قصيدة في تغالبة الدواسر

يامل قلـب فيـه مثـل السواعيـر=مثل الجحيم اللي تزايـد بالاسعـار
غدابي الهوجاس في بحـر تفكيـر=متهيض واديـر موجـات الافكـار
علـى بنـي عـم كـرام مناعيـر=دايـم منازلهـم عذيـات الاقفـار
دايـم منازلهـم مـرب المعاشيـر=وبيوتهم هي منـوة الضيـف لازار
منزالهـم شـف البكـار المغاتيـر=مراتع الغزلان ووحـوش الاطيـار
وديان صلب غاشيتهـا النواويـر=نباتهاالمكنـان وشقـار ومــرار
يالله عسى بـرق مزونـه مزابيـر=فيها من الماء صادق الماء مطـار
يمطر على السواد وجبال ابوظهير=ويزيد فوق المستديـره بالامطـار
وتسيل وديـان البريقـاء محاديـر=على مقـر الـروض تلتـج حـدار
دار بها شفنا الجنـان المخاضيـر=شفنا السعدوالكيف والعـز والكـار
مدهال سمحين الوجيـه المسافيـر=كرام اللحا زبن الجلاوي ذرى الجار
تغالـب ماتستـمـع للاشـاويـر=الى بغوا راي مضوا فيـه بجهـار
وراحوا رحيل كالسبـاع المغاويـر=وقامو يذبـون الفيافـي والاقفـار
تغالـب مثـل البحـور الزواخيـر=موجـه يهـز المبرهجـات وفـار
وخـلاف ذا ياراكبيـن مضامـيـر=نجايب من ساس عيـرات وخيـار
دوارب من عوص جيش المناصير=ربد كما جـول النعايـم الـى ذار
مسراحهن مني وملفاهـن انشيـر=ريف الضعافا مكرم الضيف والجار
ابو نصير ستر العـذارى الغناديـر=لاجاء نهار فيه زوغـات الابصـار
والي امتطى للخيل يصعق كما الزير=ويهوى كما تهوي صواريم الاحرار
والى غدا البارود مثل ا لمعاصيـر=زحزيح ما ينـزاح لاشبـت النـار
سلم على اللي ينطحون الطوابيـر=حماية القطعـان والـدار والجـار
وعلى خوالك يانشيـر المصاريـر=اللي لهم عند العرب ذكـر واخبـار
وسلم على لاد العميـري بتكريـر=اللي يفكون المتلـي الـى احتـار
وسلم على لاد العياضـي بتوقيـر=عز وكرم مع دين وبيوتـن اكبـار
وسلم على اللي كالسباع الكواسير=الاد ابن جـوزان وافيـن الاشبـار
ياما انتخوكـل التغالـب مغاويـر=على الاصايل وفوق نبهات الاكوار
وياما اعتلوامن فوق قب مشاهيـر=صفر تطير صم جلمـود الاوعـار
ويامـا تقفـوا ذود قـوم مقاتيـر=وقلايع سبق هـوى كـل مختـار
وياما تناخوا عند تالـي المظاهيـر=الى رمن البيض ملبوس الاستـار
وياما تعشوا من قـروم مساطيـر=كل ابلج لاهاش في الحـرب دجـار
بحدب الظهور المرهفات البواتيـر=هنادي فيهـا اجتهـد كـل بيطـار
وخناجر طمسن لبـوس المناعيـر=ومزرج له بيـن الامتـان معبـار