خـــــــــــــــتم السنين ؟

جاء شايبٍ قد حكحك الوقت رجليه = وعكازته لا من مشى ثالث خطاه
يمشي على هونه وكلٍ نظر فيه = النمل يسبق خطوته حين ممشاه
تسمع ونينه لا مشاء مع عزاويه = يصارع الدنيا والأيام تنخـــــــــــاه
يون كثر خطاه والكبر حاديـــــه = ختم السنين بجبهته يوم تقرااااااااه
في كل خطوه لا مشى ون قال إيه = قام ايتذكر وقته اللي توطــــــــاه
يبغى الحياه ولا لقى شي يحييـــــه = والشوف قاصر والكلام يتعـــداه
الريق ناشف والنظر ما يقديــه = والصوت لو ناديت بالاذن ما اوحاه
شايب ودورات الليالي تسميــه = مخضرمٍ قرن الزمن كله امضـــاه
قلت استريح وقال عجلان يا هيه = عندي شغل لا غبت ما احدٍ تولاه
قلت العمر يا شايب الموت ناصية = والعمر عند الله مماته ومحيــــاه
قال الزمن يا بوك ما اصعب بلاويه = خلاني اركض ما عرفت المهاداه
وقام يتحدث عن زمانه وما ضيه = وكيف الشباب اللي مع الوقت خلاه
وكيف المشيب اللي بدأ في نواحيه = والقوة اللي في شبابه وطريـــاه
وكيف العرب ما تستمع في حكاويه = وليا هرج قالو ترا الوقت نســاه
ونظرت فيه ودمع عينه يهاديــه = واخذ طرف كمه مسحها بيمناه
وانا بعد مثله دموعي تباريـــه = لأني عرفت الحزن والهم يبراه
وجلست اسولف معه والقصد اهديه = واخذ من علومه تجارب معاناه
قلت اطلب آمر قال علمي وما فيه = عندي ولد شفت الوظايف تعداه
قلت ابشر ابشر مطلبك لك نلبيه = والله ليصبح فالوظيفه وتلقاه
ضحك وقال اللي سعى الله يجزيه = في جنة الفردوس يا رب ماواه
وبدت علامات الفرح بين عينيه = والبسمة اللي غايبه زينت فاه
يا اهل القلوب الشيب لا احدٍ يعاديه = هذا الوقار اللي على الوجه حلاه
يا ضاحكٍ بالشايب اللي تخاويه = يمكن تصير الشايب اللي ذكرناه
خلك فطين وسلم الايام تبكيـــه = الوقت يغلب كل منهو تحداه
كم شايبٍ يجمع قلوبٍ حواليه = حاكم ورايه يسمعه كل من جاه
وكم بيت مات الشايب اللي يحليه = واصبح خراب ولا بقى غير ذكراه