بسم الله الرحمن الرحيم
بعد مضي شهرين على وفاة ابنه
خـص الشاعر الكبير ناصر الفراعنة
موقـعـه الرسمي بهذه الـقـصيدة
والتي يرثي فيها ابنه ثم كتب بعدها قصيدة مليئة بالحكمة
للشاعر مغزى منها والله أعلم .
و إلـيــكم ماكتبه ناصر الفراعنة نصاً :
بسم الله الرحمن الرحيم
أعتذر منكم يا أحبابي على غيابي لكن يعلم الله إنني من خبركم في فترة
ارتباطات خارج الوطن وللتو وصلت من دبي فاعذروني
ولكي تعذروني سأطرح هنا قصيدة وهي لكم حصريا جديدة وأنتم أول من يطلع عليها .
{
قد يستغرب الناس كيف يرثي إنسان ابنه وقد ولد ميتا ولم يره أمامه
وليس له ذكريات معه إلا أنني هنا رأيت ذكريات أغفلها الشعراء وليس
هناك من لم تمر عليه وهذه القصيدة رثاء في مولودي وهدية مني إلى أمه
ربط الله على قلبها وعوضها فيه وجعله شفيعا لأبويه .. القصيدة مرثية طويلة
تعددت إغراضها من رثاء إلى تبصر في الزمان إلى حكم والفلسفة }
وسآتي بأجزاء كثيرة وليست كاملة واعذروني إذا فيه أخطاء إملائية:
رثاء ...
 |
|
 |
|
مـا أرانـي فاعـلاً فـي الليـل إن أرخـى سدولـه؟ *** مـا أرانـي فاعـلاً والصبـح قـد حــان احتـضـاره
طفلي الـلي مات فـي اول يــوم مــا ذاق الطفـولـه ***عاجلـه سهـم الـقـدر واخـتـاره الله فــي جــواره
طفلي اللي مات في غمضة طرف ما حال حوله ***يــوم عـمـر الآدمــي مــا كــان يـومـاً باختـيـاره
يـا وجـودي يـوم لفّـوا شـاحـب الأكـفـان حـولـه *** مــا تـقـول إلا شـظـيّـة لـؤلــؤٍ داخـــل مـحــاره
يا وجودي يـوم أطالـع فيه,فـي عرضـه وطولـه *** تنتحـر فــي العـيـن مـنـي دمـعـةٍ كنْـهـا شــراره
نفس عيـن آبـوي عينـه بـل ونفـس الـزول زولـه *** وبالأمارة, فـيـه مــن عمه (شبـيـبٍ) كــم أمــاره
جـابـه الله مـثـل هـتّـان المـطـر سـاعـة هطـولـه *** ديــمٍ أحيا بـهـجـة أمه تـــارةٍ وآبـــوه تـــاره
ويوم شاف الشرّ من صوب أهلـهْ يشعـب ذلولـه *** حطّ دون صدورهم صـدره مـن الرحمـه ستـاره
ومــات تــوّي مــا بـعـد بـإيـديّ لبّـسـتـه نـعـولـه *** مـات تـوّي مـا بعـد سـاويـت فــي ثـوبـه زراره
كـنّ عينـه يـوم مـات تقول:بابـا, ويـش هـو لــه؟ *** يوم تبكـي وأنت تـدري ميـن أنا ذلحيـن جـاره!
كلنـا راحــل وخـيـر الـنـاس مــن زوّد رحـولـه *** باغتـنـام الصالـحـات وكــلّ كـسـرٍ لـــه جـبــاره
طفلـي اللـي صوّبـت كبـده قبـل ساعـة وصـولـه *** بنـدقٍ مـن عيـن حاسـد وأودعت قلبـي طـشـاره
يـا وجـودي مـا لقيـت أنسـب لمـولـودي مقـولـه *** مـن مقولـة: يـا وجـه صبـحٍ تحـرّر مـن خـمـاره
أو ثـغــر بـــرقٍ تـهـامـيٍّ تـبـسّـم فـــي ثـعـولــه *** ضـوح مصباحـه علـيـه يــورّد النـجـدي بـكـاره
يـوم اشيلـه مـا تقـول أشيل شــيٍّ مــن نحـولـه ***أتشمم ريحـتـه -مــن فجـعـة القـلـب- بـحـراره
يوم جيـت العـب معـاه وغـاب قلبـي مـن ذهولـه ***يـوم مـا شفتـه تبسّـم لـي وأنا فــي أول زيــاره
قمت أحدث عنه نفسي- والعرب حولي وحوله- *** ليت ما هـو ميْـتٍ؟إلا ميـت! مـا تبغـى استشـاره
اتْخنـقـنـي عـبـرتـي يـــوم آتـذكّــر مـــا تـقـولــه ***عـنـه أمّــه يــوم أنــا فــي ديـــرةٍ مـاهـيـب داره
آتـذكّـر يــوم هــو فــي بطنـهـا يـحـرّك رجـولـه ***وانتعيرّ:لـيـت مــا هــو أقـشـرٍ؟ لـبّـى الـقـشـاره
كـم سهرنـا معـه ليـلـه كامـلـه مــن كـبـر هـولـه ***ليـن صرنـا نعَـرْف موعـد قومتـه داخـل قــراره
وان تأخّـر مـا صحـى فـي موعـده قمنـا نصولـه ***ننغـزه يــا مــن يمـيـن البـطـن وإلا مــن يـسـاره
ما نبي شيْ بـسْ نبـي نضحـك علـى ردّة فعولـه ***ننـغـزه ويـفـز خـايـف مــا درى ويــش العـبـاره
مـن يـدي غـيمة علـى أيـدي الملائكـة محمـولـه ***غيمـةٍ مــن نــور مــا تشـبـه نضارتـهـا نـضـاره
يـا إلهٍ كـل مـا فــي الأرض طــراً سبّـحـوا لــه *** شفّـعـه فـيـنـا غـــداً واجـعـلـه لإبـوانــه بـشــاره
فــي نـهــارٍ فـيــه أعـنــاق الشيـاطـيـن مغـلـولـه ***يتلقّفـنـا مـثــل مـــا يـلـقـف الـحــاوي صـــراره
|
|
 |
|
 |
ويكمل ناصر رسالته بقوله :
حكم وفلسفة جاءت غير مرتبه لغاية عندي...
 |
|
 |
|
عشـت فـي الدنيـا وهـي دنـيـا وروغتـهـا عجـولـه *** وخذت منها ما خذا (عامر) و (حاجب بن زراره)
يا فتى خذ من حكـم مـن كـل الأشهاد اشهـدوا لـه *** حكمـة العاقـل على راس العصـا مـثـل الصـهـاره
المنـايـا مخـلـبٍ فــي كـــفّ نـســرٍ مـــن يـطـولـه *** شـاح بـه شوحـة حصـاةٍ حوّلـت مــع راس قــاره
المـنـايـا مـــن بـغــت يــــومٍ تـنـولــه, ابــتـنـولـه *** لــو تشـيطـر فــي تفاديـهـا مـهـي لـحـيـة شـطــاره
لـولا تفـريـق المنـايـا ضـولـةٍ مــا شـفـت ضـولـه *** تجتـمـع, يـــا للـعـجـب والـهــول بـــل يـا لـلإثـاره
مــوت دولــة, لــوّ مــا يعـنـي لـنـا مـيـلاد دولـــة *** كان ما شفنـا اختـلافٍ فـي حضـاره عـن حضـاره
لا يـغـرّك يــا فـتـى قـفــر تـطــارد بـــه وعـولــه *** كـمّ مــع سـاقـة وعــل قـفـرٍ مـشـت لـبـوة مـغـاره
اخطـر الأعداء مـن يضحـك وهـو يسـرج خيولـه *** واخطر الأصحاب من سـرك معـه, وتشـق إزاره
فتكتـك باللـي هـو اضعـف منـك مـا فيـهـا بطـولـه *** البطولة أن يـكـن فتـكـك بـمــن فـاقــك جـســاره
قبـضـة السلـطـان مــن لا يـــدّرق عـنـهـا تـغـولـه *** ومـن يعانــدهـا تجيبـه لـوّ فـي بطـون الجحـاره
خـلّ عنـك الجـدّ مــع مــن أمــسٍ آخـذتـم زمـولـه *** مـازحـه ينسى,فـقـد تحـيـي سـويـعـة جـــدّ ثـــاره
مــن يـحـاول أن يـغـيّـر ذو مـيــولٍ عـــن مـيـولـه *** مثـل مـن يسعـى إلــى تغيـيـر نـجـمٍ عــن مـسـاره
في خروج المرء عـن مـا حبّ-مـن قلـب- دخولـه *** سقطـةٌ,والـمـرء لا يـجــدي بـكــارٍ غـيــر كـــاره
الفـشـل وقــت النـجـاح إيــاك تستـبـعـد حـصـولـه *** النجـاح اكبـر فـشـل إن مــا أخـذتـه عــن جــداره
الـقـبـول مـــن الله ولا يَـحـسـد الــمــرء بـقـبـولـه *** غـيـر نــاس مــن حسـدهـا تلـتـوي بذنـيـب فـــاره
كـــم صـديــقٍ بـادّعــاء الـــود صجّـتـنـا طـبـولــه *** والحسـد كـل الحسـد شفـنـا عـلـى وجـهـه أطــاره
نيـة الحاسـد لحـاف أجـرب ولـو جـتـك مْغسـولـه *** مالـه إلا الحـرق لــو بــرد الـثـلاث يـطـق طــاره
كــلّ مــا يخفـيـه ابــن آدم ولـــو حـــاول يـحـولـه *** تظـهـره فلتـة لـســانٍ مـنــه أو مـ الـعـيـن إشـــاره
يــا مــدوّر مرجـلـة مـــن لا مـلــك ذرّة رجـولــه *** يـــا مـــدوّر إبـــرةٍ فـــي قـشــةٍ كـبــر الــزبــاره
إن مـوت الشعـب أن تـرحـل مــن الفـقـرِ عقـولـه *** الفـقـر مــا حــلّ فـــي شـعــبٍ ولا ورّث دمـــاره
حـاكـمٍ مـشّـى علـيـه أربع مـيـة كـذبـه رسـولــه *** انتـبـه تـصـدق مـعــه مـمـكـن يحسّـبـهـا صـقــاره
كم فضولي فـي العـرب سـاق لـه حتفـه, فضولـه *** كــم طميمـيـعٍ خـسـر ديـنـار فـــي تـدويــر بـــاره
يـوم ولـد الـلاش مـا تطـهـر مــن الخيبة همـولـه *** الــرجــال فـعـولـهـا زادت مـلابـسـهــا طــهـــاره
الفحولـه أن يـزيـدك قُــلّ مــا فــي إيــدك فحـولـه *** والحقـاره أن يزيـدك كثـر مـا فــي إيــدك حـقـاره
لا تطـب بـوادي أرضٍ مـا حسبـت حسـاب غولـه *** يـــاكـــلاك الـغــول وإلا يـــاتعـشّـتـك الـنـمـاره
واعرف إنْ ما جـاء بْسهولـه دايـم يـروح بسهولـه *** والصعب روحتـه صعبـه والفتـى راضـي وكـاره
ليس لـ اللحية وهــي بيـضـا عـلاقــه بالكـهـولـه *** إنـمـا الكـهـل الحقيقي فـي مــن فـقـد معـنـى وقــاره
كــم عـزيـزٍ أورده حــوضٍ مــن الذلة خـمـولـه ***والترف في بيت أصحـاب الشـرف يعنـي انهيـاره
بالأُسُـل لا بالكسـل مـا طــال مــن شــيءٍ تطـولـه *** تــدرك الأمـجـاد قـسـراً غــارةٍ فــي إثــر غـــاره
كــــم مـخـالـيـق تهـابـلـهـا ولا هــيــب مـهـبـولــه *** لبّست راس الغبي- مـن حيـث لا يـدري- غضـاره
لا تـثـق فــي واحــدٍ تـرشـح مــن الهيْـنَـة سمـولـه *** الـنـذل يبـقـى نــذل لــو يـرفـعـك فـــوق الـمـنـاره
كــم دنــيءٍ بالفـلـوس اشـيـوخ نـجـدٍ وقـفــوا لـــه *** في رجا مـا فـي يـده مـا يجلـس إلا فـي الصـداره
المـراجـل سـيـل مــن عـنـده مــن الدنـيـا سـيـولـه *** كــم شـريـفٍ مــن فـقـر جـيـبـه يخـلّـونـه عـيــاره
مــا يـنـال الـعـزّ مــن نفـسـه مــن العزة جفـولـه *** الثـنـا يـوخـذ بـأطـراف القـنـا مـــا هـــو طـــراره
اتّـحـمّــل مــــا يـواجـهـهــا مـنـبّـشــة الـدحــولــه *** فـي الهبايـا مــا يعـطّـل مــن جـمـع بــدوٍ عـشـاره
(المغـولـي) بالمساواة أعظـمـوا أمـــره مـغـولـه ***(والـفـزاري) بالمحاباة احـقـروا أمـــره فـــزاره
الـزمـن هــذا كـتـاب جــاء فـــي آخـــر فـصـولـه *** (شعـب كـامـل قــد تـشـوّه هيكـلـه نـشـوة زقــاره)
الجهالة فـي تجاهـل مـن عليـك أوصى جهـولـه *** كـــل خُـلــق بـغـيـر وقـتــه لا أرى فـيــهِ نـعــاره
ليـث واحـد ممـكـن يــدوّخ بـلـد عـرضـه وطـولـه *** وألف قـرد وقـرد مــا فـكّـت مــن بعـيـرٍ هـجـاره
ليـس مـن شـرط الشهامـه أن تجـاول كــل جـولـه ***أو بـأن تنـــزل بأعلـــى قمـــة رغــم الـوعـاره
فالأسـد يبقـى الأسـد فـي قـاع كــل ارضٍ نـزولـه *** والوبـاره دايـمٍ فـي أعلى الجـبـل وهــي الـوبـاره
قـل لبعـل السـوء عمـر الضـرب مـا أثبـت بعولـه *** رغـــم لـيــن الـمــاء قـطـراتـه يـشـقّـنّ الـحـجـاره
فــي اقتـفـاء المـجـد تـابـع لا تـكـن نفـسـك ملـولـه *** يـدرك الصعبـات مـن لا نـام راســه مــن عــواره
كـم رجـل مـن زود حـذره نـفـسه الـيـوم مختـولـه *** بل ومن نفـس الشـيَء اللـي يحـذره واخفـق فـراره
واحــدٍ يــزرع بــلا قـصـدٍ وتـثـمـر لـــه حـقـولـه *** وواحــدٍ يــزرع وهــو قـاصـد ولا يجـنـي ثـمـاره
زارع المعروف يرجي من ورا النـاس محصولـه *** ليـس معـروفـه بمـعـروفٍ قــدر مــا هــو تـجـاره
رغم فقـري كـم ولـد نعمـه -غنـي وبخيـر- أعولـه ***لأن أبوه معلّـمـه كـيـف يْحَـفِـظ قـرشــه مـهــاره
يـا فتـى دوك النصايـح أخذهـا مــا أبغى عمـولـه *** استـفـد منـهـا وأفِــد عـلــمٍ أعـرتــه لـــك إعـــاره
خــذه واتركـنـي لأنّ اللـيـل قــد أرخــى سـدولــه ***حــان وقــت مْـعَـاوَدَة مـيـلاد طفـلـي واحتـضـاره
|
|
 |
|
 |
عظم الله أجر أبو فارس وزوجه أم فارس في ابنهما
وجـعـله شفيعاً لهما يوم القيامة اللهم آمــين .
.
آخر المواضيع
مرثية الشاعر ناصر الفراعنة في ابنه 
