ولو كل من سمي برجـال رجـال ** درب المراجل بالرياجيـل ضاقـي

وين الذي يافـي بقولـه ليـا قـال = وين الصديق اللي على العهد باقـي
خلوني الخلان يـوم الزمـن مـال= اقفى حلاه وصـار مـر المذاقـي
اللي مايلفي لـو دعيتـه بمرسـال = واللي ليا مـروا عجـالا ضياقـي
من بعد ماحنّا لهـم ستـر وظـلال= في محنتـي غايـة مناهـم فراقـي
حملي ثقيل وعنه مزريبـي الحـال= وانا منـوّل معـه اشيـل الوساقـي
وناديت وين اللي يشيلـون الاثقـال= وين انت ياراقي عسيـر المراقـي
ماالليبـي الحاجـه ولا قلـة المـال= رزقي بحـول الله يجينـي يساقـي
وحتى ايش لو ماملك من المال مثقال= اصبر ولا ارضى ان الكرامه تراقي
الليبي الهقـوات ضاعـت والآمـال= وخابت ظنوني في البعض من رفاقي
وللنفس شرهاتٍ عريضات وطـوال= مـن كبرهنـه ياصلـن الآفـاقـي
والحر مايرضى المهونـه والاذلال= وقولة ضعيـف ملازمـه للمعاقـي
ولو كل من سمي برجـال رجـال= درب المراجل بالرياجيـل ضاقـي
مير المراجل ورث وحظوظ وافعال= عزي لمنهـو عـن طلبهـا يعاقـي
والبعض ياغير الاسامـي والازوال= الله يقطـع كـل سـلـكٍ دقـاقـي
وانا اشهد ان العافيه مالهـا امثـال= والله لو آقـف علـى مـخ ساقـي
ليصيـر بيتـي للرياجيـل مدهـال=ذولا مسايـيـرٍ وذولا طـراقــي
واكسب على الطاله نواميس وانفـال= وارقى مراقي الطيب مع كل راقـي
واصير طيب فال مع طيـب الفـال= واركي على كبد المعـادي عراقـي
ويالله ياعالـم خفيـات الاحــوال= تفرج لمن عظمـه نحيـلٍ رقاقـي
وتحط لي في جنـة الخلـد منـزال= نهـار الانفـس يبلغـن التـراقـي
وصلاة ربـي عـد ماهـل همـال= على الذي مسـراه فـوق البراقـي