمده من النوع اللي ابد ما تبين ضعفها جدام حد.. مثل عمر.. و الكل كان يشهد بانه حمده نسخه عن عمر في غروره و كبرياءه.. و هي تغسل ويهها تمت تصيح.. ما قدرت تيود عمرها اكثر.. صاحت على حظها و قدرها اللي جمعها بواحد مثل محمد.. اللي حبته اكثر من أي انسان.. و في المقابل خانها مع وحده من صديقاتها.. ما قدرت تخبر عن هلها بللي سواه محمد.. مع انه هذا سبب مقنع بيخلي هلها يتفهمون موقفها.. بس هي ما حبت تشوه صورة محمد جدام هلها او تنزل مستواه.. يمكن لانها بعدها تحبه و تعزه..
دخلت الميلس ...و سلمت على محمد.. عقبها ظهر فيصل عنهم .. نظرات محمد كلها عند حمده.. طول الوقت كان يتاملها و يتامل عيونها السبب شوقه و حبها لها

محمد: اشحالج
حمده: بخير
محمد: دوم ان شاء الله
حمده:............
محمد: انزين اسالي عن حالي
حمده: ما يهمني
محمد: افا.. الحين انا ما اهمج
حمده: شرات ما انا استويت في يوم من الايام ما اهمك
محمد: ومن قال انج ما تهميني... حد ما يهتم في روحه و قلبه
حمده: هيه انت
محمد: حرام عليج يا حمده.. لا تظلميني
حمده: انا اللي ظلمتك الحين.. يا استاذ محمد لا تنسى اني شفتك بعيوني
محمد: فديت عيونج
حمده: .......
محمد: تولهت عليج
حمده: بترمس شرات الناس برمسك.. و ان تميت جيه بظهر
محمد: ما غلطت بشي
حمده: وانا ماريد ترمسني بهالاسلوب
محمد: حرمتيه.. و كيفي
حمده: اوووف.. ممكن تخبرني اشحقه ياي اليوم
محمد: عشانج
حمده: خير.. شو تبا
محمد: حمده.. حبيبتي
حمده: بلاها حبيبتي هاي
محمد: ان شاء الله. حمده.. كل انسان يغلط.. و انا ادري اني غلطت.. و اتمنى انج تسامحيني
حمده: انزين
محمد: شو انزين
حمده: بس هذا اللي في خاطرك
محمد: لا
حمده: شو بعد
محمد: انا اسف
حمده:......
محمد: سامحيني غناتي .. و صدقيني اللي صار ما بيتكرر
حمده: .........
محمد: ما انكر اني غلطت .. و ما في انسان كامل.. و انا ياي اليوم استسمح منج على كل اللي صار
حمده: .......
محمد: وعلى فكره.. اباج تنسين كل اللي صار .. و اوعدج انه ما بيتكرر.. و اللي تبينه بيصير
حمده: بس.. هذا اللي عندك
محمد: لا عندي شي خاطري اقولج ياه من زمان
حمده: خير
محمد: احبج... و الله اني احبج و ما اتخيل حياتي بدونج.. انتي كل شي في حياتي يا حمده.. لا تحرميني منج.. انتي تعرفين شو اللي سويته بس عسب اوصلج .. لا تتركيني.. تدرين اني بدونج ولا شي

حمده حست بفرحه كبيره.. بس مستحيل تنسى اللي صار

محمد: بعدج عني والله اثر فيه.. حياتي تغيرت و كل شي فيني تغير .. حمده انتي روحي و قلبي و عيوني اللي اشوف بها.. دخيلج لا تبتعدين عني.. غلطت و انا ياي اعترف بغلطتيه و اباج تسامحيني..
حمده: ........
محمد: بلاج ساكته
حمده: قلت اللي في خاطرك.. ممكن الحين تخليني اظهر اللي في خاطري بعد
محمد: اكيد
حمده: علاقتنا من البدايه مبنية على الغلط.. تعارفنا على بعض كان غلط.. و اللي صار انه المشاكل زادت و العلاقة بدت تنهدم.. سمعت وايد عن سوالف النت.. سمعت كيف البنيه تتعرف على واحد عالنت و يحبها و تحبه.. و سمعت بعد انه العلاقة بينهم تنتهي في اقرب وقت.. و ان ما انتهت بسرعه اكيد في يوم بينتهي الحب اللي بينهم لانه العلاقه مبنية على الغلط.. انا كنت اعرف هالشي بس حبي لك هو اللي اعماني.. هو اللي خلاني اتعلق فيك اكثر.. هو اللي خلاني اثق فيك.. وانت شو عطيتني.. الخيانه.. هذا اللي حصلته منك. و انا ما انكر اني استاهل هالشي .. هيه نعم استاهل.. استاهل اللي ياني منك.. لاني كنت ادري انه علاقتنا بتنتهي و انه الحب اللي قلبك بيزول في يوم. مع هذا تمسكت فيك. و المفروض ارضى بللي ييني منك.. بس انا ما بغي اللي بينا يستمر

محمد: فديت روحج يا حمده.. سامحيني .. ارجوج تسامحيني .. غلطت و انا ادري.. بس ماروم اودرج
حمده: هذا اللي قبلك مجرد خيال في يوم بينتهي . و انا مابغي اتريا هاليوم
محمد: حبي لج عمره ما بينتهي
حمده: اللي بينا مجرد وهم
محمد: بالنسبة لج يمكن.. بس انا لا .. اباج و بعدني شارنج
حمده: محمد.. هليه ما يدرون بللي صار بينا.. و انا مابغي اخبر حد.. خل اللي بينا ينتهي بهدوء
محمد ( بعصبية): انتي شو تقولين.. تعرفين شو يالسه تقولين
حمده: هيه
محمد: شو هيه.. خبله انتي.. شو ينتهي.. انا مستحيل اودرج
حمده: بس انا مابغيك
محمد ( وهو منصدم من كلامها): شو تقولين
حمده: سمعتني
محمد: وانا... بهالسهوله تقولين انج ما تبيني
حمده: لاهب بهالسهوله.. انا تميت ايام افكر في هالشي
محمد: حمده.. حرام اللي تسوينه فيه
حمده: اللي خلقني خلق الف غيري.. و اظن انك بتتوفق مع غيري
محمد: بس انا مابغي غيرج
حمده: ............
محمد: ما تفهمين.. اقولج ما ابغي غيرج. و مستحيل اخليج
حمده............
محمد: ردي عليه
حمده: اباك اطلقني
محمد ( هو منصدم):.........
حمده: خل اللي بينا ينتهي بهدوء
محمد ( وهو معصب): شو اطلقج
حمده: هذا اللي انا اباه
محمد: السالفه ما تستاهل
حمده: في نظري تستاهل.. شو اعظم عن الخيانه
محمد: لا حووول... غلطت و انا استسمح منج.. دخيلج لا تخلين هالشي ينهي اللي بينا
حمده: ماله داعي ينتهي لانه خلاص انتهى
محمد ( و هو يصارخ): شو انتهى
حمده: لو سمحت لا تصارخ
محمد: ما تسمعين اللي يالسه تقولينه
حمده: ما قلت شي
محمد: احسبج ماخذه السالفه ببرود
حمده: اشحقه اتعب عمري
محمد: يعني عادي عندج نطلق
حمده: ممممممم... هيه
محمد: لا والله
حمده: هيه
محمد: بهالسهوله
حمده: هيه
محمد: تبيني اطلقج
حمده: هيه
محمد: و اللي بينا ؟
حمده: انتهى
محمد: تحاسبيني على غلطه وايد غيري يرتكبها.. و انا هب معصوم عن الغلط.. و انا ياينج اليوم استسمح منج..
حمده: اوكي.. سامحتك.. بس اباك اطلقني
محمد: تلعبين انتي
حمده: لا
محمد: بس انا اباج
حمده: وانا ما اباك
محمد: حمدوه.. يوزي عن حركاتج
حمده:.........
محمد: تبين تطلقين يعني
حمده: هيه
محمد: وانا قلت ما بطلقج
حمده: مشكلتك
محمد: لا والله
حمده: هيه... اظن لو ابويه عرف السالفه اكيد بيوقف معايه
محمد: يعني بتخبرينه
حمده: ان ما طلقتني بخبره
محمد: اوكي
حمده ( وهو مستغربه): شو اوكي.. بطلقني
محمد: لا حياتي .. طلاق ما بطلق.. تبين خبري ابوج.. بس لا تحلمين في يوم اني بطلقج
حمده: ع كيفك هو
محمد: هيه
حمده: بس انا ما اباك
محمد: مشلكتج ... سلمي على امج.. مع السلامه

وظهر عنها محمد وهو معصـــــــــــــــــــــــــــــب و منقــــــــــــــــــــــــــــهر من كلام حمده.. وهي بعد منقهره من رمسته.. و عناده..

دخلت حمده الصاله عند خواتها و امها..
ام عمر: وينه.. روح.. جان خليتيه يقعد يتعشى هني
حمده: ليش يتعشى بعد
خلود: اعوذ بالله.. اشحقه جيه تعاملينه
حمده: كيفي
ام عمر: بلاج ماطه بوزج شبرين
حمده: وينه ابويه
ابو عمر: بعده ما وصل
عذابه: ليش؟
حمده: يعني ما تدرون شو اللي سواه فيصل
ريم: شو سوا؟؟
حمده: يوم بيي ابويه بتعرفن
ام عمر: تراه يبا مصلحتج
حمده: مصلحتي يمط شعري .. مصلحتي يقطع شعري و اتم بليا شعر طول حياتي
عذابه + خلود + ريم + ام عمر: ههههههههههههههههههههههههههههههه
حمده: بعد تضحكن
عذابه: ما خبرتوني.. خاطري اشوفه وهو يمط شعرج
حمده: ما عليه يا عذوب
ريم: اتخيل شكل حمدوه و شعرها واقف
خلود: ههههههههههههه.. قصدج من دون شعر
حمده: ما عليه انزين.. اطنزن على راحتكن
عذابه: تعالي انزين... شو بتلبسين في ملجة الريم
حمده: مادري
عذابه: تعالي اختاري انزين

و قعدن البنات يجهزن لملجة الريم ... و حمده من صوب مستانسه على اللي صار .. يمكن كانت فرحانه يوم حست انه محمد يحبها و ما يقدر يعيش بدونها.. بس ما ندري شو اللي بيصير بينهم !!!!

هو حياة الروح هو شمسي و ظلي *** هو مناة النفس هو مطلب ضنينه
صورته ما بين ترحالي و حلي *** و هذا سحر الشوق يسال عنه وينه


الجزء (36)


دخلت اليده بيت عبدالله القبيسي .. و توها واصله من العين ...

اليده: شوي شوي عالكيسه.. بتكسرين الغراش اللي داخلها
الخدامه: زين ماما ..
اليده: زين ماما ( و هي تقلد الخدامه).. روحي يالله طاعي وينهم العرب.. وين هل البيت.. ؟؟؟
ام عمر: حياج.. هني هني .. في الصاله
اليده: السلام عليكم
ام عمر ( وهي تحب راس اليده): عليج السلام والرحمه.. حشا ما بغيتي تينا
اليده: شو اسوي.. منو يودر العين هالوقت..
ام عمر: من ردينا من السفر ما شفناج
اليده: انشغلت ويا العرب هناك.. وينهن عيل بناتج
ام عمر: هني...
خلود: اوه.. منو هني.. يدوه.. لا لا ماصدق...اشحالج يدوه
اليده: بخير و سهاله.. اشحالج انتي
خلود: بخير ... وينج قطعتينا مره وحده
اليده: اثريكم متولهين عليه و انا مادري
ريم: حياج الله يدوه..
اليده: منو . الريم ؟؟
ريم: هيه نعم
اليده: حيا الله يالعروس.. اشحالج غناتي
ريم ( وهي مستحيه): بخير ربي يعافيج
اليده: وينهن عيل خواتج.. وينها حمدوه
ام عمر: الريم.. قومي ازقري خواتج
ريم: ليش انا... انا عروس و المفروض ادلعوني
اليده: ابا اعرف انتي متى بتستحين
ريم: هههههههههههه مادري
ام عمر: قومي زقري خواتج يالله
ريم: ان شاءالله

دخلت ريم حجرة حمده و خبرتها انه اليده تترياها تحت.. و عقبها دخلت حجرة عذابه..

ريم: عذوب
عذابه: ها
ريم: شو تسوين
عذابه: ادور شريط
ريم: أي شريط
عذابه: الشريط اللي عطاني ياه خليفة.. تذكرين.. يوم كنا في ليوا
ريم: اااااااااااااااهاااااااااااا
عذابه: بلاج
ريم: لا ماشي.. ليش تبينه
عذابه: اباه و خلاص
ريم: ليش
عذابه: كيفي
ريم: لا والله
عذابه: ليش يايه الحين؟؟
ريم: يدوه تحت و تبا تسلم عليج
عذابه : بنزل الحين
ريم: بسرعه
عذابه: ها حصلت الشريط.. يالله بنزل الحين
ريم: اوكي

كنت أظن هالدمعة اللي وسط عيني *** و أنت رايح جت معايه تودعك
لين طاحت مني كنها ما تبيني *** من غلاتك ودها ترحل معك


حمده: فديت يدوه انا
اليده: حمدوه.. تعالي تعالي هني..
حمده ( وهي تلوي على يدتها): اشحالج يدوه
اليده: بخير يوم انج بخير
حمده: فديتج والله.. انا زعلانه عليج
اليده: افا ليش عاد
حمده: عيبتج يعني العين ونسيتينا
اليده: منو يروم ينساج انتي
خلود: لا ادلعينها.. روحها وهي جيه ما نروم نتحملها
اليده: برايها.. هاي حمده... ان ما دلعتها منو بيدلعها
عذابه: و انا يعني مالي رب
اليده: انتي عاده غير...
عذابه: ليش يعني
اليده: ان حمدوه خذت الدلع.. انتي تاخذين الحب كله
عذابه: الله لا يحرمنا منج يارب
ريم: لحظه لحظه.. لو سمحتو.. انا العروس و المفروض الدلع و الحب حقي انا بس
اليده: يكفيج ابوج .. شو تبين اكثر
ريم: فديت ابويه انا
ام عمر: اشحالهم العربان في العين
اليده: بخير.. يسلمون عليج.. بس اسميني البارحه اتفشلت
ام عمر: ليش .. شو اللي استوى
اليده: عنبوه ما تخبروني انه خليفة خطب و عرسه قريب... و اعرف هالخبر من الغرب

الكــــــــــــــــــــــــــل كان متفاجئ و اولهم عذابـــــــــــــــــــــــــــــه

خلود: منو خليفة
اليده: منو غيره... خليفة ولد عمكم.. يخطب و محد يخبرني
ام عمر: منو قالج
اليده: حرمه يتهم البارحه من دبي
ام عمر: و ماتدرين خطب منو
اليده: مادريبهم والله.. بس اظني اسمها شمه ..
عذابه: اسمها شمسه
صدت ام عمر صوب عذابه ... ما توقعت انها تعرف السالفه
اليده: هيه .. يمكن شمسه.. بنت يرانهم..
حمده: و متى خطبوها
اليده: من يومين
خلود: ماتدرين متى العرس؟؟؟
اليده: يقولون جريب.. ما بيطولون.. عذوب امايه .. هاتي التلفون بنبارك حرمة عمج
ام عمر: ما عليه بنتصل بها خلاف
اليده: لا لا .. شو خلاف... هاتي التلفون
عذابه: ان شاء الله
اليده: اتصليبها و عطيني ارمسها
عذابه: ان شاء الله

من مواضيع ورد جوري
0 ملخصات جميع لقاءات أبطال أوروبا ليومي الثلاثاء و الأربعاء ( كتابي + فيديو )
0 لبّى الخدود البيض واعيونك السود
0 ياكـــثـر ماحــبك
0 موسوعه لسيارات
0 بعـض أســـــرار اللاعبيــــن لول

توقيع ورد جوري

تطورات عجيبه

شاكرة لك عزيزتي ورد

من مواضيع شموخ العز
0 سبحان الله ! ! !
0 مواقف محرجة من الأطفال!!!
0 طاولات لـ اللاب توب
0 لاتلوموني في حبه الاجزاء (3-4-5-6-7)
0 معاناة كتاب >>>>> مسكين

مشكوووووووووووووورة ورد

من مواضيع كلي فداك
0 أسماؤنا مستعارة..فهل ضمائرنا مستعارة أيضاً؟؟!!
0 ديوان صوتي للشاعرة الراسية
0 الجزء [13] من قصة سحـــابة صيــف
0 ابتســـ :) ــــــــم ،، فالله ربك
0 ][][ طلبــــات الثيمــــات ][][

توقيع كلي فداك