!!! برد المكاتيب!!!

هبت جنوب وطاح برد المكاتيب=ويا كثر ما هب الجنوب وذكرته
يملا حضوره من حضوري وانا اغيب=وياما غيابي في غيابه حضرته
ان جا مطر صارت له اضلوعي اشعيب=وان راح ريح(ن) طير اللي بذرته
طال السكوت ومال صمتي مطاليب=غير الكلام اللي وقف وانتظرته
جنبت لو مالي عن الدمع تجنيب=من وين ما صديت فيني شعرته
واصمتي اللي صار فعيونهم عيب=واجرحي اللي لو فضحني سترته
لي صاحب(ن) يملا كفوفه تراحيب=لولا الحيا من ضحكته ما اعتبرته
يا صاحبي ماهي عليا مقاضيب=عذروبي انك ذخري اللي ذخرته
عذروبك انك شوهتك الاكاذيب=عذروبك انك جاك طيب ونكرته
ان جيتني بفراق زود العذاريب=لاجيك انا من زود صبر صبرتــه
للطير جنحان وريش ومخاليب=لكن يضيع صيدته في غبرته
ومن جزم نفسي يوم صار الردى طيب=حلمي قبل لا يكسرونه كسرته
ومن راح مني قـلت لعلّه مصيب=دورت له عذر(ن) كريم وعذرته
اللي يبي بعدي انا ماني قريب=اما ربحني والا انا مـاخسـرتـه
قلبي خويي مالقلبي معازيب=واللي حقرني من رداه احتقرته
رغم الجروح اللي بقلبي معاطيب=حبيت كفين الزمــان وشكــرته