ميثة بعيوني يا خالد الجزء9-10


	1


	ميثة بعيوني يا خالد الجزء9-10
	27/03/2008, 02:18 مساءً
	ويييين وصلنا .. هيه يوم كان احمد صوب البحر وسمعه خالد وهو يطري اسم ميثه .. . . . خالد منصدم ومتصلب مكانه... مب قادر يستوعب الكلام اللي يسمعه ... معقوله ؟ معقوله اللي كان يحبها احمد اهي ميثه ماغيرها ؟؟؟؟ وانا .. وانا ربيعه وولدعمه وتوام روحه ..خذتها عنه .؟ آآآخ يالقهر ؟ وعلى طول مشى وركب سيارته وقعد شوي وحط راسه ع السكان وحاول يرتب السالفه في مخه .. جان يرفع راســه مره ثانيه خالد : هيه صح هي ميثه ..لكن كيف ما حسيت.. احمد تغير عليه من يوم ما انا خطبتها وحتى الخطبه ما حضرها!!...بس كلامه يدل ان كان شي بينهم ... شي انا ما اعرفه ... انا لازم اعرف كل شي ..لازم اعرف باللي يدور حواليه ؟ انا السبب في عذاب اقرب الناس لي ؟ آآه كنت اطعن احمد من دون لا ادري ؟ ؟ رد خالد وحط راسه على سكان السياره وهو يحس بتأنيب الضمير وعلى طول توجه على طول بيت عمه .... "ماغيرها شيخه اللي بتخبرني بالسالفه ... لكن كيف اكلمها ؟ واذا ابوها ولا اخوها سلطان دروا اني ياي مخصوص لشيخه شنو بيقولون عني وعنها " ؟ قال بيروح واللي فيها فيها ..ماعندي طريقه ثانيه .. والوضع ما يتحمل التأجيل" سار بيت عمه وظرب الجرس وطلعلته الخدامه وقالها عمي ولا سلطان موجودين ..قالته لا .. فــ قالها تنادي على شيخه راحت الخدامه تنادي على عليها ..شيخه استغربت منو هالريال اللي يبيها وواقف خاري البيت !!! لبست شيخه شيلتها وراحت صوب الباب و تكلمت من وراى الباب : نعم اخويه شنو بغيت؟ خالد: انا ولد عمج خالد يا شيخه !! شيخه وفي خاطرها.. خالد !! : حياك ولد العم .. خالد : الله يحييج بس بغيتج بسالفه بقولج اياها وبمشي شيخه : عاد ما يصير ولد العم عند الباب..تفضل الميلس ع الاقل دخل خالد البيت وشيخه شغلت ليتات الميلس والمكيف وكانت تبي تطلع عشان تييب عصير خالد : شيخه وين سايره ؟! شيخه : بروح اييبلك شي تشربه خالد : والله ما ابي شي ... حلفت عليج يا شيخه شيخه : ليش تحلف يا خالد .. ما يصير ما اييبلك شي خالد : شيخه انا مب ياي اشرب عصير ..بغيتج بموضوع وبمشي على طول وقفت شيخه عند الباب لانها استحت تقعد وياه بروحهم: خير يا ولد العم ؟ شو الموضوع اللي بغيتني فيه خالد : خير ان شاء الله .. والله بنت العم .. انا ياينج اليوم وابيج تنوريني .. وقلت ماحد بيساعدني غيرج وان شاء الله ما ترديني خايب شيخه : ماعاش من يردك خايب ولد العم … واللي اقدر عليه انا حاظره وفالك طيب خالد : فالج ما يخيب بنت العم ..السالفه انا بقولج اياها وانتي فسريها لي .. وقالها السالفه ( الكلام اللي سمعه من احمد) والشكوك اللي ساورته من كلامه واستنتاجه من تغير احمد من يوم خطبته بالضبط … وشيخه طول الوقت ساكته وبعد ما انهى كلامه شيخه منزله راسها :والله مو عارفه شو اقولك بالضبط !! خالد : الغاليه ابيج تقوليلي بس .. ميثه كانت تحب احمد قبل ؟؟.. شيخه متردده تقول عن ميثه وميثه بتكون على ذمته بعد كم يوم ..بس دام هو شاك بالسالفه بتقوله عشان لا يروح بفكره ابعد و ابعد شيخه : امممم .... بصراحه هيه كانت تحبه ... ولو انها في عمرها ماقالتلي فالويه ..بس افعالها تأكد هالشي ... وانا دايما كنت اسولفلها عن احمد واقولها انه يحبج وهي ما كانت تعصب بالعكس كان يبين عليها الخجل وان الموضوع ما يضايقها وهي احيانا كانت تنشد عنه ... وجان تتنهد : الظاهر هي ما كانت تحب اخوي بس كان مجرد اعجاب... خالد ( معصب): شو اعجاب بعد ... !! ليكون تتحسب احمد فنان ولا لاعب كوره تنعحب فيه ؟... شوفي بنت العم ..مو تتحسبين اني معصب لان احمد يحبها ولا هي يمكن تبادله هالشعور!! ... وبنبره حزن : بالعكس انا متحسف ع اللي استوى ولا ابى اكون السبب في عذاب ولد عمي اللي شاري ميثه بماي عيونه وهو اولى بها مني ...وميثه دامنها معجبه في اخوج اكيد كانت تحبه... مادري كيف وافقت علي ؟!! يمكن اهلها جبروها ... بس دام انا اللي بديت بالموضوع انا اللي بنهيه .. شيخه( متوتره) : بس يا خالد يمكن هي الحين ما تبى اخوي خالد : حتى لو ما تبى احمد .. كيفها مشكلتها ..بس انا مستحيل اكون سبب في عذاب اعز شخص بحياتي ... واللي يجرح اخوج يجرحني قبل ... و مصيرها تعرف ان احمد ما يتعوض ... وقام من مكانه وطلب رقم ميثه من شيخه ... شيخه ما قدرت ترده لانها شافت ويه خالد وكان امررره معصب والشر يطلع من عينه .. . . . من زود شوقي يعشق الصب.. وأون ونـــاتٍ أليــــمه عزاّه من مثلي تعـــــذّب .. ومن الوصل نفسه حريمه ميثه كانت يالسه بحجرتها وترمس الهنوف اخت زوج المستقبل في الموبايل الهنوف : شحالج مرت اخوي ؟ ميثه : بخير بس صبري بعدني ما استويت زوجته؟ الهنوف : عادي ما تفرق كلها جم يوم وتستوين زوجته ان شاء الله ميثه : ان شاء الله الهنوف : تعالي انت للحين فستان ملجتج ما خلصه المصمم صح ؟ ميثه : اتصلت به اليوم وقال بيجهز باجر الهنوف : ومكياج بتسوينه بالبيت ؟ ميثه : الشعر بسويه في الصالون لكن المكياج بالبيت ... الهنوف اباج يوم الملجه تيين بيتنا من وقت و تحطيلي مكياج الهنوف : ولا يمهج حبيبتي ما طلبتي ..وبعدين انتي ما تحتايين مكياج ... ماشاء الله عليج حلوة وتسكتين ميثه مستحيه : عيونج الحلوة الغاليه الهنوف : اقول ميثه بعد ما يحتاي اقولج ..اخوي بيدخل ان شاء الله ميثه : لالا شو يدخل استحي منه الهنوف : شو تستحين هذا ريلج حلالج ملالج ميثه : ههههه ولو ..بعد استحي الهنوف : على راحتج ...بس بنشوف ليوم الخميس يوم تغيرين رايج ميثه : ما اظن بغير رايي وخبري امج اني ما ابي خالد يدخل علي مافيني تسحبه وياها وتييبه عندي الهنوف : هههههه شو عنز تسحبه ميثه : ههههه شو عنز بعد ... خلاص سجلت وبخبر عليج خالد الهنوف : ها ميثه من الحين تواشين علينا ميثه : ابوي انا ما انافق ... من الحين اراويكم الحين الحمرا الهنوف : اشوا بعده ما كتبنا الكتاب رن خط ثاني عند ميثه وطلع رقم غريب فسولته طاف .. بعد دقيقه بعد رد نفس الرقم يتصل وما ردت عليه ميثه لانها متعوده ما ترد على الارقام الغريبه ابد .. ميثه وهي تكلم الهنوف : اففف شو هالازعاج ياربي الهنوف : شسالفه ميثه : مادري رقم غريب ظاهر عندي بالخط الثاني وهالمره الثانيه الهنوف : انزين ردي عليه ميثه : لا لا ما احب ارد على الارقام الغريبه الهنوف: تلقين يطلع هندي مغلط ميثه : لا ما اظن هذا رقم حلو ومكرر وصلها مسج من نفس الرقم ومكتوب " ميثه ردي عليّه اباج ظروري " قرت المسج جان تسكر عن الهنوف وترد تتصل بالرقم الغريب . . . اناجي غربه الليل وشجوني واراجع في هوى قلبي قراري عسى ما تكون خانتني ضنوني او انه خاب في الحب اختياري خذ خالد رقم ميثه وطلع على طول من بيت عمه ركب سيارته وابتعد شوي من فريجهم وسار مكان بعيد وصفت سيارته عشان يتصل بميثه … اتصل اول مره وماحد رد عليه .. رد اتصل مره ثانيه بعد ماحد رد .. طرش لها مسج وكتب : ميثه ردي عليّه اباج ظروري بعد دقيقه اتصلت ميثه .... خالد بدأ بالكلام وكله جديه : السلام عليكم ميثه استغرب وما عرفت منو : وعليكم السلام والرحمه خالد : انا خالد خطيبج وفي خاطره يقول للأسف خطيبج ميثه وبنعومه ودلع: هلا خالد طلعت انت ؟ وين يبت رقمي ؟ خالد : مب هاي السالفه يا ميثه ... بسألج سؤال واتمنى انج تجاوبيني بكل صراحه ميثه وهي امرره خايفه : خير يا خالد شسالفه ؟ خالد : جاوبي بصراحه وبس ميثه : اوكي تفضل اسأل خالد : ميثه انتي اهلج جبروج توافقين علي ؟ ميثه متعجبه من سؤاله : طبعا لا يا خالد خالد : حلفي ميثه : والله العزيز ان ماحد جبرني عليك خالد : خلاص عيل .. قولي حق ابوج باجر ..انج ما تبيني ميثه : خالد بسم الله من اولها تفاول علينا؟!! خالد : انا ما افاول ونفذي اللي قتلج عليه ميثه : خالد شفيك شارب شي ؟!! خالد ومغمض عيونه : اقولج باجر تقولين حق ابوج انج ما تبيني ميثه : خالد انت شقاعد تقول ؟!! شو مستوي ..فهمني !!! خالد : مب مستوي شي ..بس خلاص ما بى اتزوج .. هونت ما ابى ميثه : نعم شو قلت يالشيخ ؟… وانت على بالك بنات الناس لعبه في ايديك تخطبهن وعقب تهون عنهن خالد : وانتي عى لبالج قلوب الناس ومشاعرهم لعبه في ايدج ووقت ما تملين منها تشترين غيرها ميثه : شووو؟ شقصدك ؟؟اي قلوب اي مشاعر اللي ترمس عنها خالد : انا اقولج …قلب و مشاعر انسان دريك الموت والسبه انتي …قلب ومشاعر انسان حطيتهم تحت نعالج ودستيه جدام اقرب الناس له .. وهـ الانسان ريااااال ..ريال ماهزه ريح غير غدرج فيه …شخص اعتبريه ميت ولا هو ميت ..ذبحتيه من يوم ما اانتي وافقتي عليه … ميثه ودموعها تطيح ورا بعض : تقصد احمد ... بس انا ما احبه .. خالد : قصي على غيري يافلانه … كنتي تحبينه وانا متأكد ميثه وهي تصيح : انزين حتى لو كنت احبه ..هذا كان اول خالد : وانتي عندج الحب له وقت محدد؟ ..الحب الحقيقي ما يغيره لا ماضي ولا مستقبل ..الحب الحقيقي انج توفين لشخص مهما كانت الظروف ..ماهو سلعه بسوق ولا هو اثاث نغيره مع الايام اذا جدم … اسمحيلي يا بنت عمتي …اذا هان عليج احمد فانا مستحيل يهون عليه ولا ارضى تكون سعادتي على حساب شقى اعز الناس عليه … ومثل ما قلتج ..خبري اهلج باجر ..باجر هاا .. انج ما تبيني … ميثه( تصيح) : انزين اخاف ما يطيعون وتستوي حساسيه بين العايله واكون انا السبب وتم يرتفع صوب صياحها خالد : انتي قوليلهم وخلي الباجي عليه وما راح يستوي شي اكبر من اللي سويتيه .. يلا مع السلامه وصك بويهها صك خالد عنها وحط راسه ع السكان وهو يتنفس بقوة ...خالد طيب وحنون وفي حياته ماصار بهالقساوه ..هو ما قال شي غلط ..بس ما تعود يرفع صوته ويتهاوش مع حد وخصوصا مع الجنس الناعم .. يمكن ماكان جي قبل لا يسافــر ... بس تغربه عن اهله خلاه يكون اكثر حنون ورحيم عليهم ..خالد في الاساس قلبه كبير كبييير ويشل حب كل الناس ..ذكر ربه وتعوذ من ابليس وكمل طريجه للبيت ..وهو مستضيج حده من يومه الكئيب هذا ... ميثه بعد ما صك خالد بويهها.. كانت قاعده ع السرير ودفنت ويهها في المخده وتمت تصيح .. ماتدري على شو تصيح بالضبط بس كانت تصيح ونفسها تلومها ( آآآه يا ميثه تصيحين على حب عشتيه كم شهر وراح عنج .. تصيحين على شخص ما تعرفين اذا كنتي تحبينه صج ولا هو مجرد اعجاب ..تصيحين لانج انهنتي من شخص رسمتي احلامج الورديه معاه وكأنج نسيتي انسان يعيش نفس صدمتج لكن اضعاف واضعاف …تصيحين لانج فقدتي شخص واحد وهناك شخص فقد الناس كلها يوم رحتي انتي عنه ..) تمت ميثه تشهق من الصياح …كل دمعه تنزل منها تصحيها على ما هي فيه ..كل دمعه تنزل تعاتبها على اللي سوته فـ أحمد .. وكلام خالد مازال يرن في اذنها وكيف نبره صوته وهو يتكلم عن احمد وكيف يدافع عنه ويقدر مشاعره ربيعه اكثر عنها ... ظل ضميرها يصحى من غيبوبته شوي شوي واعترفت انها ظلمت في حق انسان ماشافت منه الا كل خير ولا عمره فكر يأذيها ...وحست ان دعوه مظلوم صابتها وان الله ينتقم منها على فعلتها .. ويوم لك ويوم عليك وهذا اليوم عليج يا ميثه .. بالباجر خبرت ميثه اهلها انها ما تبى خالد … ابوها ما عصب لكن امها تضايقت وحمد شال البقعه برده فعله حمد : لا مب عـ كيفج ست الحسن والدلال … ملجتج هالخميس و توج حضرتج يايه تقولين بقواة عين انج ما تبينه ؟!! بوحمد : حمد هد اعصابك وكل شي بالهداوه حمد : وهاي خلت فيها هداوه ؟ بعد ماصكّت الحلقه ع الابطان حضرتها تقول ما تباه ؟؟!!!! بوحمد يصد يشوف ميثه : انزين يا بنيتي وراج ما تبينه ؟ خالد ما عليه زود وما يعيبه شي !! و انتي كنتي موافقه بالاول !!! ميثه وهي ناكسه راسها : خلاص ابوي ما ابيه صليت استخاره وانا مب مرتاحه .. حمد : توج يعني ما ارتحتي ..؟!! .بتاخذينه يعني بتاخذينه … تبين تفشلينا جدام العرب .. ميثه وبدت تعصب : ياخي ماباه والزواج هب غصب حمد : تخسين وتهبين تلقين واحد شراته … حمدي ربج ليل ونهار يوم خالد فكر يخطبج بوحمد : خلاص يا حمد ما نقدر نجبر البنت والزواج قسمه ونصيب .. حمد: ابويه لا تخربها زياده ..يسد البزى ( الخقه والدلع) اللي هي فيه .. الريال ما شفنا شي يعيبه ... على شو ترفضه بعد هالبطرانه؟ ميثه : انت ما يخصك فيه ..اخويه العود ع العين وعلى الراس لكن تتدخل في مستقبلي اسمحلي ..هاي حياتي وماحد له شغل .. وبعدين انا مصليه استخاره .. يعني مستخيره ربي وهو وحده سبحانه يعرف وين الخير لي >>جذب بس كلام مفيد حمد وصل حده وكان يبى يقوم يظربها بس لان امه وابوه قاعدين ..شل بنفسه وطلع عنهم وهو امرره مغيظ عليها ام حمد : لا حول ولا قوة إلا بالله .. يا بوحمد انا مالي ويه ارمس اخويه ..انت رمسه وقوله .. بوحمد : لا يا حرمه ..هذا اخوج وتنيازون وانا اقول انت رمسيه احسن ام حمد : ها ميثه ..هذا آخر كلامج .. البنت مالها إلا بيت ريلها ..والزواج ستر وغطا .. وواحد مثل خالد ما ينرد ميثه : ياامي انا مصليه استخاره وانا مرره مب مرتاحه ولا خالد ولد خالي ماعليه خلاف ..كل بنت تتمناه …وانا ما قلتلكم هالكلام إلا وانا مقتنعه ان اخيرلي واخير له …والزواج قسمه ونصيب وخالد مب من نصيبي ولاني من نصيبه ... الله يوفجه ببنت الحلال اللي تستاهله .. بنفس اليوم كلمت ام حمد بو خالد واستسمحت منه وقالتله البنت مب مرتاحه .. وبوخالد تضايق لان كان يبى بنت اخته حق ولده ومب عارف كيف يقول لولده .. فقال حق ام خالد عشان تقوله في بيت قوم خالد خالد : اما الزواج قسمه ونصيب وانا ماعندي اي اعتراض ام خالد : ماهقيت ميثه تردك وملجتكم ماباقي عليها شي خالد : اما قلتلج الزواج قسمه ونصيب وكلن ياخذ نصيبه وانا والله هب زعلان … باجر بلقى غيرها .. وزين انها قالت الحين قبل لا املج عليها ام خالد : الحمد لله على كل حال... شرايك بــ ناهد بنت مبارك الــ* خالد : هههههههههه الله يهديج يا امي ..مداج تفكرين بوحده ثانيه؟ ام خالد : شسوي يا ولدي ما ابى احد يكسر بخاطرك او يزعلك خالد وهو يقوم ويحب راس امه : لا خليت من هالشوف والله ..اللي تبينه بيستوي .. وما يصير خاطرج إلا طيب .. ام خالد وهي رافعه ايدها : يالله يا كريم انك تعطي ولدي على قد نيته ياارب ... فديتك يا خالد ليت الله رزقني باخو لك ويصير امررره مثلك خالد : يالله ان شاء الله تشوفين عيالي ويصيرون كوبي مني ام خالد : كوبي مني شو بعد ؟!! خالد : ههههه نسيت اني اكلم عيوز ما تعرف في الانجليزي شي..فديت ام خالد والله ... كوبي مني يعني نسخه مني يشبهوني.. ان شاء الله عيالي يطلعون نسخه منسخه من ولدج خالد بدر الــ** ام خالد مبتسمه : امييييين ياولدي . . . هقيتك تفهم الاحساس ... وانا روحي بك اهتمت فرحت لشوفك بلا قياس ..وعيني صورتك ضمت وفجأة حل فيّه الياس .. كذا نفس الهنا انغمت لقيتك يا اعز الناس .. عليك الناس تتشمت مروا اسبوعين ع السالفه والخبر انتشر … واكثر واحد استغرب احمد احمد بغرفته ومعاه اخته شيخه : ياترى ليش ميثه رفضت خالد .. ؟!! ولا بعد.. قبل الملجه بجم يوم ؟ !! شيخه تقريبا تعرف السالفه بس ماحبت تبين له : علمي علمك احمد : انزين انتي ربيعتها ووايد معاها..سئليها ؟!! شيخه : الصراحه استحي اسألها وخصوصا انه استوت بينا زعله عقب خطوبتها على طول … احمد: وللحين ما ترمسون بعد ؟!!! شيخه : امممم الصراااااحه لا احمد عوره قلبه على ميثه : لا حراااام شويخ .. لاتخلينها بروحها ..اكيد هي محتاجتنج الحين ... ماعندها حد غيرج شيخه : طول عمرك تراعي شعورها … احمد: لا تتحسبين اني نسيت اللي سوته ميثه فيني ..لكن بعد ما تهون اني اشوفها وحيده وما عندها حد ...شو الحين ما بتروحين عندها ؟ شيخه : اممم بشوف احمد: لا تشوفين ..روحي جهزي بوديج عندها شيخه وهي تبتسم : تصدق متولهه عليها واااايد احمد: عيل شـ تتريين ..قومي يلا شيخه وهي تقوم : اوكيك في غرفه ميثه ميثه في هالفتره وايد استوت هاديه ومنعزله عن الكل ... وتحس انها خسرت الكل .... كانت ميثه قاعده وتفكر … وتقول في خاطرها : آآآه يالميث استويتي وحيده … لا حبيب ولا رفيق ولا احد ع الاقل يسمعني ..تذكرت شيخه ..: "تولهت عليج يالدبه ولسوالفج اللي ما تنمل ولايامنا الحلوة "ونزلت دمعه حزينه ووحيده مثلها..… مسكت تلفونها وسارت على اسم شيخه وكانت تبى تتصل بها بس في الاخير غيرت رايها ... وبعد عشر دقايق قامت وسارت تتوضأ عشان تصلي العشا وبعد ما خلصت صلاه قعدت تقرأ اذكار ما بعد الفروض وشوي وحد يدق عليها الباب ميثه مندمجه في القرايه : دش انفتح الباب وميثه بعدها تقرا اللي في ايدها ..استغربت انه ما تكلم رفعت راسها إلا وتشوف شيخه وهي تشوفها بكل حنان ورقه وابتسامه حلوة ... ميثه ما صدقت وعلى طول قامت من محلها وسارت صوبها ولوت عليها بالحيل وهي تصيح.. صياح يهز النفس والخاطر ...كانت مررره متولهه على شيخه ..متولهه على بنت خالها وربيعتها واختها اللي يت بوقت كانت ميثه بامس الحاجه لها ..وحتى شيخه وحشتها ميثه وايد وكان الخلاف مسوي ثغره كبيره في حياتهم شيخه : ميثاني بس فديتج قطعتي قلبي وميثه بعدها لاويه عليها : واااي فديتج شويخ والله ولهت عليج وايد شيخه : حتى انا ولهت عليج والله ... سامحيني حبيبتي ميثه وهي تخوز عن شيخه وتمسح دموعها : انتي اللي سامحيني الغاليه والله العالم اني ندمانه على كل اللي صار ... ابيكم تسامحوني ادري اني غلطت بحق اخوج وايد واباه يسامحني اليوم .. شيخه وهي تعقد ع السرير : مسموحه الغاليه وماحد معصوم من الغلط واهم شي الواحد يعترف يغلطه ويتندمه عليه .. ميثه تروح تقعد مجابل شيخه وتمسك ايديها الثنتين: انا مالي غيركم ..رحت فوق ولا نزلت تحت.. مردي لكم .. اعترف اني كنت انانيه ..فكرت بنفسي ونسيت غيري وتقاطعها شيخه شيخه : خلاص ميثه اللي صار صار والحمد لله على كل حال وتحاول تغير الموضوع وتلطف هالجو الكئيب : اوييه بلاه ويهج جي غادي؟ ...عنبو مصفره ما خابره تشجعين نادي الوصل خخخخ وتضحك ميثه وتمن يسولفن ساعه وعقبها اتصل احمد باخته وقالها تطلع خاري لانه يترياها في السياره في السياره احمد واخته وهم رادين البيت شيخه ساكته واحمد بعد ساكت ..شيخه في خاطرها تقول ( غريبه ما سأل عنها ؟ ...اممم خلني اسأله ) شيخه : احم .. احمد ؟ أحمد : ها شيخه : غريبه ما سألت عنها !!! تم احمد ساكت وعقبها قال : ما تهمني شيخه تفاجأت ..(بسم الله بلاه انجلب حاله مره وحده ..مو هو اللي قالي اسير عندها ؟!! واتطمن على حالها؟) شيخه : ماتهمك ؟!!!!! عيل وراك تقولي سيري عندها ولا تخلينها بروحها ؟ أحمد : موضوعي مع ميثه منتهي من زمان وابيج تكونين وياها ولا تتغير علاقتكم... يعني بالمتخصر المفيد يالشيخه ... ما ابى اللي استوى وياي يأثر بعلاقتج معاها .. شيخه : افهم من كلامك انك شليت ميثه من بالك ؟!!! احمد شاف اخته ورد شاف الدرب وهو يتنهد قال : يقولج اللي ما يباك لا تصيح تبغيه !!! الجزء العاشر بالطريج ^^ ________________________________________ احبك بس انساني .. لاني احبك اقولك انساني.. روح واهجر .. روح وتنساني .. لاني احبك ابيك تنساني .. دام الفرح بيجيك من شخص ثاني .. دامك تحبه وسعادتك وياه.. دام الضحكه بتدوم معاه.. روح والله لاضحي لاجل تنساني ..انا اعرف دمعتي تموت باحزاني .. حبيبي الضحكه في وجهك تقتل الامي .. تخليني ادوس على قلبي لاجل تنساني .. تخليني اضحي بعمري وحبي واحلامي .. لاجل سعادتك الحزن يحلالي .. اشوف الجمر بقلبي ذهب غالي ..و لا تغرك دمعتي هي فرحه امالي .. حبيبي هذا هو الحب وانا المثالي ..اني احبك وانت بحضن شخص ثاني بعد شهرين من الاحداث السابقه علاقه شيخه وميثه ترد مثل اول ..ميثه متندمه وتحاول تصلح اللي كسرته بس هي كسرت قلب صعب ينرد مثل قبل ... واحمد ابدا ما يكلم اخته عن ميثه مع انه شيخه كانت تتكلم عن ميثه جدام اخوها ومن كلامها عرف احمد انها متندمه وانها تبى كل شي يرجع مثل اول بس اهو ما عطاها اي مجال..وحاول ينساها باي طريقه ... ميثه اهانته وكرامه الريال فوق كل شي ... الفتره اللي قضاها في فتره خطوبتها علمته اشيا وايد ...والحب مب اي واحد يستاهله ..واللي يغدر مره ..يغدركم مره . . . في يوم من الايام كانت ميثه يايه بيت قوم خالها بو سلطان وقاعده بالصاله مع شيخه شيخه : قومي نروح فوق غرفتي بدل ما نحن قاعدين بالصاله ميثه : انزين وينها امج ما سلمت عليها .. شيخه : امي تصلي وتتطول في صلاتها.. يلا مشينا ويقومن البنات عشان يروحن غرفه شيخه و احمد نازل من الدري طبعا سوالها اكبر طاف و خطف صوبها من دون ما يشوفها وميثه وهي تشوف شيخه بنظره حزن : شيخه شفتي اخوج ؟ شيخه : شوسوي ؟حاولت اليّن قلبه بس ماشي فايده ..تصبّري عليه شوي ميثه وشوي بتصيح : والله ملييييت ..شنو اخوج ما يمل ..ما يحس فيه... غلطنا فــ حفه وتأسفنا ألف مره .. خلاص خله يسامحنا .. ابوي انا بروح اواجهه ومشت ولحقت ورا احمد قبل لا يطلع بسيارته . . . عَوّضوك ْبغيابي لا تقول انّي َوحَشْتك لا تجاملْ دخيلك في شعور يْعَنيني بَسّ يكفي كفايه لا تمادى عَرَفْتك خَاين الحب مَا له في فوادي حَنيني إنت ياللي بعيني حِلْم عمري رسَمْتك وكيف تجرح خفوق يعشقك من سنيني أحسبه زاد حبّي في غيابي وْحسَبْتك ما تجاهَلْ وِدَادٍ كان بينك وْبيني احمد يشغل سيارته وميثه تركض ويايه صوبه وهي واصله حدها ودموعها في عيونها : احمــــــــــــــــــــد احمد ويسوي نفسه يعدل الغتره والعقال ومعطنها بو لابس (طاف) ميثه تتقرب صوب باب سيارته : حرام عليك احمد ..ليش تسوي فيني جي ؟ أنــا ....ويقاطعها احمد احمد وبكل احتقار: انتي شو ؟ انتي بالنسبه لي ولا شي ..شوفي حياتج مع غيري ... انا ريال وجريب اخطب وخطف من صوبها وهو مسرع ... ميثه مب مصدقه اللي سمعته من احمد....يت صوبها شيخه وهي تحط ايدها على كتف ميثه ... شيخه: ميثاني حبيبتي خلينا ندخل داخل ميثه تصد لـ شيخه : قال بيتزوج يا شيخه .. قال بيتزوج!!!.. وتبدأ في الصياح . . . انت مو يمي انا ياما بكيت .. يا ما بكيت من صبري وعناي زاد علي همي وانت ما دريت.. انا مت وحييت وانت مو معاي في السياره احمد مستغرب من هالقساوه اللي طلعت منه ..صج انه كان قاسي عليها قبل ..بس ما كان يقدر يقول شي في ويهها ... آآآه يا ميثه انتي اللي بديتي ولازم تاكلينها .. والله لين اليوم احبج ومب قادر اشلج من بالي ... بس انا ليش قلت لها اني بخطب ؟!! كيف جذبت عليها ؟!! يلا هب مشكله خلها تحترق وتحس شوي باللي حسيته انا ...كمل طريجه وسار ميلس( ديوانيه) ربيعه بطي بن صالح وكانوا يتريونه الشباب هناك ...طبعا قعد معاهم وسولف لكن ميثه كانت شاغله تفكيره طول الوقت !! نفس اليوم ع الساعه 10 المسا ردت ميثه بيتهم وحمد اللي وصلها بس ما دخل سيارته داخل لانه عنده شغل ومستعيل ..المهم نزلت ميثه عند الباب وراح حمد عنها ... مروان ربيع فيصل قاعد بالميلس يتريا فيصل يجهز عشان يطلعون... دخلت ميثه الحوي ومشت بخطوات بطيئه وكان شكلها تعبان وملامحها هاااديه .. طاحت شيلتها على كتفها .. ومن التعب كانت قصتها نازلة ومغطيه نص ويهها .. مروان بنفس الوقت طلع من الميلس عشان يشغل سيارته ويتريا فيصل بالسياره احسن .. يوم بغى يطلع شاف وحده تمشي بالحوش و بتدخل البيت ... على طول رد ودخل الميلس وهو متفاجأ.. بالصراحه تخبل الريال ع الغزال اللي شافه من شوي ... ( يا سلاااام محلاتها والله .... منو هاي ؟!! اكيد اخته ميثه ... يالله هذي ميثه ؟؟؟ كيف احلوت ماشاء الله .. ملاك مب ادميه) مروان ربيع فيصل من ايام الطفوله ويتذكر ميثه لانها كانت تعلب معاهم يوم كانوا صغار >> اكيد كانوا صغار كان مروان فعلا متخبل على ميثه ... عجبته من الخاطر وحبها من اول نظره وقال في خاطره لا يمكن يفرط باخت ربيعه .. وبيكلم امه عشان تخطبله هالغرشوبه نفس اليوم الساعه 2 الفجر احمد رجع البيت ودخل غرفته وبدل ثيابه ولبس بجامته وطاح ع السرير بعد 10 دقايق دقت عليه شيخه الباب احمد :تعالي شويخ دخلت شيخه وتقربت منه وقعدت ع طرف السرير مجابلتنه : شحالك احمد ؟ احمد : بخير الحمد لله .. شو مقعدنج للحين ما وراج جامعه ؟ شيخه : بلى بسسس ......... احمد : لا تبسبسين ؟ رمسي شفيج؟ شيخه تشوف اخوها بنظره حزينه وعيونها تلمع.. وترد تنزل راسها احمد استغرب من نظراتها : شيخه شفيج ؟ شسالفه تكلمي لا تحرقين اعصابي ؟ شيخه : احمد شو استوابك ؟ احمد وهو عاقد حواجبه : شو استوابي ؟!! شيخه : احمد لين متى تحاول تتهرب من ميثه ؟ ليش تحاول تتظاهر بعكس مايدور في خاطرك ؟ احمد يحاول ما يشوف في عين اخته ويدور على شي يلهي نفسه به : انا اتهرب منها ؟!! وانا اتظاهر بالعكس ؟!! هههه وليش ان شاء الله ؟!! شيخه وهي تقوم من عنده : احمدووه بس خلاص يكفي تمثيل ... لا تحاول تنكر او تتهرب ... واذا تهربت من ميثه وين تقدر تتهرب من مشاعرك وواقعك .... انا ادري انك تحب ميثه احمد : شويخ انتي اصلا ما تعرفين شي شيخه : احمدووه انا مب يايه اسويلك تحقيق او اعاتبك ... بس يا اخوي لا تحاول تسوي شي غصبا عنك ؟ ..حرام عليكم ليش كل هذا يستوي ؟ ليش كل ما استوى واحد منكم شو زينه ينقلب حال الثاني ؟ !!! احمد : ميثه هي اللي بدت شيخه : يعني انت تعترف انك تكمل عنها ونتنقم .. حمود انا ما انكر انك انهنت والوم اللي يلومك ..بس خلاص اللي صار صار .. ودام ميثه تحبك وانت تحبها ليش كل هذي الصدعه ؟... بس خلاص كفايه نكد وحزن ..ياخي السعاده جدامكم ليش ترفسونها بريولكم؟ !! احمد : ............... شيخه : احمد بقولك شي قبل لا اطلع وحطه في بالك زين .. دام ميثه في ايدك الحين لا تفرط فيها .. يمكن تكون هاي فرصتك الاخيره صدقني اذا راحت هالمره ما ظني بترجعلك مره ثانيه ..وهي وايد انذلت وكل شي له حده .. وبييك يوم تقول ليتني وليتني واذا فات الفوت ما ينفع الصوت ... وطلعت شيخه من الغرفه احمد بعد ما طلعت شيخه من غرفته تنهد بالقو وقام من على السرير و سار فتح سدته اللي فيها كل اشياءه المهمه والغاليه على قلبه وطلع صوره ميثه يوم كان عمرها 10 سنوات وهو واقف معاها وشيخه وحمد بعد ... ابتسم و مرّر ايده على ويهها ..خذ الصوره وطفى الليت وشغل الاباجوره و انسدح على السرير .... تم فتره يشوف صورتها فتره وهو يفكر بوايد اشيا ... وعقب باس الصوره وحطها تحت المخده .. وراح في سابع نومه .. . . . بعد اسبوع .. الاربعاء : 30: 8 مسا ء لو تبكي عيوني الدمع الدم ..مغرم انا بك حيل مغرم لو الثمن بالحب روحي .. ما اندم انا ع الحب ما اندم اهواك بد الخلق فالكون .. في حسنك الخفاق مفتون مجنون انا بالحيل مجنون ..خله الملا والناس تعلم بصبر على بعدك وقربك ..مسجون انا والسجن حبك مسجون والسجان قلبك ..بيده يعذبني ويرحم مالوم قلبي بالموده .. والحب له جزره ومده انا احمد الله لي بحمده .. خلاني بالصبر انعم ميثه من بعد ذاك اليوم كله حابسه عمرها بالغرفه ... كانت اول ما ترجع من الجامعه تسير الغرفه وتصك على عمرها وطول الوقت تصيح وتطلع بس خمس دقايق عشان امها ما تقعد تسويلها محاضره..ويوم الاربعا ما داومت فتمت طول اليوم في الغرفه وقافله على نفسها .. ام حمد وهي تدق الباب على بنتها : امي ميثه قومي اكليلج شي ميثه وعيونها متورمه من الصياح : امي فديتج مابي مب مشتهيه ام حمد : انزين فتحي الباب ميثه : امي بنام الحين ام حمد : انزين فتحي الباب برمسج مشت ميثه تفتح الباب وهي تحاول تغطي ويهها عشان امها ما تلاحظ انها صايحه ام حمد وبعد ما انفتح الباب : بسج رقاد يا بنيه مب زين .. وبسج دلع ..بخلي الخدامه تييبلج شي تاكلينه ..من البارحه ما طاح شي في بطنج ميثه ماتبى امها تلاحظ ويهها : اوكي عشان خاطرج باكل .. بروح اغسل ويهي ... ميثه بعد ما تعشت ..طبعا لقمتين وشبعت .. ردت تفكر في احمد خلاص احمد غزى تفكيرها وان حاولت تنسى دموعها تذكرها فيه .. تحس عمرها متشتته ..كل يوم تلوم نفسها على اللي سوته باحمد وندمانه قد شعر راسها على لانها فرطت بحبه وودها انه يسامحها ويرجع لها ..بس كيف وهي ان تقربت منه خطوه هو يبتعتد عنها اميه خطوه ...ميثه و هي تكلم نفسها : صح احمد بيتزوج ؟!! احمد نساني ويفكر بغيري ؟!! وحده ثانيه بتاخذ مكاني في قلبه ؟ لا ياربي ما اقدر اتخيل .. احمد يحبني انا ... انا حبه الاول والاخير .. هو بس جي يتغلى عليه ..والله غالي يابوشهاب وما حد بعدك انت غالي .. كفايه ما فيني زود احتمال .. و ردت تصيح مره ثانيه .. بعدين قررت تشكي لـ خالد يمكن يساعدها ...ترددت بالاول وقالت في نفسها : صج ويهي لوح وطابوق بعد بس ما عندي شي اخسره .. طرشت له مسج وكتبت فيه " علمني بـ صاحبك الصلوح قسى وانا احسبه حنــون ولي خسرته انا وش به مربوح كيف يجفى وكيف عليه اهون" خالد كان يلبس ثيابه بيطلع ويروح المسيد لـ صلاة العشا جان يسمع صوت المسج قرى المسج ..وتم يشوف الرقم وحس انه مو غريب عليه ..حاول يتذكر صاحب الرقم جان يوصله مسج ثاني من نفس الرقم " ولد عمك نساني .. ما يحبني وانت تقول انا دنيته كلها .. وين كلامك عنه ... احمد صار اقسى من الجبل عليه ..يكرهني ولا وده يشوفني حتى " عرف خالد انها ميثه بنت عمته ..وفهم قصدها واستغرب من معامله ولد عمه لها .. بس بنفس الوقت ما لامه على فعلته ..هو حر بحياته بس قال لازم يرجّع الامور لمجاريها وجان يطرش لها مسج يواسيها " احمد مرده لج .. وان ما رد .. انا اييبه لج^__* " ردت عليه ميثه : " كيف يرد وهو بنفسه قالي انه بيخطب " تعجب خالد من هالكلام !! اي خطوبه بعد !! ليكون صج بس رد عليها : " خلي الموضوع عليه وانا اتصرف" بنفس اليوم المسا اتصل خالد بـ ولد عمه احمد وتواعد معاهه عشان يطلعون يتمشون في السياره خالد: ها بو السولعي وين ودك نتعشى ؟؟ احمد: مر بناخذ خفايف ونتعشى ع البحر خالد: غايته (صار) خدوا عشاهم وراحوا صوب البحر يتعشون بعد ما تعشوا تموا يسولفون وكان الجو حلو وهادي احمد وهو يتأمل البحر : ليت الناس مثل البحر ما يتغيرون خالد: البحر غدار احمد بس مو اغدر من بني آدم ولا اشر منه خالد وهو يستدرج خويه : احمد الوسيم: لبيه خالد: لبيت حايه .. احيد (اذكر) قلتلي وحده في بالك وبتخطبها جريب ..شو استوى معاها ؟ ما اشوفك يبت الطاري من هذاك اليوم تغير ويه احمد وما عرف شو يقول : ها ؟!.. الله كريم الله كريم خالد: شو الله كريم ؟!!... ليكون بس رديت عن قرارك ؟ احمد : ماادري شو اقولك الصراحه .. بس مأجل الموضوع شوي .. خالد:اها .. اللي فيه الخير ربي يجدمه .. وان شاء الله تتيسر امورك وتجتمعون .. احمد يصد لــ خويه خالد وهو يبتسم : ها ولد العم اشوفك متحمس اكثر عني؟ خالد : هههههه لا بس آآزرك ... وخذ نصيحه مني ويصد يشوف البحر ويكمل كلامه : ترى الحب شي حلو انك تعيشه مع اللي تحبه ويحبك وتتمسك به ولا تخلي الايام تاخذه عنك.. الفرص ما تييك كل مره ... ودامك تحب شخص من كل قلبك لازم تسعاله وتتعبله .. وان صار خلاف امبينكم لا تعطون مجال كل واحد فيكم يعاند الثاني ويتغلى .. ليش نييب حق عمارنا الهم والنكد ونحن نقدر نخلق لنفسنا احلى الاجواء ... الايام تروح ولا هي راجعه .. عيشوا كل دقايقها بفرح وسعاده ..ليش نحزن على دنيا فانيه؟!! .. طول ما خالد كان يتكلم ..احمد يسمعله بانصات ويحس الكلام موجه له وكأن يعاتبه ويلومه في بنت عمته وعور قلبه على نفسه وعلى ميثه وعلى ولد عمه خالد ... ( فديتك ولد عمي اشهد انك مثل الدوا اللي ينحط ع الجرح يطيب .. آآآه بس ياترى منو فينا الضحيه؟ انا ولا انت ولا ميثه ؟!! ) . . . صـارت الدنيـا غريبـه وصـرت انــا متـولـه عشتـهـا حـلـم خيـالـي والغـريـب لـحـالـي عشتهـا بكـل راحـه واصبـحـت لــي ممـلـه عشتهـا فـي إبتسامـه وعشتهـا غربـالـي بنفس الوقت ميثه قاعده بالصاله .. اخيرا رحمت حالها وافرجت عن نفسها من السجن وقعدت مع اهلها كانت ميثه تشوف تلفزيون واهلها يتعشون لانها خلاص تعشت مساعه حمد وهو يكلم ابوه : ها ابوي كلمت ميثه ؟ ميثه صدت لهم وهي مستغربه !!!! بوحمد : لا يا بوك بعد العشا بكلمها ميثه : اش عنه ترمسون ؟ وبشو يكلمني ابويه ؟ بوحمد يقوم من على السفره : ميثه غناتي روحي حجرتي انا بغسل ايدي وبييج ميثه ماقالت شي بس في ويهها اكبر علامه تعجب بوحمد تغسّل وراح الغرفه وكانت ميثه تنطره هناك في غرفه بو حمد بوحمد : شو يا بنيتي يقولون حابسه نفسج في الغرفه من اسبوع ؟!! ميثه : لا ابوي بس جذي اذاكر بوحمد : واللي يذاكر ينعزل بالعالم ؟! هزري حتى الثانويه العامه ما يسوون جذي ميثه : لا انا اصلا احب اقعد بروحي ...اخلص مذاكرتي واقعد بالغرفه بوحمد : المهم هذي مو سالفتنا ...السالفه يا بنيتي انه عرب يايين يخطبونج ميثه ساكته وتعابير ويهها للحين ما طلعت بوحمد يكمل كلامه : واللي تقدملج هو ربيع اخوج فيصل ..مروان ... وانتي تعرفين اشكثر اخوج وياه والريال والنعم فيه والله .. وما شفنا شي يعيبه ولا قد سمعنا اخوج نعته بشي.... وانا من ناحيتي ماعندي مانع ..لكن الراي رايج وهاي حياتج وانتي اللي تقررينها ونحن اللي علينا نضمنلج الزوج اللي يقدر يعيشج الحياه الزينه لكن مثل ما قلت الراي بالاخير رايج يابنيتي ميثه : ...................... وحمد : ميثه مابى اسمع جوابج الحين... فكري وخذي وقتج وردي علينا ميثه : ان شاء الله ابوي... ممكن اروح الحين؟ بوحمد : روحي الغاليه ... طلعت ميثه من غرفه ابوها وتمشي بسرعه تروح غرفتها وتسمح دموعها اللي يطيحن اربع اربع حمد شافها وهي تصيح جان يكلمها بجديه : اتمنى ما تكون دموع حزن ! ميثه طنشت كلامه بس هو تم يكمل : تراها ما بتنفعج يالشيخه ام حمد : حمد شبلاك على اختك ؟ !! حمد بنقم: هذي ؟ هذي الود ودي اذبحها على هالدلع اللي هي فيه .. كل ما ياها واحد قعدت تدلع علينا .. تصيح ما ابيه ما بيه .. ومروان هذا عاشر واحد يتقدملها .. قصورها هالمره ما توافق .. ام حمد : حمد مالك شغل بها ... انا بكلمها وبقنعها ... حمد يمشي عن امه : انا بكلمها امي .. اذا عليكم ترى البنت بتم ياهل ودلوعه وتمشيكم على رايها دايما.. ام حمد تمسك ايد حمد : تكفى بوشهاب لا تكلمها انت... ادريبك بتجبرها حمد : لا لا بكلمها بهداوه .. راح حمد فوق غرفتها وبغى يدخل بس ميثه كانت قافله الباب حمد : ميثه افتحي الباب ميثه : شو تبى ؟ خلني في حالي ياخي حمد : ميثه بالزين افتحي الباب ... بكلمج انا ..ما باكلج سارت ميثه وفتحت الباب لاخوها دخل حمد وقعد ع كرسي التسريحه : تعالي بسألج انا .. ليش كل هالدموع من نييب لج طاري العرس ؟ ميثه : ............ حمد : اسألج انا جاوبيني ميثه : يعني لو قلت لك السبب بتتفهم الوضع ؟ حمد : اكيد .. ميثه : الجواب اني ما ابي اتزوج ولا احب طاري العرس ... حمد : دوري غيره ميثه : حمد انت ليش جي تعاملني ... يالسه ع جبدك ولا اكل من جيبك ؟ ليش تبغي الفكه مني ؟ حمد : حد يبغي الفكه من اخته؟ ولا اخته الوحيده بعد ؟؟ .... نحن نبى مصلحتج .. ومب حلوة كل ما يوج عرب يخطبونج تردينهم .... ابوي الرده عند العرب منقود (عيب) ميثه : والله انا علشان خاطر العادات والتقاليد الــزززفته اوافق على حساب مستقبلي حمد: انزين ليش رافضه الفكره ؟؟؟ وحتى لو انخطبتي الحين .. تراج ما بتتزوجين باجر ..؟! ميثه : ما ابي .. كيفي ... انا اللي بتزوج مب انت حمد : مب على كيفج ياهانم ... الشور شورنا .. والبنت ما لها كلمه بعد كلمة الرياييل ميثه : ابوي بعده عايش الحمد لله ... وهو ما بيغصبني على شي ما ابيه ... قالي الراي رايي .. ماقال انه راي اخوانج .. فـ رجاءا يا اخ حمد لا تتدخل في حياه غيرك حمد : قسم بالله لا تخليني اقوم الحين واظربج ؟ ميثه تصرخ: ياريت تكمل جميلك وبالمره تذبحني وافتك منكم حمد ( معصب): شوفي يا ميثه .... باجر ابى اسمع امي تقول انج وافقتي .. وان سمعت العكس .... بتشوفين شي ما شفتيه في حياتج وانا قلتلج يا بنت راشد ... ومحد بيردعني فيج لا ابوج ولا اي آدمي ع الارض .. ... تفهمييييين ؟ ... وطلع عنها اليوم الثاني في بيت قوم ميثه الساعه 7 المسا . . . سال الدمع على الخد دفاّق ..وانا دريك الموت وانوح خلي هجرني وناوي فراق ..وانا من الهجران مجروح اللي نسى عهده وميثاق .. ومن ربعته مانلت مربوح جفني لذيد النوم ما ذاق ..وطيف الحبيّب دايم يلوح اقفى وخلاني بالاعواق.. وادعاني جثه بلا روح ورمح الجفا راسخ في الاعماق .. من يوم خلي آزم يشوح ميثه ردت لحالتها الجديمه... طول الوقت بغرفتها و تصيح وتتعذر لاهلها بانها حاسه بخمول وراسها يعورها وتبي تنام دخل عليها حمد ... وفي هاللحظه ميثه لعنة نفسها الف مره لانها ما قفلت الباب ..و بصراحه ما لها نفس ابد لــ حمد وتسلطه المستمر عليها ..وحست بخوف منه لانه امها وابوها مب موجودين في البيت ورايحين المزرعه وللحين ما ردوا المهم دخل حمد غرفتها ...وكانت ميثه قاعده ع السرير حمد : نقول مبروووك ؟ ميثه : وليش حتى الرفض ينقاله مبروووك بعد ؟!! حمد : يعني طنشتي كلامي .. واللي قلته ما ياب نتيجه وياج ميثه : حمد رفجه فج عني مالي خلق ... بليز اطلع برا حمد تقرب صوبها ومسك شعرها بالقو حمد وهو ماسك شعرها : بطلع ... بس قبل لااطلع سمعي اللي بقوله لج ميثه : آآي هد شعري ... لا تطلّع رجولتك فيني حمد : بعدج ما شفتي شي مني ميثه تتأوه : آآي شعري يالدنيء .. اكيد وحده من الصايعات حاقرتنك وفاج غيضك فيني ميثه : جبببببببب يالخايسه ويصفعها طراق بالقو .. وتطيح ميثه ع السرير بس حمد مسكها من ايدها وشدها صوبه :لا تقعدين تمارطيني انزييين ..وكلمي اخوج العود باحترام.... شوفي ميثه ... اذا كان واحد في بالج ومخليج ترفضين الكل عشانه .. فــ اقولج انسيييييييييييه .... ولا تتحسبين اني عبيط وتطوف عليه هالحركات ... ميثه بصوت عالي و تصيح : انت شقاعد تقوووووول؟؟؟؟ .... ما اسمحلك تتكلم عني بهالطريقه تفهمممم؟ حمد بنبره حاده: انتي اللي لازم تفهمين .... والله يا ميثه ... ان عرفته لا اجتله واحرق قلبج عليه هذا اذا ما جتلتج وياه يالحقيره .. وبنفس الوقت رن تلفون حمد جان يدز اخته على اليداربالقو وطلع من الغرفه وصك الباب وراه زين ما كسره ... حمد عامل ميثه بقساوه و من دون شفقه ولا خوف من الله ... قوته وتسلطه خلاه ينساه الاخوه اللي بينهم ويتجبر على انسانه ضعيفه تحولت احلامها الحلوة الى كابوس قاعد يلاحقها ويبيكيها ليل ونهار بعد ما طلع حمد عنها طاحت ميثه على الارض وتصيح بصوت عالي ومكسور (آآآآآه ... اكرهكم كلكم .... وحوووش مب بشر ... كل الريايل وحوش..اكرهكم.... ليش انخلقت بهالدنيا الدنيه ..الخسيسه .... اكرهكم واكره نفسي ..آآآه يا احمد كله منك يالحقييير .. أيا النذل .. كله منك ...انت السبب ... ليش تسوي فيه جي ..... انا احبك وانت تذبحني .. اموت وانت مو داري فيه ولا بعذابي .... كله منك .. كله منك يالحقيييييير...يارب موتني ..مابي هالدنيا الظالمه ... ياربي خذ روحي .. ) تمت ميثه ع الارض تصيح وشعرها اللي غطى ويهها وانخرس بدموعها وهذا غير الالم اللي تحسها في غزها (خدها ) اللي تورم من الصفعه وجسمها اللي تحسه تكسرت ظلوعه يوم دفرها( دزها ) حمد على اليدار تشره على اللي ما يواسيك...في حزة الشداد والامحان..خص الذي ماقبل غاليك..وله بالضمير معزه وشان...واما الذي مامن تواليك...ما يسعفك لو كنت غرقان...قالوا لي هذا الحال يرضيك؟...فلان مايذكرك باحسان؟...واشهو السبب مايا يعزيك؟...وهو من اعز احبابك فلان...قلت الزمن ياخذ ويعطيك...وعلى الارض ماهو بدايم انسان...وين الاكابر والمماليك...محد صفتله كل الازمان


	من مواضيع همس الشوق 0 ميثة بعيوني يا خالد (5-6) 0 كيف تعرف انك في عام 2008؟؟ 0 مسجات 0 لكزس 2009 0 اغرب فنادق في العالم


	توقيع همس الشوق ابـي صاحب يبيع الناس ويشتريني .... وابي قلب لي ضاقت بي الدنيا ما يخليني

همس الشوق

عضو ذهبي

الجنس :

الدولـة :

رقم العضوية : 10530

تاريخ التسجيل: يناير 2008

المشاركات : 852

المواضيع : 49

عدد مشاركات اليوم :

نقد عربي: 119,437

المصرف: 0

المجموع نقد عربي: 119,437
تبرع

نقاط الترشيح : 66

المستوى : همس الشوق ذهبي

الـــهدايـا :

اعلانات خاصة في اعضاء منتديات البدو فقط


	2

رد : ميثة بعيوني يا خالد الجزء9-10

24/04/2008, 02:38 مساءً

اهئ اهئ ياحرررام كسرت خاطري وعورت قلبي

تسلمين حبيبتي ويعطيج الف عافيه

لاعدمناج


	من مواضيع عسوووله 0 الاعجاز العلمي للقرآن الكريم (( ادخل و شوف عظمه ربك )) ...!! 0 ..{ الذهب الابيض والبنفسجي }.. 0 (( تســرٍـرٍيـحـــه قـــوطــ vrw ـــي النيـــــدو )) 0 تحذير لكل من او يعرف احد يملك سيارة من نوع ..... 0 ..{* فندق تشيران بالاس كمبنسكي ..اسطنبول ... موعد مع الفخامة .}..


	توقيع عسوووله كوني كالنخله عالية الهمه بعيده عن الاذى اذا رميت بالحجارة القت رطبها

عسوووله

عضو ماسي

الجنس :

الدولـة :

ميدلية تميز: شكر وتميز - السبب: جهود طيبة نشكرج عليها

ميدلية تميز: تميز وشكر - السبب: تواجد وحظور مميز نشكرج عليه

أوسمة العضو: 2

رقم العضوية : 9643

تاريخ التسجيل: ديسمبر 2007

المشاركات : 3,145

المواضيع : 112

عدد مشاركات اليوم :

نقد عربي: 346,564

المصرف: 0

المجموع نقد عربي: 346,564
تبرع

نقاط الترشيح : 246

المستوى : عسوووله ماسي

الـــهدايـا :


	3


	رد : ميثة بعيوني يا خالد الجزء9-10
	24/04/2008, 03:17 مساءً
	شكرا الك عسووولة على متابعة القصة و سلمت الايادي الغالية على المرور و الرد تحياتي الك


	من مواضيع همس الشوق 0 لابتوب ضد الماء 0 فارس الاحلام 0 أسوأ ... أفضل ... أجمل 0 مخدات للبنات (الثغر الخجول فوتي نامي) 0 تحف كريستالية روووعة

همس الشوق

عضو ذهبي

الجنس :

الدولـة :

الـــهدايـا :


	4


	رد : ميثة بعيوني يا خالد الجزء9-10
	24/04/2008, 03:21 مساءً
	همس الشوووق لاهنتى ويعطيك العافيه وبصراحه لم اقرئها نظرا لطول القصه قرئت القليل وبانتظار الجديد ودمتى بخير


	من مواضيع صياد الغزلان 0 ونحتُ بشعرى بيوتٍ جزال --- بشعرى وتقرأ بغرب وشمال 0 هل تعلم


	توقيع صياد الغزلان

صياد الغزلان

عضو فعال

الجنس :

الدولـة :

رقم العضوية : 12748

تاريخ التسجيل: أبريل 2008

المشاركات : 53

المواضيع : 2

عدد مشاركات اليوم :

نقد عربي: 4,836

المصرف: 0

المجموع نقد عربي: 4,836
تبرع

نقاط الترشيح : 0

المستوى : صياد الغزلان

الـــهدايـا :


	5


	رد : ميثة بعيوني يا خالد الجزء9-10
	24/04/2008, 03:57 مساءً