سعد بن علوش . . قصيدة رائعة

الحيا من اللي خلق هالعالم و مغنيها=السما هذا سماه ..القاع هذي قاعه
و جعل نفس ٍ تستمر في معصية باريها=تبطي و هي بين ضلعين الحنك نزّاعه
لا جفتك الديره و ضاقت بك و باهليها=و جاك من جيش الهموم اثعالته و اسباعه
و فسقت العالم ..و ناقم خبلها صاحيها=و حكيت الرويبضه ..و انبطروا الزّرّاعه
غط خشمك في التراب و قول : يا مفنيها=افنني وانا مسبح ٍ لك بسمع و طاعه
راكب اللي ضمّر من اسهابها جنبيها=أولف من الجد .. و من ظلالها جزّاعه
لا أوقفت رزّت قواصيها على دانيها=و لا مشت يطري عليك الهوش و الفرّاعه
لون مقدمها "صباح الخير " يا راعيها=ولون موخرها مثل ما تشعل الولاّعه
في نحرها المجد و الخير الرضي قافيها=و في وسطها غاروا الشيخان و الفزّاعه
ايعقب سوّامها .. قبل يخسى شاريها=ما تجمع عندها الدلاّل و البيّاعه
من مرابط عز و راعيها مهوب مصخيها=ما يودعها المودع عند أخوه اوداعه
امخشوشه لين يأتي في السبق طاريها=ولا اظهرت لفّت رقاب العالم الطّمّاعه
كنها في موكب السواس و امباريها=بنت أمير ٍ من كثر طيبه تحشم اتباعه
و كن الأرض تقول فيها : الله يحييها=جعل أبرك يوم جيتي فيه و ابرك ساعه
ولا ابتدأ المركاض و جتك الخيل من تاليها=جاتك أولها تقول في ذيلها درّاعه !!
ضرب يديها على البيدا قبل رجليها=ضرب أصابع فارع ٍ تطبع على طبّاعه
تنحر اللي يعرف القصة قبل لا أحكيها=بس أبحكيها عليه و بارفع السمّاعه
الرجال أشكال و عاليها على واطيها=فيهم الأدنى و الأدنى و الدني بانواعه
وفيهم اللي لا بغى له حاجة يسويها=ما يرده عقل و لا تحتميه أطباعه
و فيهم اللي لا رمى الطولات ما يخطيها=كل ما هبت هبوب الطيب فل اشراعه
وفيهم اللي يأخذ الحسنه و لا يجزيها=و هذا أبشع شيء .. و أردى نوع و أكبر راعه
و فيهم اللي جاته الدنيا و هو هاويها=حظه يكسّب له اللي ما كسبه ذراعه
و فيهم اللي علته في جوشنه كانيها=ما تسولفها زوايا خافقه لأضلاعه
و فيهم اللي شل هم الناس و محاتيها=و ما فلح في أوضاعهم ..و لا التفت لأوضاعه
و فيهم اللي لا حكى كلمة مهوب يثنيها=و فيهم الزيزوم .. و وجه الخير .. و الطرقاعه
و الحياه .. أشياء تتراكم على بعضيها=ما يفرق بعضها إلا من يحسب أوجاعه
و الله إني صرت لا أبغضها و لا أدانيها=معتبر نفسي متاجر و الصلاة بضاعه
لان قلبي من عرف وش في الصلاة و فيها=غادي كنه و هي البزر و المرضاعه!
و والله يارجل يجنبها و لا يدّيها=إن ماله خانه .. و ما في عمره أطماعه
و أنت لو زليت عندي زلتك ناسيها=و جعل كبد اللي مهوب يغليك سم اللاّعه
صاحبي ما تعرف الانفس و لا خافيها=النفوس من النفوس الخافيه ..ملتاعه
صاحبي مرّ الليالي من سبب حاليها=صاحبي انزع من القلب النبيل قناعه
ما انت ب أمكوش على الدنيا و لا محصيها=انشد اللي لا عب الدنيا براس اصباعه
ستة وعشرين عام أفلّها و أطويها=صبحها رغّابه و في ليلها منّاعه
صاحبي جنب حراميها قبل حاميها=صاحبي ..صاحبك من صدقه يهل ادماعه
بانصحك نصيحة ما عادني بثانيها=دام عمرك ساعه ..اجعلها لربي طاعه