السلام عليكم ورحمة الله وبركاته
بعد طول الغياب اقبلوو مني هذه المتواضعه
ياالله يامنشي مـزون الهماليـل=يالواحد اللي من عذابـه نخافـي
تفرج لقلـبٍ غربلتـه البهاذيـل=اللي سببها بـان ماكـان خافـي
مادام قدري في عيون الرجاجيـل=وافي مثل مقدارهم عنـد وافـي
ومادامني من روس قومٍ حلاحيـل=وارد على جـمٍ غزيـرٍ وصافـي
ماهمنـي نقالـة القـال والقيـل=ولا دنافيس النفـوس الضعافـي
اسرج اركابي والهدف نجمة سهيل=واسوقها للعز لـو كنـت حافـي
واحب شوف النار جنب المعاميل=واشفق على صفقة رفيقٍ سنافـي
ودلال بنٍ فايـحٍ وسطهـا الهيـل=وتمر الخلاص الي مذاقه يشافـي
وانحاستين من حليب المشاميـل=أباكـرٍ ترعـى نبـات الفيـافـي
وسوالفٍ تبري الكبـود المغاليـل=ومجلس شرف مايدخله كل هافي
علا شحم حيلٍ سمـانٍ مواحيـل=وقصيد ابن لعبون ولا النصافـي
وخوة رجالٍ يرجحـون المكاييـل=معك معك في الشر ولا العوافـي
ماهي بخـوة حابليـن المحابيـل=سوالفٍ تسفي عليهـا السوافـي
هذي طراة العمر يااهل التماثيـل=ومنهوفعل فعـلٍ جميـلٍ يشافـي
والجادل اللي حبها كذبـة ابريـل=قولو لها قلبي لما عـاف عافـي
وقولو لها تنسى كلام آخر الليـل=وحبٍ لجا خلف الضلوع النحافـي
كم ليلةٍ قـد طرقتنـي الغرابيـل=وكم موعدٍ تكذب علي فيه طافـي
وكم مرةٍ سكًنتها فـي المظاليـل=جفنٍ غطا والجفن الاخر لحافـي
باشوم عنها والعوض في المقابيل=وآاخلًي الحـب المزيًـف خلافـي
منهو خذا طبع البحر وازرق النيل=خوان والخـوان ماهـو بيافـي
والجادل اللي صدقت كذبة ابريـل=قولو لها قلبي لما عـاف عافـي
آخر المواضيع
مــجــلــس شــرف 
