الشاعر سعد بن عبدالله الهتلاني العجمي الله يرحمه والشاعر ضيدان بن صبيحان اللزيزي العجمي
كان بينهم رفقه وصداقه وكانت بينهم محاورات كثير ,, نذكر لكم بعضها ,, وطبعاً كل محاوره لها موضوع ومناسبه
مختلف ... للعلم ضيدان رجال كبير بالعمر وسعد الله يرحمه كان توه شباب ,,
محاورة المقهى:
ضيدان :
تطلب لي الشاهي وتطلب لك حليب=وانا على الحليب كبدي ذايبه
انا احمد الله يوم ما انت بـلي نسيب=يقطـع صبـيً مـا يقـدر شايبـه
سعد :
قم اطلب لنفسك ترى مانت بغريب=ولاني بطالب لك ولانيب بـجايبـه
تبغى الكفيا يوم طريـت المشيـب=واتعبتنـي مثـل الوزيـر ونايبـه
ضيدان :
في خوة الطيب انا مالـي نصيـب=ومن خوة الرديـان نفسـي طايبـه
قد كان ظني فيـك للعلـه يطيـب=والاريا بها مخطي وفيهـا صايبـه
سعد :
كل يبي يرمي رفيقه فـي القليـب=وابليـس نـوخ عندنـا ركايـبـه
وعلمته الممشى سبقني في الخبيـب=اللـي علومـه كلبوهـا خايـبـه
في السفر على الخط السريع :
ضيدان :
اللي يلوح لك على الخـط السريـع=الظاهر انه يا سعـد مـن ربعنـا
وقف ترى المعروف عمره مايضيع=خلاّية الرجلي مهـي مـن طبعنـا
سعد :
هذي سواتك قبـل للتكسـي تبيـع=من لا يعرفك يبتلش فـي وضعنـا
صاحبك هذا وقفتـه وقفـة خليـع=حنا على الشارع وريحه نشعنـا
ضيدان :
خله ونرجع له الى طـاح الربيـع=ذا عرضته يمكـن تفـرق جمعنـا
حنا ما صدقنا ان حن ناتي جميـع=وشفنا تهاوشنا وهـو مـا سمعنـا
ضيدان يتشره على سعد :
ضيدان :
عطنا من اللي ياسعد ربي عطـاك=عندك فلوس في البنـوك و نايمـه
وانا رفيقك دايـمٍ و امشـي وراك=وما ادري متى تمطر سماك الغايمه
سعد :
اللي عطاني خير بالشحـذه بـلاك=هـذي عطايـا الله وذي قسايمـه
يومك حسود وتـو مابيـن رداك=ما عندنا لك مـا يفطـر صايمـه
ضيدان :
أظن من زارك ببيتك مـا نسـاك=ولا أظـن مثلـك تنسـي قدايمـه
يا رجل فكر زين والرب يهـداك=عزم ترى الرجال مـن عزايمـه
سعد :
تعش عندي جعل ما تاكل عشـاك=عسى تعشـاك الطيـور الحايمـه
واللي لنا جابك عسى يقطع مـداك=واللي يبي فرقـاك محـدٍ لايمـه
ضيدان مسير على سعد في خيمته :
ضيدان :
يومين غيري يا سعد ما حدن جاك=متكرسع(ن) في خيمة لك صغيره
وابي تغني لي وانا اسمع غناك=وترى الغنا ماهوب بس لسميره
سعد :
العلقم اللي لونه احمر عطيناك=مكثر شايه ولا فيه شيره
خذ لك بياله وانقلع عني هناك=ما عندنا لك يا اسود الوجه غيره
واللي تسبه قبل يومين غداك=والبارحه عشاك يبغى الستيره
وهذي اشهر ردية بينهم :
سعد :
ضيدان ما ودك نشكل عصابه=نحتل بعض بنوكها والمحلات
اما يجي لي والك قدر ومهابه=والا تبيتنا بيات الشريفات
والرجل ودك يشتهر في شبابه=بالطيب والا بالعلوم الرديات
ولا يهتني ف اكله ولا في شرابه=الين تطلع صورته بالمجلات
ضيدان :
لا تحسب انا يا سعد وسط غابه=هاللي تراوى لك تراهن عمارات
وموضوعك اللي جبت كله غرابه=والظاهر انه سابع المستحيلات
واخاف لا تنبح عليك الكلابه=ثم هات نسلم من مخاليبها هات
يا بوك ما عمري دخلت النيابه=ومن العمر ما بقي كثر ما فات
وان كان تبغى الراي قبل يغدابه=من واحد جرب جميع الحيالات
خل الحطب للي يعرف الحطابه=نهارنا شمس وفي الليل لمبات
وسلامتكم وأن شاء الله تعجبكم
آخر المواضيع
محاورة رائعة 
