اليوم جايبة لكم قصة تتجنن
لو ما قراتوها يضيع نص عمركم
صح انو القصة كتييير طويلة بس تستحق انها تنقرا
تتكون من 12 جزء كل يوم تقريبا بحطلكم
جزئين
وهاي اجمل قصة قرائتها لحد الان الاجزاء الاولى كلها احداث
الخميس :3:00 الظهر
في بيت غانم سلطان( بو سلطان)
في غرفة أحمد
تعال يا وجه السعد واشطب على الوجه البغيض ..
يا حــيٌك وطلتــك في وجهي بعد ياحيٌـها
تنعشني انعاش الشفاء العاجل للقلب المريض ...
يا أيــها . . تـدري يالبٌـــيك وش يا أيٌـها؟
ما انته بزيٌ الناس واكتبها لك بخط عريض ..
. تبغيني احلف ؟ لا ورب البيت ما انت بزيٌها
احمد قاعد بغرفته و يفكر بـ ميثه وشو ياخذلها لعيد ميلادها ..... احمد عمره 24 يدرس في كليه الشرطه وهاي آخره سنه له ... الشخصيه المحبوبه للعيله واوسمهم ... انسان طيب وحنون ...وهو يحب بنت عمته ميثه بجنون .. يحبها من ايام الطفوله وكبر حبه لها مع الايام ...كانت ميثه محل اهتمامه واعجابه وحتى ميثه يعجبها احمد وتميل له بس ما تبين حقه ...
احمد وهو سرحان فيها تدخل عليه اخته شيخه ...
شيخه أخر عنقود وعمرها 19 ..سوالفجيه واجتماعيه وما عندها اخوان غير احمد وسلطان اخوها العود وهو متزوج وماخذ بنت عمه الهنوف ..
شيخه
لاحظت سرحان اخوها ... لانه كان ينتف شنباته خخخ : ها وصلت بيتهم ولا بعدك عند الاشارات؟ ..شيخه كانت تقصد ميثه بكلامها لانها تعرف انه اخوها يموت عليها ....المهم الاخ بعده سرحان ولا انتبه لكلام شيخه ...
شيخه : حموووود ....... بعد ما انتبه .. ردت ترمسه للمره الثالثه : حوووووووو بو الشباب ...اييييه حموود وصمخ بسك سرحان ..خوفي بس تيبس مكانك من كثر ما تسرح وتفره بالمخده .. انتبه لها احمد ...
احمد( معصب).. : شوووو ؟ وشو شتبين يايه الغرفه ومتى دخلتي ؟ وليش تصارخين جي؟..
شيخه:بلاك انزين غادي جبريت ؟ ... وبعدين انا من ساعه قاعده ارمسك وانبح صوتي بس انت الظاهر غرقان في هيامهم ... ادريبها ماغيرها غزت تفكيرك بنت العمه ميثو الدبه ... شيخه ربيعه ميثه روح بالروح بس تحب تغايظ احمد وتنرفزه
احمد: عن الغلط على شيختج وشيخه العرب يعل كلكم تفدونها
شيخه وتحط ايدها على خصرها وترصص عيونها : نعم اخوي عيد كلامك .. حبيبي لاتنسى ان اسمي شيخه ...وماحد شيخ عليه ... جان هي بتستوي خدامتي هذا شي ثاني
احمد عصب على كلامهما : بتعطني مقفاج ولا ايي ادوسج في بطنج؟
شيخه : بسم الله ؟!! إلا هي سوالف وانت تدريبي ما ارضى على حبيبتي وربعتي ميثاني فديتها ....سيده الغراشيب بنت راشد
احمد: هيه توج
شيخه وتزيد من عندها ..لأن الاخت يايه مصلحه عشان احمد يوديها السوق : يسد انها بتكون حرمه اخوي .. اكيد بتكون أحلى البنات لان اخوي اللي اختارها من بد بنات العالم كلهن .. ياحظج يا الميث جان اخوي بيظويج حرمه وين بتلقين مثله وفي ورحامته
احمد: لا اختيه الغاليه ... انتي وراج شي .. جني اشم ريحه مصلحه ؟
شيخه : لا حمود فديتك ..ميثه ربيعتي ويالسه امدحها عادي ..هيه صح تذكرت ليش يايه غرفتك خخ..جان تنزل راسها اونها مستحيه ..: حمود بليز ودني السوق اليوم
احمد رد انسدح ع السرير ورد ايديه الثنتين ورا راسه : اها ..قولي جي من اول يالعياره اممم آآآآآسف .. انتي ما كنتي تمدحين ميثه على بياض ويه ..وانا مااحب المنافقين
شيخه : اوووه حمود يلا عاااد لا تذلني .. حرام عليك ابوي هب فاضيلي ولا امايه وماعندي حد يودني السوق وسلطان لاهي بحرمته وكله مشغول ...وتقربت من احمد ومسكت ايده تترجاه وتكمل كلامها : وكل واحد منكم يتعذرلي بشي و جان يقاطعها احمد : بس بس خلاص كسرتي خاطري تقولون بشكاره وبيسفرونها غصب ..
شيخه : فديتني اكسر الخاطر بس بشكاره لاء ههههه...
احمد: خلاص عقب صلاه العصر اباج تكونين جاهزه وإلا ماشي سيره..
شيخه : افااا عليك الحين اروح اجهز ..فديتك اخوي مشكوور وتقربت منه عشان تحبه بس احمد فرها بمخده : روحي روحي اجهزي مابي بوسات مصالح ..فقدت هالويه
طلعت شيخه من الغرفه وهي تضحك وراحت تجهز حق روحه السوق ... احمد وافق يودي شيخه السوق لانه حاط في باله ياخذ لميثه هديه وقال اخته بتساعده في الاختيار .. وخاصه شيخه تعرف ميثه شو تحب وتعرف ذوقها >> روحه مصلحجي الاخ لووووول
الخميس 5:50 العصر
في بيت راشد عبدالله ( بو حمد)
ميثه قاعده بالصاله ترمس ربيعتها في التلفون واخوانها فيصل 20 ومنصور 16يلعبون بلاي ستيشن
بعد ربع ساعه صكت ميثه من عند ربيعتها و شافت روحها متملله وما تعرف شو تسوي ...جان تشوف اخوانها مندمجين في اللعب فقالت خلني اغلس عليهم شوي
سارت ميثه ووقفت جدام التلفزيون وتسوي عمرها تدور شي في المكتبه
منصور : ميثه خوزي غطيتي ع الشاشه
ميثه وببراءه: ياربي وين جراجه (شاحن) تلفوني ؟
منصور وبدا يعصب >> صغير بس وايد عصبي
منصور: ميثو الدبه قومي من هني ودوري على الجراجه بعدين
ميثه : يالاثول وين ادور بعدين؟ ابى جراجتي.. الموبايل مفضيه وهي مغطيه ع الشاشه كلها
فيصل : روحي خذي جراجتي
ميثه : لا ما ابى ..ابى جراجتي لحظه خلوني ادور هالصوب وسوت نفسها بتدوس البلاي ستيشن
منصور طاح قلبه ..عاد كله ولا لعبته محد يقرب صوبها .. : ميثه البلايستيشن مو تدوسينه داسج فيل ان شاء الله.. وقام الريال ..خاف ع اللعبه وسار صوبها ويرر شعرها من ورا >> دفش ما يتفاهم
ميثه : آآآآي يالسبال فج ايدك ..شعري أأي
فيصل ناقع من الضحك ع المشهد ... لان منصور ماسك شعرها وهي ماسكه المكتبه
فصيل : هههههه تستاهلين ...اونج يايه تدورين حايتج ولا تلعوزينا ؟
ميثه : انزين فصول قوله يهد شعري .. بيصلعني اخوك الغبي ... وتدخل امهم الصاله
ام حمد : منصور هد شعرك اختك ..مسود الويه نتفت شعرها
منصور بطل ايده من شعر اخته .. : بنتج اللي بدت خلها تتحمل اللي ياها
ميثه : انا بديت يالحمار ؟
منصور : لا يدتي ..طلعت من قبرها ويت تدوس البلايستيشن
ام حمد : لم ثمك واستح على ويهك تييب طاري يدتك الله يرحمها بسوالفكم الطفسه
ميثه وهي تغايضه وتسويله حركات بويهها وايديها : وييييو فشلوه ..القط ويهك
وقام منصور يبلحقها بس هي ركضت وسارت فوق ودخلت حجرتها ..
ميثه20.. بنت غاويه وايد ..حبوبه ومرحه وبنفس الوقت هاديه وخجوله ..
تدرس بالجامعه سنه ثانيه مع شيخه اللي تعتبرها اختها وتوأم روحها ..ميثه وحيده اخوانها ؟؟حمد 23 انسان صايع رقم 1 وتوأمها فيصل ومنصور 16
دونها الساعة تمر الفين عام**ودامني معها تسرّع عدها
ما يوصف ما بها زودالكلام**والجمال اللي بها ما سدها
احمد وشيخه في السياره ورادين من السوق
احمد: اقول شيخو اتصلي بـ ميثه
شيخه : مكلمتنها البارحه
احمد : انزين اتصلي اليوم بعد مافيها شي ..وايد من بارحه
شيخه بنقم: ان شاء الله ..بس هب الحين ..لي رديت البيت وريحت شوي بتصل بها
احمد: لا حبيبتي ... اتصلي الحين وجدامي ..أبى اسمع صوتها
شيخه (معصبه): حمود انت ما تجنع من سيره ميثه؟!! ... اذا ما شفتها ..تسمع صوتها .. وان ما سمعت صوتها تفكر بها ..شو ياخي انت ما تمل ؟
احمد: دام السالفه فيها ميثه ... الشيخ احمد ما يمل وهو يحرك راسه بالنفي
شيخه : حمووود ترى الثقل يمدحونه ..اثقل شوي
احمد : ثجيل غصبن عليج يالعيوز .. يلا اتصلي ولا تتحرين روحتج للسوق كانت ببلاش
شيخه : امممممحق ... طول الوقت ونحن ندور هديه لميثه ..ماخليتني اتشرا عدل
احمد: يلا اتصلي انزين
شيخه : انزيييين .. وتطلع تيلفونها من الشنطه وتتصل لـ ميثه وسوته على سبيكر طبعا اوامر من سلطات العليا >> احمد
ميثا : ألوووووه
احمد بصوت خفيف : فديت منطوقها والله...و فديت راعيه الالوووو
شيخه وهي تأشر حق اخوها عشان يسكت : يامرحبا ملاااايييين ولج ازيدهن مليار ولا يسدن في ذمتي والله
ميثه: المرحب لاهان ولج امثالهن عشر ...شحااااالج ؟
شيخه : بخير ما اشكي باس ومن صوبكم ؟
ميثه : بخير يسرج حالنا ... وخالي و خالتي وخوانج شخبارهم ؟
شيخه : كلنا بخير الحمد لله ..بس اهم واحد عندج ميهود (مريض)
ميثه شهقت : احمممممممد ؟
احمد مرتبش وشاق الحلج
شيخه : هههههه ايوا طلعي طلعي ..وانتي يالحماره عندج احمد اهم من خالج ؟!!
ميثه : هههههه مب جي السالفه ..بس هذا الشبل من ذاك الاسد ... يالله قولي منو مريض الحين ..هميتيني
شيخه : شوقج احمد تعبان هاليومين وتطلع لسانها حق اخوها والاخ عاجتنه الجذبه
ميثه وبنبره حزينه : ما يشوف شر يارب ...يعل فيج ولا فيه هههههه
شيخه : يالسباله بسم الله عليّ ... امبوني كنت مريضه من اسبوع
ميثه : اتغشمر وياج .. بسم الله عليج ... الله يقومه بالسلامه
شيخه : الله يسلمج ياارب ..ويبلغ سلامج
ميثه : ويدي وانا متى قلت سلمي عليه ؟!!
شيخه: ما قلتي بس قلبج اللي قال
ميثه : عدال يا ام العرّيف انتي .. لا تسلمين عليه ولا عندج خبر ..بس تعالي بسألج ..انتي شكلج في السياره صح ؟
شيخه : ها ؟.. هيه فالسياره راده من السوق
ميثه : اووه احيد بحسره تروحين السوق !! منو اللي ترحم بحالج ووداج
شيخه : امم ... احمد اللي شفق عليه هالمره ووداني
ميثه ( مستغربه) : مب توج تقولين اخوج مريض ؟!!
شيخه : هيه انزين ولا زال مريض
ميثه : خافي ربح اخوج مريض وقايلتله يوديج السوق ..امرره مافيج رحمه يا بنت غانم
شيخه وبمكر : ويي خايفه عليه ميثو؟ ... وبعدين اخوي مريض من الحب مو شي ثاني بسم الله عليه هاكو حذالي يشقح ينطح وفيج يسرح هههه
ميثه وهي معصبه : يعلج الساحق الماحق الرصاص المتلاحق ..يالسخيفه يالجذابه
شيخه : هههههههههه بل بل ويقولون اطول لسان في العيله لسان شيخه الفقيره ... تعالي بتخبرج انتي من وين تييبين كل هالسب ؟
ميثه : جي اييني الهام سب يوم ارمسج وانتي ويهج ما ينقاله كلام حلو
شيخه : وانتي بعد مب ويه وحده تقول كلام حلو ... مادري على شو ميت عليج اخويه؟ .. بنصحه يفحص عيونه عن يتندم طول عمره
واتيها كفخه على راسها من احمد
ميثه : موتي حره يا الغياره ودج اصلا بنص جمالي ..
شيخه : وي ميثو عدال على نفسج بتتفجج عظامج من غرورج ..
ميثه : الكلام وياج مضيع مذهبه مو بس ظايع .. يلا جنا أذن المغرب ..بروح اصلي ابركلي من سوالفج اللي مثل ويهج وويه اللي قاعد حذالج بعد
شيخه : وويه اللي قاعده ترمسني بعد خخخ
ميثه : انزين اقول شويخ لا تستوين غبيه مثل عاويدج من اسكر عنج تقولين حق اخوج تقرير مفصل عن اللي قلته وما قلته...بعدين يصدق عمره وراسـه يكبر ( ميثه ما كانت تبى احمد يعرف انها طاحت بشباك حبه وكانت دايما تتغلى عليه وتحاول ما تعبره ذاك الزود )
شيخه : ههههههه لا لا ما بقول تطمني وبالذات اليوم...قولي ليش ها قلتي ليش ....لاني مسويه سبيكر والحبيب سمع كل الكلام هههههه
ميثه افتشلت من الخاطر : ......................والله انكم حركات وسكرت على طول
شيخه : ههههههههههه يحليلها عصبت ...
احمد ساكت بس متشقق من الخاطر
شيخه : حمووود اشرايك نخطف صوبهم ونسلم عليهم ؟
احمد وهو ما صدق خبر : ما طلبتي شي بنت غانم ...بنمر المسيد نصلي ..وعقب بنروحلهم
شيخه وترفع ايدها لفوق : يالله متى ايوني عرب عيونهم سود يحبوني مثل ما يحب احمد بنت عمو
احمد : قصورج بعد ... بدفنج وياه بحوش البيت ..
شيخه : اففف الوحده يعني ما تحلم
احمد : احلمي في قبرج ..
شيخه : عوذ بالله
احمد : شو
شيخه وبصوف خفيف : اففف لاحول
احمد : شووووو
شيخه( مفوله) : وشوايه تشويك ... عنبو شو قلت انا؟ .. يالسه اذكر ربي ما قلت شي
احمد : هههههههه بلاج انزين شوي شوي على عمرج عن نتفجرين علينا
تضحك شيخه على عمرها لانها نادر ما تعصب اصلا مب لايقه عليها العصبيه وكملوا طريجهم ووصلوا المسيد ونزل احمد يصلي وشيخه راحت مصلى الحريم .. وبعد ما ركبوا السياره وساروا صوب بيت عمتهم ام ميثه وقبل لا ينزلون طلب احمد من اخته تقنع ميثه ترد معاهم وتبات عندهم الليله ..شيخه ترددت بالاول لانها تحس ان اهل ميثه ما بيوافقون بس احمد وعدها اذا اقنعتهم بيوديها وين ما تبى >> الاخوان كلهم مصلحجيين خخخخخ
^^
احلى من الجزء اللي فات ^_^
ميثه بعيوني يا خالد..............الجزء الثاني
ناظرني بعيونك حبيبي لا يضيع الوقت .. لا تكتم احساسك حبيبي لا يضيع الوقت ..
الندم قاسي حبيبي واللي اقسى الصمت
احمد وشيخه وصلوا بيت قوم ميثه ..استقبلتهم عمتهم ام حمد ودخلتهم الصاله
ويابتلهم شي يشربونه .. وقالت للخدامه تنادي على ميثه عشان تنزل وتسلم عليهم
في الصاله
ام حمد : هيه زين يوم عبرتونا وييتوا صوبنا
شيخه : والله عمو انا ابي اييكم دوم ..بس ما عندي حد اييبني و الدراسه ماخذه كل وقتنا .. السموحه والله
ام حمد : مسموحه بالحل فديتج والله يوفقكم ويسرلكم ياارب
شيخه واحمد : آمين
احمد : عمتي وينهم عمي والعيال؟
ام حمد : بوحمد ساير العزبه ( المزرعه ) العصر وظني الحين بيي وحمد راقد من الظهر واي شي حاولت اقعده ما طاع يقوم
وفيصل توه من شوي ظهر ويا ربعه ..
بعد شوي نزلت ميثه عندهم وهي مسيحيه من احمد ع الحركه اللي استوت ع التلفون..
ميثه : السلام عليكم .. هلا والله
احمد وشيخه : وعليكم السلام ... تقوم شيخه وتوايه ( تبوس) ميثه وميثه تقرص شيخه بالدس
شيخه : آآآخ ياحماره
ام حمد : ميثو ويهد شنو سويتي في البنت ؟
ميثه : ههههه السموحه دست ريولج ما شفت ..وهي تصد احمد : شحالك احمد ؟
احمد طاير من الفرحه على غزالته " اشهد اني باحسن حال يوم شفتج " : بخير الله يسلمج انتي شخبارج؟
ميثه " والله مفتشله " : الحمد لله يسرك الحال
و تروح تقعد عدال امها ..
احمد : عمتي عرفتي ان ولد اخوج خالد بيرجع من السفر باجر ؟
ام حمد مررره استانست ع الخبر وانملت عيونها دموع : الله يبشرك بالخبر وليدي ... ع البركه ان شاء الله ... علني فداك يا خالد .. اسميني متولهه عليك صج ..واخيرا يارب ... الله يرجعه بالسلاااامه
الكل : آمين
ام حمد : منو اللي بشرك ؟
احمد : اهو بنفسه اتصل فيني اليوم ...
ام حمد : اها ... عيل بنروح صوبهم باجر باذن الله ..
خالد يستوي ولد عم احمد وهم بنفس العمر ... خالد يدرس في بريطانيا من 4 سنوات وفي السنتين الاخيرتين ما رجع البلاد ... شخصيه مميزة تطبع عليها الطيبه وصفاء القلب ... كتوم بس صادق ويدش الخاطر بسرعه
شيخه : عمتي على هالبشاره .. طالبينج طلبه.. قولي تم
ام حمد وهي فرحانه بالخبر ومودها رايق: تم يا بنت الغالي .. آمري فديتج
شيخه : ما يامر عليج ياارب ... وهي تشوف ميثه : احم.. عمتي خلي ميثو ترد معانا ..
ميثه وعلامه تعجب في ويهها : يالله بالستر ... وين ايي معاكم هالحزة؟
شيخه : بناخذج الجهنم الحمرا ههههه ...وين بعد ؟ بيتنا ... تباتين عندنا الليله
ميثه تشوف امها وتتريا جوابها ... هي مش معارضه بس الشور مو عندها ..عند امها ..
ام حمد : ليش بعد ترد معاكم ؟ ترانا بنسير باجر صوب بيت عمج بدر ( العم بو خالد ) وانتو بتاخوونا هناك وبتشوفينها !
شيخه : لا عمو .. انا ابيها تيي اليوم وتبات عندنا وباجر نروح ويا بعض بيت عمي بدر .. الشيمه عمو لا ترديني عشان خاطر رجعه خالد
ام حمد : والله شقول ... لحظه اشاور ابوها مافيني على كلامه عقب
اتصلت ام حمد بــ ريلها .. وابو ميثه عارض بالاول بس وافق بالاخير لان شيخه تعنت لين بيتهم وما احب يكسر بخاطرها ..
في السياره احمد وشيخه وميثه وهم راجعين البيت .. واحمد طول الوقت مشغل اغنيه عيضه " اهمه" ويعيدها بس عشان يقهر ميثه وميثه منقهره
اهمه لو كذب اني ما اهمه .. غلاه يجو ل في قلبه ودمه
يبان الحب في نظره عيونه ..يقول الصج ولا ولد عمه
يغار و غيرته تفضح غرامه ..وتكشف غيرته حتى كلامه
يغار ويقلب الدنيا عليه ..يبيني دوم في قربه ويمه
يبيني دايم بحنبه يبيني ..ولو انه تظاهر ما يبيني
انا ادري فيه وادري عن طباعه..يخفي الشوق في قلبه ويضمه
يكابر وادري انه هو يكابر .. وانا ادري بس لكن دوم صار
ابيه يبوح عن حبه وشوقه..وانا اللي بين خلق الله اهمه
شيخه تبند المسجل : احمدو تراك لوعت جبودنا بالاغنيه ..درينا انك تهمهم .. والبنت طبله اذونها انطرت من الاهداء .. ماتسمعها تأفف من الصبح ؟!
ميثه وخلاص واصله حدها ودها تكفخهم الاثنين بس ساكته وماسكه عمرها
احمد : شسوي يا اختي ..عل وعسى يحسون باللي فيه
شيخه وتصد ورا عند ميثه : ها ميثه خانوم حسيتهم فيهم ؟
ميثه : جب انزين
شيخه : جب ها ؟.. هين ... حمود ... رد شغل الاغنيه ..صمام الامان عندهم بعده ما انفجر هههههه
جان يرن تلفون ميثه ... وكان اخوها حمد المتصل وقالت في خاطرها ..الحين اراويك يالاحمد ان ما خليتك تحترق ..وترد على اخوها
ميثه : هلا والله صح النوم الغالي
حمد : ميثو وينج ؟
ميثه " بل ما ادفشك يا اخوي " : هلا فديتك شو تحاتيني ؟
حمد مستغرب من كلام اخته : بلاج ميثو ؟.. شفيج كانج ترمسين ريلج ؟
ميثه : هههههههههاااي شفيك انت .. احبك كيفي انزين
واحمد ميت غيظ ووده يقوم ويصطرها طراق ويحط اللي تكلمه تحت السياره ويدوسه .. هو صح انه واثق من بنت عمته ..بس بعد متحرقص ويموت يعرف منو هذا اللي ميثه تتفداه وتقوله احبك
نرجع لميثه وحمد
حمد : انزين وينج ؟... دخلت غرفتج وما لقيتج ؟.. وهم في البيت مالقيتج
وينج ؟
ميثه : انا في السياره رايحه بيت خالي غانم ..
حمد : سايره الحين ..؟؟ ومع منو ومتى بتردين ؟
ميثه : حبيبي سايره مع شيخه واحمد وبنام في بيتهم
حمد : انزين ليش ما خبرتيني ؟
ميثه : سوري حبيبي .. قلت نايم وما حبيت ازعجك
حمد : انتي فيج شي اليوم .. !! خلاص عيل ... سلمي عليهم
ميثه : يبلغ ان شاء الله ... شي في خاطرك قبل لا اسكر
حمد : خاطري اعرف انتي شو فيج اليوم؟
ميثه : هههه حياتي والله مافيني شي.. هذا يسمونه دلع بنات
حمد : مالت عليكن وعلى دلعكن الماصخ هذا
ميثه في خاطرها " امحق شو ارد عليه الحين": ..........
حمد : المهم اخيلج الحين
ميثه : اوكي
حمد : يلا باي
ميثه : وانت من اهله حبيبي
حمد : حمد لله والشكر .. اقولها باي تقولي وانت من اهله هههه.. يلا باي
ميثه : هههه وداعت الله حياتي
سكرت ميثه عن اخوها ,,,, وجان تسالها شيخه بفضول قاتل
شيخه : الميث منو كنتي ترمسين ؟؟
ميثه : اخوي حمد ... وهو يسلم عليكم
احمد وشيخه : الله يسلمه من الشر
احمد في خاطره " اشوه ... جني مت وردتلي الروح من جديد ... بس بعد غيران من اخوها ترمسه بكل برقه ونعومه ... ياالله عقبال ما ترمسني جي"
يتبــــــــــــــــــــع
آخر المواضيع
ميثة بعيوني يا خالد 
