يا وجودي كل ما جيت في راس الطويل...والهبوب يرد صوتي نسايم نودها

يا وجودي كل ما جيت في راس الطويل=والهبوب يردّ صوتـي نسايـم نودهـا
في رفيعٍ لا زبنته من الضيقـه دخيـل=انشرح بالي و عيني تشوف سعودهـا
من علوّه تكشف اهل المزارع والنخيل=والمنازل في طرفهـا وبيـن حدودهـا
اترّقب غيبة الشمس ساعات الأصيـل=واتذكّـر ديـرةٍ كـل عيـد أعـودهـا
أتذكر والعبايـر علـى خـدّي تسيـل=ما خطر للنفس يـومٍٍ تبيـح سدودهـا
حسبي الله حسبي الله ويا نعم الوكيـل=المحبـة ولّعـت والهبـوب تزودهـا
جعل سحّاب المخايل من المنشى هميل=لا أكشفنّ بروقهـا وارزمـنّ رعودهـا
تبتدي من غرب نجد ليا حـدّ الجبيـل=المشاهي بأمر ربّـك تغسـل نفودهـا
يرتوي صلب الجبل وآخر الوادي يسيل=وتستخير البدو لا زان معشّـى ذودهـا
يالله أني طالبـك لا كثيـر و لا قليـل=يـا كريـمٍ مدتـك نافـعٍ مـردودهـا
أغنني يا خالقي عن معاريف البخيـل=لا يذكّرنـي متـى هـي ولا معدودهـا
كيف ابطمع ياحياتي وانا عابر سبيـل=والمقابـر كـل ليـلٍ تصـك لحودهـا
السعيد اللي ليـا راح يذكـر بالجميـل=الليالي ما حسب نقصها مـن زودهـا
يامراسيل الوفا عجّلـي قبـل الرحيـل=باديٍ لـي نظـرةٍ و العشـم بردودهـا