هنا عابرة سبيل

حـان الفــراق .. وتم توديع غالين=قسـوة زمن وظروف ماهي رحومه
وحـاولت ابدّل موقف العسـر باللين=وأبين قدامه جسور ظلومه
وأعاتبه وأنقد على دمعة العين=وانا - حشا لله - ماني ألــومه
وأقول هذا حال كل المحبين=وهذا الفراق الي تجينا علومه
ومسكت نفسي كن ماصاير شين=أخشى على خلي يشقق هدومه
ثم قلت وش تنطر حبيبي لهالحين؟=!! أثر ايديني ماسكات كمـــومه

أنا عجوز مطلـــقة وام ورعـــــــان=وأيضاً مدام وبنت وآنس وعانس
أنا بدوية وعايشه عند حضـــــران=وبنت البحر وابوي زارع وغارس
أمية ماتعرف حروف وألــــــــــوان=وتلميذة دشت جميع المدارس
ضفره وخبله ، عاقله،في نقصان=شرود وأنطح لي ثمانين فارس
خلونِ أعيش العبره دون عنـــوان=طــــــيف يمر بلا رقابه وحارس

تـرى الـذبايح واهـلها مـاتسليني=انـا ادري ان المرض لايمكن علاجه
ادري تـبي راحـتي يـابعد عـيني=حـرام مـاقصرت ايديك في حاجه
اخـذ وصـاتي وامـانه لاتـبكيني=لـوكان لـك خاطرن ماودي ازعاجه
ابـيك فـي ايـدينك تـشهدني وتـسقيني=وداعتك لايجي جسمي بثلاجة
لف الكفن في ايديك وصف رجلين=ماغيرك احدن كشف حسناه وحراجه
ابـيك بـالخير تـذكرني وتـطريني=يـجيرني خـالقي مـن نـار وهاجه
سـامح عـلى الـلي جـرى مـابينك وبيني=ايام امشي عدل وايام منعاجه
اعـيالي هـمي وانـا الـلي فـي يكفيني=علمهم الدين تفسيره ومنهاجه

أهلي يدرون إني شاعرة =بس مايدرون في جرح الليالي
يمنعوني من كتابة خاطرة =مادروا إني من زمان بهالمجال
آه لو يدرون اني (( عابرة ))=عندهم بتصير موتتنا .. حلال

يسألوني عابـره ويـن الجديـد=والاجابـه ضايقـه فينـي ملـل
راحت ايام السعـاده والقصيـد=عشتهـا بيـن التكانـه والجهـل
كنت اروض شارد الحرف العنيد=ماعسرني لو بغيته فـي عجـل
فيه اصور لوعة الحـب الاكيـد=ومنّه(اشكل) ماحوى قلبي غـزل
ومعه (اسافر) عن معاناتي بعيـد=ولأجل حبه ماشحنّي من زعـل
احضنه (فرحة) طفل في يوم عيد=واسكنه (روض) الخزاما والنفل
واحتويته ليت لي (قلـب ٍ) بليـد=ماعرف (فرق) الجزاله والهزل
والنهايه مابقـى عنـدي جديـد=واعذروني صارت ايامـي ملـل

أنا عجوز مطلقة وأم ورعـان=وأيضاً مدام وبنت وآنس وعانس
أنا بدوية وعايشه عند حضران=وبنت البحر وأبوي زارع وغارس
أميةٍ ماتعرف حروف وألـوان =وتلميذةٍ دشت جميع المدارس
ظفرة وخبلة عاقلة في نقصان=شرود وأنطح لي ثمانين فارس
خلوني أعيش العابرة دون عنوان=طيفٍ يمـر بلارقابة وحـارس

بريال عارضته على السوق بريال=من باعني برخيص والله لأبيعـه
من يشتري رجّال قصّر بالافعـال=باع العهـود الماضيـه للخديعـه
رجّال يسوى له ثمانيـن رجّـال=كل الصفات اللي ملكها فضيعـه
له ضحكةٍ تشبه لضحكات الأطفال=ذيبٍ ونظراتـه حنونـه وديعـه
وله فزعةٍ منها المجانيـن عقّـال=وفجوج لا ضاقت عليّ الوسيعـه
ياما عدل عوجا ثقيلات وطـوال=وأنا معاقبتـه غيـورٌ صريـعـه
والله يسوى لـه ثمانيـن رجّـال=والخبل مثلي لا زعل يب يبيعـه

تعال بشـرح لـك أنـا كـل مغلـوق=تعـال شاهـدنـي مــع ذكريـاتـي
لا لا يغرك لبس موضـة ومسحـوق=انفض غبـار الوقـت تلقـي صفاتـي
قرب وطالع معّـن الشـوف بحـدوق=وزيف التطـور جـرده مـن حياتـي
بتشوف في وجهي من الماضي اطروق=أخذت من بطن الصحـاري صفاتـي
طفلـة بثـوب مخيطينـه ومفـتـوق=تنطـر جديـد الثـوب بالعيـد ياتـي
سمعت طرف اخبار عن كلمة السـوق=وتاخذ وتسـأل هـو وجـوده ثباتـي
طفلـه سحبهـا الوقـت للهم برفـوق=حتي انهـا صـارت مـن العاشقاتـي
وجار الزمن وعرض الحـب للعـوق=شـرق ركايبهـا وهــم مشمـلاتـي
واتلا عهدها فيـه يركـض ورا نـوق=مسرود جيب وفـي يدينـه عصاتـي
ويصد لكن يلتفـت لـي مـن الشـوق=عجـلان يلخصنـي بعيـنٍ تحـاتـي
وقفـى وخطواتـه يتـلـن معـلـوق=وخلانـي ماتنقـل عظامـي عبـاتـي
ودار الزمان ولا مشي الحظ بوفـوق=ومازلـت أخفـي بالظـلام اعبراتـي
ولا زلت أنا العب له علي كل طاروق=حتـي يجيـب الله مـوعـد وفـاتـي

ضايقه بالحيل محتاجه اشتكي=لولا طبع فيّ .. يمديني شكيت
بس أدور عذر منشان البكي=لو يدوسون بطرف ثوبي بكيت
كل ماجيت اتريح وارتكي=يزدحم في خاطري الفين بيت
ويش بيدي افعله غير الحكي؟=قاصره خطوات رجلي لو مشيت
أسرعي يانفس موتي واهلكي=صرتي همي يوم بالدنيا شكيت

لا تسافر وتتركني أجاهد غلاك=كل شي يهون إلا جهاد الغرام
أما تبقى معايا أو اسافر معاك=لاتخليني لطوال الليالي طعام
خوفي البعد لامنه خذاك وطواك=مثل قصر تولاه الزمن والهدام
لا تسافر وانا اللي في رجا الله ورجاك=!! لاتسافر وتلقاني بقايا حطام

كل ما اتصل فيك.. صبح وليل تشكي لي=من عوج الاوضاع والدنيا ومتاعبـــها
مليت يا صاحبي مابيك تحكي لي=هالأسطوانه أنا مليـت مطـــربها
حتى خيالك بتـال الليل ياتي لي=جروح وعيون معقوده حــواجبها
عيشتني بعالم ماهو على جيلي=زهرة شبابي حرام انك تخربها
ياما هجرتك ولا كملّت ترحيلي=حبايب ماتعبر عن حبايبها
حبيبتك ما تحمــّل هالبهاذيلي=إضحك معاها ولاطفها ولاعبها
هيّا تغزل وغن وزيد تدليلي=البنت ياحبها للي يداعبها
قلي وش رايك بفستاني ومنديلي؟=الوانهن تعجبك .. أو مانت راغبها؟
وقلي وش رايك بعقدي مع خلاخيلي؟=وشف قذلتي يوم قصينا ذوايبها
وقلي وش رايك بأطباعي وأقاويلي=لاحظ عليها وغيّـرها وشطّبها
خل بيننا انقاش وعلوم وتعاليلي=وآمر على البنت وان حبيت طالبها
يامدمن الهم كافي دمع بالليلي=بكره تشبع من الدنيا ومصايبها
دنياك والله .. ماتسوى التزاعيلي=حتى ولاهيب كفو الي يعاتبها

ليتني البارحه ياغالي ماسريت=يم درج ٍ مقفل من قديم السنين
أشهد اني فتحته وانتحبت وبكيت=شفت ماهيض الجرح القديم الدفين
شفت وسطه رساله وليتني ماقريت=بيت شعر قديم وظرف مع صورتين
اشهد اني لغيره بالغلا ماعطيت=واشهد انه بغاني مير ما من عوين
صحت من قلب ياويلي على اللي هويت=وقمت امسح دموعي من يسار ويمين
لاطرالي حبيبي بصوت واطي حكيت=!! إنا لله .... وإنا للولي راجعيـــــــن

يمه .. يايمه .. فديتك لاتخليني=بعثرني الهم وأبغى يديك تجمعني
يمه افهميني تراك ان مافهمتيني=مافيه شخص بهالدنيا بيسعمني
ماعدت انا طفلتك.. كبرت شوفيني=خليك يمي ترى الاطماع تتبعني
لاتدلليني .. أبي منك تدليني=وابي ايديك تداعبني وتصفعني
ولا انهد حيلي أبي عطفك يقويني=ياما كلامك على الشدات شجعني
وان جيتك ابكي .. ابي منك تهديني=مابيك تبكين .. أبغى العقل ينفعني
يامملكة عطف ياعطر الرياحيني=براثن الهم والهوجاس تلسعني
بسمتك عندي الا من ضقت تكفيني=وارضاك عني عن الاحزان يرفعني
اسمى العلاقات تربط بينك وبيني=ياللي احضانك ان ضاق الكون تاسعني
لك احترامي وحبي والوفا .. فيني=وفيك اروع الحب مايخطي ويخدعني

الناس سدّادة سلف يوم الرخا باكر يضيـع=ما بي اسوي حاجة أصبح عليها نادمـــه
أبحث بقلب التجربه وآخذ من أحداث الجميــع=عبره تساعدني على صدمات وقت قادمه
بعطي واسامح للبشر وأحسن مع الكل الصنيع=حتى إذا جار الزمن القى صديق انادمــه
ودي على طول الزمن أكون منديل الفجيــع=أحب أعمّر ما أرتضي أكون ـ لحظةـ نادمـه
وما دمت أنا متعافيه وما زلت في سن الربيـع=مهما يكن حجم العمل أرفض وجود الخادمة

لي صاحبٍ منه تبي تطلع الروح=خبلٍ ومن هي مولعه فيه .. خبله
عاملين المح له من الجد ومزوح=واقول ياعنتر تناديك عبله
طال المدى ثم قلت انا اغليك يالوح=مجروحه جرحٍ مخاطره عجله
دنق وقال آنا من العام مجروح=وأشر لجرحٍ مبطي وسط رجله

أبكسر الاغلال واعيش حــره=بصنع قراري وكل شيٍ بيــدي
مليت من صبرٍ عطاني مـضره=أعيش في عصرٍ لجدّان جـدي