ردا على القصيده التي اساءة للبدو وابناء البادية

الله كريم ولا تميل الموازين = ونحمد اَله الكون زادت انعامه
حنا البدو منا ملوك وسلاطين = حنا لنا من المجد أعلى مقامه
حنا بعون الله دايم عزيزين = فينا الشجاعه والكرم والزعامه
حنا جنينا الضان هن والبعارين = خدمة لنا وللضيف مابه ملامه
مشهود لنا في جميع الميادين = عدونا ان ما مات يشكي عظامه
عاداتنا بالطيب كم له عناوين = حتى العدو تفرض عليه احترامه
وعيالنا دايم عليهم حريصين = أرواحنا فدوة لهم يالنعامــــــــــه
والطيب عند البدو ما فيه تقنين = لضيوفنا نقدم اطايب طعامه
ودخيلنا لو كان يشكي من الدين = لو هو كثير وجاير الحمل ضامه
يبشر بفزعة تفرح القلب والعين = حنا اهل المجد واهل الكرامه
لوصية الاجداد دايم حريصين = ونفخر بقول بركات بكلامه
ورسولنا راعي الغنم يالمسيكين = حنا لنا من المجد اعلى سنامه
وسلطان بن سلمان نسل الكريمين = وصل الفضا رايد والكون حامه
وصحيح منا اللي يملكون الملايين = وأكثرهم اهل الطيب وأهل الشهامه
حنا ترى بفعل المكارم قديمين = بكل المواقف نتصف بالقرامه
وحنا على عهود النشامى وفيين = حكامنا عقال ماهم غشامه
وبعض المعاني من الفاظ الرديين = قوله حشا ماهو علينا لزامه
وحنا بحمى الاوطان دايم ميامين = ارض العروبة شاهده والكرامه
ويشهد علينا بالوفا قبل هالحين = حنا على مبدأ شديد استقامه
حنا على الشدات صلفين صعبين = ولا نازع الحكام على الزعامه
اللي براحة شعبهم مستهمين = وحكامنا ندعي لهم بالسلامه
اللي حكمو بالعطف واللطف واللين = والحاكم المخلص علينا احترامه
ومنا الهواشم واَل هاشم شريفين = أشراف من أشراف حتى القيامه
ومنا الخليفة اللي على الضد صلفين = وتشهد على افعال الرجال المنامه
عدوهم يخزم خزام البعارين = ياليت من مثلك يجود خطامه
واَل ثاني للرجال معروفين = بالدوحة الخضرا رجال الشهامه
واَل السعود اللي سواة الشياهين = حرار دايم بالأعالي مقامه
اللي ببيت الله هم مستهمين = كبيرهم بالبيت زاد اهتمامه
وان قلت زايد من امثاله قليلين = زايد بطيبه وقمة نظامه
وان قلت ابن مكتوم يقال نعمين = حكامنا اهل الفخر والفخامه
واَل الصباح مكبرين الدياوين = حتى اليتيم موفرين طعامه
وعاداتنا ما مثلها بالقوانين = واللي يسب الناس سهل لجامه
هذا مردي بوسط الفين واثنين = على الذي للبدو قل احترامه
أسرف بقوله يلقنونه شياطين = والحر ما يوصف بوصف الحمامه
واحفظ مقامي عن مقام الديين = ولاني من اللي ينقلون النمامه
يقول ان البدو ما عندهم دين = وكثير من قوله للأجواد سامه
والحمد للرحمن حنا مسلمين = والكل منا منزل الخلد رامه
فينا أطباء والاطباء قديرين = يشفون من جاهم شديدً سقامه
وفينا رجال العلم حازو نياشين = وكم من بطل عالصدر علق وسامه
وفينا اذكياء كم الفوا من دواوين = وكم مسجد منا قدير امامه
والبدو من قبل التطور ذكيين = على النجم يسرون ما من علامه
ما هابو الصحراء رجال قويين = شرواك لو وصلو مكاحل عظامه
عاشو عزاز نفوس ما هم مساجين = والحق ان غير يعدله حسامه
ردي على ما عرف له عناوين = مجهول اصله والاسم والاقامه
ما اسب اصله فيه ناس حشيمين = ولا ربعه والخوال وعمامه
اظن لو شاور رجال فهيمين = اكيد عاقلهم على الظلم لامه
واهل المدن فيهم ارجال صدوقين = كثير منهم من يوزن كلامه
والحضر هم والبدو دايم قريبين = الاصل ادم يا قليل الشهامه
يا موقد الفتنه عسى تفقد اثنين = الاوله شوفك تعيش بعتامه
والثانية تفقد من العقل ثلثلين = عقلك من الرحمن تفقد زمامه
ما خفت ربك يوم نصب الموازين = بعد الحياة الجسم تكسيه خامه
الموت لا تنساه محفوظ كل شين = وكم واحد الموت انهى احلامه
وش مكسبك ظلمت عدة ملاين = من اهل الشرف ما نلت ادنى علامه

ذا انتسبت إلى قوم فلي شرف = إني من القوم في أطراف حوران
أنســابهم يعربيات مسلسلة = من نسل عدنان كما من نسل قحطان
السردية = طوال الايمان

لا يوجد توقيــع في الفتره الحاليه .. راجعنا لا حقاً
ونتمنى لك دوام الصحـــه