الجزء [19] من قصة أحبك لو بغيت إنساك مقدر

نشت عذابه وهي حاسه انه الدنيا ادور بها... شلت التلفون و اتصلت بيت عمها.. بس القدر جمعها بخليفة ..

خليفة: عليووو... وينكم عن التلفون... لا حووول.. الووو
عذابه ( وهي متفاجئة يوم سمعت صوته):........
خليفة: الوووووووو
عذابه: هلا خليفة
خليفة عاد عرفها من صوته.. كيف يروم ينسى هالصوت
خليفة: اشحالج؟
عذابه: بخير الله يعافيك... علومك؟
خليفة: يسرج حالي
عذابه: دوم ان شاء الله.. مبروووووووك
خليفة حس بانه حد طعنه في قلبه... ما توقع انه بتعرف بهالسرعه
عذابه: الف مبروك.. الله يتمم لك على خير
خليفة: تسلمين
عذابه: يدوه بتسلم عليك ( وعطت يدتها السماعه و راحت حجرتها)

ظهرت من الصاله.. و هي حاسه انه ريولها هب رايمه تشلها... ركبت الدري و وصلت حجرتها.. دخلت الحجرة و صكت الباب..و بعدها هب مستوعبة اللي صار.. خليفة خطب وحده ثانيه... معقوله خليفة تنازل عنها بهالسهوله.. خلاص يعني بيعرس.. و بيتركها... بيعرس و بياخذله وحده ثانيه وهي بتكون امل مقتول في حياته...

(( لا لا اكيد انا احلم.. مستحيل خليفة يهدني.. مستحيل يعرس و ياخذ له وحده غيري. و انا. ادري يحبني .. مستحيل يهدني مستحيل... و انا شو .. شو مصيري في هالدنيا .. انا شو من دون خليفة.. ))

حطت الشريط اللي عطاها خليفة في المسجل و شغلته ...
مظلوم انا في الحب مظلوم **** و كم عاشقٍ تبليه ظلام
يا ويل من هو بات محروم **** ساهر على شانك من العام
يا سيدي يا ريم الحزوم **** هيمتني في حبك هيام
حبك في وسط القلب مرسوم *** فيني تردد بين الانسام
كم بات حبك من الغلا مهموم **** هم الفراق و هم الاسقام
ارحم اسير محارب النوم *** * ساهر لجل عينك ولا نام
هذا و انا في الحب مظلوم **** راضي بظلمك لو الف عام
مظلوم انا في الحب مظلوم **** و كم عاشقٍ تبليه ظلام

و عقبها دخلت عليها امها ..

ام عمر: عذابه
عذابه: هلا اميه
ام عمر: بلاج
عذابه: ما شي.. اميه بغيت منج شي
ام عمر: شو
عذابه: اباج تتصلين بام خليفة تسلمين عليها
ام عمر: توني مرمستنها
عذابه: شو قالت
ام عمر: ماشي .. سلمت عليها وباركتلها خطبة خليفة و عطيت يدتج ترمسها
عذابه: زين.. وانا برد اتصل اباركلها عقب
ام عمر: فديتج يا عذوب ( جان تلوي على عذابه و تميت تصيح)
عذابه ( وهي ماسكه دموعها): بلاج امايه
ام عمر: ما تهونين عليه اشوفج بهالحاله
عذابه: أي حاله.. انا ما فيه شي.. مافيه الا العافيه
ام عمر: تتحريني ماعرفج... انا امج و حاسه فيج
عذابه : شو تقولين يا اميه... حاسه بشو.. انا مافيه شي
ام عمر: عذابه ترى الزواج قسمة و نصيب .. و الله بيعوضج بواحد احسن عن خليفة
عذابه: هههههههههه ( تضحك وهي تحاول ما تبين لامها حزنها) .. امايه ليش جيه ترمسيني
ام عمر ( وهي تصيح): ماباج تفكرين في السالفه مول.. بس ادعي انه الله يوفق ولد عمج و يرزقه بالذرية الصالحه .. و ادعي انه الله يوفقج انتي بعد
عذابه: فديتج يا اميه... السالفه ما تستاهل تصيحين عليها.. شوفيني انا مافيه شي.. لا تكبرين السالفه.. ولد عمي و اكيد بتمناله الخير .. وعمري ما بحقد عليه او حتى بكرهه..
ام عمر ( وهي تمسح شعر عذابه): يا رب يا عذابه..يا رب افرح بشوفتج عروس و افرح بشوفة عيالج ...
عذابه ( و هي تحاول تبتسم): الله لا يحرمني منج يا اميه...

ظهرت عنها امها.. و يلست عذابه روحها في الحجرة
(( حليلج يا اميه .. لو تدرين انه هالضحكه كانت دموعي ... لو تعرفين انه ورا هالابتسامه الم فظيع و جرح عميق في قلبي .. الله يرزقني بواحد احسن عن خليفة !!!!.. ماتدرين يا امايه انه محد احسن عن خليفة ..ماتدرين اني مابغي اخذ غير خليفة.. ماتدرين اني احب خليفة و بتم احبه طول عمري))

هذا قلبي و هذي عيني و ذي سنيني *** ما يبونك ترحل و كيف أقنعك
حتى روحي واقفة بينك و بيني *** لا هي عندي و لا هي تقدر تمنعكفي الصاله... يلسن البنات رواحهن عقب ما دخلت اليده حجرتها ترتاح

خلود: ماصدق... خليفة خطب وحده ثانيه
حمده: ما توقعت الصراحه
ريم: حليلها عذوب.. و الله احس اني لو كنت مكانها بموت. ما اتخيل الانسان اللي كان في يوم من الايام بيكون ريلي بهالسهوله يودرني
خلود: لا تظلمين خليفة .. الظروف اللي اجبرته يسوي هالشي
ريم: أي ظروف... عذابه شو خصها .. عمر و الهنوف اظاربوا .. اشحقه يلومونها
حمده: الصراحه انا مالوم ام خليفة...
ريم: انا الومها... حرام اللي تسويه في عذابه.. و هذا خليفة ما يحس.. كيف قدر يودر عذابه..
خلود: سكتي.. ابويه وصل

ابو عمر: السلام عليكم
البنات: عليكم السلام
ابو عمر: وينها عيل امكم
خلود: في الحجره
ابو عمر: تغديتوا؟
ريم: لا طبعا.. انا الصراحه ماروم اتغدا بدونك
ابو عمر: ههههههه.. ادريبج.. انزين زقري امج نتغدا رباعه
حمده: امايه ما تبغي تتغدا
ابو عمر: بلاها
حمده: راسها يعورها
ابو عمر: و ختج عذوب
حمده: ماظنها بتتغدى بعد
ابو عمر: شو سالفتكن اليوم
خلود: ماشي ...بخلي الخدامه تحط الغدا
ابو عمر: اوه.. نسيت .. اصبري اصبري.. ولد عمج بيينا.. يمكن يتغدا ويانا
ريم: اشحقه يينا بعد
ابو عمر: عيب عليج.. خليفة حسبة ولديه .. و بعدين ليش ما تبينه يي
ريم: بس جيه..
ابو عمر: حمدوه يوم بيوصل خليفة خبريني
خلود: اظنه وصل ..
ابو عمر: بسير اطالعه عيل

ظهر ابو عمر الميلس و يلس عند خليفة .. طبعا خليفة كان ياي يرمس عمه و يخبره عن خطبته ... خليفة طول الوقت كان منحرج من عمه و ما يعرف كيف يفاتحه بالموضوع.. اما ابو عمر فكان يتحرى انه خليفة ياينه يرمسه عن عذابه... خبره خليفة عن كل شي و طلب من عمه ان يروح معاه يملجون ..و طبعا بو عمر وافق بالرغم من انه تفاجأ بس ما حب يرد خليفة لانه كان يعزه و يغليه

ام عمر: خليفة هني؟؟
ابو عمر: روح
ام عمر: هيه.. شو كان يبغي
ابو عمر: يعني ماتدرين
ام عمر: خبرك
ابو عمر: هيه
ام عمر: شو قالك بعد
ابو عمر: يبغيني اسير وياه نخطب له البنيه
ام عمر: بتسير
ابو عمر: اكيد بسير
ام عمر: و عذابه
ابو عمر: بلاها
ام عمر: بلاها هالسيرة... خل حد من خواله يروح معاه
ابو عمر: خليفة و لديه و ان ما خطبت له منو بيخطب له
ام عمر: و انت ما فكرت في بنتك
ابو عمر: و هذا ولديه
ام عمر: تبديه على بنتك.. انت ما شفت حالة بنتك اليوم... ( وتمت تصيح)
ابو عمر: بلاج تصيحين
ام عمر: من الحسرة يا بوعمر... هالبنيه غامضتني
ابو عمر: الله بيعوضها
ام عمر: بس هذا اللي رمت تقوله
ابو عمر: شو تبيني اقول... يعني ما تدرين انه قلبي يعورني على بنتي .. بس شو اسوي.. هذا هو نصيبها.. صح اني تمنيت انه خليفة اللي ياخذها بس انا ما اروم اجبره على هالشي.. لو كان يبغيها جان رد و طلبها..
ام عمر: حليلج يا عذابه
ابو عمر: لا اتمين ترمسين جيه جدامها.. عذوب لو ما تبين انها زعلانه بس تراها حساسه
ام عمر: ادريبها.. و اباك تروح ترمسها
ابو عمر: ما عليه... خليني ارقد الحين
ام عمر: و الغدا
ابو عمر: منو له نفس ياكل...

عقبها وصل فيصل البيت

فيصل: خليفة كان هني؟؟
خلود: هيه.. يا يرمس ابويه
فيصل: اشحقه ما قعد
ريم: ماله ويه
فيصل: حتى انتي لسانج بدا يطول.. شرات ام اربع و اربعين لسان ( يقصد حمده)
حمده: لو سمحت لا ترمسني ..
فيصل: فالج طيب.. من عيوني.. انزين شو يبغي خليفة
خلود: ماتدري
فيصل: شو
ريم: غربية انا احيده ربيعك و يخبرك بكل شي
فيصل: شو ؟؟؟
خلود: خليفة يريد ابويه يخطبله بنت يرانهم
فيصل استغرب....
فيصل: أي بنت
حمده: ما سمعت .. تقولك بنت يرانهم
فيصل: هب توج قلتي ما تبين ترمسيني
حمده: سوري بالغلط
فيصل: لاتعيدينها ... انزين بنت منو؟؟؟
خلود: بنت يرانهم
فيصل: احلفي
خلود: احلف بشو
فيصل: تتمصخرون انتو
ريم: نحن ما نتمصخر
فيصل: بس هو ما قالي
ريم: يمكن كان منحرج
فيصل: وينه ابويه
ريم: في الحجره
فيصل: ما قال شي
خلود: ظهر من الميلس مضايق.. بس غريبة انه خليفة ما يخبرك ولا يصارحك
فيصل: مادريبه والله.. وينها عيل عذابه
خلود: في حجرتها
فيصل: تدري؟؟
ريم: هيه تدري..
حمده: صدق انك ذكي.. شقايل بعد ما تدري.. يعني العرب كلها تعرف و عذوب ما بتعرف
فيصل: لا حول... انتي ما بتلمين ثمج.. هب توج قايله ما بترمسيني..
حمده: نسيت انزين.. و بعدين يا استاذ فيصل ما نسيت اللي سويته فيه من ايام
فيصل: ويعني
حمده: يعني احمد ربك اني ما خبرت ابويه
فيصل: خبريه انزين
حمده: تتحرى ابويه بيسكت
فيصل: ادريبه .. بس لو بيعرف بسوياتج ما بيلومني.. و بعدين اشحقه تعاملين الريال هالمعاملة الزفته
حمده: كيفي
فيصل: لا هب على كيفج... انتي ما تستحين
حمده: لو سمحت لا تتدخل في حياتي الخاصه
فيصل: حمدوه لا تخليني الحين امط شعرج شرات قبل بس هالمره عاد بخليج بدون شعر
ريم : ههههههههههههههههههه
حمده: احلف انت بس ..
فيصل: تبين تجربين
حمده: ..........
فيصل: برايكم عيل.. انا ظاهر.. مع السلامه ( ظهر عنهم)

خلود: عيب عليج ترمسينه بهالاسلوب
حمده: ما تشوفين اسلوبه الزفت
خلود: ولو هذا اخوج العود و المفروض تحترمينه
حمده: احترمه هيه.. هو بعد المفروض يحترمني.. يعني هب صغيره عسب يمد ايده عليه
ريم: بس انتي تدرين ليش ضربج
حمده: وانا ما غلطت بشي.. اصلا محد يعرف بللي سواه محمد غيركم.. تعتقدون لو فيصل عرف بيسكت.. بس انا الغبيه اللي اداري على محمد و في الاخير انضرب
خلود: انزين.. شو قلتيله ؟؟
حمده: ابغي اطلق
خلود: صدق ترمسين
حمده: هيه صدق
ريم: شو تتطلقون.. حمده حرام عليج هب زين اللي تسوينه
حمده: عيل اربط حياتي بانسان مثله.. الحمدلله اني عرفته و كشفته على حقيقته
خلود: عقب شو عاد.. عقب ما ملجتوا.. انتي ما حسبتي حسابج عقب . شو بيقولون عنج الناس
حمده: خلهم يقولون اللي يبونه.. انا واثقه من عمري و ادري اني ما غلطت بشي
ريم: بس غير يوم تحسين بنظرة الناس لج.. و خاصه يوم تكونين مطلقة
حمده: شو اسوي يعني.. روحكم تعرفون اللي صار .. انا شو يضمني انه ما يكرر هالشي عقب العرس
خلود: بقولج شي و اباج تحطينه في بالج.. هالزمن ما بتحلصين واحد بدون علاقات.. و ان حصلتي تراه هالشي نادر.. بس معظم شبابنا تنتهي علاقاتهم عقب الزواج .. و محمد واحد من هالشباب .. صح انه له علاقات مع بنات بس اكيد بيتغير عقب العرس.. و محمد انسان طيب و شكله يحبج.. لا تخسرينه لغلطة يرتكبها الف واحد غيره في مجتمعاتنا
حمده: و يعني؟؟
خلود: يعني استهدي بالله و غيري تفكيرج.. انتي المفروض بذكائج تحافظين على محمد و تخلينه عندج طول حياته
حمده: حبيبتي هالكلام ما نشوفه الا في التلفزيون.. و لا شبابنا ما منهم فايده
ريم: حرام عليج.. لا تجمعين
حمده: ليش ان شاء الله.. منو تقصدين بكلامج.. لا تقولين سيف
ريم: هيه سيف.. بلاه يعني .. هب عايبنج.. انتي روحج تعرفينه و تعرفين اللي صار بيني و بينه.. بس الصراحه ما توقعت انه انسان بهالشخصية .. في البدايه اتحريته واحد لعاب همه في الدنيا المغازل و البنات.. بس عقب اكتشفت فيه اشياء وايد حلوه..
حمده: ريمو... انتي متى ترمسين جيه
ريم: اعبر عن رايي
خلود: خلونا في سالفة محمد
حمده: اوف... حتى اني كرهت اسمه
خلود: ههههههههههههه
حمده: ليش تضحين
خلود: عليج.. مادري على منو تقصين.. علينا و لا على عمرج.. الحين انتي تكرهين اسمه..هب جنج ميته فيه
حمده: هاك قبل.. و الاول تحول
ريم: ماصدق.. انتي اصلا لو ما كنتي تحبينه جان مازعلتي يوم شفتيه مع وحده ثانيه.. هذا يسمونه الغيره
حمده: أي غيره انتي بعد.. المفروض ازعل .. يعني الحين هو ريلي و اتخيلي اشوف ريلي مع وحده ثانيه.. لازم انقهر و ازعل
خلود: اوف منج... انتي الرمسه معاج ما منها فايده شرات ما تقول اميه.. والله انتي كبيرة و تعرفين مصلحتج عدل.. تبين تطلقين على راحتج.. اطلقي .. و انا الصراحه انصحج تراجعين قرارج.. لانه هب لعبة.. هذا حياتج يا حمده..

خذتني كلي انا وش باقي فيني *** خايف اوقف و القى ظلي يتبعك
روح وسافر بس طلبتك يا ضنيني *** عالاقل لو ما أشوفك بس أسمعك
عقب يومين

ابو عمر: يلا عاد.. وين المدخن..
ام عمر: ان شاء الله..
اليده: هذا الحين اشحقه مستعيل ها.. اللي يسمع يقول هو اللي بيعرس الحين
خلود: هههههههههههههههههه.. يدوه خاطري اعرف ليش مادانين ابويه
اليده: شو بعد مادانيه... بس هذا ابوج سوالفه مول ما تعيبني
ريم: حليله ابويه.. حرام تظلمونه
اليده: مالت عليج.. محد مدلعنج غير ابوج
ريم: اخر العنقود.. ما يدلعوني يعني
اليده: امحق.. قومي ودي المدخن عند ابوج لا يحتشر علينا
ريم: مافيه اتحرك.. انا ملجتيه عقب كمن يوم.. يعني المفروض ارتاح و اخذ لي فتره نقاهه
اليده: نقاهة شو بعد.. انتي ما بتصطلبين الا بهالعصا
ريم: تبين تضربيني
اليده: هيه نعم.. هاللي تستاهلينه
ريم: اهون عليج
اليده: ها.. هيه تهونين عليه
ريم: صدق... ( وجان تيلس حذال يدتها).. يدوه حبيبتي .. انا الريم.. اهون عليج تضربيني
اليدة: انا ابا اعرف هاللواته اللي فيكن من وين يايبينها..
ريم: هههههههههههههههههههه
عذابه: وينه ابويه؟؟
خلود: في الحجرة

و عقبها دخلت عذابه حجرة ابوها وفي ايدها المدخن.. يوم شافها ابوها استغرب.. ماتوقع انها بتيه بدخنه و هو ساير ملجة خليفة..

ابو عمر: جان خليتي حد منو خواتج ييب المدخن
عذابه ( وهي تبتسم): افا عليك يا بو عمر.. اذا انا ما دخنتك منو بيدخنك عيل

ابو عمر ابتسم لعذابه.. بس حس بالحزن اللي في عيونها.. اليوم بيسير ويا خليفة يملجون على بنت يرانهم شمسه.. اليوم انتهى امل عذابة ومات املها في وجود خليفة في حياتها.. تم بو عمر يتامل عذابه و هي تضحك و تسولف ويا امها .. استغرب كيف قدرت تتماسك لين الحين.. وين دموعها على خليفة.. لهالدرجة قست على نفسها و على قلبها..

عذابه: ابويه..
ابو عمر: لبيه
عذابه: من ساعة نرمسك و انت هب معانا.. بشو تفكر؟؟
ابو عمر: ها لا لا ماشي.. خير شو عندكم
ام عمر: اقول اشعنه ما سووا عزيمة حريم
ابو عمر: مادريبهم والله.. اليوم بس عزيمة الرياييل.. و بعدين محد بيحضر الا هل المعاريس
ام عمر: بس المفروض يسوون عزيمة حريم
ابو عمر: الله يهديج.. خليهم على هواهم
عذابه: بس هذا خليفة .. و المفروض يسووله حفله و يفرحون به و بعروسه
ام عمر اطالع عذابه و هي مستغربة من رمستها
ابو عمر: ترى خليفة الله يهديه ما طاع .. ما يبغي يدخل يسلم على حرمته.. عقبها قالوا بلاها الحفله و بعدين العرس جريب و ما بيتم حد ما بيعزمونه.. قومي طاعي فيصل وينه وما فينا نتاخر
عذابه: ان شاء الله ( ظهرت عنهم)
ابو عمر: بلاج؟
ام عمر: ماشي .. و بتتاخرون؟؟
ابو عمر: لا ماظن.. بنملج و بنتعشى
ام عمر: على خير ان شاء الله

في الصاله

اليده: فديتك يا فيصل.. ما شاء الله عليك .. اذركني بيدك
حمده: شو اللي ذكرج به؟؟
اليده: جيه نسيته عسب اذكره.
ريم: الله عالحب.. وبعدين انا احيدها ملجة خليفة هب ملجتك انت.. اشحقه متعدل جيه
فيصل: انتي وشلج.. يالله على حب هالبنات للتطنيز و المصخره
ريم: طالعين عليك
فيصل: انزين وينه ابويه..
عذابه: توه يتخبر عنك...
فيصل : يلا عيل.. بترخص عنكم.. يمكن اشوف لي وحده في الطريج تعيبني و اخذها
اليده: الله يقطع سوالفك.. انت مادري متى بتوب ..بتخبركم.. وينها حمدوه؟؟؟

روح و سافر بس توعدني تجيني *** وأنت سالم للي ينطر مرجعك
اما عني روح ولي ربي يعيني *** الله يعلم كيف حال مودعكفي حجرة حمده:

حمده: شو هالحاله لين متى بنتم جيه
محمد: اسالي عمرج
حمده: محمد لو سمحت.. خلنا ننتهي من هالموضوع لاني تعبت الصراحه
محمد: شو تبين بالضبط
حمده: تدري شو ابا
محمد: تطلقين؟؟؟
حمده: هيه
محمد: عيل تحلمين
حمده: اوهو.. هب حاله... وانا اباك .. غصب هو
محمد: حمده.. دخيلج.. لا تكبرين السالفه
حمده: ما بكبرها.. لانها اصلا كبيرة
محمد: ادري غلطت و انا اعتذر مليون مرة.. دخيلج يا حمده تسامحيني..
حمده:..............
محمد: هاي زلة و ان شاء الله ما بتتكرر.. فديتج سامحيني
حمده: لا تتفدى لو سمحت
محمد: حرمتيه و كيفي
حمده: لا هب على كيفك
محمد: لا حول.. لين متى تمين جيه
حمده: لين ما طلقني.. يا خي انا خلاص عفتك.. ماباك.. غصب هو
محمد ( وهو معصب من اسلوب حمده): هيه غصب.. عيبج زين .. ما عيبج اختاري أي يدار و دقي راسج فيه.. و على فكرة انا مسافر ويا ربعي
حمده: نعم؟؟ و كم بتم
محمد: سنه على الاقل
حمده: تستهبل حضرتك
محمد: هيه استهبل.. و يلا مع السلامه( و صك عنها)

العين

عيسى: ها بشر؟؟
محمد: ابشرك بشو.. جان عالموت تراه قريب مني
عيسى: بسم الله.. شو هالرمسه بعد
محمد: بموت و السبه هي
عيسى: توكل على الله و ما بيصير الا كل خير
محمد: أي خير..
عيسى: تحيد يوم انصحك قبل.. بس انت الله يهديك ما تسمعني
محمد: لا تذكرني الله يخليك..
عيسى: يعني ماشي امل
محمد: تبغي تطلق
عيسى: اصبر عليها شوي و اكيد بتغير رايها
محمد: الله يسمع منك.. تصدق يا عيسى.. ما اتخيل حياتي دونها.. صح اني تعرفت على وايد و شفت وايد.. بس هي الوحيدة اللي ماريد اودرها.. حياتي كلها بين ايديها.. انا قلتلها اني بسافر و ان شاء الله عاد في هالفترة تغير رايها
عيسى: ان شاء الله


دبي

بدور: ابا اعرف شو اللي غيرك صوبي
عمر: انا ماتغيرت
بدور: اتغيرت.. و تغيرت وايد بعد
عمر: بدور ابغي اقولج شي .. و اتمنى انج تفهميني
بدور: .....
عمر: بدور انا مانكر اني في يوم حبيتج.. و لا انكر اني بغيت اتزوجج.. بس
بدور: بس شو؟؟
عمر: ماظن بينا نصيب
بدور: عمر .. حياتي .. شو تقول.. اذا عن ابويه.. ما عليك. انا بقنعه.. ابويه يحبني و بيسوي أي شي عشاني.. بس انا مابغي منك شي غير انك تراضي ابوك و تيبه عسب تخطبني.. بس هذا اللي طلبته منك..تشوفه وايد عليه؟
عمر: تستاهلين اكثر عن جيه.. بس المشكله اني اللي ما استاهلج.. و اظن انج المفروض ترتبطين بواحد احسن عني بالف مره
بدور: حبيبي انا مابغي غيرك.. لا تسوي بي جيه
عمر: اسمحيلي يا بدور.. بس اتوقع اللي بينا انتهى و الله يوفقج بغيري
بدور ( وهي متفاجئة): عمر.. شو يالس تقول؟؟
عمر: اظنج سمعتيني
بدور: وانا و علاقتنا .. و حبنا
عمر: بدور.. حياتي هب معاج.. انا حياتي بين هليه
بدور: شو تقصد
عمر: انا ابتعدت هالفتره عن هليه و انقطعت علاقتي بهم.. و صدقيني انا حاس بالندم.. ما تصور حياتي دون امايه او حتى ابويه.. صح انه قسى عليه بس بعده بيتم ابويه.. انا حياتي هناك بينهم وبين خواتي
بدور: ليش ما تخليني جزء من حياتك.. يا عمر انا اللي كنت دوم انصحك ترد تستسمح من ابوك . تعتقد انه علاقتنا هي اللي بتفرقك عن هلك
عمر: ماظن ابويه بيوافق
بدور: ليش
عمر:........
بدور: انت شو تتحراني.. مالي اهل .. انت اكثر واحد تعرفني..و تدري اني اللي بيني و بينك هب علاقة تافهه
عمر: و انا ما قلت هالكلام
بدور: عيل ليش احس انك تعايرني..
عمر: انا عايرتج؟؟
بدور: هيه.. عمر انا رمست غيرك و لا اتعرفت على غيرك.. انت اللي حسيت معاه بطعم الحب و الحياة.. انت الوحيد اللي دخلت قلبي و تملكت مشاعري
عمر:......
بدور: حرام اللي تسويه فيه
عمر: دخيلج يا بدور افهميني... انا ماقدر اخذج.. ماقدر اخذ وحده انا متعرف عليها و لا بعد ظاهره معايه
بدور: شو تقول... ؟؟؟
عمر: اظنج سمعتيني
بدور: عمر... انا يوم ظهرت معاك ظهرت لاني وثقت فيك.. لاني احبك.. لاني كنت على استعداد اسوي أي شي عسب اثبتلك اني احبك
عمر: بدور.. قلتلج انتي انسانه طيبه و الف واحد يتمناج..
بدور: و انا مابغي غيرك.. يعني الحين يوم قعدت معاك في مكان عام.. طحت من عينك
عمر: انا ماقصد جيه.. بس بقولج شي .. ترى نحن الشباب لو نتعرف على البنات و نحبهم.. ترى الاقلية منا يفكرون بالزواج من اللي يتعرفون عليهم.. يعني باختصار ما في واحد يفكر ياخذ وحده متعرف عليها
بدور: توك تقولي هالكلام
عمر: لاتنكرين يا بدور اني ييت و خطبتج..
بدور: و الحين شو؟
عمر: الحين لو راضيت ابويه.. ما بيرضى اني اخذج.. و بعدين لا تنسين انه عندي عيال
بدور: عمر ليش ما تصارحني
عمر: تراني يالس اصارحج الحين
بدور ( وهي تصيح): ابا اعرف شي .. و عقبها ما بتسمع صوتي
عمر: شو؟؟
بدور: الهنوف هي السبب
عمر: شو يخصها الهنوف
بدور: الله يخليك جاوبني على سؤالي .. صارحني و لو لاخر مره.. بعدك تحب الهنوف
عمر: قبل اتحريت علاقتي بالهنوف علاقة عادية.. بس الحين لا.. اسمحيلي يا بدور.. بس الهنوف هيه الوحيدة اللي منية حياتي اني اقضي وياها عمري كله
بدور ( وهي تصيح بصوت عالي): عمر... الهنوف ما تباك... ما تباااااك
عمر: يحق لها ترفضني.. بس انا ما بتردد اني ارجعها مره و مرتين و عشر
بدور: و انا؟؟؟
عمر: الله يوفقج بغيري ..(( بدور صكت التلفون في ويه و ما خلته يكمل كلامه))

حس عمر بتانيب الضمير... تم يفكر كيف كان يعامل بدور و غيرها.. كيف كان انسان قاسي.. ما كان يهتم بشعور غيره.. همه الوحيد نفسه ..بس الحين تغير... تغير عن قبل.. تغيرت شخصيته.. و همه في هالوقت.. يرضي والديه.. و يرد للهنوف و عياله...


صرت احسد من كثر شوقي و حنيني *** حتى هذا الخاتم اللي باصبعك


الجزء (37)

آه لو تدري حبيبي ** كان والله ما قسيت
من غرامك كم اسهر ** في الليالي ما أنام

يوم ملجة خليفة القبيسي


اتيمعوا الرياييل في ميلس بيت العروس... و حضر المطوع و ملج بهم.. الكل كان مستانس و فرحان.. حتى فيصل مستانس لعرس ولد عمه و اعز انسان على قلبه.. الا خليفة .. هو الوحيد اللي صدق كانت علامات الحزن و اليأس واضحة على ويهه.. حتى ابو البنيه ( علي) لاحظه هالشي بس ما اهتم ..

اما العروس ( شمسة) فعلا كانت في قمة الجمال .. بالرغم انه ما عزموا حد بس ما شاء الله اهلها وايد و البيت انترس ... شمسة عمرها 22 سنة و تخرجت من التقنية بس ما اشتغلت.. بالرغم من انها انجبرت تقعد في البيت لرفض اهلها من انها تشتغل.. الا انها كانت مستانسه و ماهمها هالشي .. وما شاء الله عليها ربة بيت ممتازه و الكل يمدحها.. و الكل كان يحسد خليفة على زواجه من شمسة .. لانها فعلا ما عليها قصور ..

شمسة جميلة و جمالها هادئ.. شعرها هب طويل .. وهي من النوع اللي ما تهتم في عمرها وايد... بس في يوم ملجتها قررت انها تغير من شكلها... و كانت صدق جميــــــــــــــــــــلة و الكل انتبه لهالشي .. و احلى شي فيها عيونها.. اللي كانت تعبر عن فرحتها و سعادتها .. اما ام خليفة هب قادرة توصف فرحتها بملجة ولدها الوحيد.. صح انه في خاطره وحده ثانيه.. وانها منعته من انه يحقق مناه.. بس ام خليفة همها سعادة خليفة و فرحته.. بعيد عن عمر و هله.. و هالشي اللي خلاها تخطبله وحده ثانيه.. و الصراحه هالوحدة على قدر من الجمال و العلم و الطيبة و الاخلاق.. حتى خوات خليفة ( الهنوف و علياء) كانن مستانسات.. بس فرحتهم هب كامله.. لانه العروس هب عذابــــــــــــــــه

عقب العشا قرر خليفة انه يروح.. الكل استغرب من هالشي... حاولوا معاه بس ما طاع.. ابو عمر عرف السبب و عرف انه خليفة هب مرتاح لهالملجة .. وحس بضيقه و حزنه بس المشكلة ما بايده حيلة ... و عقبها طلبت ام خليفة من ام العروس انها ادخل خليفة و يطالع حرمته.. عقب تردد وافقوا.. بس المشكلة خليفة اللي تم مصر انه ما يدخل و لا يبا حتى يسلم عليها ... و عقبها اتصلت فيه الهنوف على امل انها تقنعه

الهنوف: خليفة.. هب زين اللي تسويه شو بيقولون عنك العرب
خليفة: الهنوف تراني وصلت حدي...
الهنوف: والله حاسه فيك
خليفة: حاسة بشو... اااااااااااه... والله انه العوق اللي فيه محد حس فيه
الهنوف: استهدى بالله يا خليفة.. البنيه استوت حرمتك و حرام من اولها تكسر بخاطرها
خليفة: انا وشلي.. ترى امايه تبغيني اخذها و خذتها.. شو تبون اكثر... اقص على عمري و عليها و ادخل احبها على راسها
الهنوف: دخيلك يا خليفة .. انساها انساها خلاص..
خليفة: ...............
الهنوف: خليفة

خليفة تم ساكت... ((( انساها..؟؟!! كيف انسى عمري و روحي و قلبي و اول حب في حياتي... هاي الامل اللي عشته من وانا صغير و كبرت على هالامل و الحين يبوني انساها)))

الهنوف: خليفة وينك؟؟؟ رد عليه وينك؟؟
خليفة: شو تبين
الهنوف: عشان خاطري يا خليفة... ادخل .. خمس دقايق سلم عليها و على امها و اظهر.. فديتك يا خليفة لا تردني
خليفة: الهنوف... برايج.. بروح الحين.. مع السلامه ( وصك عنها التلفون)

في ميلس الرياييل

ابو عمر: فيصل.. قم تاخرنا... خلنا نروح
فيصل: ان شاء الله...

سلم ابو عمر على الرياييل ... و ركب السيارة يتريا فيصل اللي كان واقف يرمس خليفة... فيصل سلم على خليفة و روح هو وابوه

فيصل: شفت خليفة؟
ابو عمر: بلاه
فيصل: والله غامضني.. ما تقول ملجه.. جنه عزا
ابو عمر: الله يهديه و يوفقه
فيصل: ابويه.. انت زعلان منه
ابو عمر: و اشعنه ازعل.. هذا ولديه لو شو ما صار.. لو اني زعلان جان ما ييت وياه اليوم
فيصل: اتصدق.. حاولت ما بين له اللي في خاطري
ابو عمر ( وهو مستغرب): شو في خاطرك
فيصل: ..........
ابو عمر: بلاك سكت ؟؟
فيصل: تمنيته ياخذ عذابه.. و انا ادري انه يباها من هو صغير.. اليوم و نحن قاعدين عندهم تميت اطالعه و اذكره يوم يلعب ويا عذوب.. تذكرته يوم يرمسني عنها دوم و انا اقوله بسك عاد حشرتنا بعذوب... ( جان يضحك).. يوم عرفت انه بيملج و بياخذله وحده ثانيه قلبي عورني عليه اكثر من عذابه.. لاني ادري انه بيتعذب اكثر عنها.. و اليوم يوم شفت حالته قلت في خاطري كيف الومه و هو روحه يلوم عمره على اللي يستوي.. مارمت اعاتبه و انا اشوفه مويم و زعلان يوم ملجته..ما قدرت اقوله شي و لا حتى اعاتبه لانه ودر اختيه و خذ غيرها.. صح انه ولد عمي و حسبة اخويه.. بس حتى عذابه ما تهون عليه.. ما عرفت شو اقوله.. باركت له عل و عسى اخفف الحزن اللي عايش فيه ( وعقبها صد فيصل صوب الدريشة و هو يحاول يمسح الدمعه اللي في عينه قبل ما يشوفه ابوه)

ابو عمر تم ساكت و يسمع رمسة فيصل.. معقولة فيصل كان يفكر بهالشي.. فيصل اقرب واحد لخليفة.. و اكثر واحد حس بالمه و حزنه... و عقبها ابتسم ابو عمر يوم حس انه فيصل صد الصوب الثاني .. ما درى انه الدمعة كانت واضحه بالرغم من انه يحاول يخفيها


خليفة شل هله و روح البيت.. و في السيارة الكل سكت و محد رمس.. هو توقع انه امه بتواجعه و بتلومه.. بس العكس اللي صار.. ام خليفة تمت ساكته.. و مارمست خليفة و لا قالتله شي... تدري بحزنه و ما بغت تضغط عليه اكثر... حتى خواته ما رمسن... نزلهن البيت وقرر انه يظهر ..

ام خليفة: وين بتسير.. الوقت متاخر
خليفة: برد بسرعه
ام خليفة: وين عاد؟
خليفة: مادري... (و عقبها روح)


بيت عبدالله القبيسي

وصل بو عمر و فيصل البيت...

ريم: هلا والله باحلى ابو في هالدنيا
بو عمر: شو اللي مسهرنكم لين هالساعه
حمده: نترياك
بو عمر: ليش .. شو عندكن؟
ريم: شو استوى؟
فيصل: شو بيستوي يعني... ملج الريال و خلاص..
حمده:بس
فيصل: هيه بس
بو عمر: صدق ما عندكن سالفه.. بسير احط راسي و ارقد.. يلا تصبحون على خير ( دخل حجرته)

خلود: خليفة اشحاله؟
فيصل: بخير
خلود: دخل يسلم على العروس
فيصل: لا
ريم: احسن... بس ليش
فيصل: مادريبه.. ما طاع
حمده: حليله...
ريم: منو قاله يعرس..
فيصل: بسير ارقد
ريم: انزين ما خبرتنا عن شو صار بعد
فيصل: تحيديني حرمه...
حمده: بلاهن الحريم
فيصل: ما بلاهن شي.. مالي بارظ اسمع سوالفكن التافهه... ( روح عنهن)

ريم: بلاه هذا
خلود: شكله مضايق
ريم: يمكن عسب خليفة
خلود: مب يمكن.. الا اكيد
حمده: خاطري اشوف العروس.. تتوقعون تكون حلوه
خلود: انا شفتها مره بس من زمان... و الصراحه حلوه
ريم: بس هب شرات عذوب... فديتها والله...
حمده: بس انا اللي مستغربة منه .. انها هب زعلانه .. بالعكس فرحانه و ابتسامتها ما تفارقها
خلود: يعني ما تعرفون عذوب... روحي حجرتها و بتشوفين حالتها ..

لا هنا زادي و شربي ** لا ولا بيومي اهتنيت
تايه مضيع دوربي ** وسط عتمات الظلام

في حجرة عذابه...

عذابه كانت منسدحة ع الشبرية .. و صاكه الليت و تمت تفكر.. تفكر في كل اللي صار .. خليفة و ايام الطفوله و كيف كانوا يلعبون .. اذكرت فيصل يوم يضربها و كيف خليفة يدافع عنها .. اذكرت ايام ليوا و كيف كانت الفرحه مرسومه على شفاتهم.. تذكرت ايام السفر في الاجازات... كانوا دوم يسافرون رباعه ويا عيال عمهم...

عذابه هالايام كانت ماسكة دموعها... وعدت نفسها انه محد بيشوف دموعها و لا حد بيحس بحزنها.. ما بغت حد يشفق على حالها .. و الاهم ما بغت حد يقول لخليفة عن حالها او حسرتها على بعد خليفة و زواجه من غيرها.. حاولت تبين لغيرها انها قوية و ما بيهزها شي حتى لو هالشي هو زواج خليفة.. ما بغت تعور قلب امها او حتى ابوها... ما بغت تبين لخواتها ضعفها او حزنها ... و عقبها سمعت صوت التلفون يرن.. بس ماهتمت.. تمت منسدحه و تفكر.. بس بعده التلفون يرن... غريبة من بيتصل في هالوقت... نشت بتشل التلفون


عذابه: الو ..
خليفة: مرحبا
عذابه ( وهي مستغربة): خليفة؟؟
خليفة: هيه
عذابه: خير ...
خليفة: ....
عذابه: تبا ابويه؟؟
خليفة: لا
عذابه: عيل فيصل؟؟؟ بس فيصل راقد.. جرب اتصل به على موبايله
خليفة: مابغي حد منهم.. اباج انتي
عذابه ( وهي حاسه بغصه في صدرها): ..........
خليفة: سمعتيني.. مابغي حد غيرج يا عذابه... والله اني مابغي حد غيرج
عذابه: خليفة بلاك؟؟؟ شي فيك
خليفة: تعبان يا عذابه.. قلبي يعورني عليج و على حالي
عذابه: استهدى بالله ..
خليفة: اسمحيلي غناتي .. و الله غصبا عني.. مادري شقايل خذتها .. مادري شقايل خذت وحده غيرج
عذابه: البنية زينه و حرام اللي تسويه.. الله رزقك بوحده الكل يشهد بطيبتها و اخلاقها
خليفة: وانا مابا غيرج
عذابه: خليفة هب وقته هالكلام.. خلاص انت الحين متزوج.. و المفروض تنسى
خليفة: انسى شو
عذابه...........
خليفة: انسى شو .. ردي عليه؟
عذابه ( و الدمعه في عينها) : تنساني
خليفة: تبيني اموت عيل
عذابه: يعل يومي قبل يومك..
خليفة: انا الحين عايش على ذكراج.. كيف تبيني انساج
عذابه: خليفة ... بخليك الحين
خليفة: سامحيني
عذابه: على شو.. انت ما غلطت بشي
خليفة: سامحيني... سامحيني ...

عذابه ماقدرت ترد عليه لانه تمت تصيح.. وما بغته يسمع صوتها و هي تصيح

خليفة: احبج .. احبج موت و الله يشهد على كلامي .. و اباج تعرفين لو مهما صار .. بتم احبج و غلاتج يا عذابه محد بياخذ مكانج في وسط قلبي .. صدقيني اني احبج احبج احبج.. عمري ما بنساج .. و ربي يشهد على كلامي

صكت عذابه التلفون .. تمت تذكر كل كلمة قالها خليفة .. (( صدقيني اني احبج احبج احبج.. عمري ما بنساج .. و ربي يشهد على كلامي ))

خلاص .. باختصار انتهى الامل و مات الحب.. انتهى و مستحيل بيرجع.. لانه ماله امل في الحياة .. خليفة تزوج و هذا الشي مستحيل يتغير.. و عذابه مصيرها غير عن مصير خليفة .. حياتهم مع بعض اصبح من المستحيلات..

لا خوي و لا مخاوي ** و لا لقيت اللي اهتويت
بين ياسي و بين همي ** غارق ببحر الغرام

دخلت عذابه حجرتها .. صكت الباب و ردت انسدحت على شبريتها .. بس النوم ما قارب جفونها من كثر الصياح .. من قهرها و حسرتها على فراق خليفة.. كل ما تسمح الدمعه تنزل غيرها .. و كل دمعه تحمل اسم خليفة.. علا صوت صياحها و ما بغت حد يسمعها .. حاولت تخفف الصوت و حط ايدها على ثمها عسب محد يسمعها.. يلست تفكر في اللي صار قبل... تذكرت يوم طلبها كمن مرة بس هي ردته.. بالرغم من انها تحبه ردته.. ليش؟؟؟ الكبر و الغرور اللي تملكها.. كانت واثقه انه خليفة بيتم لها لو شو ما صار .. كانت تدري انه خليفة عمره ما بيبتعد عنها بالعكس بيتم يباها لاخر يوم في حياته.. بس الدنيا اثبتت لها العكس.. الحين يوم هي تمنت خليفة .. هو اللي ابتعد عنها.. بس مع فرق بسيط.. انه الابتعاد هب بيد خليفة و لا بيد عذابه.. الظروف اجبرتهم على هالشي.. بس طبعا ما باليد حيلة.. دام انه الزواج قسمة و نصيب



عقب يومين

بيت عبدالله القبيسي

اليده: ابا اعرف الحين .. انتن ما تشبعن من الطلعة.. حشا كل يوم سوق و حواطة
حمده: يدوه الله يهديج .. ملجة الريم باجر.. و لازم نتجهز ..
اليده: انزين الا هي ملجة.. لازم هالحواطة بعد
حمده: هيه لازم... يدوه بسير البس فستاني و اباج اطالعينه و تقوليلي شو رايج فيه.. دقايق و بييج
اليده: فستان بعد... جيه ملجتج و لا ملجة ختج.. ما يندرى من هي العروس بينكن.. حتى خلدوو الرزينه غدت شراتكن.. الا عذوب.. بتخبركن وينها عذابه.. عنبوه كمن يوم ما شفتها..
ام عمر: في حجرتها
اليده: و اشحقه حابسة عمرها..
ام عمر: مادريبها والله.
اليده: حليلها.. ( وجان اطالع حمده و هي لابسة فستانها)... ايه انتي... شو هاللبس بعد.. اخ عليج يا مسودة الويه.. هذا لبس الحين و لا بعد يسمونه فستان .. امحق فستان
حمده: ليش عاد.. بلاه
اليده: و تساليني بعد.. عنبوه ما رمتي تشترين قطعة بوارين و تغطين ظهرج بها
حمده: هههههههههههه يدوه هاي الموضه
اليده: لا روضة و لا موضه.. وبعدين انتي ما تواجعين بناتج.. هذا لبس ينلبس الحين
ام عمر: جيه يشاوروني قبل ما ياخذن شي.. كل شي يسونه على هواهن
حمده: امايه فديتج... انا بلبس شال عليه .. ما بحوط جيه
اليده: أي شال بعد... تعالي تعالي.. خليني اشوفه
حمده: لا لا .. ادريبج بتضربيني
اليده: يبالج ضرب.. و خواتج شقايل لبسهن بعد مفصخ شراتج؟
حمده: يعني
اليده: يا فضيحتنا جدام العرب.. شو بيقولون عنا الناس ها؟
حمده: و يعني.. جيه انا بمشي عند الرياييل.. تراها عزيمة حريم.. و بعدين ملجة ختيه ما تبوني اتعدل يعني
ام عمر: اتعدلي محد منعج.. بس عاد بحدود.. هذا هب لبس الصراحه
حمده: امايه... لا تخلين افكار يدوه تاثر عليج.. ( وجان اطالع يدتها) لا تفهمين غلط يدوه... بس يعني نحن بنات و يحق لنا نستانس و نتعدل
ام عمر: روحي راوي ابوج و تعالي جان طاع انا ما بقولج شي
حمده: شـــــــــــو.. تبينه يذبحني
اليده: هاااااااااااااااا... تخافين من ابوج يعني... و نحن ما تعبرينا.. اصبري عليه شوي... بو عمر... بو عمر.. تعال

من مواضيع ورد جوري
0 موقع يترجم (قطعة) مو كلمة...رائع فعلا
0 الخط الفاصل بين الليل والنهار
0 لعمل توقيع شخصي في خمس دقائق وبالعربي خاااااص
0 مـلاعب كـأس العالم .. معلومـات و تفاصيل
0 الناقه وحده بوحده

توقيع ورد جوري

تسلم يمينك غناتي

الله يصبر عذابه

من مواضيع شموخ العز
0 مقابض عربات التسوق الاكثر بكتيريا
0 أنت ليه مش بتمسك إيدي وإحنا ماشيين في الشارع؟
0 لاتلوموني في حبه من الجزء 13 الى النهايه
0 ماهو نوع قلبك ؟؟!
0 رحمك الدافي ووردك الأبيض

بدت الأحداث تنتهي مشكورة ورد

من مواضيع كلي فداك
0 موسوعة القبائل المتحضره من(عنزة)
0 لوائح الفنان القطري عبد العزيز صادق
0 !! تأثير الصيام على أجزاء الجسم بالصور !!
0 أمسية ابها سعد بن علوش
0 ~¤§( لــحـن ** الــمــوت )§¤~ .. طلب خاص ..

توقيع كلي فداك

تسلمين على القصه مره روعه وانا احب القصص بليز كميليها بسرعه ابي اعرف احداثها

توقيع جاره القمر

آه لو تدري حبيبي ** كان والله ما قسيت
من غرامك كم اسهر ** في الليالي ما أنام

يعطيك العاافية

من مواضيع هنادي
0 ...% ثلاثة أشياء تأتي بدون ميـ ع ـاد %...
0 ][®][^][®][افتقارك .. سر .. افتخارك][®][^][®][

توقيع هنادي