بسم الله الرحمن الرحيم
أعزائي من إخوان وأخوات بهذا المنتدى الطيب
السلام عليكم ورحمة الله وبركاته . . . وبعــد :
هذه قصيده للشاعر المعروف /ممدوح بن عبد الله المرزوقي
والشاعر ممدوح (أبو عقاب) قالها في يوم العيد
عندما فارق أمه وهو في السجن , وهي قصيده محزنه ... يقول :
كلِّن يعايـد بـاول العـــيـد غاليـه *****وعيدي من الفرقا الدموع الثمينـه
احــدن يعايد بين ربعـه واهاليـه *****واحدن يعايد بالسجون الحصينـه
عيدن عسى ربي يزيّن مساعيـه***** لو انها في داخل السجـن شينـه
عــيدن بـدون الوالـدة مالنـا فيـه***** لو زانت ايامه فـلا هيـب زينـه
العيد والله شوفة امـي وطاريـه***** وتقبيلـة إيديهـا بذِّلـن وليـنـه
يامن يعايد لي عليهـا واجازيـه***** فـي دعوتـن لله بينـي وبيـنـه
يقول يالقلـب الرحـوم ومعانيـه***** يامهجة الممـدوح يانـور عينـه
عيدن عليك يعود باحلـى لياليـه***** وعيدن عليك يعود بامن وسكينـه
ياعيد قلبي ونـوره اللـي مقديـه***** يالهفـة اشواقـه وزفـرة حنينـه
يامنبع العطف الصدوق ومجاريه***** ياذا الحنان اللـي يتدفـق بحينـه
ياجنتي وبستـان قلبـي وواليـه***** ياريحة الفردوس الاعلى وطينـه
ياعزي السامـي وهيبـة معاليـه***** ياروح روحي والخفوق وضنينـه
يامكسبي ياراس مالـي وصافيـه***** ياغيث قلبـي ياعطـاه وعوينـه
يامْ الجَنَان اللي تزاحـم حسانيـه***** ياقمـة الحـب المخلّـد بعيـنـه
ياقـرْة فـوادي وغايـة مرابيـه***** العبد مكتوب القـدر فـي جبينـه
العذر ياسلطـان قلبـي وحاميـه***** ممدوح ماغيـر الحديـد بيدينـه
بين الشبوك اعايد الدمع واخفيـه***** ياعيد عيـد الغلغلـة والضغينـه
العيـد عنـدي سامياتـن معانيـه***** لكنها بالسجـن ضيـم وضغينـه
العيد لو هو عيـد مـاالله محلّيـه***** إليا ابعد المخلوق عـن والدينـه
والله يالولا واحدٍ فـوق نرجيـه***** ماصبر على فرقا الحنون الرزينه
يوم اذكر امي نور داري وراعيه***** ابكي وانا كبدي مـن الله متينـه
قلبي ثلاث سنين والبعـد طاويـه***** ماشفتها والعيـد وينـي ووينـه
عيدن يزوّد هـم قلبـي ويدميـه***** يصبح ويمسي عبرته في وتينـه
ياعيد قلبي نار الاشـواق تكويـه***** وانته تنقّـض بالجـروح الدفينـه
نقضت جرحن بين الاضلاع كاميه***** وابكيت عينن من جداها حزينـه
ذكّرتنـي ياعيـد ماكنـت ناسيـه***** وخليتني لجـروح قلبـي رهينـه
جرحن جرحته واجب إنك تداويه***** لايصبح الموت المصفّى خدينـه
يوم آتذكّر طول عمري وماضيـه***** خطرن على قلبـي يبيّـح كنينـه
يتـوق قلبـي لاتذكّـر مغانـيـه***** فالبر والاّ فـي ربـوع المدينـه
عمرٍ مضى بين الرجال المداليـه***** الله يعوض ماغـدا مـن سنينـه
ويالله ياللي دبـرة الخلـق بيديـه***** ترفع لنا بامرك شـراع السفينـه
أرجو أن تحوز عـلى رضاكم ولكم مني أجمل وأطيب تحية
آخر المواضيع
كلن يعايد بأول العيد غاليه . . وعيدي من الفرقا الدموع الثمينه 
