يالله ياللي تسيّر الكون باقدار**ياللي بوقت الضيق كل ٍ يدله

يالله ياللي تسيّر الكون باقدار=ياللي بوقت الضيق كل ٍ يدله
ياللي تعرف اللي خفا ويّا الاسرار=يامن تعقد الامر وفي يدك حله
يالواحد المعبود حي ٍ وجبار=يامن جميع الخلق له مستذله
يالله ياللي رحمتك دون مقدار=محد ٍ حسب مقدارها لو فطنله
يالله جيتك من عنا الوقت منهار=ودموع عيني كالمطر مستهله
ضاقت بي الدنيا وضاقت بي الدار=واسبابها ثقل الهموم المجله
عشت بزمان ٍ علني كله امرار= محد ٍ يمر بدورته ما يعله
محد ٍ يعرف الخوّه وحشمة الجار=والكل يمشون بهوان ومذله
عيشة غثا وهمومها دايم كبار= حتى الصغيّر شايل الهم كله
وانا اشهد اني بهالزمن حيل محتار=هذا زمن عز العفن والمذله
لكن وش نسوي ؟ وهالوقت دوّار=وزادت مشاكل وقتنا الطين بله
وينك زمان ٍ قد مضى فيه الاحرار=اصعب سؤال!! وينتظر من يحله
هذاك وقت ٍ فيه للمرجله كار=كل ٍ بنى بيت الكرم منزل ٍ له
معاك من خوّة هل الطيب الاخيار=ارداهم اللي لانطق ما تمله
خوّة نشاما من طويلين الاشبار=ناس ٍ لهم بالطيب وقفه وشَله
وهات الحطب يا مسندي واوقد النار=وشقر القهاوي حطها وسط دله
واحكر لنا الفنجال موزون ببهار=وفي بطن بغداديه يالقرم زله
ثم الحقه يا صاحبي شوي مسمار=حتى يتسوّى كل شي بمحله
وعطني من الفنجال مزّه وهو حار= خله يداوي علتي ايه خله
وتشوف في مد النظر ارضنا انهار=من خير ربي ارضنا مستظله
ويبدى طلوعه باذر ٍ حبه صغار=ويكسي قفار الارض مافيه خِلّه
والارض يصبح عشبها كنه اشجار=ويا محلا المقيال من تحت ظله
وتلعبك ارياح البختري ونوّار=وريح النفل تشفي من القلب عله
والبل يمينك والغنم منها يسار=ما كنها الا لارضنا مستحله
واليا ارتعت ماتاكل شعير وشوار=تاكل من العشب الخظر وقت حِلّه
والطير معنا لاكفخ حلّق وطار=وبمخلبه غز السمينه وتله
حر ٍ ونسل احرار من ماكر احرار=اليا زهمته ما طرى يقول لـ له
تطرب لشوفه من مجاميع الانظار=واخاف من عين الحسد لا تدله
هذي حياة ٍ تبري القلب لانهار=وتبري هجوس ٍ بالمرض مستعله