من روائع الإسطورة الشاعر عبد الله بن عون

خيّل سحاب العين وانـوى دريـره=اللي ظهر واللي على حـد مظهـار
من هول خطبٍ صاب شبه الجزيـره=ما فيه روحٍ ما شكت منه الاضـرار
الخطب موجـع والإصابـة كبيـره=يوم انتهى المشوار بالوالـد البـار
يـا الله يلّـي مـا سجدنـا لغيـره=يا واحـدٍ بيديـه تحديـد الاعمـار
تجبر عزانا فـي نزيـه السريـره=وتجبر عزاء الزوار من شتى الاقطار
وتبقي لشعبه من اخوانـه ذخيـره=صمود واستمرار واكمـال مشـوار
وتعين من عقبـه يقـود المسيـره=وينهج بدار الخير منهـاج الاخيـار
صرحٍ بدا ببنـاه صقـر الجزيـره=وعقبه عمر مبناه بابنـاه الاحـرار
مرحوم يا صـداد وجـه المغيـره=شراب فنجـال المواقـف اليـا دار
شيخ تصـدر للخطـوب الخطيـره=عنا وجرع ضدنـا كـأس الامـرار
ومواقـفٍ عنـد الشدايـد كثـيـره=منها لبو فيصل دفاعه عـن الجـار
يوم الصباحي جت عليـه الكسيـره=ومخرب الجيره على جيرتـه جـار
قام الفهد من دون حلـت قصيـره=لين استعاد الدار مـن كـل غـدار
والدار مـا عـود بطـرق يسيـره=الا بعد مـا صـادم النـار بالنـار
ويوم استعاد الدار عقـب تحريـره=قام الصباحي بالثنا عبـر الأقمـار
ومنها مواسـاة الشعـوب الفقيـره=غيثٍ على أوطان المحاويج مـدرار
وتوزيعة المصحف على كـل ديـره=للمسلمين اللي وراء زرق الابحـار
ومنها المشاريع الضخام الشهيـره=مستشفيات وكـل مشـروع جبـار
امثـال توسعـة الحـرم وتعميـره=والجامعات اللي نهضهـا بالاعمـار
وعلى العقيدة والوطن فيـه غيـره=وان عدمة الارياء يعود لـه الشـار
واخوانه أصحاب العقـول المنيـره=غيّابهم عنـد المواجيـب حضـار
صفوة ملوك الأرض مبـدأ وسيـره=وكبـار قـومٍ يستحقـون الاكبـار
واهبهـم الله للعـروبـه بـريـره=وملجاً لمن حاطت به النار والغـار
والحكم ما له غيرهـم مـن يديـره=ولا غيرهم للدار من ينهض الـدار