طفله صغيره

يمه اذنبت ونزحت من العشيره=وان تمنوا توبتي ماني بتايب
مابي لدنيا الغنادير اي سيره=طايح من عام الاول في مصايب
يمه الي حب له طفله صغيره=وش يسوي لاغدى فيها طلايب
طفلة ماكانت بحبي جديره=بس كانت غير عن كل الحبايب
كنت اسميها العنود المستذيره=ليت اهلها العام سموها عجايب
كنت اجيها مثل الامطار الغزيره=كنت اضيع بجوها مثل الهبايب
واطلب الله هي متى تصبح كبيره=تفهم شلون المكان يصير ذايب
ان تغنت صارت الطرقه قصيره=وان تغلت صارت جروحي عطايب
وان بكت ناش الفضاء طهر الستيره=وان شكت راح الحكي مثل الذهايب
وان توارت مثل الاسرار الخطيره=صار لوني مثل الايام العصايب
ديرة ماهي بها ماهي بديره=لو ثراها عشب واعلاها سحايب
يمه تحبين طايلة الظفيره=اه..والله ياعليها اسـود ذوايب
ان تحرك له سواليف كثيره=وان ركد روح مثل لمة قرايب
عرفتني الليل ونجوم الظهيره=بللتني بأغنيات ورحت طايب
كل عرق في خفوقي تستثيره=خايف تصبح مراجيحه نصايب
صنتها مثل البحر لابعد جزيره=ماتركت علومها لاهل الركايب
قالت ان جاء الراس شايب فيه خيره=قلت يابنت الحلال الراس شايب
قالت الا الحب وش هو؟ وش مصيره؟=قلت انا استاهل وانا كل السبايب
ماجزا اللي يحب له طفله صغيره=غير قبر وضحكها فوقه نصايب

اللهم ارحمني بالقرآن واجعله لي اماماً ونورآ وهدى ورحمه
اللهم ذكرني منه ما نسيت وعلمني منه ما جهلت وارزقني تلاوته آناء الليل واطراف النهار واجعله لى حجة يارب العالمين