الجرح غاير والسنين اتعبتني

الجرح غاير والسنين اتعبتني = سايرتها رغم الهموم الأليمه
ابكي حوال الناس لو ما بكتني = عندي من الأحزان دوله عظيمه
هي غربة الأيام ما ساعدتني = ما شفت بالدنيا قلوبٍ رحيمه
عشت الحياة وكنها عيشتني = بين الجحيم وبين نار الهزيمه
اقرا عيون الناس لو ما قرتني = عينٍ تصوبني وعينٍ كريــمه
الحال مايل والظروف ارهقتني = والدمع سيلٍ سال من دون غيمه
الخد حافي والليالي وطتني = وعزي لمن سود الليالي تظيمه
عشت الحياه ودنيتي عذبتني = والله يعين اللي حياته سقيمه
لو جيت ابا اشرح قصتي عورتني = الصمت في بعض المعاني غنيمه
ولولا هموم القلب يوم احرقتني = ما قلت كلمه والنوايا سليمه
يا بوي وين امي عسى ما جفتني = ما شفتها يا بوي وش هالظليمه
طلقتها وتقول لا ما اعجبتني = وش يعجبك يابوي ماني غشيمه
راحت وكانت ودها لو شرتني = ضاع الحنان مع الندم والنديمه
ذكرتها واليوم هي ما نستني = يمه تعالي لك معزه وقيمه
يمه ترى الدنيا بعدكم رمتني = في بيت ابوي ولا عرفت الحشيمه
تدرين يمه والعيون اسهرتني = ما ذقت طعم النوم ذقت الحريمه
الناس وعيون العواذل بلتني = ولولا الحيا لسوي اكبر جريمه
يمه شربت المر حتى سقتني = ايام بقعاء مرها والصريمه
لو جيت ابا اضحك بالألم عاقبتني = عشت الليالي مثل عيش اليتيمــه
سبحت في بحر الألم واغرقتني = طبع القسى فيها تبيني وليمه
رمح الغدر شفته وفيه اطعنتني = وزادت جروح القلب واصبح هشيمه
يمه وشوفي كيف بقعاء احضنتني = بدل حنانك ذقت غل وحميمه
واليوم والله حالتي محزنتني = قمت اتذكر لي جروحٍ قديمـــه
ذكرى جروحٍ مع شقاها غزتني =ما عاد به رحمه ولا فيه شيمه
هذا وانا ذكرى السنين اتعبتني = جاريتها رغم الضغوط الأليمه