السلام عليكم ورحمة الله وبركاته
لدي هذه المتواضعة أرجو قبولها
أقول
يالله يا مطلوب ياعالم السِرْ=يامن عبادك كلهم لك رجاوي
أسألْك ياربي تباعدني الشّرْ=أنت القدير اللي بلطفك صخاوي
نفسي ترا قد ذاقت الحلو والمرْ=ماعاد يفرق سامجه والحلاوي
وقتن مضى لوكان عاده بيفتَرْ=يرجع لنا ويعيد ذيك الهقاوي
أنا اشهد انه لو رجع يبري الضَّرْ=يبري نفوسن قد دهتها البلاوي
اليا اجتمعنا نبرم العزم للبرْ=ما هو مثيل امجمّعات القهاوي
أهل النفوس الصافية مابها حَرْ=تلقى المزوح وفيه للشعر راوي
أحدن بدع قافه وغيره يحرّرْ=واما وجدها جاب شعر الخلاوي
والضو شبّه من تحاطيبنا سَمرْ=نارن توهّج في وهَجها سناوي
دخّانها كنّه يغازل له البدرْ=آخير من عُودن يسوّقْه جاوي
ودلال رسلانن نفَهّقلها الجمرْ=واليا اقْطَعت ببهارها لك طراوي
بالنجر دقّ الهيل واخلط به الزّرْ=ثمْ حوّله باللي شرابه شفاوي
كيفن لنا به تنجلي ضيقة الصدرْ=فنجال بنن مشربه لك يداوي
ومْعا الصباح ابحزّة منادي الفجرْ=قمنا وصلينا قرينا التلاوي
ومْعا شروق الشمس فرّيت لي فرْ=بين العروق وبين ذيك الملاوي
والذود ضحّى بين رمثن وشرشرْ=ابلن مقيمت ساس ماهي شراوي
اللون واحد وسمها ما تكررْ=ترخص رقابن دونها بالعزاوي
وسط الربيع وتنهش العشب لخضرْ=في ديرتن ما قاربوها الشواوي
ابلن مجاهيمن بوسطه تبخترْ=من زينها تخلف كثير الهقاوي
طوال الأيادي زانها وسع منحرْ=كبار الخفاف اللي تشاد الرحاوي
والخشم كايف منهدل منْه مشفرْ=مع مشربن طايح بشكل امتساوي
طوال الرقاب وجردها مابه اشْعَرْ=واذنن كما حربة بخيت العطاوي
باللون كالغربان مابينها أصفرْ=ما ضمها ياكون حرّن نداوي
على السنام اتْشوف طيرن تسمّرْ=كنّه عشيق بعشقها صار هاوي
هذي طراة الروح سجّو تفكرْ=اليا بغيت يصير بالك صفاوي
آخر حياتك عند ناكر ومنكرْ=في ضيقة الحودن وقبرن هواوي
والختم يلّّّّّّّلّه طالبك يا ميسرْ=شهادتن بك قبل يوم اللقاوي
وصلاة ربي عالنبي المبشِّرْ=وآله وصحبه عدّ وبل النواوي
وسلااااااااااامتكم
تقبلو تحياتي
:
آخر المواضيع
ماهو مثيل امجمّعات القهاوي 
