اتريوا الجزء قبل الأخير
الجـــــــــــــزء ما قبل الاخير والأخير
اليوم الثاني من بعد الاحداث السابقه
في الستار بكس الساعه 10 المسا
خالد واحمد يتطمشون على حمد اللي من الصبح قاعد يشوف البنات اللي قاعدات ع الطاوله المجابله لهم ... طبعا البنات مو مقصرات ... يونيه بودره مغطيه يوههن وكل الوان الطيف في الويه ..والعطر اللي شال البعقه شل...هذا غير الخصر اللي
لا بسينه
حمد يغني وهو يقصد وحده من البنات: الله واكبر ماجملك ..ودي اقولك واسالك الله واكبر ماجملك..لو للحسن عرش وتاج ماظنتي غير ملك..اذهلت في الجلسه الحضور يازايد هالنور نور
قالوا اكيد انت االقمر ولاالقمر هو من هلك ..شيل القمر واجلس وجان يقاطعه خالد
خالد : بس بس فشلتنا بصوتك هذا ..
حمد : ههههه خالد شوف شوف ام الازرق ... احلى وحده فيهن ... بس وغده ما تضحك في ويهي الحلو
خالد من النوع اللي ما يحب يشوف البنات واذا شافهن تكون نظره خطافيه وغير مقصوده ..
خالد يقهر حمد: لا طاعه لمخلوق في معصيه الخالق
حمد يصد لـ احمد : هذا منه فايده ..بوشهاب شرايك بام الازرق
احمد : اي وحده ؟ هذي اللي عيونها جنا معطينها بوكس من السواد
حمد : هههههه ياخي هذا يسمونه ايشاااادو ما ادري ايشادور ..
احمد يوم شاف البنيه ... البنت ابتسمت في ويهه
حمد : ايا الخاينه ... من الصبح انا اشوفها وهي ولا معبره .. ويوم شافها هالخسف ..تشققت الحماره ..
احمد : ههههههه بس عشان تصدق اني احلى عنك وترضى بواقعك المرير
فيصل اخو ميثه ومروان ربيعه كانوا في نفس المركز ... ويوم شافوا قوم خالد يوا صوبهم و سلموا عليهم.. وحمد يوم شاف مروان قام وسلم عليه بالخشوم
حمد : حي به النسيب
مروان : الله يحييك يالسنافي ... ها افهم من كلامك انكم وافقتوا ؟
احمد تفاجأ من الخبر ... ولا اراديا شاف خالد وعقبه على طول شل بنفسه وطلع من المركز
خالد شاف احمد وعرف انه تضايق من اللي سمعه .. حتى هو تفاجأ من الخبر .. وعلى طول لحق احمد وخله حمد لاهي معاهم ..
طلع خالد من المركز وشاف عند مواقف السيارات احمد يطلع بسيارته مسرع ويسوق بطريقه جنونيه وشكله اليوم ما يبعدي على خير ...اتصل خالد باحمد بس ما رد عليه ...
.
.
.
هونتها ولكنها عيت تهون .. لا قلت راح الهم .. الاقيه جدام
فيني الم ما مر في قلب مطعون .. فيني حزن ما مر في عيون ايتام
اصحاب انا والهم واحباب ونمون .. لا ماهي صداقه يوم ذي عشره اعوام
والهم سجاني وانا فيه مسجون .. وان قام حظي طاح وان طاح ما قام
تقول ما انسان غيري في هالكون .. حطمت في همي انا كل الارقام
الحزن في عيني وفي جسمي مدفون .. تتحقق الاحزان وتخيب الاحلام
احمد في السياره مسرع ودخل في الخط السريع وكان الشارع ظلام.. دموعه متجمعه في عيونه ... احمد يتحسس من هالموضوع وتذرف دموعه على هالطاري ... جنا دموعه تحب طاري ميثه ..عاتب نفسه مليون مره لانه ضيع ميثه من ايده ..ضيع سعادته اللي كانت تنتظره ...بالرغم ان ميثه خانته بس هي مازالت تحبه وهو يعشقها بجنون ... ميثه حبه العذري ..ميثه اول نبض بقلبه واحلى كلمه بشفاته ...ميثه هي عوق احمد وهي الدوا لاعواقه .. ميثه التكلمه لـ احمد وسعادته مستحيل بتكون مع غيرها ..حس احمد هالمره فعلا ميثه بتروح عنه .. تذكر كلام شيخه اخته يوم قالتله ان ميثه بيده الحين والمفروض ما يفرط بها وانها احتمال تروح عنه والندم ما ينفعه بشي ..بس ما توقع بهالسرعه !!.. ما مداه يفكر يراجع نفسه واحساسي إلا وميثه تروح من يديد ..
" آآآه يا الميث .. ميثه انتي هلي وناسي واغلى احبابي ..ميثه انتي حبي وعمري وكل حياتي .. فديتج ميثه حاولتي ترجعين لي بس انا الجاسي ما عطيتج فرصه"..
في الصوب الثاني نفس الوقت عند خالد اللي فواده مشغوب على خويه وقال لازم يلحقه قبل لا يسوي بنفسه شي ولا يصيرله مكروه دامه يسوق بهالخبال ...ركب خالد سيارته البورش ولحق احمد بسرعه بس خالد ضيعه لان الشارع هذا بالذات وايد ظلمه وطويل واحمد كان مسرع حيل.... رد خالد يتصل باحمد عشان يوقف ويكلمه ويهديه ... كان خالد ماسك التلفون يتصل بـ احمد بس الجهاز طاح عنه تحت سيت الكرسي جان يدوره ويشله ويوم رفع راسه تفاجأ بشاحنه داشه الشارع عرض ودخلت سياره خالد فيها ....
وصل احمد لمكان معين ووقف بسيارته وطلع وتساند ع الباب ونكس راسه
ويقول في خاطره ( ياربي انا اشفيني ... مب انا اللي ما بغيت ميثه هالمره .. عيل ليش زعلان دامها يتتزوج ؟؟... خلها تشوف نصيبها ... والظاهر الله ما كتب نصيب في بعض وحتى لو كنت احبها من الطفوله .... ) تم احمد واقف ربع ساعه وعقب لاحظ سياره شرطه واسعاف خطفوا صوبه بسرعه ...
احمد يكلم نفسه : لا حول ولا قوة إلا بالله ... اكيد واحد من الشباب مسوي حادث .. رد ركب سيارته وشاف تلفونه اللي فره بالسيت الثاني ولقى مسد كول 2 من خالد
احمد : ياحليلك يا ولد عمي ... جني طنشتك وخليتك في المركز ..اكيد الحين تحاتيني ... اتصل احمد بـ خالد بس لقى جهازة مغلق ... استغرب .. "توه متصل فيني ..كيف يغلقه ؟!! رد اتصل مره ثانيه بس هم طلع مغلق !!
فجأه قلبه قبضه .. ورد تذكر الاسعاف والشرطه ... احساس ياه بان خالد صابه شي لا قدر الله ... وتم احمد قلبه مقبوض.. .. بس طنش الموضوع .. وكمل طريجه
وبعد عشر دقايق ما تحمل احمد الوسواس اللي فيه ...يحس انه شي مستوي لـ خالد .. هو ما وده يفاول على ولد عمه .. بس مستغرب تلفونه مغلق وبنفس الوقت شاف شرطه واسعاف .. ذكر ربه وقرر يروح نفس المكان اللي راحت فيها سياره الشرطه والاسعاف وهو يدعي بان احساسه ما يكون في محله ...
تقرب احمد من مكان الحادث وشاف سيايير متيمعه وشرطه والاسعاف وكم سيارة واقفه وكم شخص من العامه ... نزل من سيارته وتوجه صوب الشباب ... لان الشرطه مانعه حد يتقرب من موقع الحادث
احمد يسأل واحد من الشباب : خير يالشيخ شو مستوي ؟
الشاب : راعي البورش دخل بالشاحنه وشكله بيتوكل
وقف قلب احمد ولفت الدنيا عليه ومسك بالشاب لانه حس نفسه دايخ ومخنوق جنا الاكسجين خلص بهالكون ... وهو يقول بخاطره ( لا لا اكيد مب خالد ... خالد مب الوحيد اللي عنده بورش .... ليكون بس لحقني وصار اللي صار؟؟ .. لا لا ماحد كان وراي .. وانا يوم طلعت من المركز خالد ما لحقني ..خالد بعده هناك .. مب هو ..لاء مب هو انا متأكد ) حاول احمد يبعد عنه الشكوك والوسواس عشان ما يصدق اللي سمعه ,,, سار على طول صوب الحادث وهو وده يروح وما يروح بس تجرأ وسار ولا عليه من الشرطه او اي حد ... حاولوا يمنعونه بس فلت من ايدهم وسار صوب الشخص الممدود ... من شاف احمد خالد .. غمض عيونه اللي انترست دموع وعلى طول ركض وطاح صوب خالد ولمه لصدره وهو يصيح بصوت عالي : خاااااااالد ؟ .. خالد شو اللي استوابك ؟ ...خالد حبيبي رد عليه .. خالد ... خالد انا ارمسك رفجه افتح عيونك وكلمني ...تم احمد حاضن ولد عمه و يصيح وخاست كندوره (دشداشه) احمد بدم خالد ... وجان اييي كم شخص من الشرطه ويبعدونه عن خالد وشلوه لـ سياره الاسعاف بس احمد شل بنفسه وركب معاهم
وصلوا المستشفى ودخلوا خالد غرفه العمليات
أحمد تساند على اليدار ونزل ع الارض يصيح : انا السبب ..خالد لحقني وسوى الحادث بسبتي .... انا السبب .. انا السبب...والله ما بسامح نفسي لو استوابه شي ..ما بسامح نفسي ابد ...لا تروح يا خالد .. لا تروح يا ولد عمي الوحيد..رفجه لا ترووح عني .. الله يخليك ..
بعد 45 دقيقه وصلوا اهل خالد كلهم وسلطان وحمد وبوحمد وزوجته وام احمد وابو احمد والكل مدوده ومتلخبط ومفجوع من الخبر .. .. حاولوا ياخذون العلوم من احمد ..بس هو قاعد ع الارض ويصيح من غير ما ينطق باي كلمه ..
بعد نص ساعه ..
ام خالد تصيح وبوخالد يحاول يهديها وهو روحه مب قادر يتحمل الوضع .. يحس الموت بياخذ ولده الوحيد .. ولده اللي توه راد من السفر بعد غيبه طويله وما تهنوا به ..ومسرع ما انحرق قلبهم فيه ..لكن لا اعتراض لامر الله
بو خالد بحزن: بسج يا حرمه مو زين عليج .. ادعيله بالشفا .. صياحج ما بيفيده بشي
اذكري ربج الغاليه
ام خالد( تصيح) : ولدي بيروح عني يا بوخالد.. وحيدي ضناي .. يارب ارتجيك بانك تخليلي ولدي وتاخذ عمري وتعطيه له .. ما ابيه يروح مني
والهنوف وهي تحاول تخفف على امها : يما اذكري الله ..خالد بيصحى وبيعيش عمرٍ طويل ان شاء الله ...
ام حمد : يا ام خالد ولدج ان شاء الله بيتشافى ...ذكري ربج و ادعيله ..وربج ارحم منج عليه ....
بعد ساعه ونص طلع الدكتور والكل تجمهر عنده
بوخالد : بشر دكتور ..شو حاله الحين؟!!
الدكتور : ما اقدر اقولكم الحين ..لان حالته مب مستقره ..بس ياجماعه منو منكم اسمه احمد .. ولدكم ينادي عليه؟ ...
فز احمد وانتفض قلبه وعلى طول يا صوب الدكتور : انا احمد يا دكتور
الدكتور : انا بدخلك عنده بس لا تطول اذا سمحت لان نبي ننقله للغرفه الثانيه
أحمد : ان شاء الله ان شاء الله ودخل على طول ..
.
.
.
مكتوب تكون هنا مكتوب...وأنا أناظر دمعة في عينك
آآه يا قلبي يشتعل لاهــوب... ودمعي يهمر على جبينك
شفت الدم ع الصدر مسكوب...شلونك يا خالد وين زينك؟
يا ما حملتني والحال متعوب...وياما خفت عليه من حاسدينك
خذني يا خالد ترى القلب منهوب…حزن الكـون أظنى ظنينـك
دخل احمد الغرفه ..والغرفه بارده ..كئيبه ..ثجيله و ظلمه ..وسكون قاتل وصوت واحد صادر اللي من غيره ينتهي كل شي ..
كانت دقات قلب خالد الخفيفه والهاديه وهدوئها اللي ما يطمن و لكن اللي في وضع خالد يشوفها نبض الحياه والاساس والامل الوحيد ..
مشى احمد بخطوات هاديه صوب حبيب قلبه خالد
خالد الممدد ع السرير كأنه جثه لا حركه ولاهمس..واللي مابقى فيه شي صاحي وويهه الحسن راح مع الحادث ..
احمد فــ خاطره: "يالله يادنيا .. توك ياخالد قبل ساعات قاعد جنبي في المركز والحين بين هالاجهزة "
احمد مسك ايد خالد وتقرب من ويهه عشان يبوسه وتطيح دمعه حــاره من عينه و تحضن خد خالد بكل معاني الاخوه والحب الحقيقي
خالد بصوت يادوب ينسمع : أحمـ ـ ـ ـد
احمد بألم وحزن: يالبيه ..يا رووووووح أحمد ..
خالد: أحمــ ـ ـد انـا بــروح
احمد دموعه تطيح وحده ورا الثانيه : اذكر ربك يا خالد ,, انت بترجعلنا ان شاء الله
خالد: بـ ـ ـ ـقولك شي قبـ ـ ـل لا امـ ـ ـ ـوت
احمد يحس بانه مخنوق والالم عاصر على قلبه وانفاسه : لا تقول هالكلام يا خالد و خالد يقاطعه: خلـ ـ ـ ـني اقـ ـ ـول
احمد و يحاول يتماسك : قووول .. قول وانا اسمعك
لحظه سكون تمر 30 ثانيه احمد قلبه ارتعش من الخوف على صديق عمره ..بس النبض موجود ..
يرد خالد يتكلم كلام متقاطع وباكثر صعوبه هالمره : ما وصــ ـ ـيك.. تـ ـ ـ حـ ـبك .. وانـ ـ ـت بـ ـ ـعد ..ادري أنـ ـ ـا .. أنــ ـا اترجـ ـ ـاك أحمـ ـ ـد
احمد مب عارف خالد من يقصد بس ما بغى يسأله ولا يقاطعه و يخليه يخلص كلامه : مـ ـ ـ ـا وصيك عليهـ ـ ـا ..
احمد يصيح وهو ما يعرف منو المقصود ولا يبى يعرف ..هو همه الحين خالد وبس : كل اللي تحبهم احمد بيحطهم بعيونه... بس ياخالد انت يتعيش وانت اللي بتشوفهم وترعاهم
مضت لحظه جمـــــــــــــــود وخالد ما قام يتحرك .. احمد حاول يرمسه بس ما رد عليه خالد ..طلع احمد من الغرفه مثل المينون يصرخ : خالد ما يتحرك .. خالد ما يكلمني ..
دخلوا الممرضات والدكتور معاهم وبعد ربع ساعه طلعوا
والكل اصلا متميع عند باب الغرفه وكل واحد منهم يسأل ع صوب والحريم مسوين مناحه والصريخ واصل آخر البلاد
الدكتور : هدوا يا جماعه ... خالد الحمد لله بعده عايش بس هو طاح فـ غيبوبه
الوضع هدا شوي بس هم حزنوا لانه طاح بغيبوبه لكن الحمد لله بعدها الروح فيه ..
بو سلطان : لا حول ولا قوة إلا بالله ...عسى يا دكتور الجروح اللي بجسمه مب عميقه ؟
الدكتور: هو الحين تحت تأثير المخدر ونحن ما نعرف حالته بالضبط ..
ع الاقل لين ما يطلع من الغيبوبه وتستقر حالته ونحن الحين بننقله للعنايه.. الله يقومه لكم بالسلامه .. عن اذنكم .. ومشى عنهم
بوخالد (يصيح) : لا حول ولا قوة إلا بالله .. لا حول ولا قوة إلا بالله
بو سلطان يحط ايده على كتف اخوه : ولدك خالد بيقوم بالسلامه ان شاء الله .. والحمد لله ع كل حال... تصبّر يا خوي واحتسب الاجر ..ربنا رحيم وما ينسى عبده
.
.
.
بعدك يا خالد القلب من الهم ما شلنا
خيم علينا الحزن والدمع ما ظلنا
وحده سبحانه ندعيه ودونه من لنا
وبصلاتنا ودعانا نرجيه يرجعك لنا
المستشفى ..الساعه 3 الفجر
المكان ..يسوده حزن ..اكتئاب .. الم ..ضيق ..تشاؤم ..
واحمد كانت حالته مب اقل عن الباجين وتم يصيح طول الوقت مثل اليهال..... كان بعده يالس ع الارض وصاك على ريوله ومنزل راسه
سلطان اخو احمد يا صوبه وقعد على ركابه عشان يكون نفس مستوى احمد
سلطان : لا حول ولا قوة إلا بالله... ياريال اذكر ربك بدل هالصياح ...
احمد ومسوي طاف حق اخوه..
سلطان : لا تصيح شرات الحريم يا احمد ... الريال ما يصيح ..خل ايمانك بربك قوي ..وان شاء الله خالد بيقوم بالسلامه
احمد ويرفع راســه وكانت عيونه متورمه من الصياح : وان ما قام ؟ ..
سلطان وحط ايده على على ايد احمد من الصوب الثاني وقربه لصدره : لا تخاف ..بيقوم باذن الله ... هذا اختبار من الله لنا يشوف قوة صبرنا وايمانا به ..المفروض تقوم وتوقف مع عمك بدل ما انت قاعد جي ومقطع قلوبه زياده ..
وبعد عشر دقايق
بو سلطان: سلطان خذ زوجتك و الحريم ورجعهن البيت
سلطان : امايه... الهنوف ..عمتي تعالن اوديكن البيت ترى يلستكن مامنها فايده
ام خالد : والله ما افارج هالمكان قبل لا اتطمن على ولدي
بو خالد : ليش تحلفين يا حرمه ... الهنوف يابوج روحي البيت وخذي عماتج ووياج
الهنوف : ان شاء الله يبا
حمد : امي تعالي انا بوصلج البيت
ام حمد : سلطان يما ...انت خذ زوجتك وروح بيت عمك وارقد هناك..عيالك والبنات بروحهم في البيت ... وخل امك تنام عندي الليله .. وشيخه اختك تراها في بيتنا عند ميثه ...
سلطان : ان شاء الله عمتي
ردن الحريم البيت وتمت ام خالد بالمستشفى مع الرياييل
في بيت قوم بوحمد ..كانت ميثه يالسه وشيخه عندها لان شيخه اهلها كلهم بالمستشفى
في بيت قوم ميثه
شيخه مسويه مناحه ..لانها وااايد تعز خالد ... ولانه قلبها رهيف وما تتحمل هالاحداث
ميثه تحظن شيخه اللي كانت تصيح : شيخه بس حبيبتي ... ولد عمج بيقوم بالسلامه
شيخه: ميثاني بيروح عنا خالد .. بيروح ونحن ما تهنينا به ... مسكين خالد والله ما يستاهل ...يا ويلي عليك يا ولد عمي
ميثه : ربج رحيم واكيد ما بيردنا خايب اذا دعيناله ...وهذا مقدر ومكتوب ..مايستوي تقولين ما يستاهل ...المفروض نحمد الله وما نعترض باللي يقدره علينا
شيخه تقوم عن حضن ميثه وتسمح دموعها : والنعم بالله ..والحمد لله على كل حال .. بس وينهم تأخروا نبى نعرف حاله الحين ..ان شاء الله ما يكون متعور وايد
ميثه : الله يسمع منج ..ويسمعن صوب بيبان سياره تتسكر
شيخه : هاكوم وصلوا ويربعن صوب باب الصاله
ميثه وشيخه وهن يسالن مره وحده : ها شحاله خالد الحين ؟
ام سلطان : المسكين طاح فغيوبه وما يعلم به غير ربه
ميثه تحط ايدها على حلجها : لا حول ولا قوة إلا بالله ..وشيخه تيلس ع القنفه لانها تحس ريولها صارن مطاط وما تقدر تشلها
ميثه: انزين يما ما قالوا متى بيقوم منها ؟
ام حمد ودموعها تنزل : الغيبوبه ماحد العالم بها غير ربنا ...والدكاتره ما بيدهم شي .. هذا يوقف بايد الله وحده ..وترفع ايدها للسما : يااارب نرتجيك بانك تقوم خالد بالسلامه وترده لنا سالم يا الله انك ارحم الراحمين
الباجين : امين
ليله كئيبه قاعده تمر على العايله ... ليله ما مرت دقيقه منها إلا وكلهم يدعون لغاليهم بالشفا والسلامه .... خالد الانسان الهادي الطيب ..اللي اهله ما شافوا منه كل خير بين الحيا والموت ومنعزل عنهم بغرفه ظلمة تفوح فيها ريحه الموت ..بصراحه الحادث كان قوي وسياره البورش تكنسلت وخالد وايد جروح في جسمه هذا غير ضربه في الراس اللي لحقت به ..احتمال يعدي كل هذا على خير ..لان خالد بنيته الجسمانيه قويه والجروح مع الايام بتطيب بس المشكله الحين انه في غيبوبة ..مسافر لابعد الاماكن ظلمه ووحشه .... يا انه يرجع لاهله وبنكتبله عمرٍ جديد او يرحل عنهم لدنيا ثانيه من غير زاد باستثناء العمل الصالح ..الغيبوبه صدمه ماحد يتحملها .. كأن الموت واقف على راسك .. وفيها الشخص يحط كل الاحتمالات ....لكن الايمان بالله موجود ,,, والرجا فيه ما يخيب ..
الجــــــــــــــــــزء الاخير
بعد شهرين من الاحداث الفايته
.
.
.
ولا غيرك في هالدنيا فتّني ..وحملني ثقيلات النوايب
انا يا أحمد حبك ذابحنّي .. فدتك الروح دام ان حبايب
ولا ارتاح إلا بشوف عينك .. متى بتعود يا مجفي وغايب
انا وش حيلتي يا كيف اسوي .. وانا في حبكم مخطي وصايب
قام خالد من الغيبوبه وصحته قامت شوي شوي ترد مثل اول ..وردت معاها الفرحه للعيله كلها ..اما على سالفة مروان اللي خطب ميثه .. من خالد سوى الحادث العرب لهوا بـ ولدهم خالد وتعذروا لاهل مروان ويا الرفض هالمره من حمد .. وحمد تغير وايد .. وتصالح مع اخته وابعد الشكوك من راسه وخلاها على هواها .. هو ما بيجبرها على شي يمكن تكون له عواقب وخيمه.فالمستقبل . ونرجع لخالد اللي ابوه نذر من يتحسن ولده ويطلع من المستشفى يسوي عزيمه كبيره.... ويا يوم العزيمه وعلى الساعه 9 المسا بيت بوخالد مليان عرب .. تقولون عرس ...بصراحه الكل فرحان ومستانس وجوالاسري كان وايد حلو في عيلتهم باستثناء قلبين للحين ما اكتلمتهم بفرحتهم ...
خالد عرف انه احمد وميثه بعدهم ما يكلمون بعض واصرّ يصالح ما بينهم ..
وهو من ناحيه ميثه مطمن بس العوق في احمد وكيف يفاتحه بالموضوع
في يوم العزيمه في بيت بو خالد
خالد واحمد واقفين في الحوي جريب من الميلس
خالد : اقول أحمد انت مستانس ؟
احمد تعجب من سؤال خالد : ليش تسأل يعني ؟
خالد : لا اقول بس
احمد وهو يشوف القمر :بصراحه ؟ مستانس ومب مستانس !
خالد : أحمد بصارحك بشي
احمد عقد حواجبه : خير ولد العم ؟!!
خالد : أحمد لاتنكر .. انا ادري انك تحب ميثه >> مايحب يلف ويدور خخ
احمد امرره متفاجأ بس ما علق
بعد دقيقه صمت وتأمل
احمد( يتنهد): كنت احبها
خالد : وما زلت تحبها
احمد يرد يصد لـ خالد وهو رافع حواجبه: ماشاء الله واثق ؟
خالد يبتسم : اي واثق مع سبق الاصرار والترصد ... و اتمنى انك تتخلى عن كبرياءك شوي ..ترى البنت شارتنك
احمد : وانا عفتها من زمان
خالد مسك ايد احمد : لا يا بوشهاب .. مب انت اللي تعاف ميثه... مب احمد اللي يتخلى عنها
احمد : خالد ممكن نسكر الموضوع ؟!!
خالد (معصب): تدري انت شو ؟ انت اناني وما تحس
احمد شاف خالد بكل استغراب ..اول مره يكلمه جي ويقوله هالكلام
احمد : ما برد عليك
خالد : تدري ليش ما بترد علي ؟.. لانك فعلا اناني وماعندك رد تبرر فيه افعالك ... اسأل نفسك شو ردت فعلك يوم ميثه تنخطب وشو تسوي بنفسك ؟ ويوم تكون الفرصه في ايدك ويضحك باستخفاف : اول واحد يتخلى عنها ؟ ياخي ما تحس بتناقض في سلوكك؟!!! .. البنت في ايدك وانت تحبها وتخليها تروح لغيرك ؟!! شو تبرر هالتصرف؟!!
احمد فعلا كان يحس بتناقض بافعاله ... حبه لميثه والصدمات اللي حصلها منها خلته يتخربط وما يعرف الصح من الغلط ... خلته يتردد في اي خطوه يقدم عليها حتى لو كان هالشي في صالحه ..
خالد : أحمد.. تذكر يوم كنت ابى اوصيك على فلان وانا بالمستشفى
احمد : هيه اذكر بس ماعرفت منو كنت تقصد بالضبط؟!!
خالد : كنت اقصد ميثه
احمد (متعجب): ميثه ؟!!!!! وليش هي بالذات؟!!!
خالد : لاني عارف ماحد يخاف على ميثه كثرك وبيحميها غيرك ... انت اكثر واحد يحب ميثه ....
احمد : ..........
خالد حط ايده على جتف احمد وهمسله : وصيتك عليها يا احمد ... وصيتك على ميثه وانا بين الحيا والموت وانت وعدتني
احمد تم يشوف خالد ويحس بالعبره خانقتنه ... ما تكلم ولا نطق بشي ... راح عن خالد ومشى صوب الميلس بيدخل ورد يشوف خالد
وهو يقول بخاطره
" لا توصي ... ميثه بعيوني ياخالد .." ودخل الميليس
صبروووا يا جماعه ما خلصت القصه لووووول
.
.
.
لاتكثر همومي وترسم عذابي وأنا تركت الناس وأخترتك انته
قلبي فتح لعيونك السود بابي من عقب مافي ويه غيرك غلقته
تعال داوي في حياتي مصابي وأنا بعوض لك زمان هدرته
ياخالد عالي القدر والجنابي خليت كل الناس واخترتك انته
في المطبخ الخارجي لبيت بو خالد كانن الحرمات موجودات والكل حفزان
اللي يودي واللي اييب من فواكه وقهوى وفواله وجاي وعصير .. وشيخه موجوده وياهن .. ظاربنها حفوز غير طبيعي ويايه تفازع بالشغل وياهن ... اما ميثه فكانت عند العنود والهنوف في البيت ..
شيخه طلعت من المطبخ وشكلها بتسير البيت >> بيت بو خالد مو بيتهم
وخالد بعده ما مشى عنه احمد سار المطبخ وشاف في طريجه شيخه
خالد : اووووه شيخه ؟ شو تسوين هني ؟
شيخه : شوفه عينك يا ولد عمي ^__^ في المطبخ
خالد : ليش اتعبين عمرج ؟.. الخدامات ماليات البيت وشالات الشغل
شيخه : لا يغرك تراني ما اسوي شي .. ايي وارمس الحريم واكل واطلع خخخ
تم خالد يشوف شيخه وهو مبتسم ..وشيخه مستحيه وتقول في خاطرها "هههه بلاه خالد جذي يبحلق!! "
خالد : اقول شيخه ... انتي شو تدرسين بالجامعه ؟
شيخه : اداره اعمال
خالد : اممم وكم سنه لين تتخرجين ؟
شيخه : اممم سنتين وكورس
خالد رافع حواجبه : بل !!! شو يصبرني هالكثر ؟!!!
شيخه تفاجأت واستحت وودت الارض نتشق وتبلعها .. ما توقعت خالد يكون بهالجرآه ويفر هالقنبله في ويهها يوم من الايام
تتجدمت عنه وتقول وهي مستحيه : انـ ـ ـ ـا بروح داخل ..وسارت عنه
خالد : اقول شيخه لحظه
وقفت شيخه وهي معطيه ظهرها حقه .. ما تقدر تشوفه ..خلاص البنت شوي وبتصيح من الحيا
خالد : شيخه
ترد شيخه وتصد لـ خالد وهي منزله راسها :لبيه ولد العم
خالد (مبتسم): انزين رفعي راسج
طنشت شيخه كلام خالد ومازالت منزله راسها
خالد : انزين بسألج وينها ميثه ؟
شيخه رفعت راسها وتغيرت ملامح ويهها
شيخه بحزن: ها ؟!! ميثه ؟ ؟؟؟؟؟؟ داخل
خالد : ههههه شيخه شفيج .. بلاه حسج تغير ؟
شيخه مستغربه من تصرف خالد .. ومب فاهمه شو اللي يباه بالضبط " ين ولد عمي وقعد .. الظاهر الحادث أثر فيه وايد "
خالد تقرب من شيخه ويبتسم: اكيد مستغربه ليش اسأل عن ميثه صح ؟
شيخه : لا عادي ..ليش استغرب ؟..بروح ازقرها؟
خالد : لالا انا ما اباها
شيخه : عيل ؟!!!
وقالها السالفه >> صبروا يا جماعه بعدين بتعرفون السر لوووول
بعد ما قالها السالفه ..
شيخه بفرح : ولا يهمك الحين بروح .. بغت تروح بس خالد زقرها مره ثانيه
خالد : شيخه
شيخه صدت له : هلا خالد
خالد : امممم ياريت تهدين دراستج ..لاني مستعيل
شيخه تأشر : اوييييه أحمد وراك
خالد قلبه طاح في بطنه وعلى طول صد لورى وهو يبلع ريجه ..بس هاي كانت جذبه صغيرونه من شيخه عشان تخوف خالد ..
شيخه وهي تسير عن خالد : هههههههه امسك قلبك عن يطلع من صدرك ..وراحت داخل >> توها مستحيه ؟
سارت شيخه داخل عند البنات
قلنا كانت ميثه قاعده مع العنود والهنوف وكانوا في بنات من اهلهم بعد وياهن
وشيخه حادره عليهم الغرفه والفرح في عيونها والابتسامه راسمه الويه وعلى طول اتي وتقعد عند ميثه عند دواها المعتاق وصديقتها روح بالروح
ميثه تهمس لها : دوم هب يوم ان شاء الله
شيخه : على شو ؟
ميثه : على الابتسامه .... اليوم احسج مستانسه والويه ينور ما شاء الله
شيخه : ههههههه اي صح ... وهي تهمس لـ ميثه : ما اصدق ميثو ؟ فاجأني الصراحه
ميثه : منوووووو ؟ !!
شيخه : لا لا ما بتصدقين لو اقولج
ميثه : لا قولي بصدق
شيخه وهي سرحانه : لالا ميثو ما بتصدقين
ميثه عصبت و قرصت شيخه في ايدها : خلاص ما بصدق بس قولي شو السالفه
شيخه : آآخ .. اوه زين زين يعني انا في علم مب حلم
ميثه : والله بتذبحيني ..يلا رمسي
كانت بتقولها عن سالفتها مع خالد بس تذكرت السر اللي قالها قبل شوي : اوييه ميثو نسيت اقولج ..روحي اخوج فيصل يترياج صوب المطبخ الخارجي
ميثه : فيصل ؟!!! شو يبى
شيخه باستعباط: اشدرررررررررررراني !!!
ميثه : انزين بسير بس يوم برجع بتخبريني عن سالفتج يا ام السوادهي والدواهي
شيخه : ان شاء الله عمتي ..
ميثه قامت ونزلت تحت بتروح بره صوب المطبخ الخارجي
بنفس الوقت اللي شيخه كلمت فيه ميثه ..راح خالد عند احمد في الميلس
خالد يقعد عدال احمد : اقول بو الغراشيب روح الوالده تباك صوب المطبخ
احمد : الوالده ؟ ما قالت شوتبى ؟
خالد : لا ما ادري ..
قام احمد وطلع من الميلس .. ومشى لعند المطبخ بس ما شاف امه واقفه .. وقف شوي جان يشوف ميثه واقفه بس بعيد شوي ... تخبل الريال .... من طيحه خالد بالمستشفى ما شافها إلا مره وحده يوم يت تزور خالد مع امها
.
.
.
الحب ميثه وانا ميثه.. شمسي ميثه ظلي ميثه ومثل ميثه لي هواها قلبي واتمناج
نبض قلبي وسط قلبج هام دربي لاجل دربج مثل ما تحبيني احبج يا حبيبتي واتمناج
انا منج وانتي مني .. جيتيني او رحتي عني ..وكلي احلام وتمني واتمناج
الحب انتي وانا انتي.. شمسي انتي ظلي انتي.. ومثلج انتي لي هواها قلبي ولا غيرج تمناج
ميثه يوم شافت احمد واقف كأنه يتريا حد .. فز قلبها عليه واستانست ..
كل واحد يتحسب ان الطرف الثاني هو اللي زاقرنه وما يدرون انه هذا خطه من خالد وشيخه ..
ميثه في خاطرها " لا خليت من هالشوف والله .... بعده يباني فديت قلبه يا ناس "
احمد في خاطره " فدييييتج يا ميثه ..لهالدرجه تحبيني ومتمسكه فيني .. احبج والله"
احمد استغل هالفرصه وقال بيصلح كل اللي فات ... ليش يبتعد عن شوقه وغناة روحه وقلبه متولع بها ..وبنفس الوقت عارف ميثه اشكثر تحبه وتحب التراب اللي يمشى عليه
تقرب من ميثه وميثه نزلت راسها مستحيه
احمد بهمس : ميثه
ميثه ( مستحيه) " يالبيه ..روح ميثه انت " : نعم
احمد : ميثه أنا آسف
رفعت ميثه راسها والدموع بعيونها ... فرحانه انه حبيب قلبها وشوقها رجع لها .
ميثه : لا تتأسف ياحمد ... قلبي ما زعل عليك يوم
احمد : يعني اعرف انج راضيه ولا زعلانه مني
ميثه : محد يزعل من روحه يــا أحمد
احمد مستانس ووده الحين يقوم ويشلها من الفرح
احمد يتقرب اكثر من ويه ميثه : ميـــــــــثه ..........والله اني أحبــــــججججج موووووت
بعد 20 يوم
احمد خطب ميثه وبعد اسبوع تحمس خالد وخطب شيخه والاخ خالد مستعيل ويبى يتزوج بسرعه وشيخه ما تبى بسرعه .. بس خالد تم حاشر احمد واخته الهنوف عشان يقنعون شيخه لين ما رضخت بالامر .. وتحددت ملجتهم الشهر الياي وعرسهم بعد 4 شهور .. احمد وخالد بيتزوجون بنفس اليوم واحمد بيملج على ميثه بعد ملجه خالد بعد اسبوعين .. احمد كان يبي قبل بس الانسه ميثه مصرة ع القرار
بعد شهر ..
ملجه خالد وشيخه ..
.
.
.
له من غلا روحي نهورٍ تجارى .. مثل الفرات ونهر دجله مع النيل
مزيون من زينه يحير العذارى.. اهيف زريف الطول حلوالتعازيل
روحــــه لطيفه طيب ولا يجارى .. شيخه اللي له بقلبي مداهيل
يضيء جبينه مثل شمس النهارى.. يسني سنا خده ورى مرهف الشيل
في غرفه شيخه ..
شيخه لابسه فستان سماوي وكانت آيه في الجمال ومتغيره وايد بس لولا هالتوتر اللي فيها جان بتغدي احلى,, والبنات العنود وميثه وياهن بالغرفه..
ميثه : ماشاء الله عليج يا شيخه .. والله تيننين .. ياحظه خالد فيج ..شو بيرقده اليوم اذا شافج
شيخه : ميثو والله تسكتين .. روحي خايفه ..وما بي اشوفه
العنود : حشى قصاب اخوي .. تلقين اخوي هو روحه متوتر
شيخه : هيه باين من شهرين وهو يحن يبى يملج
ويسمعون حد يدق الباب
ميثه تشوف شيخه: هذا اكيد احد من اخوانج يايب دفتر عقد الزواج عشان توقعين
شيخه : اكيد احمدوه
ميثه استانست على الطاري
العنود تشوف ميثه : هيه اذا احمد عيل قومي ياميثه وفتحي الباب لـ شوقج
ميثه : لا لا العنود قومي انتي
العنود : لا لا هذا خطيبج وانتي اطلعيله
شيخه : ايييه وبعدين وياكن ..خاس الريال وهو عند الباب
ميثه وهي تقوم : ها شيخه خايفه اخوج يخيس بره ويرد الميلس بالدفتر ؟
شيخه ( مستحيه) :لا والله بس حرام واقف من الصبح
لبست ميثه شيلتها وغطت ويهها وسارت فتحت الباب
احمد يوم شاف ميثه فز قبله ..رغم ان ويهها مايبين لكن استانس لان حبيبته واقفه جدامه
احمد : شحالج ميثه ؟
ميثه ( مستحيه) : بخير الحمد لله .. انت شخبارك ؟
احمد يتنهد : انا ؟ انا تعبان والله
ميثه : بسم الله شفيك ؟
احمد (مبوز): ابى املج
ميثه ( عصبت ) : عطني عطني الدفتر
احمد : يعني وافقتي وتبينا نملج اليوم ؟!
ميثه : اقولك عطني الدفتر بخلي شويخ توقع تقولي وافقتي ؟
احمد عطاها الدفتر ووقف يتريا بره
خذت ميثه الدفتر وودته حق شيخه عشان توقع
ميثه : يلا يا شيخه المزايين وقعي وهي تمد القلم لشيخه
شيخه : ميثه وقعي عني انا ما اروم ( ما اقدر )
العنود : شيخو بتنفلعين اليوم .. عن الدلع وسمي بالرحمن ووقعي
خذت شيخه القلم ووقعت بكل توتر وايدها ترتجف
ميثه : وع شيخو ماقدرتي توقعين احلى ؟ ع العموم الف مبروووك حبيبتي
شيخه :ههههه الله يبارك بحياتج ..
وطلعت ميثه بره الغرفه عشان ترد الدفتر لـ احمد
احمد بعد ما اخذ الدفتر عن ميثه : عقبالنا يا ميثه
ميثه مبتسمه : .......
احمد : انزين قولي آمين ..
ميثه : آمين
احمد : يلا انا بروح تلقين خالد متحرقص المسكين
ميثه : الله يحفظك ودخلت داخل
احمد وده الدفتر عند الرياييل .. وبعد ساعه ونص وبعد ما خفت الناس وكل واحد رد بيته خالد عند الريايل حاشرنهم يبى يدخل يسلم على زوجته ليمن ارأفوا بحاله ودخلوه ..وشيخه كانت في غرفه الضيوف في الدور الاول
خالد قبل لا يدخل احمد قاعدله على جبده ويقول شروطه
احمد : شوف عندك عشر دقايق تسلم وتطلع ..ولا تكثر الرمسه ترى اختي تستحي ..وخلك يالس بعيد عنها ..وحركات مني مناك مانبى
خالد : حشى عمي ما قالي جي .. يايني انت بتتشرط وعلى زوجتي بعد ؟
احمد ماسك ضحكته : هيه انا ولا مب عيابنك ؟ وبعدين انا ما اتشرط ..بس اقولك من الحين اني عقب عشر دقايق بدخل عليكم وما يخصني اذا ما شبعت قرقره
خالد : انزين انزين الحين ادخل ولا كيف يعني ؟
احمد يضحك : ادخل ادخل قبل لا تسوي فيني جريمه
دخل خالد على شيخه اللي كانت يالسه ع القنفه مستحيه امرره ..
تقرب خالد وقعد شوي قريب منها ..
خالد : الف مبروووك الغاليه
شيخه منزله راسها مستحيه : الله يبارك بحياتك
دقيقتين ســــــــــــكوت
خالد : انزين رفعي راسج ..خليني اشوفج
شيخه مستحيه وما تقدر ترفع راسها
خالد في خاطره " اوهو هذي وايد تستحي .. لا بالله طلعنا بلا حمص "
رفع خالد ويه شيخه بايده وانبهر بجمال زوجته وهدوء ملامحها اللي تبعث بالراحه وخصلات الشعر اللي نازله على عيونها ويهها ..
خالد يبى يكسر حاجز الحيا والسكوت عن شيخه : حرمتي جي حلوه وانا ما اعرف .. وشيخه لا تعليق >> زيد الطين بله خخخ
خالد : شيخه شوفيني انزين ..احمد يقول انج شلقه (حوله) وانا ابى اتأكد
شيخه بعفويه تظرب على صدر خالد ع الخفيف وهي تضحك : خالد بس عاااد
خالد فيوزاته ظربت من اللمسه والاخ عيبته السالفه جان يمسك ايدها : زين واخيرا نطقتي بشي .. وتم يشوف ايدها : الله الله ع الحنه ..اشوف ايدج الثانيه " هو يبى يمسك ايدها وتحجج بالحنه " وشيخه بكل عفويه تفتح ايديها الثنتين عشان خالد يشوف الحنه
خالد وهو ما سك ايدين شيخه : فديت هالايادي وفديت هالريحه الغاويه ويشم ايد شيخه
شيخه تشل ايديها من ايد خالد
وتم خالد يسولف لين شوي شوي شيخه قامت تبادله السوالف
وما مداهم يندمجون بالسوالف إلا واحمد يدخل عليهم
خالد يتحرطم ( يتحلطم) : اوهوو .. نعم اخويه شو بغيت ؟
احمد واقف عند الباب : يلا ولد العم .. خلص الوقت وزياده ..رد بيتكم
خالد : يعني من غير مطرود ؟
احمد : ليكون بعد ناوي ترقد هني ؟
خالد : والله لو بيدي جان رغتك من البيت ورقدت هني .. وبعدين حرام عليك بوشهاب والله ما قعدت معاها .. روح روح بره خلني اكمل سوالفي
احمد وايي يعقد عدال اخته ويحط ريل على ريل : دام السالفه جي عيل انا قاعد على جبدك مب طالع اليوم
خالد يكلم شيخه : حشى هذا اخوج ما يحس .. اقوم الحين اسلخ يلده بالعقال
شيخه : فديت اخويه ماحد يقدر يلمس اشعره منه
خالد فاج حلجه : طاعوا هذي والله ؟!!... من طروا اخوها .. تفدته ودافعت عنه .. وانا حليلي من الصبح احاول تقولي كلمه حلوة وهي مسوتلي طاااف
احمد اونه معصب : ها شو بعد تقولك كلمه حلوه ؟.. ابوي لا تخرب اختي
خالد : والله ماحد مخربنها غيرك .. الحين بدل ما تنصحها تثور في ويهي
وجان يدخلون عليهم ام سلطان وسلطان
وشيخه قامت تسلم على اخوها سلطان لانها ما شافته مساعه
سلطان : مبروووك الغاليه
شيخه : الله يبارك فيك يارب
ام سلطان وهي ترمس المعاريس : ها عيالي بنحط لكم عشان جان تبون
احمد : لا لا يما ما يبون ...
ام سلطان تشوف ولدها: وانت شدراك ؟ خلهم هم يرمسون يمكن خالد يوعان
احمد : وين يوعان الله يهديج ... توه عند الرياييل في الميلس تارس كرشته
خالد : ههههههه كلن يرى الناس بعين طبعه
سلطان : امي جان بتحطون العشا يلا بسرعه تراني يوعان
ام سلطان : انزين فديتك بس خل بالاول المعاريس يقولون
خالد : لا عمتي ما ابي والله ...
احمد يشوف امه: يوم اقولج ان الريال تارس كرشته وما يبى
ام سلطان : ياربي على هذا الولد اللي حاسد الريال على خيره .. تراه من فلوسه
وخذتهم السوالف ساعه كامله وعقبه سلطان وام سلطان انسحبوا من الغرفه وطلعوا وبعد خمس دقايق وقف احمد : شوف انت ومرتك .. بعطيكم خمس تخلصون سلامتكم ووداعتكم وهو يتثاوب : وبعدين شل قشك ورد بيتكم ..ياخي ابي ارررررقد ووطلع عنهم
>>>>>>>>>>> شو تشوفون عيب .. ريال ويسلم على زوجته
بعد عشر دقايق طلع خالد من بيت بوسلطان ورجع بيتهم وهو مستانس ومرتاح البال .. حليله كان وده ياخذ رقم شيخه بس احمد واقف شوج في البلعوم وما عطاه اللي يبيه ... وقرر يطلب الرقم مره ثانيه واكيد ما بيردونه لان خلاص صار زوجها ومن حقه يكلمها وقت ما بغى ...
بعد 3 اسابيع
ملجه احمد وميثه
.
.
.
شمعه عمري و ليله عيد ورديّه ..واحلام قلبي وضحكه ليل قمّاري
ميثه هديه اهداها خالقي ليّه ..هي وحدها في حياتي صارت اقماري
الملجه كانت حلوة رغم انهم ما عزموا وايد ناس .. ويا الوقت اللي يسلم احمد على ميثه ... ميثه كانت حلوة بمعنى الكلمه .. هي روحها حلوة وكيف لا استوى بكامل زينتها .. وخالد موصي حمد اخو ميثه يطفر احمد عشان ينتقم لذاك اليوم
احمد بعده في الميلس وقاعد يغمز حق ابوه عشان يقولهم انه الولد يبى يسلم على ميثه .. حمد قاعد عند احمد ويهمس بصوت خفيف : بوشهاب ..ميثه تقول ما تباك تدخل عندها ..
احمد عصب وطلع عيونه وهو مستغرب : لا مب على كيفها
حمد : لا تصدق على كيفك انت؟
خالد وقاعد وياهم : يا حليلك يا ولد عمي .. ما يبون يشوفونك
احمد : عاد انت اول واحد استانست .. وهو يرد يشوف حمد : حمد دخيلك روح اقنعها .. ولا ترى بدخل عليها غصب
حمد : شو بعد تتدخل غصب .. بلاك مستقطع ..اثجل شوي
احمد : خل عنك انت ... روح روح قولها احمد بيسلم عليج
خالد : حمد خلاص ارحم بحاله ..شوف ويهه كيف استوى حاار .. حرر حرر علو على المكيف خخخخ ..
حمد : ههههههه ابوي احمد اسولف معاك ..يلا الحين بخبر الاهل ويسوون لك درب ..
احمد ما صدق وتم يعدل كشخته
ودخلوه داخل .. احمد كان اجرأ ودخل سلم عليها جدام الكل ولبسها الطقم والدبله وعقبه خلوهم شوي بروحهم بعد مذله حمد ..
احمد قاعد مع ميثه بروحهم : حشى مابغوا يخلونه بروحنا شوي ..وسكت شوي .. وكمل كلامه : واخيرا استويتي زوجتي يالميث .. الف مبروووك حبيبتي
ميثه تبتسم : الله يبارك بحياتك ..وانت بعد الف مبرووك لك
احمد : الله يبارك بحياتنا ياارب
احمد فصخ غترته وعقاله وفج اول عقمتين كندروته وميثه فاجه عيونها وحلجاها : اييه اييه شو قاعد تسوي ؟
احمد يحط غترته وعقاله على القنفه : هههههه لا تخافين ... بس اريح نفسي .. من الصبح وهم على راسي .. خلي شعري يتنفس ..
احمد تقرب من الميث وتم يقولها كلام حلو والبنت مستحيه واحمد يزيد ويزيد .. هو قبل ما كان مقصر ..والحين بعد ما استوت حلاله طايح فيها حب في حب وباسها بين عيونها ويدخل عليهم حمد واحمد وميثه استحوا وابتعدوا عن بعض شوي
حمد حاط ايده على خصره: ماشااااااااااااء الله .. ولا بعد فاصخ الغتره والعقال النسيب ... شرايك بعد مره وحده اييبلك بجامه .. بدل هالكندوره
احمد يرقع: وانت ما تعرف تستأذن قبل لا تدخل ؟
حمد : هذا وانت بس مالج جي عيل شو خليت حق العرس
احمد يلبس الغتره : زوجتي يا اخ حمد ..وما حد يقدر يمنعني
حمد ويعقد بينهم : يوم بنزفها لك في بيتك ..ذيج الساع ماحد بيمنعك
احمد : انزين حبيبي ممكن تروح تييبلي شي اشربه
حمد : قص على غيري .. تبى تقعد وياها بروحكم ها ؟
احمد : لا والله عطشان
حمد بخبث : لازم عطشان ..
ويطقه احمد على الخفيف : هههه اسكت يالطفس .. واطلع ابي اقول شي حق زوجتي
حمد ويشوف ساعته : شوف انت من نص ساعه قاعد ..بعطيك خمس دقايق بسسس وان ما يعبنك الخمس دقايق .. بشل ميثه وياي فوق وانت خلك بين الاطوف رمسهن لين ما يمل
احمد : والله انك مذله ..
حمد : لا والله انا حمد بن راشد الــ***
احمد : انزين شو بيستويبك لو قعدت انا زياده ..
حمد : لا ابوي .. نحن عطيناك نص ساعه وشفنا البلاوي ..واذا عطيناك زياده يتسنى عمرك .. ووقف حمد : يلا عجّل ..عندك خمس دقايق بس ... وما وصيك خلك بعيد وامسك نفسك شوي خخ ..وطلـــع عنهم وهو يضحك ..
ورد احمد تقرب من زوجته ومسك ايدها وحبها : ميثه حبيبتي ..ربي يقدرني اني اسعدج واعطيج كل اللي تبينه .. واكون كل شي بحياتج .. ميثه انا وايد تعذبت عشانج وشكثر عانيت وانت ما تدرين وو .. جان تحط ميثه ايدها على حجله : احمد .. خلاص نحن الحين لبعض.. واوعدك اعوضك وانسيك كل اللي فات .. ونفتح صفحه يديده من اليوم ..
احمد : الله لا يحرمني منج يا ام خالد
ميثه ( مستغربه ) : ام خالد ؟ منو ام خالد
احمد : هاالملاك اللي جدامي ام خالد
ميثه : انزين حبيبي ممكن تطب هالسالفه ..
احمد : دخيييييييييييييلج ميثه عيديها مره ثانيه
ميثه استحت لان كلمه حبيبي طلعت عفويه منها
ميثه : لا لا مابي
احمد بوّز : يعني انا مب حبيبج
ميثه : يا مكركم انتو الرياييل تسحبون الرمسه تسحّب من حلوجنا
وتم احمد يسولف مع زوجته والسعاده تغمرهم وفرحتهم ما تنوصف ..,
آخر المواضيع
ميثة بعيوني يا خالد الجزء ما قبل الاخير والأخير 
