السلام عليكم اخواني اليوم بقلكم سالفه اول قصيده قلتها في حياتي
في أحد الايام جيت( للوالد) رحمه الله واسكنه الجنه وجميع اموات المسلمين
وكان رحمه الله شاعر وكفيف البصر منذ الطفوله و له روح مرحه عرف بها . وتربطني به علاقه فوق العاده وكان عمري 13 سنه تقريبا وانا انتهزت فرصه انه جالسين لوحدنا قلت بسمعك قصيده قال: لمن
قلت : لي
قال هات سمعني
وانا اقول باسم الله
اسمك حنان وما بقلبك محنه = فيه الغلط مسماك ياداعج العين
صوبت قلبي بالنواعس رمنه= عيونك اللي رمشها طول شبرين
قاطعني, قال :عيد رمشها وش طوله عيد
و ابتسم ثم أخذ يقيس شبرين على عصاه
وقال ماشاء الله وش هلرموش هذي كيف تحط الشيله ؟
كمل هات
من شاف محبوبي شهد له بفنه=
واذا باب المجلس يطرق
اهلا تفظل يالله حييه , تصدقون من اللي جاء
ابو حنان 0 جار وصديق للوالد ( من الاردن)
تقهوى وعليه بالخير وبعد ما خلص قال للوالد : والله انا نفسي اكوي ابنك هاظ كوتين
قال الوالد : اذبحه بأيدك وشف من يعارظك ( راح تفكيره بعيد)
قال ابو حنان بعيد الشر عليه عمو بقتل اللي بقتله 0 بس اليوم واحنا خارجين من صلاة الجمعه مع الشمس شفت من عيونه كنه معاه الصّفير وعنا بنعطي المريض الفقوس ( مثل الخيار) وينزل هلصفار ولا كويه على بنصر اجرينه اليمين وبنصر ايده الشمال ( خلف خلاف ) شو بتسمحلي اكويه؟ وهي النار ما بتحتاج جاهزة والمرض في اولاته (وكان صادق فعلا )
قال الوالد وهو يبتسم مشكور ومسموح 0 وكأنه يقلي شف وش بيصير لك هلحين من ابو حنان 0
قال ابو حنان : بدي روح الشارع اشوف ( مسمار ) وهلقيت اجي 0
قلت للوالد: كان قلت لا ماحنا كاويينه 0 قال: ياولدي فيه اب يقول على ولده حبيبه ما حنا معالجينه !!؟ كلها براس المسمار ثم
احمد ربك( محورين ) يعني كل شبر بمحور وش تقول لو كل رمش حسبه عليك بمحور !!؟
هات وانا ابوك هات
قلت: القصيدة؟
قال: لا وانا ابوك هات حطب خل النار تجمر 0 وبعدين لاحقين على القصيدة الله يجيب العواقب سليمه 000
هل فيكم من جرب اختلاط البكاء بالضحك ( شعور لايمكن وصفه) هذا حالي ذلك اليوم
وذهب ابو حنان ذلك الجار الطيب والعائله الكريمه الى ارض الله الواسعه ولازال اثر هذه المحاور باقيه 0
وسلامتكم
آخر المواضيع
سالفتي انا واول قصيده 
