نزل راسه... و مشى بخطوات بطيئة .. وصل عند الباب... اللي كان امبطل.. ظهر .. بس خسارة يا سيف .. ما صديت اطالع ورا.. ما صديت اطالع شو تركت وراك... ظهر سيف من البيت... ظهر من حياة الريم... بعد ما طعنها في قلبها..
بانت عيوبه وبان للاسف ماله امان
واللي مثله مابيه اتركه من غير رجعه
عقب ساعه ... و ريم على حالها يالسه في الميلس .. و الدموع بعدها تنزل من عيونها.. تغير لون ويهها و فعلا التعب كان واضح عليها.. دخلت عليها خلود
خلود: متى ظهر سيف؟؟
ريم:...........
خلود: جان خليتيه يتعشى
ريم:..........
خلود: انزين قومي .. امايه تباج.. ريم... ريماني ... ( جان تقرب صوبها)
خلود: ريم بلاج تصيحين...؟؟ ريم خبريني .. ريمو فديتج بلاج... ( حضنتها و تمت تمسح شعرها).. ريم بسج صياح و خبريني شو اللي صار .. شو قالج سيف؟؟ ريم عاد ارمسي ..
ريم ( وهي تحاول تتكلم بس هب قادرة): س.... سيف
خلود: بلاه سيف؟؟ شو قال ؟؟ شو اللي صار بينكم... ريمو خبريني
ريم: اب... ابا اميه... ابا اميه... اماااااايه ...
خلود: ما عليه بتيج الحين اميه.. بس دخيلج خبريني شو اللي صار... انزين بس لا تصيحين.. خلاص حبيبتي لا تصيحين... امايه بتيج الحين ( ظهرت من الميلس تزقر امها)
عقبها يت ام عمر ويا بناتها الميلس
ام عمر: ريم.. بلاج امايه... شو فيج؟؟
خلود: اسالها ما ترد عليه
عذابه: يمكن شي يعورها
ام عمر: الريم.. شي يعورج.. مريضه؟؟؟ خبريني عاد لا تعوريلي قلبي..
اليده: بسم الله عليج... يمكن يني دخل فيها ولا شي... هاتو مطوع يقرا عليها
حمده: الله يهديج يا يدوه.. هذا وقت ينون و مطاوعه
اليده: عيل .. قبل شوي محد احسن عنها و الحين انجلب حالها.. شو تسمينه ها
حمده: مادري.. بس اكيد شي استوى ..امايه اساليها انزين
ام عمر: يا ويل حالي عليج يا الريم.. ماعرف بلاها البنيه... ما ترمس... عذوب.. طاعي ابوج وصل .. و لا اقولج زقري فيصل .. روحي بسرعه
عذابه: ان شاء الله
ام عمر: ريماني.. حبيبتي.. خبريني شو فيج... ارمسي امايه..
ريم ( حضنت امها وهي تصيح بصوت عالي): اااااه يا اميه... ط.. طلقني
الكل استغرب ....
اليده: ينيتي انتي .. عنبوج ما وحالج... من اسبوعين ملجتج
خلود: ريم... شو تقولين؟؟
حمده: ريم فديتج... هدي اعصابج... بسج صياح... خبرينا شو بلاج
اليده: ما تسمعين.. تقول طلقها
خلود: اكيد هب مستوعبة اللي تقوله... يدوه هذا سيف
اليده: سيف و لا درع ... المهم انه طلقها
حمده: مستحيل.. هذا يحبها موت
اليده: شو بعد يحبها موت.. شو هالرمسه بعد
البنات يتحرطمن ويا يدتهم... و ام عمر تمت حاضنة الريم و تصيح .. لانها الوحيدة اللي حست بالريم.. و عرفت انه اللي تقوله صدق.. عرفت انه سيف طلقها..
فيصل: شو السالفه؟؟؟ بلاها الريم
اليده: مادري بلاها.. ينت البنيه و قعدت..
فيصل: الريم... بلاج؟؟
خلود: ما بتروم ترد عليك
فيصل: اشحقه تصيح؟؟؟ شو سويتيلها ( وهو يطالع حمده)
حمده: نعم نعم نعم... شو سويتلها بعد.. جيه شو تحيدني
فيصل: راعية مشاكل
حمده: لا والله
فيصل: هيه عيل من غيرج اللي بيصيحها
حمده: بسكت ما برد عليك.. لانه هب وقته انزين
فيصل: انزين... بس ما خبرتوني بلاها
عذابه: امايه بلاها الريم؟؟؟
فيصل: اشحقه اميه تصيحين... بلاكن اليوم.. يوم الصياح العالمي هو؟؟
اليده: صدق انك متفيج... ملعون الصير طلق ختك
فيصل ( وهو متفاجئ): منو اللي طلق منو؟؟
اليده: مسود الويه.. سيفوه طلق الريم.. ما يستحي و لا يخيل .. عنبوه من اسبوعين مالج .. شو اللي كالفنه يعرس يوم انه ما يباها
فيصل ( وهو يمسك ريم): ريمو... خبريني .. شو اللي صار ؟؟؟ طلقج. ردي عليه طلقج
ام عمر: بلاك ميود البنيه جيه.. ما تشوف حالتها ...
آآه ياعمر الجراح ليتني مايوم طعته
اللي عذبني وراح باعني والحين بعته
فيصل شل عمره و ظهر من البيت ... و هو ظاهر عند باب البيت شاف سيف واقف يرمس ابو عمر .. جان ينزل فيصل من السيارة و سار عند سيف ... و يفتح باب سيارته و ينزله ...
فيصل ( و هو يصارخ) : يالنذل... يالخايس... والله لا اخليك تندم على اللي سويته ..
بو عمر:فيصل... شل ايدك عنه
فيصل: خلني اضربه الخايس... تتحرا بنسكت عنك ... تتحرا محد وراها بيجابلك يالنذل ( و تم يضرب سيف اللي ما تحرك ولا حتى دافع عن نفسه)
بو عمر: فيصل قم عنه.... ما تستحي انت تمد ايدك عليه جدام بيتنا بعد
فيصل: يا بويه هدني ما تدري شو اللي سواه الملعون ...
في نفس اللحظه وصل خليفة .. اللي شاف الضرابه عند باب البيت و الناس متيمعين... جان ينزل من سيارته و مسك فيصل
خليفة: شو تسوي؟؟؟ فيصل.. قم عنه
فيصل: والله ما اقوم لين ما اكسر له ضلوعه...
خليفة: فيصل.... هب زين اللي تسويه
ابو عمر: تخبل هذا...
عقبها فرقوا فيصل و سيف... و تم خليفة يسحب فيصل داخل البيت و هو بعده يصارخ و يسب سيف
فيصل: والله يا سيف.. خلني اشوفك في بقعة و الله لا اكسر لك راسك... انت بعدك ما تعرفني ...
ابو عمر: فيصل ... شو هاللي سويته.. شو بيقولون عنك العرب .. بيموت الريال على ايدك
فيصل: خلهم يقولون اللي يبونه... اختيه اهم من رمسه الناس و اهم من حياة النذل هذا.. لو فيه خير جان قدر يسوي اللي يباه جدامنا
خليفة: شو اللي سواه
فيصل: طلقها
ابو عمر: طلق الريم؟؟
فيصل: هيه طلقها الخايس...
ابو عمر: ليش .. شو اللي صار
فيصل: تسالني انا.. انا شو عرفني .. صدقت يا خليفة يوم حذرتني... ليتنا ما وافقنا
خليفة و بو عمر تم متفاجئين من اللي صار ..
ابو عمر: ومتى صار هالكلام
فيصل: من ساعه... الله ياخذه و يا خذ اليوم اللي قربناه.. انتو خلوني ابرد قلبي و اكسر راسه
ابو عمر: انتو اللي بتكبرون السالفه... و بتفضحونا جدام الخلق ... وينها ختك..؟؟
فيصل: مادريبها.. يمكن في الميلس
ابو عمر دخل الميلس بس ما حصل حد... رد دخل الصاله جان يشوف اليده اللي خبرته ان البنات فوق في حجرة الريم...
ركب ابو عمر الدري.. و هو حاس انه ريله هب قادرة تشله.. مشى صوب غرفة الريم بس المشكلة كيف يواجها.. شو اللي لازم يقوله... هو روحه منصدم من السالفة.. كيف يروم يخفف عنها الالم و هو روحه حاس بالألم في قلبه
فتح الباب جان يشوف ام عمر لاويه على ريم و البنات حولهن
ابو عمر: اظهرن برع ..
حمده: ابويه... ( بس قاطعها بو عمر)
ابو عمر: حمدوه اظهري برع عقب بنرمس
حمده: ان شاء الله
ظهرن البنات من الحجرة و قعدن يتناقشن عن السالفه
حمده: صدق طلقها
عذابه: واضح انه صدق.. و لا جان ما شفتي فيصل ظهر بسرعه برع
حمده: ماصدق انه هذا كله يظهر من سيف... سيف.. مستحيل
عذابه: حبيبتي هالزمن المفروض تتوقعين أي شي
حمده: بس هذا هب أي واحد... سيف اللي يحب ريم ...خلود بلاج ساكته؟؟
خلود: افكر .. افكر في حالنا.. ليش المواقف الصعبة دوم تلاحقنا.. ليش ما نروم نعيش بسعادة دون ما حد يخرب علينا فرحتنا.. ليش محد فينا تقدر تفرح و تستانس .. في البدايه انا .. يوم وافقت اخذ عبد العزيز .. تعرض لحادث و تاجلت فرحتيه بشوفته معايه.. عقبها حمدوه اللي المشاكل بينها و بين محمد ما تنتهي .. و فوق هذا كله شافته مع وحده ثانيه... و عقبها عذوب.. تصدقين عذابه كنت اقول في خاطريه ليش انا انحرمت من عبد العزيز يوم فرحتيه معاه كانت جربية ... و تميت فتره زعلانه .. بس عقب يوم شفتج و شفت اللي صار معاج.. احمد ربي على كل حال.. عذابه لو كنت محلج ما ادري شو بيستويبي و انا اشوف اغلى انسان في حياتي .. و الانسان الي حبني بكل جوارحه يتزوج و ياخذ وحده ثانيه... و الحين ريم... حرام اللي يصير فيها.. تخيلن لو حد فيكن مكانها... المشكله انه هذا الانسان هو اللي لحقها .. هو اللي كان يباها.. بس القدر خلاها تتعلق فيه و تحبه.. و في الاخير بكل سهولة يطلقها.. عقب اسبوعين.. اسبوعين بس من ملجتها... اااااااااااااااه... ( تمت تصيح)
حمده: خلود هذا وقت صياح...عذوب.. حتى انتي تصيحين؟
عذابه: صدقها خلود... اللي استوى لريم شي محد فينا يروم يتحمله
غرته ضحكت سنونه والقصايد في عيونه
ماحسب هالورد باكر يختفي ويموت زرعه
في الصاله
يلس فيصل و هو بعده محتشر وبعده يسب سيف .. و خليفة تم يالس يسمعه. ما عرف شو اللي المفروض يسويه.. حاول يهدي فيصل .. و عقبها وصل عمر .. وقف عمر يطالع خليفة.. اللي طبعا العلاقة اللي بينهم شبه مقطوعه
عمر: السلام عليكم
خليفة: عليكم السلام
عمر: اشحالك
خليفة: بخير
عمر: ها فيصل.. ما سرت عند ربعك.. توهم يتخبروني عنك
فيصل: اسميك متفيج
عمر: بلاك شاب ضو
خليفة: المهم بترخض الحينه
فيصل: وين بتسير
خليفة: مادري
فيصل: اصبر انزين بسير وياك..
عمر: فيصل ... بلاك؟؟؟
فيصل: طبعا ماتدري... ترى الخايس اللي اسمه سيف طلق ختك اليوم
عمر ( وهو متفاجئ): ليش ؟؟
فيصل: و انا شو عرفني .. شو تتوقع من نذل شراته ( وجان يسكت)
عمر: بلاك سكت؟؟
فيصل: شو تباني اقول
عمر: .....
فيصل: تعرف
عمر: شو
فيصل: اباك تفكر في اللي استوى اليوم ... ما مريت انت بهالموقف قبل
عمر : شو قصدك
فيصل: عمر... كنا دوم نسمع قصص و سوالف تستوي ويا غيرنا.. بس عمرنا ما مرينا بهالتجارب.. كنت اسمع الناس يوم تقول كما تدين تدان.. بس عمري ما عرفت معنى هالجملة الا اليوم
عمر: .....
فيصل: احس انه اللي يستوي بخواتنا نحن السبب فيه.. تذكر كيف كنت تعامل الهنوف ...و طالع كيف اليوم هاك النذل سيف عامل ختك... انا مانكر بانه كانت لي علاقات مع بنات .. بس عمري ما فكرت كيف بياثر هالشي في حياتي الخاصه و بالاخص في حياة خواتي.. و اليوم اللي سواه سيف كانت صفعة على ويهي.. خلتني اقوم من النوم اللي كنت فيه... تعتقد انه لو كنت انت او انا ما نعامل غيرنا بهالطريقه .. جان سيف ما عامل الريم جيه و لا ذلها بهالطريقة
فيصل شل عمره و ظهر مع خليفة.. و خليفة كان صدق مستغرب من رمسة فيصل...
عمر تم يفكر في كلام فيصل... وصل تفكيره لبدور.. و تذكر كيف رمسها اخر مرة .. سبحان الله يوم عطاها الامل و اوهمها بالحب و تركها بهالسهولة... سيف سوا نفس الشي .. بس الفرق كانت الضحية هالمره.. ريم.. اخته
خان ويحسبني اخون شافني بعيون طبعه
عقب يومين بتبدا الدراسه.. حمده باقيلها اخر كورس و بتخلص دراستها الجامعية ... و عذابه مستانسه ع الجامعه لانها بتبتعد شوي عن الضيق اللي تحسه في البيت.. و ريم اللي اول سنه لها في الجامعه و اللي المفروض تستانس .. كانت بعدها متاثرة من طلاقها من سيف المفاجئ...
ابو عمر تكلم مع الريم و حاول انه يفهم سبب الطلاق .. بس ما قدر لانه الريم روحها ما عرفت شو اللي خلى سيف يكرهها لهالدرجة.. ابو سيف اتصل في بو عمر و استسمح منه من اللي صار .. بس طبعا ما في شي بيصلح اللي انكسر..
ام عمر اهتمامها في الريم هالايام زاد.. يمكن لانها اخر العنقود و لانه التجربة اللي مرت فيها هب سهله..
في حجرة الريم
ام عمر: ريماني افتحي الباب.. هب زين عليج اتمين في الحجرة روحج
ريم: امايه فديتج ما فيه شي.. ابغي ارقد
ام عمر: هب حاله هاي .. من يرقد العصر... قومي يالله .. طاعي الجو ماحلاه.. قومي اقعدي ويا خواتج برع في الحوي..
ريم: ان شاء الله
ام عمر: ريم.. ترى بنات عمج برع... قومي اقعدي وياهن
ريم: ان شاء الله
ام عمر حست بانه محاولاتها ما منها فايده.. حاولت مرة و ثنيتين و ثلاث مع الريم بس ما شي امل..
ابو عمر: ها شو قالت؟
ام عمر: شو بتقول بعد... انا خلاص ماقدر ... ( وجان تسكت)
ابو عمر: بلاج؟
ام عمر (وهي تصيح): بلايه؟؟؟ ما تشوف اللي يصير.. يا بو عمر حالة بناتك هاي ما تسر .. طالع حمدوه و عذوب .. و الحين الريم.. الله لا يوفقك يا سيف.. حسبي الله عليك و نعم الوكيل
ابو عمر: هذا المكتوب يا ام عمر ... و لا تعارضين امر ربج
ام عمر: بس ماروم اشوف بناتي و هن على هالحاله.. انت ما تشوف الريم.. لو شفت ويهها جان زغت.. هب شوي عليها تعيش على انها مطلقة و هي توها 18 سنه ( و تمت تصيح)
ابو عمر: بسج صياح و ازقري بناتج خلهن يتلبسن
ام عمر:ليش .. و ين تبا تسير
ابو عمر: بنسير المزرعة في ليوا
ام عمر: الحين؟؟؟
ابو عمر: هيه الحين... اليوم الاربعاء.. بنرد بالجمعه قبل الصلاه..قومي يالله ( ظهر عنها)
قرر بو عمر يروح حجرة الريم و يرمسها عل و عسى تقتنع و تظهر من العزلة اللي هي فيها
بو عمر: الريم...؟؟
ريم: ها ابويه
بو عمر: شو تسوين
ريم:برقد
بو عمر: منو يرقد العصر
ريم: انا
ابو عمر: انزين بطلي الباب بغيتج في سالفه
ريم: ابويه دخيلك .. برقد الحين..
بو عمر: عيل تروغيني
عقبها فتحت الريم الباب
ابو عمر: بسم الله... بلاج غادية جنيه
ريم: ليش.. بلاه ويهي
ابو عمر: طاعي ويهج في المنظره
ريم: لاني تعبانه و المفروض ارقد
ابو عمر: محد يرقد الحين.. قومي الله تلبسي
ريم: ليش؟
ابو عمر: لا تسالين ..
ريم: ابويه مالي براض اسير مكان
ابو عمر: الريم... الدنيا ما توقف هني.. تراها تمشي .. يا اميه انسي اللي صار و الله بيعوضج بغيره.. لا تزعلين و لا تضايقين.. من لي غيرج يا الريم.. انتي تعرفين غلاتج عندي و ما تهونين عليه اشوفج بهالحاله.. قومي غناتي اتلبسي و خلنا نظوي
ريم: وين بنسير
ابو عمر: وين خاطرج تسيرين.؟
ريم: تدري ابويه... خاطري اسير ليوا.. من زمان ما سرنا المزرعه
ابو عمر: على هواج
ريم: صدق؟
ابو عمر: هيه صدق... كم ريم عندنا
في الحوي
خلود: انزين اطعمي هالكيكه و خبريني شو رايج فيها
الهنوف: لذيذة... انتي مسوتنها
خلود: هيه ..
علياء: والله يا خلود دوم امدح طبيخج عند امايه
خلود: فديتج والله.. ها هاي هي الناس اللي تعرف الذوق
حمده: هاي خلود محد يمدحها...
خلود: خلينا المديح لج انتي
حمده: اكيد...
الهنوف: هههههههههههه.. بعدج ما تغيرتي
حمده: ليش اتغير ... الحمدلله الكل عايبنه طبعي
عذابه: هههههه واضح عسب جيه هاجروا و خلو البلاد و السبة طباعج
علياء + خلود + الهنوف: ههههههههههههههههه
حمده: احلفي انتي بس..
علياء: وينها الريم.. نحن يايين عسب نشوفها
عذابه: وانا اقول ليش الحبايب مشرفينا اليوم.. كله عشان الريم
الهنوف: من خبرني خليفة وانا دوم احاتي الريم.. حليلها والله.. تطلق من اسبوعين بس من ملجتها
خلود: و هذا اللي معقد السالفه.. يعني لو بدر شي منها او انه استوت سالفه بينها و بينه بتقولين له الحق انه يطلق.. بس فجأة و بدون مقدمات طلقها.. و هذا الشي اللي مضايقنها
علياء: انا من سمعت السالفه ما خليت دعوه ما دعيتها عليه.. صدق انه ما يستحي.. تمنيت اكون ريال عسب اروم اضربه و اذبحه بعد
عذابه: الله يخلي فيصل.. ما قصر
علياء: صدق؟؟
عذابه: هيه.. يوم عرف اللي صار شافه و ضربه ضرب..
الهنوف: يستاهل..
جان تيهم ام عمر..
ام عمر: حياكم الله.. فرحتونا بشوفتكم...
الهنوف: تسلمين عمتيه...
ام عمر: وينهم العيال ( عبدالله و سلامه)
الهنوف: يلعبون هاك الصوب
ام عمر: حليلهم... والله الحياة من دونهم تنعاف.. يا رب تجمعنا مرة ثانيه
الهنوف تمت ساكته... و البنات يتمن يطالعنها
حمده: امايه شو بتعشونا اليوم
ام عمر: ماشي عشا... قومن يالله تلبسن بنسير
خلود: وين بنسير
ام عمر: ابوج بيودينا ليوا
عذابه: والله... وناسه
الهنوف: عيل نحن بنترخص
ام عمر: وين وين.. ماشي سيرة .. بتسيرن معانا
الهنوف: لا عمتيه ما يستوي... مره ثانيه ان شاء الله
ام عمر: لا لا ... انا رمست امج و وافقت..
علياء: صدق عموه... خاطريه اسير وياكم
عذابه: اكيد بتسيرين..
ام عمر: ما يهمج غناتي .. قومن تلبسن بسرعه.. بسير اتصل في اخوانج
و تموا هل القبيسي يتجهزون بسرعه لسيرة ليوا... فيصل قرر ان يروح يوم عرف انه خليفة بيسير .. و ام خليفة بعد وافقت عقب اصرار ام عمر... اما عمر ما طاع يسير عسب ما يضيق على عيال عمه هناك.. بس امه اصرت عليه لين ما وافق ...
ليوا ...
وصلوا هل القبيسي المزرعه.. و قرروا ن يقعدون برع البيت لين الفليل... قعدوا الرياييل و تموا يسولفون و يذكرون ايام اول .. و ابو عمر كانت صدق مستانس يوم شاف عمر قاعد ويا خليفة و يسولف معاه..
اما الحريم .. قعدت ام عمر و يا ام خليفه و اليده معاهم.. و حتى البنات الهنوف و خلود و الريم و حمده معاهم يضاحكن ... اما عذابه و علياء قعدن بعيد و تمت يسولفن رواحهن..
علياء: من زمان ما يلسنا رباعه
عذابه: صدقج
علياء: طاعي شكل خليفة... تصدقين تولهنا على ضحكته و ابتسامته
عذابه:.........
علياء: والله يا عذوب في خاطريه اشياء وايد ابا اقولج ياها بس ماعرف من وين ابدا.. صح انه علاقتنا هب شرات قبل بس صدقيني هالشي مول ما اثر فيه.. بالعكس اللي صار ما بين هلنا خلاني اعرف معنى صداقتنا.. احس انه لو مهما صار انتي الوحيدة اللي بتمين ربيعتيه و اختي و الوحيدة اللي اقدر افتحلها قلبي
عذابه: الله الله ع الحب
علياء: يا ويهج... احمدي ربج اني اقولج هالكلام
عذابه: الحمدلله و الشكر.. حتى انا يا علياء تولهت على قعدتنا و سوالفنا
علياء: و لاتنسين افلامج الهندية
عذابه: أي افلام؟؟؟ خلاص انتهت الافلام
علياء: ليش عاد؟؟؟ ما تحلمين بواحد ياينج على حصان ...
عذابه: لا
علياء: معقوله
عذابه: هيه... كانت اوهام هب احلام
علياء: عسب خليفة يعني... اذا خليفة عرس هذا هب معناته انه احلامج بتنتهي او انه حياتج ما بتستمر
عذابه: ادري انها بتستمر و ادري اني بتم احلم و اتخيل .. بس المشكلة انه حلمي الي تمنيته بهالسهولة ينتهي
علياء: اذا انتي تقولين هالكلام عيل خليفة شو بيقول.. طاعي شكله اليوم... و بتشوفين الفرق بين شكله الحين و شكله من الصبح.. احس انه يوم يشوفج او حتى يسمع عنج يستانس و ترد الضحكه لشفاته
عذابه: خليفة عرس الحين.. و اظن انه الكلام ما منه فايده
علياء: والله يا عذوب اني تمنيتج تكونين حرمته هب عشانج ربيعتيه و بنت عمي... لا .. لاني ادري انج الوحيده اللي خليفة يتمناها و يباها.. الله يسامحج يا امايه..
عذابه: شو تقولين.. امج مالها خص
علياء: اميه هي اللي اصرت عليه انه ياخذ شمسه و ما ياخذج انتي
عذابه: امج تفكر في مصلحة خوج
علياء: و مصلحته انها ادمر حياته و تكسر قلبه؟!!!!!!!!!
عذابه:............
علياء: بلاج سكتي
عذابه:.........
علياء: عذوب... خليفة ما يبا شمسه و لا يبا غيرها.. و امايه تعرف هالشي بس هي تمت تحن عليه لين ما خذ شمسه
عذابه: اذا انتي بتلومين امج.. عيل انا بعد المفروض الوم عمر.. لو عمر ما طلق الهنوف جان ما صار اللي صار
علياء: تبين الصراحه كلهم السبب... اول شي عمر لانه وايد تمادى و وايد جرح الهنوف .. و عقبها الهنوف بعد كانت السبب يوم تمت تسكت عن عمر و ما وقفته عند حده من البدايه..و عقبها اميه اللي اصرت على خليفة انه يعرس و ياخذ وحده غيرج...و الحين منو اللي بيستفيد... لا خليفة بيستفيد من بعده عنج.. و لا انتي بتستفيدين من فراق خليفه.. و لا حتى شمسه بتستفيد
عذابه: خليفة طيب و ماظنه يبقسى على شمسه
علياء: ماتعرفين خليفة عيل... امايه اللي هي امه ما قام يسمع رمستها و لا حتى يعبرها
عذابه: صدق؟؟
علياء: هيه والله.. و تعتقدين انه ما بيقسى على شمسه... اوف اوف اوف
عذابه: بلاج
علياء: قهر... منقهره .... هااااااااااااااااااااااااااااااااااااااااااااااااا الكثر
عذابه: ههههههههههههههههههههه
علياء: تضحكين بعد
عذابه: اضحك على حالنا.. جنا عيايز
علياء: ههههههههههههههه هيه والله صدقج
عذابه: اطالعين منو؟؟
علياء: ها... محد
عذابه: عليه هالكلام..؟؟
علياء: بطالع منو يعني
عذابه: هذاك... ( و تمت تاشر على فيصل)
علياء: ايه انتي.. لا تأشرين
عذابه: يعني كنتي اطالعينه
علياء: شو فيها يعني..
عذابه: ما فيها شي
علياء: اقولج عذوب... فيصل يحب حد
عذابه: يحبنا و يحب امه و ابوه
علياء: عن الاستهبال
عذابه: ههههههههه...
علياء: يحب وحده؟؟؟
عذابه: ممممممممممم....ماظن
علياء: ليش ؟؟
عذابه: شو ليش... تبينه يعني يحب وحده..؟؟
علياء: لا ... انتي ما تفهمين شي ...
عذابه: فهميني انزين
علياء: اقول يعني ليش ما يعرس دام انه ما يحب حد
عذابه: فيصل يعرس... مستحيل... ماظن يسويها
علياء: اها.. بس تعرفين.. مرة سمعت فيصل يرمس وحده
عذابه: متى
علياء: مرة يا بيتنا ويا خليفة .. و سمعته يرمس وحده في الصاله
عذابه: مادري والله.. وانتي ليش تتخبرين عنه
علياء: ها... بس جيه.. فضول ... قومي نيلس عند خواتج
عذابه: لا لا
علياء: ليش
عذابه: بس جيه.. خلنا هني احسن
وتمت علياء تكمل سوالفها ويا عذابه.. اما عذابه فما بغت تيلس عند الحريم هناك لانه المكان قريب من الرياييل .. و هي ما بغت خليفة يطالعها او انها ترمسه .. حاولت قد ما تقدر انها تبتعد عنه بالرغم من انها قلبها عنده...
ام خليفة: ياختي هذا خليفة ما عرف شو اسوي معاه
ام عمر: ما عليج... كلهم جيه.. و بعدين انتي شاوري هل البنيه و سووا اللي تبونه.. و خليفة ما بيقول شي
اليده: يوم انه ما يباها اشحقه خطبتوله
ام خليفة: البنيه زينه و ما فيها شي
اليده: عيالكم هذيله ما منهم فايده... هب ويه عرس...
فيصل: جني سمعت شي عنا
اليده: ها... يا حبهم ع سوالف الحريم
فيصل: هههههههههههههه .. انتي اللي صوتج عالي ...
اليده: تخبرك بو عمر .. هذا فصول متى بيعرس
بو عمر: والله انا الود ودي ايوزه اليوم قبل باجر..بس المشكلة وينها البنيه اللي بتقبل به
فيصل: ليش.. هب عايبنكم... منو هاي اللي ما تستحي بتردني...
ام عمر: تتحرى انه الجمال و المال كل شي.. لا يا بويه الحين الناس تشتري الريال ما تشتري فلوسه
فيصل: وانا ما رمست عن فلوسي.. بس الصراحه ما عليه قصور
اليده: عيل اشعنه ما تعرس
فيصل: هب وقته
خلود: متى وقته عيل ...يوم بتشيب و بيغدي شعرك ابيض..
فيصل: بتخبركم بلاكم حاطين عليه اليوم
الهنوف: خاطرنا نفرح بك انت و خليفه
عاد هذيج الساعه من سمع عمر صوت الهنوف تخبل... كان عاطنهم ظهره بس من سمع صوتها صد يطالعهم... و بو عمر شاف عمر و شاف حالته و تم يضحك عليه...
ام عمر: لا تعورون روسكم معاه.. هذا فيصل ما منه فايده..
فيصل: افا يا ام عمر.. جيه عاد تفشليني
ام عمر: جيه جذبت.. هذا هو الصدق
اليده: لو توافق و تعرس بنسوي عرسك انت و خليفة في يوم واحد
فيصل: لا لا ... ابا اعرس روحي.. تبون تخربون عليه
خليفة: الود ودي اخليك تعرس بدالي
الكل صد يطالع خليفة .. و ام خليفة حست بحزن يوم سمعته يقول هالكلام.. الصراحه واضح انه خليفة عايف شمسه و عايف العرس و طاريه...
ابو عمر: المهم يا فيصل انك توافق
فيصل: خلاص عيل
ام عمر : شو خلاص
فيصل: على هواكم... تبغوني اعرس بعرس
اليده: زين زين يوم انك غيرت رايك.. بس عاد وين البنيه اللي بترضى بك
فيصل: ردوا قالوا منو بيرضى بك... ترى وايد بنات يتمنن واحد شراتي
اليده: مره... هذا الطبع اللي فيك مول هب زين.. ترى الكبر هب زين
خليفة: يدتيه.. خلوه على راحته.. زين منه يوم انه وافق يعرس
فيصل: بعرس بس بشرط.. ابا اخذ اللي في بالي
ام عمر: لا حول.. انا خبرتك و قلتلك لا تيبلي وحده من ... ( جان تسكت)
فيصل: لا تخافين يا ام عمر
حمده: عاد اللي في بالك ما تروم تاخذها
فيصل ( وهو مستغرب): وانتي شو عرفج
حمده: ادري... لانها خلاص طارت...
فيصل تم مستغرب من رمسة حمده... يا ترى عرفت من هي اللي في بال فيصل ... و شو قصدها بانها طارت
الهنوف: خلود.. قومي نتمشى
خلود: ليش
الهنوف: قومي و بعدين بخبرج
خلود: اوكي... ريم.. بتتمشين معانا
ريم: لا .. بقعد هني
الهنوف: قومي ..
ريم: ما يحتاي
خلود: اوهو.. نشي يالله ...
قامن خلود و الهنوف و معاهن الريم يتمشن...
خلود: ليش نشيتي
الهنوف: الصراحه... ما رمت ايلس و عمر يالس يطالع
خلود: هههههههههههههههههه
الهنوف: ما شفتن نظراته والله انحرجت
خلود: جنكم يهال ..
الهنوف: غيري السالفه احسن.. ريم بلاج ؟؟؟
ريم: ما بلاني شي
الهنوف: لين متى بتزعلين عليه
ريم: انا هب زعلانه عليه.. زعلانه على حالي ..
خلود: ريم اعتبريه من الماضي و انسيه
ريم: انسى اللي جرحني... مستحيل
خلود: حاولي يالريم.. ابويه من يشوفج على هالحاله ما تصورين شو يستوي به.. انتي تعرفين غلاتج عند ابويه و تعرفين حالتج هاي كيف تاثر عليه
ريم: بس ماقدر اخفي شعوري ... ماقدر اخفي حزني و انا .. مطلقه
خلود و الهنوف سكتن يوم سمعن كلمة (( مطلقة )) .. كلمة قوية على وحده مثل ريم
ريم: تخيلن .. بعدني ما فرحت .. و لا حتى لبست الفستان الابيض.. و لا استانست بعرسي.. ما مدالي افرح كمن يوم و في الاخير يي بهالسهولة يقولي انتي طالق ..يلست افكر هالايام شو اللي سويتهو خلاه يطلقني.. بس لاني رفضت الغلط و قلتله انك غلطان في ويهه عاقبني بهالطريقة
الهنوف: بعدج صغيره و الف من يتمناج ..
ريم: اتخيلي اسير الجامعه و اتعرف على بنات و اكون صداقات .. و ان حد سالني انتي معرسه .. اقوله لا مطلقة.. احس الكلمة وايد كبيرة عليه.. حاسه بغصة في صدري .. انه هم ثقيل على صدري.. و ماعرف شو اسوي ماعرف
خلود: لا تخلين هالافكار تاثر فيج... و بعدين مثل ما قالت الهنوف انتي صغيره و الحياة جدامج.. لا تعتقدين انه هاي هي النهايه
ريم: المشكلة اني ما جبرت نفسي عليه.. هو اللي ياني .. هو كان يلاحقني.. هو اللي تم ورايه.. هو اللي خلاني احبه.. يعني عقب ما تعلقت فيه ينساني .. ماصدق انه في انسان مثله.. كيف قدرت اصدقه و اصدق شعوره و احساسه صوبي.. كيف قدر يقص عليه بهالسهوله و انا وثقت فيه ...
الهنوف: ريم.. انتي زعلانه لانه طلقج.. بس تعتقدين انه اذا ما طلقج و استمريتي معاه.. اكيد ببين مشاعره في يوم من الايام.. و يمكن يكون هاليوم عقب العرس..و اتخيلي عاد.. تخيلي انج تكشفين حقيقته في وقت متاخر.. شو بتحسين؟؟ ريم احمدي ربج انه الله كشفلج ياه على حقيقته الحين بدال ما تتورطين معاه اكثر...
خلود: ريماني... صدقيني انه الله يرزق الانسان على قد نيته.. و اكيد الله بيرزقج بواحد احسن عن سيف بمية مره
ريم: كرهت العرس و طاري العرس و كل شي عن العرس ...
أنا الجريح وجرحي اليوم نزّاف ..... واللي جرحني في الهوى سهم حريف
تمت حمده يالسه .. عقبها قررت تيلس ويا عذابه و علياء ... و هي سايرتلهم.. سمعت فيصل يزقرها
فيصل: حمده
حمده: هلا
فيصل: تعالي
حمده: شو تبا .. بعدين بعدين
فيصل: اقولج تعالي
حمده: انزين. خير
فيصل: شو تقصدين برمستج قبل شوي
حمده: متى
فيصل: منو هي اللي طارت
حمده: هيه.. تذركت
فيصل: ردي عليه منو اللي طارت
حمده: اللي في بالك
فيصل: و انتي شو عرفج منو اللي في بالي
حمده: اعرفها
فيصل: منو .؟؟
حمده: منو يعني .. علياء بنت عمي
فيصل ( وهو منصدم): و ليش تقولين انها طارت؟
حمده: يهمك يعني
فيصل: هيه يهمني
حمده: ربيعتيه يمكن تخطبها لاخوها
فيصل: نعم؟؟؟
حمده: شو ؟؟؟
فيصل: شو عرفها ربيعتج بعلياء؟؟
حمده: انا خبرتها
فيصل: و من متى تشتغلين خطابه
حمده: من الحين.. شفتها في ملجة الريم و انا رمستها عن علياء
فيصل: اسمعيني عدل.. والله يا حمدوه ان سمعتج تخطبين علياء لحد بتشوفين شي عمرج ما شفتيه
حمده: تهددني حضرتك
فيصل: هيه
حمده: وانت اشحقه مهتم في علياء. ماحيدك تبغي تعرس
فيصل: بعرس و باخذها فاهمه
حمده: قول جيه من الصبح.. اثري الحبيب يغار
فيصل: اجلبي ويهج يلا .. ( روح عنها)
حمده: فيصل... الحق ما تلحق..
فيصل مستانس و في نفس الوقت حزنان لانه يمكن يفقد علياء في أي لحظه.. ما توقع انه علياء يمكن تعرس و ياخذها واحد ثاني غيره ... و عقبها سار عند ابوه ..خاطره يرمس ابوه.. بس كان متردد.. يمكن لانه الموقف كان صعب شويه .. او انه بعده هب مقتنع بسالفة العرس
تعشوا ..و عقب العشا ردوا تيمعوا مره ثانيه .. و يلست اليده ترمس عن قبل و عن ايام اول ... و فيصل بعده يفكر في علياء.. تم يطالعها وهي قاعده بعيد... شاف ابتسامتها الحلوه.. علياء رقيقة و حلوة و احلى شي فيها قلبها الطيب... فيصل قعد يفكر يعرس و ياخذ علياء.. او انه يتريا شويه لين ما يقتنع.. بس يمكن يتنقع في وقت متاخر .. و تضيع علياء من ايده..
فيصل: عمتيه.. ( يقصد ام خليفة)
الكل استغرب .. منو يقصد فيصل ب ( عمتيه) .. غريبة دومه يزقر ام خليفة ( خالتيه).. البنات تمت يتغامزن و يعيبن على فيصل
فيصل: عمتيه.. الصراحه...بغيت اعرس
ام خليفة: زين زين... احسلك يا فيصل .. العرس خير و بركه
حمده( وهي تصاصر عذابه): يبغي يعرس و يخبر ام خليفة .. هذا اخوج هب هين ههههههههههه
علياء مستغربه.. فيصل قرر يعرس.. بياخذ منو يا ترى ... بس اشحقه يرمس امها !!!!
ابو عمر تم يطالع فيصل و هو بعد مستغرب منه...
فيصل: عمتيه ... ابغي اخذ علياء ...
عاد هذيج الساعه ... الجو توتر... كل واحد في حاله
خليفة مستغرب من فيصل... فيصل ما جد خبره انه يبا اخته ولا حتى بين له انه يبغي يعرس...
عمر مندهش من حركة فيصل .. بس مع هذا تم يضحك عليه
ام عمر استغربت من حال فيصل.. اول شي تحرته هب صاحي .. تمت اطالعه بنظرات و هي معصبة عليه ... و استغربت يوم شافت عيونه و هو صادق بكل كلمة يالس يقولها...
ابو عمر الوحيد اللي تم مبتسم .. يضحك على فيصل و شكله وهو يرمس ام خليفة
البنات تمن يعيبن على فيصل.. اللي تضحك و اللي تتمصخر عليه....
الا علياء.. اللي صدق كانت مستحيه و مفتشله من اللي سواه فيصل.. حست انه ويهها احترق ... و خاصه انهم كلهم يطالعونها...
ام خليفة: والله يا فيصل .. ماعرف شو اقولك.. الشور عند علياء
فيصل: صدقيني يا عمتيه .. والله يشهد على كلامي.. صدقيني اني بحط علياء في عيوني الثنتين..
علياء من الحيا شلت عمرها وروحت عنهم .. و عقبها لحقتها عذابه..
أتخيلك دومك معاي ... قمرا تنور لي سماي
أفرح وأجدد بك هواي ... وأحيا الأمل بك من جديد
يا راحة البال وغلاك ... ما حب في الدنا سواك
أنا معك وأبقى معاك ... حتى لو تبعد بعيد
أحبك لو بغيت أنساك ما اقدر أحبك لا تسال القلب اصبر... احبك من زمن يوم الطفولة يوم الوقت أحلام و تصور
الجزء (الاخير)
دخلت علياء داخل البيت.. و يلست في الحجرة و هي تتنافض.. هب مستوعبة اللي صار .. فيصل طلب ايدها .. فيصل يباها.. معقولة...!!! معقولة فيصل يعرس ..؟؟ علياء كانت لها مشاعر خاصة صوب فيصل من فترة .. بس ما توقعت انه فيصل يبادلها الشعور نفسه
(( ماصدق... فيصل !! فيصل يخطبني ؟؟ (جان تبتسم) غريبة !! بس أنا ما حسيت في يوم انه يفكر فيه .. فيصل يعرس .. و انا بكون حرمته..!!! معقولة يا دنيا ... تجمعيني بالانسان اللي تمنيته و حلمت به !!! ))
و تدخل عليها عذابه
عذابه: حشا تعبت وانا ادورج..
علياء: ليش
عذابه: ليش بعد ( وهي تبتسم).. ماتدرين يعني
علياء: عذوب ماصدق اللي صار .. اتخيلي فيصل يخطبني... فيــــــــــــــصــــــــــــــــــل؟؟!!!!
عذابه: اتصدقين حتى انا مستغربة... سبحانه مغير الأحوال
علياء: بس فيصل مستحيل يتغير
عذابه: ليش لا ... دام انه عمر اللي هو عمر تغير... بس اتصدقين ما توقعت في يوم انج بتكونين حرمة خويه
علياء ( وهي مستحية): عذوب عاد... لا تحرجيني اكثر
عذابه: يعني انتي موافقه؟
علياء: مممممم
عذابه: ؟؟؟
علياء: مادري
عذابه: بدينا بالدلع... يا هي يا لا .. ما في شي اسمه مادري
علياء: انزين خلوني افكر
عذابه: ما يبالها تفكير
علياء: لا والله.. هذا عرس هب لعبه
عذابه: علاية... انا اعرف فيصل عدل... و متاكدة انه بيحطج في عيونه شرات ما قال لامج.. و لو اني هب واثقه منه جان شفتيني اول وحده ارفض هالشي.. و بعدين .. ( جان تسكت)
علياء: بعدين شو ؟؟؟
عذابه: لا تفرطينه جان ما فرطت خليفة... انتي ما تعرفين الندم اللي في داخلي .. نادمة على اول يوم رفضت فيه خليفة
علياء: بس في فرق .. خليفة يحبج
عذابه: اتصدقين انه فيصل لو ما يحبج جان ما طلبج اصلا
علياء: يحبني ؟؟ و انتي شو عرفج
عذابه: احساسي.. يعني فيصل اللي كان بيموت و لا انه يسمع طاري العرس.. فجاة جيه غير رايه.. اكيد لانه يحبج و يباج
و تدخل عليهم حمده
حمده: ماصــــــــــــــــــــدق... انتي حرمة فيصل .. لا لا مستحيل
علياء: حمدوه دخيلج هب وقته الحين.. روحي ميتة من الزياغ
حمده: ههههههههههههه... ليش ؟؟
علياء: احس اني انحطيت في موقف سخيف.. الصراحه هذا اخوج ما يستحي
حمده: لا والله... لانه طلبج يعني ما يستحي
علياء: يعني انا شفت افلام و مسلسلات .. بس عمري ما شفت شي يشابه اللي سواه فيصل.. اتخيلن عاد عمي قاعد و عمر و امايه و امج و يدوه بعد... اااااااااااااااااااااااخ ويهي ..
عذابه: ههههههههههههه.. يمكن لانه حب يحطج امام الامر الواقع.. عسب ما تتهربين منه
علياء: جيه عاد... يا فضيحتيه.. ماعرف شقايل بجابل عمي
حمده: صدقج.. لو انا مكانج شهر ما بظهر من البيت... و بعدين احمدي ربج انه فيصل يباج.. هذا فيصل هب أي واحد
علياء: و يعني.. جيه انا مالي رب.. و هو بعد المفروض يحمد ربه لاني بوافق
عذابه: يعني انتي موافقه
علياء: مادري مادري.. حمدوه شو الجو برع
حمده: حلو...
علياء: اقصد الجو عند هلج برع
حمده: عادي... انا ما حسيت بشي الصراحه.. خلنا نظهر احسن.. العشا بيزهب الحين
علياء: منو اللي له نفس ياكل الحين
حمده: انا ( ظهرت عنهم)
علياء: عذوب... شو اسوي الحين
عذابه: بلاج
علياء: انتي هب حاسه بشي... راسي يعورني.. و بطني و عيوني و ... و زايغه
عذابه: اذا انتي حاسه انج متردده .. فكري كمن يوم.. و صلي الاستخارة .. و بعدين لازم تشاورين امج طبعا
علياء: خوفي من امايه.. اخافها ترفض
دخلت عليهم ام خليفة
عذابه ( وهي تحاول تتهرب من ام خليفة): بسير اطالع امايه برع.. ( ظهرت من الحجرة)
ام خليفة: علياء
علياء: هلا اميه
ام خليفة: سمعتي ولد عمج ..
علياء مستحية و موخيه راسها..
ام خليفة: فيصل زين و بعدين هو ربيع خليفة و حسبة خوه.. بس يا علياء
علياء: بس شو
ام خليفة: حاولت ابعدكم عن عيال عمكم عقب المشاكل اللي يتنا من عمر .. و عقب اللي صار باختج من اقرب الناس لها وهو ولد عمها.. و مانكر اني غلطت بهالشي... لانه هذا عمكم حسبة ابوكم.. و هذيله عياله شرات خوانكم.. بس بعد يا علياء ما نبا نتقرب منهم اكثر
علياء: ليش يا اميه؟؟
آخر المواضيع
الجزء [21] من قصة أحبك لو بغيت إنساك مقدر 
