كانو كلهم قاعدين بالصاله يسولفون
واحمد الحبيب مريح وطايح على ريل امه وامه تلعب بشعره
شيخه : الحين منو المفروض يدلعونه ... هالدب ولا انا اخر العنقود ؟
ام سلطان : عندج ابوج ..خله يدلعج ..وخلي ولدي انا بدلعه
شيخه : ابوي ما يدلعني ... انتي خذتي الدلال كله خخخ
ام سلطان : امحق دلال ... ابوج ما يعرف الدلال
بوسلطان كان مندمج بالاخبار جان يصد يشوفهم : من هاي دلال .. ما اعرفها
شيخه : يبا هاي وحده تلف الفريج تدور الدلع من الشباب
بو سلطان : منو هاي ؟؟؟ وين طلعت بعد؟
شيخه : هههههههههه ابوي اشفيك !! امايه تقول انك ما تدلعها وهاي كل السالفه
يو سلطان يشوف زوجته : افاااا يا ام سلطان ..بعد كل هذا تقولين ما ادلعج
ام سلطان : يعلني افدااااك يالغالي ... بس جذي اقول عشان لا يحسدونه بعض الناس وتشوف شيخه
شيخه : اهاااااا من ورانا سوالفكم .... عنبو شياب ويتغزلون ببعض .. ماينلام جيلنا طلع صايع ضايع ..بس صج شياب انتاج 2005
ام سلطان : ياللي ما تخيلين شو هالرمسه الطفسه؟ .. وين تلقطينه يا بنت غانم ..؟!!
شيخه : يما انا ما يخصني في مثل ينقال .. لا حب في سن اليأس ..وانتي عيوز منتهيه صلاحيتج خخخخ
احمد : امي بعدها شباب لا خليت منها يااارب ..ابوج كبر وشيب
بو سلطان : انا كبر من امك بـ 3 سنوات .. وظني الحرمه تعيز قبل
ام سلطان : خلاص يعني يا غانم صرت تشوفني عيوز طايحه بجبدك
شيخه : احمدوووووووه سويت فتنه امبينهم هههههه
احمد : ابوي لا تغلط على امي ..هاي غناتي وروحي
بو سلطان : اشوف الاخبار واجابل ويه هالبوش النحيس ابرك
شيخه : ايييه احمدوه يلا قوم بسك حنان ... قوم عن امي ريلها يبست
ام سلطان : لا لا ما يبست ريولي ..خليه قاعد عندي ..باجر بيتزوج ويتاخذه زوجته عني وبيصبح وبيمسي وهو مجابلنها
احمد في خاطري " الله يسمع منج " : افااا شو هالرمسه امي .... انتي الكل في الكل ..الله يخليج لنا ياارب ... جان يرن تلفون احمد بس الموبايل كان على القنفه (الأريكه) واحمد وامه قاعدين على الارض ...
احمد : شويخ هاتي تلفوني
شيخه سارت عند التلفون وشافت المتصل وابتسمت : احمد هذا خالد ولد عمي .. عادي ارد عليه ؟
احمد : وانتي شدراج انه رقم خالد ولد عمج ؟ هاتي هاتي ..قصورج بعد تردين !!
خذ احمد الموبايل ورد على الاتصال : يا الله حيهم .. يا مرحبا مليووون يالشيوخ
خالد : الله يحييك ويبقيك ... مرحب باجي بالغرشوب
احمد : تصدق توك ما كنت على بالي خخخ
خالد : لا لا تحاول تخبي شوقك عني .. اعرفك ليل ونهار تفكر فيه
احمد : ياخي انت ما تحس ... تعرف اني احبك ..بادلني الشعور
خالد : شو اسوي .. الحب مب جبر ... حاولت احبك بس قلبي يقول ابعد عن واحمدوووه وغنيلووووه
احمد : ههههههه المهم علوومك ياريال
خالد : علوم الخير .. وانت شخبارك ؟
احمد : يسرك حالنا .. وين دارك ؟
خالد : جداكم والله .. ولا نسيت اني بمرك اليوم وبنطلع
احمد يطق على يبهته : اووووف تصدق نسيت .. خلاص خمس دقايق واكون جاهز
خالد : لا يبا قول غير هالحجي .. بحياتك ما تجهزت في خمس دقايق ..
احمد : هههههه خلاص عيل اقرب داخل
خالد : لا لا بترياك في السياره
احمد : افااا يا ولد عم ما ابي اسمعها منك .. يلا تعال عمك بالصاله سلم عليه وانا بروح اتلبس
خالد : خلاص صار .. يلا انا جدا ( صوب) بيتكم
احمد : اوكي عيل انا بطلعلك الحين
خالد : اوكي باي
احمد : باي
سكر احمد عن خالد وخبر امه وابوه انه خالد واقف برع وهو بيسر يفتحله الباب .. وقال حق اخته شيخه تروح داخل ..بس الاخت ريحت عمرها وقعدت ع الكرسي وقالت مافيها شي ولد عمي ..بسلم عليه وبطلع غرفتي ..
دخل خالد الصاله وسلم على عمه وزوجه عمه ... واحمد حدر غرفته عشان يتلبس
خالد وهو يحب راس عمه : شحالك عمي ؟ عساك إلا بخير
بو سلطان : بخير الغالي ..انت شخبارك والاهل ؟
خالد : كلهم بخير الحمد لله .... وهو يشوف حرمه عمه : شحالج عمتي ؟
ام سلطان : الحمد لله بخير ولدي .. انت شحالك ؟ علومك ؟ عنبو ما بغيت تيي صوبنا ..
خالد : العذر والسموحه منج الغاليه .. واليايات اكثر عن الفايتات
شيخه : شخبارك ولد العم
خالد يصد ويشوف شيخه : بخير الحمد لله ... انتي شخبارج شيخه
شيخه : بخير الحمد لله .. نشقح في هالدنيا ... وتقعد شوي وعقب سارت المطبخ تييب عصير حق خالد ..
شيخه وهي حادره الصاله وفي ايدها صينيه العصير ومبتسمه الاخت ..تقولون وحده من مضيفات طيران الامارات
خالد : ليش تعبتي عمرج بنت عمي ..
شيخه : لا تعب ولا شياته ..إلا هو عصير
ام سلطان : ماعليك إلا هي مره فالسنه تدخل فيه المطبخ
شيخه ( منحرجه) : جرام عليج امي .. انا كل يوم ادخل المطبخ
ام سلطان : ويدي ؟ متى ؟ ماشفناج عيل طبختيلنا شي
شيخه : مب لازم اطبخلكم انزين .. المهم اني ادخل كل يوم المطبخ واشرب ماي واطلع خخخ ... شيخه من يابت العصير وهي بعدها واقفه
ام سلطان : بتمين واقفه جذي على راس الريال
شيخه : اوووه اشبلاي هههه .. خلاص انا بروح داخل .. وهي تشوف خالد : كرر الزياره ولد العم ... نبي زياره معتبره مب خطافيه مال خمس دقايق
ام سلطان في خاطرها " امرره فصختي الحيا بنت غانم .. وطيحتي الميانه مع الريال "
خالد : ان شاء لله ولا يهمج بنت عمي ..
شيخه: يلا جااو جااو ...وسارت شيخه غرفتها وهي تضحك على تصرفاتها ..( يا ربي انا ليش جي اخترش وما اعرف ارمس مثل الاوادم ههههه فديتي خلني على طبيعتي احسن ) شيخه انسانه وايد حبوبه وعفويتها ومرحها معطينها ميزه عن غيرها .. وملامحها طفوليه وهاديه ... وتدش الخاطر بسرعه
بعد شوي نزل احمد الصاله وهو كاشخ وطلع مع خالد..
يا (خالد) خفوقي غدا في يدينهالعبة
لعب الهوا في غصون الراك لا مالت...
و هي في قلبي تمركز في طرفشعبه
وذكرى غلاها ليا ذا الحين ما زالت...
في السياره.. خالد دق فصمه وشغل الاذاعه
احمد : اوب شو هالاغنيه الرهيبه ..؟ طلعت اثري يا بو الوليد ..مانقدر عليك ( كانت اذاعه Fm حاطه اغنيه جديمه لابو بكر سالم)
خالد : ههههه وانا شلي هذا الاف الام روحه حاط الاغنيه .. ذكرتني الاغنيه بــ راعي الدكان ابوبكر دوم كان يحطها
احمد : هههههه حليله ما صدق يوم عرف انه في مطرب على اسمه ..مسكين ابوبكر اسميه كان كنجوس
خالد : هههههه كنجوس علينا لكن حق الخدامات امرره اطيب منه ما شي
احمد : وخاصه مع تامي ( خدامه الجيران)
خالد : اسكت هاي كانت Vip عنده
احمد : من زينها ام القمل هههههه
خالد : احمد .... تتذكر ايام قبل يوم نلعب في الفريج ونسرق بيض من مزرعه قوم جسوم ..(بيت قوم خالد كان في نفس فريج قوم احمد قبل)
احمد : ههههههههه اي والله ... ولا بعد احيدك كنت تحب اخته دلال
خالد : اي حب اي خرابيط ... بس كنت احب اشوفها واتكلم معاها ..إلا تعال وينهم الحين ؟
احمد : انتقلوا من زمااان لمنطقه ثانيه.... ها ليكون بس تولهت على حب الطفوله دلوله؟
خالد : لا حووول .. قلنالك ما نحبها ..
احمد : ههههه انزين بوالوليد شو عن الوضيفه بشر ؟
خالد: وعدوني خير والوالد مكلمنهم بعد ..( ابو خالد ماسك منصب وله هيبته وشخصيه بين العرب ووايد ناس كبار يعرفونه )
دام السالفه جي ...عيل ناقصنك شي واحد
خالد : تقصد الزواج صح ؟
احمد : عليك نووور ... ماشاء الله مب قاصرك شي ..الوضيفه بين ايدك
خالد : خله ايمعلي كم قريشه قبل ... لاتنسى الزواج مصاريف وعوار راس
احمد : ابوك ما بيقصر وانت ولده الوحيد وحتى لو قلت له مصاريف العرس عليك بيرفض وبيلزم يدفع كل شي عنك ...
خالد : خلها على الله ... دام الوالده ما فتحتلي السيره ...ما فكر حاليا
احمد : وانت تتريا الوالده تقولك يا ولدي نزوج ؟ !! شنو هالرمسه يا خالد؟ ... عجل يا بوك نبى نفرح فيك ونشوف عيالك يخربون الدنيا ويقطعون سيتات السياره خخ
خالد : اللي يسمعك يقول انت امررره صاك الـ 60 واحفادك طولك
احمد وبتردد : انا ع الاقل في وحده في بالي ...وناوي اخطبها جريب
خالد صد لـ احمد وهو متعجب من كلام ولد عمه... (معقوله احمد يحب وحده وانا ما اعرف ...)
خالد : اوب يالخطير ...لا لا طلعت مب هين ... قول قول من هاي سعيده الحظ اللي يابت راس شيخ الغراشيب ولد غانم الــ****
احمد: هههههه لا تستعيل إلا فتره بسيطه وبتعرف
خالد : الله يوفقك وياها ... خلاص دام السالفه جي ... بخطب عشان نتزوج فنفس اليوم
احمد: هيه والله فكره .... ابوك بيوفر علينا كل شي خخخخ
خالد : اشوفك إلا حاسد ابويه على خيره ؟
احمد: لا فديته عمي الله يزيده ويباركله في خيره
وصلوا المركز وراحوا يحظرون فلم اجنبي وعقبها تعشوا وردوا البيت
لا تفكر كيف تكسب ميه شخص بظرف عام
الشطاره كيف تكسب قلب واحد ميه عام
قلبي يوفيلك ويبقى لك على مر الزمان
قلبي يهواك وتحبه ما يخونك في الغرام
قلبي لو جارت ظروفك يبقى جنبك ما يبيعك
يشتريك بكل غالي مايفكر في الملام
قلب ما يخون الامانه صادق لك بالوفا
لو سعوا كل العواذل يبقى حبك في سلام
بعد اسبوع في بيت بوخالد بعد الغدا كان خالد قاعد بالصاله وامه وابوه وخواته يالسين وكانت الهنوف بايته(نايمه) عندهم ...
الهنوف : اقول خالد ما تفكر تتزوج ؟ يلا نبى نستاتس باخونا الوحيد وابي اكون عمه
خالد في خاطره ( اشوه انج ببتي الطاري يا اختي ) >> وراه ميت ع العرس
ساره وهي تصفق والابتسامه شاقه الحلج: هيه هيه بيستوي في بيتنا عرس
العنود وهي تكلم ساره : سوير لا تنسين تخبرين نوره بنت جيراننا وهي تخبر امها وامها تتولى المهمه وتعلم حريم البلاد كلهن
ساره : و حريم دول الصديقه بعد خخخ
ام خالد: لا وييه سوير مو تسوينها وتفشلينا والسالفه ما استوت ... وتصد لخالد ..ها خالد يما شرايك ؟ والله اني اتريا هاليوم من زمااان
خالد : دام تبوني اتزوج ..اخطبولي بنت الحلال الزينه وما بنقول لا
الكل استغرب رده فعل خالد من موضوع العرس وانه ما عارض بالعكس الظاهر الريال معزم يكمل نص دينه
ام خالد والفرح غامر ويهها وقلبها : هاي الساعه المباركه ومنو من البنات اللي تقدر ترفض غناه قلبي ولدي خالد ..
بو خالد : ها خالد اشوف إلا الفكره داشه راسك وهو يبتسيم وفرحان لولده ويكمل كلامه :عين العقل يا ولدي .. ولا تحاتي على البنت ترى العروس موجوده ..عندك شيخه بنت عمك ولا ميثه بنت عمتك ... تخير وحده منهن وخل علينا الباجي ..>> كل شي عنده حار بـ حار
خالد انحرج >> تو الناس ... : والله يا بوي ما ادري شقولك ...ويصد لـ امه : ها ام خالد انتي شو تشوفين ؟..
ام خالد :ما عندي خلاف .. كلهن زينات واعدهن مثل بناتي .. اللي تباها انا موافقه عليها
الهنوف : شرايك بشيخه بنت عمي ... انسانه خلوقه ومرحه وطيوبه ...
بو خالد : انا اقول ميثه اخير له ..لانها اكبر عن شيخه واكثر تليق على خالد !
خالد : شوركم وهدايه الله ... ماعندي مانع ...
بعد شوي قام خالد وحب راس وامه وابوه ودخل غرفته وهو يحس بسعاده وراحه ..حمد ربه ع النعمه اللي هو فيها وكل اللي يتمناه مسهل له ...
بعد يومين كلم ابو خالد اخته ام ميثه وقالها انه يبي ميثه لولده خالد وام ميثه استانست حيل بس قالت لازم تشاور ابو حمد والبنت وبترد عليهم جواب..
.
بعد 4 ايام ردوا اهل ميثه عليهم بالموافقه وفرحت العيلتين ...
محبوبتي ياناس للغير مخطوبه .. هز الحشى بركان والخافق بتسّلم
هذا حكم ربي والاقدار مكتوبه .. حدن يباركله وحدن له يسلم
ياليتها لو كانت اليوم مغصوبه .. لا ايول وسط الناس يوله وانا اتألم
يا ويل عين اللي فقد شوف محبوبه .. الكون كله من بعد شوفته اظلم
في بيت بو سلطان وقت العصر ..
ام سلطان تكلم ام حمد ع التلفون و احمد نازل عشان يروح الكليه وهو نازل وبيطلع من باب الصاله سمع امه تقول : باركي للميث ... تستاهل بنيتي الغاليه .. عقد احمد حواجبه واستغرب ..(على شو تبارك لها ؟!!! ....لااااااااااا ..ليكون اللي في بالي وانها ؟؟؟؟ وانهـ ـ ـ ـا انــ ـ ـ ـ خطـ ـ ـ ـبت )؟!!!!!!!!!!! تمت التساؤلات تدور براس احمد وهو واقف في محله ولا تحرك خطوة ... وهو يحاول يشل هالاوهام
ام سلطان سكرت التلفون ونادت على احمد : احمد .. احمد يما
صد احمد لـ امه بكل تثاقل : خير يالغاليه؟ ... حس احمد انه امه بتقوله الخبر الاكيد اللي شاك به..
ام سلطان : فديتك ترى ولد عمك خالد خطب ميثه بنت عمتك وام حمد تقول خبري العيال وابوهم ايون الخطوبه باجر المسا ...
احمد دارت الدنيا عليه ... ( خاااااااااااالد ؟!!!!!!! ولد عمي خالد خطب ميثه ؟!! هو ماغيره خطبها ؟!! لا مستحيل اكيد هذا كابوس .. ولا انا اتخيل بس ... مستحيل ميثه تروح عني ... امووت ولا غيري ياخذها .. واخرتها يطلع ربيعي وتوأم روحي خالد ياخذها ... وهو يشوف امه ويقول في خاطره ..(امي قولي انه هذا مقلب ... قولي انج تسولفين وانه ميثه ما انخطبت ..) آآآآه ويلي من حبيبن خان العهد وتركني جريح اعاني صدوده ... رد على امه وقالها ان شاء وطلع من البيت مسرع بسيارته..
سار ولا هو داري وين ساير ... حس بعمره ضايع ... ضاع بعد ماكانت ميثه له دروبه ... صار غريب بعد ماكانت ميثه داره ومرباه ... (ليش ميثه ليش؟ ... ليش وافقتي وانا اتحسبج تبادليني الشعور؟ .. آآآخ يا ميثه يا اني اتوهم انج كنتي تحبيني ولا انتي طلعتي الخاينه ؟ ) كان احمد مصدوم من الخاطر وهالشي اللي منع دموعه تنحدر لانه يحس بعده مو مستوعب ... كان يوم اسود وغبر بالنسبه لـ احمد اللي اعتبره يوم وفاته ... يوم موت كل شي حلو في حياته .. وسعادته وآماله اللي علقهن بانسانه انهتهم بكلمه منها من دون اي اعتبار لمشاعر ه...
ألا يا ويل من فارق رفيجه ..وشبت في وسط قلبه حريجه
ياليته عالمٍ باللي جرالي ..وحالٍ من عنا الفرقا عويجه
ياكيف الروح تحيا بعد روحي .. وهو روحي من ازمان عتيجه
وصل الخبر عند شيخه اللي انصعقت به هي الثانيه ... وراحت غرفتها تصيح ..تصيح على حظ اخوها فـ أعز رفيجاتها ... وتمت تقول في نفسها ...( عانك الله يا اخوي ... بتلقاها من حبيبتك اللي خانتك ولا من ربيعك اللي ذبحك ولا هو داري عنك .... احمد خويه طيب ومايستاهل ... ليتك بس ما حبيتها ولا عطيتها قلبك اللي ما صانته .. ليش ميثاني سويتي جذي؟ ..ليش بعتي حب اخوي برخص التراب؟ ... ليش هنتينا بهالطريقه ؟ ليش وافقتي على حساب موت اخوي ...اخوي اللي مستعد يموت تحت ريولج ولا تزعلين عليه ؟ ماهقيت يالميث ماهقيتها منج انتي بالذات ) ... اشتعلت النار في يوف شيخه وحست بقهر ما حست به قبل ... وقررت ما تكلم ميثه وتزعل منها واللي فيها فيها ...ميثه ربيعتها وبنت عمتها لكن احمد اخوها
دبله وسط يمناه ..ورده على ثوبه ..مجبور ارضى بالذي صار واستسلم
حسبي عليه صارت احلامي مسلوبه ..لي حل بي يا ناس ما حل في مسلم
ابكي ودمعاتي ع الخد مسكوبه ..تتسابق الدمعات ع الخد تتقسم
ايام عمري صارت اليوم محسوبه .. باخذ من الايام عبره وبتعلم
خالد خطب ميثه رسميا واحمد ما حضر الخطوبه وجذب عليهم وقالهم ربيعه مسوي حادث وبيروحله المستشفى والرياييل حددوا الملجه وبتكون بعد شهرين وطاف شهر ع الاحداث السابقه وكل هالمده شيخه ماخذه على خاطرها من ميثه ... ميثه حست بتغير شيخه عليها وكانت تدق لها احيانا وما كانت ترد عليها .. وبالجامعه كانت شيخه تضطر انها تكلم ميثه عشان البنات ما يلاحظن واذا رمستها ترمسها بكل برود ... واما علاقه التوأمين فـ كانت عاديه ولكن طلعاتهم وسوالفهم ويلساتهم مع بعض كانت تقل يوم عن يوم واحمد كان يتعذر لخالد ويقوله انه عنده امتحانات وان هاي آخر سنه ويبى اييب معدل زين وهو فالواقع ما يقدر يشوف بعين خالد .. خايف يزل لسانه ويعترفله باللي في قلبه ...احمد مازال يحب خالد ونظرته له ما تغيرت بس لا اراديا يحس بالغيره منه .. وكل ما يشوف خالد يتذكر ميثه .. فــ عشان جي حاول ع الاقل هالمده يرخي العلاقه مابينه وبين ولد عمه ليمن يتعود على الفكره المريره ...كان خالد يطوفله اعذاره ولو انه قلبه يقول شي ثاني ...بس ما حط احتمال يكون زعلان عشان خطبته لميثه ...
قبل اسبوعين من موعد الملجه والحال ما تغير ... احمد يتهرب من ولد عمه خالد وشيخه ما تكلم مثيه ...فقررت ميثه تروح بيت خالها بوسلطان عشان تتفاهم مع شيخه وتنهي هالزعله اللي مالها داعي ...
.
.
.
شفتك وظنيت به عاود غناتي ... واحتسبت سيدي عايدٍ ليّه
واعترتني رعشةٍ هزت قواتي .. واحتبس نطقي عن قول التحيه
دخلت ميثه الصاله ولقت ام سلطان وسلمت عليها وبعدين راحت فوق عند شيخه ..بعد ماركبت الدري شافت احمد طالع من الغرفه وشكله بيطلع .. احمد اول ما شافها ..تخربط الريال .. اول مره يشوفها بعد ما انخطبت والصراحه توله عليها... ومهما سوت ميثه تراها بتظل اول حب لـ احمد وما يقدر يمسحها من باله بهالسرعه ...وفجأة حس بنغزة بصدره وتذكر خيانتها له وكيف هانت عليه ...وانها خلاص ملك غيره
ميثه وبصوت هادي : احمد شحالك ؟ >> بذمتكم مايبالها ظرب
احمد ويقول في خاطره .."تسأليني عن حالي بعد ماكنتي حالي ودنيتي ومماتي ...تستاهلين صفعه على هذا السؤال السخيف يالخاينه" ..حاول يرد عليها بأي جواب بس حس انه ما يقدر يتكلم ..واذا تكلم يمكن يغلط عليها (حسافه بنت عمتي لين اليوم اراعي شعورج واخاف اجرحج) ... اكتفى بنظره احتقار شافها وعلى طول مشى عنها
ميثه ما استغربت وقالت بصوت خفيف : بسم الله .. .شوي بيقوم ويظربني ... اييه مشكلته وسارت غرفه شيخه ...
ميثه تدق الباب : شويخ؟
شيخه سارت فتحت الباب لبنت عمتها واستقبلتها بابتسامه باهته : تفضلي حياج
ميثه : مرحبا بنت الخال ... وينج لاتنشدين ولا تيين صوبنا ؟..مررره قطعتي عنا ؟
شيخه : مشغوله شوي ... ومالحق..كانت تقول هالكلام وهي ترتب الاوراق اللي ع السرير
ميثه : شويخ بلاج ليش جذي تكلميني ؟ ما احيدج جذي ؟ شو اللي غيرج عليه ؟ احسج زعلانه مني ؟ وسارت قعدت على السرير
شيخه وبكل جديه : ويوم انج تحسين اني زعلانه منج .. ما سالتي نفسج ليش انا زعلانه او ليش تغيرت عليج؟ >> البنت شكلها بتطلع كل اللي في خاطرها اليوم
ميثه : شيخه اللي صار قسمه ونصيب وهذا نصيبي بالدنيا
شيخه : شووو ؟ قسمه ونصيب ؟!! ميثه لا تحاولين تبررين موقفج بالنصيب .... النصيب مو معناه انج تبيعين شخص ارخص كل شي عقبج ...تبيعين شخص يسهر الليل يهاذي بج وان صحى يصحى على طاريج ... النصيب مب انج تعطين لشخص امل بالحياه وعقبها تحكمين عليه بالموت ..ولا هو انج تغدرين بناس امنوا حياتهم وياج وعافوا البشر عقبج ... شيخه تقول هالكلام والدموع في عيونها ... : تشوفين هالدموع اللي بعيوني .... اشوفها يوميا بعيون اخوي ... اخوي وان ما صاح ..تراه يصيح دم في قلبه والنار تحرقه بكل لحظه تمرين انتي في باله ..وتقاطعها ميثه
ميثه : شويخ ... اخوج من صغره يحبني وما انكر .. لكنه ما تقدملي ... كان المفروض يخطبني ولا يسمح لاي حد يسبقه ..الشخص يوم يبني آمال لازم يخليها على ارض الواقع ولا يعلقهن ويخليهن مع الايام والايام ماحد داري بها ولاظامن لها...
شيخه : ميثه انتي شو قاعده تقولين ؟ اخوي ما بنى هالآمال إلا لانج عشمتيه بحبج له ... احمد يوم عن يوم كان حبه يزداد وهو مطمن بانه اللي يحبها هي اللي بتكون شريكه حياته... ميثاني (والعبره خانقه شيخه ) انتي كنتي تحبين اخوي ... شلي خلاج توافقين على خالد ؟ وانت تدرين علاقه اخوي بولد عمه كيف قويه ؟!!!!
ميثه ما تعرف شو ترد : شيخه ... ولد خالي اللي خطبني وما يستوي ارده.. وايد مشاكل بتستوي ونحن في غنى عنها ..
شيخه : وفي رايج اللي استوى بـ احمج مب مشكله؟؟ وبعدين خليني اقولج شي ... انتي لو ماكنتي تبين خالد..جان رفضتيه ولا بيهمج لو تستوي مشاكل ولا لا...
ميثه : شقصدج؟
شيخه : قصدي واضح وانا وانتي فاهمين السالفه ولا تبيني اقولج ؟ شيخه تقول في خاطرها ( بطلع كل اللي بخاطري اليوم ..علي وعلى اعدائي يا ميثه) امرره مقهوره من برود ميثه ...
ميثه : لا قولي .. ما احب تنغيزاتج ..
شيخه : من يوم سيرتنا للمزرعه وانا حسيت بج تميلين لـ خالد ... انجرفتي ورا عاطفتج من غير قيود وبكل انانيه وماعطيتي نفسج دقيقه تفكرين بشخص حط كل آماله عليج ... مافكرتي انج لو بديتني تحبين شخص ..تنهين حياة شخص ثاني اللي هو اخوي...السوالف اللي فيهم طاري خالد تستانسين عليها .. واذا مر اسم احمد جنا اذنج تسكر وماشي تعابير على ويهج وتقول بطريقة استهزاء : no commint at all
ميثه وباستخفاف : والله انا ما قلت لـ خالد ... دخيلك تعال اخطبني ... وخلاص يعني اذا مره مرتين ضحكت مع احمد يعني حبيته ؟ شيخه انتي وايد تبالغين وتكبرين المسائل ... وما اعتقد احمد يحس مثل ما انتي تقولين
شيخه : تدرين ليش تقولين هالكلام ؟.. لانج مامريتي فيه .. او اصلا ما حطيتي نفسج مكانه عشان تحسين ...وتقول في خاطرها ( الله يا ميثه !!! الحين احمد من سنين يحبج .. ويطلع منج هالكلام ؟!!!)
ميثه : خلاص شويخ اللي صار صار ... احمد بيلقى اللي احسن واخير مني والله يهينه بها ... وانا عشره ايام بالكثير بكون على ذمه ريال والمفروض نصك السالفه قبل لا تكبر زياده ....
حست شيخه ان الكلام اللي قالته ما حرك شعره من ميثه لكن ارتاحت انها طلعت اللي فـ خاطرها .. : الله يهينج معاهم ويعوض اخوي خير ياارب
قامت ميثه وراحت صوب الباب بتطلع : ع العموم اتمنى انكم ما تفتحون هالسيره وما ابي احد يكون شال عليه ..واحمد مع الايام بينسى ( وين ينسى وقلبه مجروح من الخاطر ومصدوم فاقرب ناسه )
شيخه تتنهد : الله كريم.. بس صبري اييبلج شي تشربينه
ميثه : شربت من الكلام اللي قلتيه وارتويت ..مشكوره... وطلعت من الغرفه
شيخه ردت صوب السرير وقعدت عليه وتمت تفكر والدموع ورا بعض ,,, طاحت دموعها متحسفه على حلو الايام اللي راحت واللي ما تظن انها بترجع .. والعلاقه اللي حالت عليها هي وميثه اللي كانن مثل الخوات لبعض خصوصا انهن ما عندهن خوات .....(آآآه يا الميث وايد صرتي قاسيه وانا اقول انج الحنون وقلبج اللي يحن على الصغير والكبير ...والحين صار اقسى من الصخر على اقرب الناس لج ... فديتك يا اخوي كيف عايش ايامك الحين ؟ بأي لون تشوف الدنيا الحين ؟ وبشو تفكر الحين ؟ الله يعينك ويقدرك على نسيانها ..صعب هالشي ..لكن ما في شي يصعب على خالقنا ..والله انج ما تستاهلين اخوي يالميث ... والله ما تستاهلين واحد مثله ... بييلج يوم ياميثه وبتندمين والدينا دواره والجرح دين..)
في خفايا القلب .. آهات وعذاب ...وفي ضميري هم واحزان وشجون
ليش يا دنياي احلامي سراب ..واللي هويته قلبي الصادق يخون
عايش حياتي في مآسي واكتئاب ..والعمر يمضي عسى جراحي تهون
كان لي اغلى من اهلي والاصحاب .. وكان لي يا ناس اغلى من العيون
ابعد واجفى وانا كلي اغتراب .. وما بقالي شي احياله في هالكون
جفت دموع العين ..والحب غلاب ..أه كم بشكي من جروح وطعون
الامل عن ناظري ولى و غاب ..وفي المحبه صدق خيبت الظنون
احمد في السياره راجع من الكليه وكانت الساعه 10 المسا
كانت مستضيج من الخاطر ويحس نفسه مخنوق وما يعرف وين يروح
وكان مشغل المسجل على اغنيه على بحر
"تخنقني العبرات تنزل دموع عيني ..ليمن تذكرت او شفت بيتك بعيني
آه وين ايامهوين كلامه..وين همسه ابي سلامه
مااذكر في يوم ظلمني..كنت احبهويحبني
عايش انا باحلامه..ويجي يومه ورحل عني
آه وين عيونه وينكلامه..وين سلامه ويه جنونه"
كان احمد يسوق وحصل نفسه واقف جدام بيت حبيبة قلبه ميثه
ساقه الشوق لعندها من غير ما يحس ..تم واقف ويشوف دريشه غرفتها اللي كانت بالدور الثاني ومواجهه لحوي البيت...كان تفكير احمد يرده بـ ذكريات ايام قبل وكيف كانوا وكيف اصبحوا ...كان يحس بغصه صاكه على بلعومه وعقب حرك سيارته و كمل دربه بس مب للبيت لاي بقعه تخلصه من الضيجه اللي هو فيها .. لانه خلاص واصل حده وفي اي وقت يمكن ينفجر
نفس اليوم الساعه 1 بعد منتصف الليل .. كانت شيخه يالسه ع اللابتوب وتشتغل ع الفوتوشوب إلا وتسمع صوت تكسير شي ... تروعت وعلى طول سارت صوب الباب وتساندت عليه بس تجرأت وظهرت من الحجره ... وجان تسمع صوت ظربه قويه على شي خشبي ... مصدر الصوت كان غرفه اخوها احمد ؟؟ اصلا ماحد وياها في الدور الثاني غير احمد ..المهم خافت شيخه على اخوها وركضت صوب غرفته وفتحت الباب وشافت احمد حاط ايديه الثنتين على التسريحه ( التواليت) وناكس راسه وعيونه مغمضه ..حز في خاطرها منظر اخوها ... وعقبها شافت كبت(دولاب) الثياب و مرايته متكسره والارض اللي انغطت بقطع الكريستال المنثوره... هاي كانت الهديه اللي خذها احمد ليوم ميلاد ميثه ..وشافت سلسله الذهب بعد طايحه ... مشت بخطوات حذره عشان لا تدخل القطع الصغيره في ريلها وشلت السلسله ... وسارت صوب اخوها
شيخه تحط ايدها على كتف اخوها وتضغط عليه بالقو وببنره حزن: احمـــــــد .. لا تسوي بعمرك جي .. خلاص ما تفيد العصبيه وحرق الاعصاب ..حاول تنسى وان ما قدرت حاول بعد ... شلها من قلبك ... لا تخلها تيي على بالك .. اشغل نفسك بشي ثاني .. انساها خلاص
احمد رفع راسه وتم يشوف نفسه بالمنظره وكل تعابير الحزن والتعب على ويهه ويتكلم والعبره خانقتنه : شلون انساها وانا حتى لو شفت نفسي بالمنظره اشوفها فيني ... كيف انساها وطيفها يلاحقني وين ما اروح... حبيت ميثه من كل خااااطري ... حبيتها بكل احاسيسي ..بكل حالاتي .. مريض ولا صاحي .. حزين ولا فرحان .. نايم قاعد .. مشغول او فاضي .. ما مر يوم إلا وميثه على بالي ... هي ساكنه في روحي ..والله ما اتخيل ياخذها غيري ما اتخيل هاليوم ..
ونزلت دمعه جريئه من عينه ..اللي كانت تتبعها اميه غصه بالحشا ... اليوم اطلق احمد العنان لدموعه بالنزول بعد ما كانت عبرات مخنوقه تمت شهرين .. واليوم طاحت وهي تحكي معاناه صاحبها اللي يشرب كاس القهر والضيم من ايد احب الناس على قلبه... احمد المرح ..البشوش ..إلا ما يعرف البجي .. انكســر اليوم عشان بنت ... ( كل شخص وله نقطه ضعف)
"ابكي وانا ليقلب مثل الحديدي..
يا رخص دمعي بعد فلانه وغلاها..
ابكي وافضي حر ما بي فيقصيدي...
ياليت دمعي يروي روحي وظماها.."
شيخه ساكته ومب عارفه شو تسوي حقه ... تحاول تخفف عنه.. وهي محتاجه حد يواسيها ..تحاول تنسيه ولو يوم واحد وتخليه يرضى بالواقع المر و لكن فاقد الشي لا يعطي ...
الجزء الثامن
بالطريج ^^
هذا جزايه اني هويتك ومغليك وانته بحياتيكنت لي راسمالي...
ضيعت وقتي في محبتك هاويك..ولا كنت اصدق فيك مهما يقالي...
صدقتكذبك وخدعتني حكاويك..واثرك تخطط بالخيانه اغتيالي ...
غلطة حياتي يوم اثقت انافيك..غلطة عمــر وادفع ثمنها بغالي...
بعد يومين العصر في بيت قوم ميثه
يت ام خالد بيت قوم ميثه
في الصاله ام حمد تكلم ميثه : ميثه يما روحي قولي للخدامه تجهز الفواله والقهوى مرة خالج بتي الحين
ميثه ارتبشت على الطاري : ان شا ء الله يما
اول مره في تاريخ البشريه ميثه تدخل المطبخ وبنفسها تجهز الفواله والقهوى ... وتسوي العصير ..والخدامات مستغربات ..
بعد 20 دقيقه يت ام خالد وخالد كان بيرد البيت لكن وين وعمته ام حمد ماسكه ايده ..
خالد ( مستحي): لا عمتي مره ثانيه
ام حمد : لا ثانيه ولا ثالثه ... واغمي عليك يا بو وليد ..اش منه مستحي ؟
خالد : ههه لا مب مستحي عندي شغل
ام خالد ببراءه : اي شغل ؟ انت قلتلي بتوصلني وبترجع البيت ترقد
خالد منحرج : ........
ام حمد : هاا شفت ؟ يلا تعال داخل .. لا تخاف ميثه مو في الصاله ... عيال عمتك داخل.. اقرب وليدي ..البيت بيتك ..حياك
خالد استسلم للامر ودخل الصاله ... بس اول ما دخل ..لا اراديا عيونه كانت تدور زوجة المستقبل بس الحبيبه معكسره في المطبخ اليوم وتفازع بالشغل
بعد ما ودت الخدامه الفواله والقهوى وهي راجعه المطبخ بصينيه العصير
ميثه تكلم الخدامه بفضول : اي واحد قلاص خالد ؟
الخدامه تتمعن النظر في القلاصات وتأشر على واحد منهم : هادا
ميثه :are you sure ? اخاف يطلع مال فصول ..
الخدامه : لا لا فيصل شربي كله ..خالد ما شربي وايد
ميثه خذت القلاص وشربت باقي العصير ويوم خلصت قالت: علني ما خليت من راعي القلاص .. وعقبال يا خالد ما تشرب من قلاص عصيري يوم العرس ههههههه
الخدامه بنقم : ميسو هادا مال رياااااااال.. مافي زيييييين !!!!!!
ميثه ( معصبه ) : هبي هباج الله تقولين مافي زين ..ودج اصلا !! يعلج ويعل عيالج وابوهم وكل عشيرتج تتفدونه ..
بعد عشر دقايق ميثه قاعده في المطبخ متملله وودها تطلع .. بس وين تطلع وخالد في الصاله وهم وما تقدر تروح غرفتها لانها بتنشاف اذا ركبت الدري
فجأة حدرت عليها ام خالد ومعاها ام حمد .. ميثه استحت وعدلت عمرها وقامت سلمت عليها
ام خالد( مبتسمه) : هلا ببنيتي ميثه .. شحالج امي ؟
ميثه (مستحيه ) بخير خالتي ..انتي شخبارج ؟ عساج بخير
ام خالد : بخير يسرج الحال امي..
ميثه : دوم مو يوم وهي تشوف امها : يما بغيتوا شي من المطبخ؟
ام حمد : لا فديتج ..بس خالتج بغت تسلم عليج قبل ما تروح ..
ميثه : ليش خالتي تعنيتي وييتي المطبخ .. جان خبرتوا الخدامه وانا اييج
الصاله؟!
ام خالد: ادريبج ما بتين دام خالد موجود بالصاله
ميثه نزلت راسها مستحيه : .............
ام خالد وام حمد : ههههههه
ام خالد : يالله محلاج يالميث يوم يغدي ويهج احمر ..الله يحفظج ان شاء الله
خلصت ام خالد كلامها و سلاماتها ووداعاتها وطلعت اهي وام حمد الحوي .. وميثه على طول طيران لغرفتها عشان تشوف خالد من دريشه الغرفه >> ما تفوت
وقفت ميثه عند دريشه غرفتها وتمت توايج على خالد اللي كان في حوي البيت يسلم على عمته ام حمد .. وبالصدفه خالد رفع راسه وشاف ميثه تشوفه...ميثه شافته ثانيه ثانتين ثلاث واربع وبعدين ردت الستاره وتساندت عليها.... دريشه ميثه عاكس بس الحين قرب المغرب ينشاف داخل الغرفه ... المهم ميثه بغت تطفي الليت وتشوفه على كيف كيفها بس خافت ان خالد يقول طفت الليت عشان تبحلق فيني عدل ... ردت الحبيبه تشوفه بس هالمره بالدس ويوم كانت تشوفه.. فجأة تذكرت احمد لمن كان ايي بيتهم وقبل ما يطلع يتم يشوفها وهي في نفس المكان .. ويوم كان يسوي نفسه يعدل غترته وهو من هناك يسولها باي باي بيده عشان ما يلاحظون واحيانا يوم ماحد وياه في الحوش يحط ايده على قلبه ويسمكه وبحركه يفره صوبها عشان تلقفه .... حزت في خاطرها هالذكرى .. لا اراديا ظربتها الغبنه ( غصه) وقالت وهي تتنهد : احمد شحالك الحين ؟ ... استغربت ميثه من اللي تقوله بس مسرع ما نست الموضوع وردت تفكر بحبيب القلب اللي صار شغلها الشاغل والرجل الاهم في حياتها
.
.
.
ما يفيد ارجع لحبك ما يفيد .. انولد قلبي فـ بعدك من جديد
اوعدك ما انساك لو طال الزمان .. خلنا اصحاب لكن من بعيد
بيدك حبنا افلس وظاع .. قلبي الشاري وقلبك انت باع
كيف ترجع لي بعد ما الحب ظاع .. وقلبي المسكين خليته وحيد
يوم الجمعه في بيت بوسلطان بعد الغدا ..الريم بنت سلطان حاشره ابوها تبي تسير الدكان ..
سلطان : وين اوديج الدكان الحين ..؟؟ العصر العصر
الريم : بابا انت كله تقول بعدين .. كله تقص عليّه
سلطان وهو يأشر على احمد : اكو عمي بيوديج دكان
احمد : روح روح فاضي حق بنتك انا ؟
سلطان وهو يغمز حق احمد عشان يسايره ويجذبون على الصغيره
سلطان : ريماني اكو عمي قال بيوديج دكان
احمد يسوي نفسه معصب : ريموووو بتين اوديج الدكان ؟؟
الريم تمت تطالع امها وهي مبوزه
الهنوف : الله يهديك احمد وين تبيها توافق وانت جي مبقق عيونك لها
احمد : ههههه هذا اللي اباه ترى ... ويرد يشوف بنت اخوه : ريمو يالحماره اكلمج انا ..
الريم : انت الحمار
الهنوف : الريم ..عيب ماما لا تقولين حق عمي هالكلام
احمد : زين ريمو .. خلاص ابد ما بيوديج دكان ولا بخلي حد يوديج بعد
الريم : بخلي خالي خالد يوديني .. خالي يحبني وايد
سلطان : ريماني خلاص خالي خالد ما يحبج .. وما بوديج دكان بعد ..بيودي ميثه بس
احمد في خاطره " اقوم الحين اصكك بهالقلاص فـ راسك انت الثاني "
الهنوف : بومِييد لا تقول حق الصغيرونه هالكلام
سلطان : هههههه ابى اشوف رده فعلها .. ويكمل كلامه حق بنته : خلاااص ريمو خالي ما يحبج .. ميثه بتاخذه عنج ..
الريم وشوي بتصيح : انا ما احب ميثوو ..
ام سلطان : سلطان يا ولدي زين جذي خليت بنتك تكره الحرمه
وتدخل عليهم شيخه الصاله ..
شيخه : ها احمدوه فديتك ساعه كم بنسير السوق؟
احمد : فاضيه انتي
شيخه : هيه والله فاضيه وما عندي شغل تصدق ؟ .. ليكون بس رديت عن كلامك ؟ حبيبي لا تنسى انت وعدتني البارحه .. لا لا ما يخصني .. بتودني اليوم ..
احمد : بل بل بل خلي الواحد يتنفس .. هذا انا ما قلتج لا
شيخه : عيل ليش تقول فاضيه ... يعني افهم من كلامك انك غريت كلامك ..
احمد : والله ليش كله تقوليلي انا اوديج ... ؟ عندج سلطان ..ولا هو مب اخوج يعني ؟
سلطان : لا لا ما اودي حد انا ... الريم من الصبح تبيني اوديها الدكان ولا وديتها .. تقولون حواطه السوق ويالحريم .. حلمي شويخ
شيخه بنقم : لا حبيبي ما بحلم لاني غاسله ايدي منك
سلطان : خخ غايته والله
الهنوف : شيخه خواتي بيمرن عليه اليوم وبنروح السوق .. تعالي معانا
سلطان : لا لا انتن اخوكن خالد بيودكن .. ما يخصكن في اختي ؟
الهنوف : بسم الله شقلت انا الحين ؟
شيخه بحزن : لا تودوني ولا تخلوني اروح مع حد ؟!!!! وتشوف احمد : ها احمــد شو الحين ؟ والله مب حاله .. تعرفوني ما اروح السوق إلا في السنه احسنه .. والله انكم مذله .. يعني شو بسوي في السوق؟ .. باخذ حايتي منه وبنرد البيت .. !!
بو سلطان : فديتج يا بنيتي والله لو فيني شده جان خذتج ..بس تدريبي ركابي يعورنّي وما اقدر امشي وايد ..
شيخه : بويه انا عاذرتنك ..بس هالغلامين امرره ما يحسون والله .. هذا وانا اختهم الوحيده .. وتقولين في خاطره " يالله متى اييني الريل ويفكني من هالمذله "
احمد وكسرت خاطره شيخه ..مسكينه كيف تحب اخوها وواقفه معاه في كل الظروف وهو مستبخل عليها روحه السوق؟!! ..
احمد : خلاص شيخه .. تزهبي العصر بيوديج
شيخه فرحانه : و يعلني ما خلى من هالشوووووف يا ناس ..فديييت اخويه احمدوووه .. الله يجبر بخاطرك .. ياخي انت شيييي
سلطان : دهان سير
شيخه : لا والله ... اصلا انا احب حموود ..سواء وداني السوق ولا لا ..
جان ينش احمد وسار صوب بنت اخوه الريم اللي كانت لايهه وتعلب بألعابها ..وشلها
احمد : ريماني تحبيني ؟
الريم : هيه احبك بس ما احب ميثه
احمد : ليش ؟
الريم وماده البوز شبر : بس ما احبها
احمد في خاطره " اخ يالريم لو تدرين هاللي ما تحبيها شو سوت بعمج "
جان ينزلها وقالها تروح تلبس نعالها عشان يوديها الدكان .. ومن بعد ما ردها البيت طبعا ما خلت شي ما شرته من الدكان..راح احمد حجرته وريح شوي لين آذان العصر وعقبه ودا شيخه السوق ..
العصر .. احمد في السياره مع شيخه
شيخه بفضول : حمووود ريمو ليش قالت ما تحب ميثو ؟؟ والله مستغربه من كلامها
احمد : ماشي ... قلتلها الظهر ما بوديج دكان ولا بخلي حد يوديج .. جان تقول بخلي خالي خالد يودني ..وجان يقولها سلطان وتنهد شوي : خالج ما يحبج وما بوديج دكان ..بحب ميثه وبودها هي دكان
شيخه : اهاا ..
وعقبها ظلوا ساكتين لين ما وصلو السوق ..
في السوق في محل الشيل والعبايه كان المحل شوي زحمه ..شيخه داخل واحمد يترياها خاري ( برا) ..
شيخه وهي تشوف وحده من الحريم : انتي مو جنج مرت اخوي اللي من شوي شايفتنها في البيت
الهنوف : ههههه شيخه ؟
شيخه : هيه طال عمر ج شيخه بلحمها وعظمها من دون الشحم طبعا ..
شيخه والهنوف كانن متنقبات ..بس شيخه عرفتها .. وعقبها سلمت على بنت عمها العنود اخت الهنوف وخلاف سوتلها شيله وطلعت من المحل ..
ويوم طلعت شافت اخوها واقف مع خالد ..
شيخه : شخبارك خالد ؟
خالد : هلا شيخه بخير الله يسلمج ..انتي شحالج ؟
شيخه : بخير ..
خالد يكلم احمد : ها ولد العم ..شو الحين .. نتلاقى في الشيشه الليله ( المقهى) ؟
احمد : لا ولد العم مالي نفس والله
خالد يتنهد : خلاص على راحتك .. ولو اني كنت بستانس اذا خاويتنا
احمد : السموحه منك .. مره ثانيه ان شاء الله
خالد : ليتها تيي هالمره الثانيه .. ع العموم ما اعطلكم زياده
احمد : اوكي الغالي اشوفك على خير ... فمان الله
خالد : بحفظ الله ..
وساروا عنه .. وهو يمشون شيخه سالت اخوها
شيخه : حمووود.. ما ادري احسك تتهرب من ولد عمك ؟
احمد : مايخصج انتي
شيخه : حموود خالد ما يخصه ؟!!
احمد ( معصب): خلصتي حايتج عشان نرجع البيت ؟
شيخه : لا لا اصبر بس بدخل هالمحل الاخير وخلاص
احمد : انتي من الصبح تقولين هالمحل الاخير وتدخلين عشر محلات عقبه
شيخه :هههه لا خلاص فديتك والله هذه أخر محل
احمد : يلا انزين خلصي وفكيني من شرج
فعلا كان هذا أخر محل دخلته شيخه ... الانسه بغت تدخل كم محل عقبه بس خلاص لانها حلفت وهذا غير شكل احمد امررره ما يساعد ..
.
انا ما ادري اذا قلبي رفض يصبرشسويله
تخيل حالتي بعدك.. انا تحطمت ع الاخر ..
اكلم نفسي بغيابك ..الوم القلب واشكيله
واصبّر نفسي بالقوة .. واقضي الليل انا ساهر ..
قبل موعد الملجه بأسبوع
وخالد طفح الكيل عنده ونفذ صبره من ولد عمه ... وبنفس الوقت ماهان عليه يشوف احمد متضايق وما يخفف عنه ... وملجه خالد هالاسبوع ويبى ربيعه وصديق عمره يشاركه الفرحه وهما اللي مخططين يتزوجون رباعه..قرر يروحله البيت وخصوصا ان احمد طلعاته قلت عن قبل وقال أكيد بيحصله بالبيت وكان الوقت 8 المساء
سار خالد بيت عمه وقالوله احمد طالع .. استغرب وين طالع ... اتصل على جهازه بس لقاه مغلق !!!
خالد قاعد بالسياره : وينه هذا ؟!! وين طالع ؟!! يمكن رايح البحر ... اعرفه بوشهاب ... يموت ع البحر ..وان شا ء الله ألاقيه هناك ...
.
.
.
علمنــي وشلـــون انساك وانـــــــام .. وانا اللي لك صاحي ايام وايام
شاغلني في بالي شوقك ولا يروح .. صاحي انا ونايم مايروح مايروح
في عالم اخر لعاشق انهدمت كل احلام سنينه واسودت الدنيا في عينه وما صار يشوف في الدنيا غير رماد الاشياء والسواد ولا يذوق لها طعم ..وصار ملجأه الوحيد لسجن واقعه الاليم هو البحر اللي يعتبره صديقه الوفي و الوحيد..كان احمد يالس صوب البحر ويتنهد كل شوي ..ونفسه تحكي للبحر معاناتها بلغه ما يحس بها غيرهم من الخلايق ..
...
ومن صوب خالد اللي توجه البحر .. واحساسه يقول ان بيحصله هناك .. ويوم تقرب شاف سياره رنج ذهبيه وعرف انها سياره احمد ... وقف سيارته بعيد شوي عشان احمد لا يحس فيه ... نزل وتقرب اكثر وكان احمد يالس على الرمل وناكس راسه وصبوعه تتخلل شعره ..وكان فعلا شكله يكسر الخاطر وتبين ان الشخص هذا محطم نهائيا ... قال خالد في خاطره.....( الله يا ولد عمي ..اللي يشوفك ما يقول هذا احمد اللي نعرفه .. الظاهر اللي فخاطرك وايد...و شكلك شال جبل من الهموم ولا راضي تتكلم ..) كان خالد يبى يتكلم جان يسمع تنهيده احمد وتراجع شوي ... احمد وهو يكلم نفسه بصوت خفيف : آآآآآآه.. بحضر زفافك مثل باقي المعازيم.. لو كان في ليلة زفافك وفاتي.. بحضر نهاية قصةالحب والضيم.. واكتب على جرح الهوا ذكرياتي..
خالد استغرب لكلام احمد...( يعني اللي حبها احمد.. بتتزوج غيره ؟!! لا حول ولا قوه إلا بالله ... ما تستاهل يا ولد عمي... وهو يقول هالكلام مر على مسمعه اسم مثيه !!
احمد وهو يكمل كلامه : آآآخ يا ميثه ... بهالسهوله ضيعتي كل اللي بنيته وياج ... هذا جزى المعروف ..ولا الطيب ماله قيمه في هالدنيا .. آآه يادنيا تعاندني ...ليت قلبي ما حبج ولا قرب صوبج ..
خالد منصدم ومتصلب مكانه... مب قادر يستوعب الكلام اللي يسمعه ... معقوله ؟ معقوله اللي كان يحبها احمد اهي ميثه ماغيرها ؟؟؟؟ وانا .. وانا ربيعه وولدعمه وتوام روحه ..خذتها عنه .؟ آآآخ يالقهر ؟ وعلى طول مشى وركب سيارته وقعد شوي وحط راسه ع السكان وحاول يرتب السالفه في مخه .. جان يرفع راســه مره ثانيه
خالد : هيه صح هي ميثه ..لكن كيف ما حسيت.. احمد تغير عليه من يوم ما انا خطبتها وحتى الخطبه ما حضرها!!...بس كلامه يدل ان كان شي بينهم ... شي انا ما اعرفه ... انا لازم اعرف كل شي ..لازم اعرف باللي يدور حواليه ؟ انا السبب في عذاب اقرب الناس لي ؟ آآه كنت اطعن احمد من دون لا ادري ؟ ؟ رد خالد وحط راسه على سكان السياره وهو يحس بتأنيب الضمير ...
آخر المواضيع
ميثة بعيوني يا خالد الجزء ( 7-8 ) 
