مســـــــــــــاء المــــــــــوت ؟ !! ؟

طفلٍ ثلاث اسنين عمره ولا زاد = جاه القدر والموت للنفس مكتوب
بين الجبال اللي لها الذيب رواد = تايه ولا عنده من الزاد مقضوب
يمسح ادموعه ما عن الدمع نشاد = يصيح يرجع له صدى الصوت مقلوب
يمه يبه يا قوم يا صم الأوتاااد = اشلون انا ماني من الناس محسوب
الموت يرصد خطوتي درب الأجداد = والصبر ما اعرفه وانا اليوم مرعوب
يمه علامك ما سعيتي مع الجاد = خليتني يمه وحيدٍ ومسلوب
هاذي ثلاث ايام والعيش بإجهاد = يمه حنانك فاقده صار مطلوب
الموت مد إيديه والموت صداد = وقفت حاير والقهر لا بسه ثوب
هذا لسان الحال والحال بسهاد = سم الفراق يخلي العقل مشهوب
يا بوي ما تسمع صدى الصوت رداد = يا بوي ضعت ولا على قلبي اذنوب
يا بوي ما كنت احسب الروح تنصاد = تركتني ما اتعبت للبحث مركوب
نمت وشبع جسمك من النوم لا عاد = وانا شريد وبين الأوهام محطوب
يا بوي طالع صورتي وقت الأعياد= وش تنفعك صوره بلا جسم مرغوب
يا ربعي اللي تفتخر وقت الأمجاد = ما فيكم اللي ينشد الطير ويلوب
مافيكم اللي شاف فلذات الأكباد = وين الشهامه وين ما شفت مندوب
أول ليال الحزن أنا كنت شداد = اروح وارجع والتفت شرق واغروب
بين المتاهه بين هاذيك الأشهاد = ابكي واجر من التناهيت منكووب
يمه وذاك الليل بالقلب قداد = ناديت يمه ما سمعتي ولا نوب
يمه وصوتي تسمعه كل الأحياد = يمه وشفت اشراقة الشمس في كوب
يمه مشيت وشوكت الرجل تزداد = وحر الحصى في كبد رجلي له اثقوب
وثاني ليال الخوف تزداد الأحقاد = يمه واشوف الموت والموت مجلوب
يمه ذكرتك يوم انا وسط الأمهاد = وذاك الحليب اللي من الروح محلوب
ذكرت ابوي ولعب عمي والأولاد = وذكرت بيت العز وجدارنا الطوب
تعبت والله وانكوى القلب وانقاد = خلاص غابت شمس طفلٍ ومكروب
تعبت اجر اخطاي في كل ميراد = عطشان ادور من ثرى القاع مشروب
وثالث ليال الذل جا الموت صياد = وسلمت روحي منكسر حال مصيوب
لو شفتني يا بوي ذواي كما الصاد= روحي ينازعها من الموت جاذوب
ودعت دنياكم احسابي من الباد = بس اذكروني للشقاء الذكر مصحوب
هاذي اثيابي لا طفى جمر الأنكاد = رشوا عليها الطيب والسدر مخضوب

صوت من اعماق الثرى غير معتاد = غطى سماي احزان والقلب مشبوب
يابني قضى ربي ولا للقضاء راد = مكتوب نفقد مهجة القلب مكتووب
والله حرثت الأرض لكن ما فاد = والدمع من عيني على الخد مسكووب
اصيح وابكي وارفع الصوت يا أجواد = قلبي من اسباب القهر جالس يذوب
والله وربي والفضاء المتسع كاد = يصير في عيني كما خيط مرتوب
قطعت قلبي وانحرم جسمي الزاد = كني يتيمٍ فاقد الأهل مضروب
يا ليتني تحت الثرى بين الأصفاد = وانت الذي تدعي لي الله ويتووب
الناس لاموني عبيدٍ مع اسياد = ما ذاقوا اللوعات لوعات منهوب
ياليت تدري كيف أنا مثل الأجياد = جنت جنوني واصبح العقل مشذوب
سمٍ سرى فالجسم كالماء بالأعواد = والراس شاب وقطع المشي عرقوب
شربت كأس المر من ذم الأوغاد = ما ذاقو الحسرات حسرات مجدوب
وصلاة ربي عد ما هبت الناد = على النبي الهاشمي خير محبوب