عزيل من رافق مقاريد ورخوم =سود القلوب اللي من الحقد مليا
اللي سوالفهم كما ريحة الثوم=يغلون من طيب الأجاويد غليا
من بينهم كني غريب من القوم= وهذي سوات اللي نواياه عليا
وين الرجال اللي مشاكيل وقروم=مثل الحرار اللي براس الجبليا
شقر الحرار ولا يقرب لها البوم=ولاهيب تنزل فوق حدب السهليا
مثل الذي جنسه مع الناس معدوم=صادق ولامن قال هرجه فعليا
أبو محمد طيب الراس شغموم=وافي ولامن غبت عنه أتصليا
يا خوك عيني حاربت لذة النوم=وعلي السهر يا خوك صعب أحتمليا
لا يا فهد قلبي له أيام مهموم=وأنا علي الله ثم عليك أتكليا
أشكي وكني ساري الليل منجوم=ولا يشيل الحمل كود الجمليا
أمن الكسل كني لي أيام محموم=لكن لا شفتك يروح الكسليا
يا شيخ ويش الراي في جيلنا اليوم=ويش الحلول الصايبه والعمليا
الحر هذا الوقت ما يدرج الحوم=والبوم في قمة جبلها نزليا
والسيف من جور الزمن صابه أثلوم=حتي الكديش اليوم شاش وصهليا
ولانيب من رفقة هل الطيب محروم=مثلك يكفي لو ضربت المثليا
وأدري بصدقان الرخي فالرخي كوم=ويا قلهم يا شيخ وقت الصمليا
أن جاء نهار(ن)فيه همات وعزوم=فيهم على ما قيل خاب الأمليا
صحيح للعالم تقاليد وسلوم=غير الحثاله من صحبها حثليا
والناس تكره من به الكبر والزوم=مهذار وجهه ما يعرف الخجليا
وليا دعيته يقعد شوي ويقوم= وأن سمع له هرجه لغيرك نقليا
قلته وأنا ماني علي اللاش ملزوم=الأرض للطيب وسيعه وخليا
لا صرت لا ظالم ولا نيب مظلوم=وما همني هرجة عذول(ن)عذليا
وشرواك من روس القبايل معي دوم=كم واحد(ن)لا غبت عني سأليا
وألا الردي من رافقه يلحقه لوم=أدنات كلمه منك صد وزعليا
لو كان يملك مال كامل وجمجوم=فرقاه فوق الكبد مثل العسليا
ولا خير في رجل(ن)بغيض(ن) ومذموم=اللي ليا جوه الطراقي بخليا
أمن البخل وده تروح السنه صوم=همه علي الدنيا يصر الهلليا
جتك القوافي كنها بارق أغيوم=وألا كما مخزون بيت النحليا
فيها من الحاضر سواليف وعلوم=عن ما جري يا شيخ واللي حصليا
والختم صلي الله علي خير معصوم=كسر صنم مكه وأزال الجهليا
القصيدة صوتية
حفظ القصيدة
آخر المواضيع
عزيل من رافق مقاريد ورخوم 
