السلام عليكم ورحمة الله وبركاته
كيف الأحوال ..
والله اني زمان كنت أجيد المقدمات وكنت فكاهي >>
بس من تالي صاير ٍ جدي شوي ..
ياجماعه شي حلو لما الإنسان يشوف حصاد ما يعمل لمدة سنة كاملة ..
يعني انا مدرس رياضيات .. والرياضيات ماده مافيها لعب وجلسه ( للمعلمين اقصد )
يعني طول السنة المعلم واقف على قدم ٍ وساق ..
خاصه اذا كانت المرحلة ثانوية ..
فــ يوم أشوف طالب مبدع ويجيب فل مارك
يبرد قلبي وارتاح وانبسط واصفق له وانا أصحح
لكن يوم اشوف طعس درج مفهي .. وهو فاتح فمه قدامي السنه كلها
العن ثوا ابو الساعه اللي عرفت فيها التربيه والتعليم ..
الزبدة مالكم بالطويله ..
انا كل سنه اصوّر اجابات بعض طلابنا الدلوخ بعد ما يختبرون ..
لأمرين
الأمر الأول / التسلية وامتاع الزملاء بعد عناء التصحيح ... الخ
الأمر الثاني / اعرضها في الانترنت " بعد إخفاء الأسماء " ليرى الأمه أحوال أبناءنا ..
" ياكم واحد ٍ بيقول ذا مرشد طلابي مهوب مدرس رياضيات "
الزبدة ياجماعه ..
" ولعل كل واحد هنا كان طالب يأيدني في كلامي "
يوم كنا طلاب .. بالذات في ثالث ثانوي
كان همنا النسبه .. يعني النجاح مضمون من الفصل الأول لنسبة كبيرة جدا ً من الطلاب
قسم بالله ياجماعه ان نسبة كبيرة من طلاب ثالث ثانوي عندي في المدرسه الآن ..
همهم الأول النجااااااااااااح ..
يعني شي يقهر ..
انا أدرّس أول ثانوي .. وأراقب عند ثالث ثانوي
اسأل الطلاب .. باستمرار ..
كم نسبتك الفصل الأول ؟
سألت اكثر من 15 طالب .. تقريبا ً وبدون مبالغة 12 طالب منهم تحت ال 80
ليش كذا بس .. وين كنا وكيف صرنا ..
ملاحظه بسيطه /
ياليتني صوّرت الطلاب وهم يذاكرون بالممرات قبل مايدخلون القاعات ..
اللي مايعرف معدلاتهم ونتايجهم ويشوفنا وحنا نكشـّهم للفصول ..
يقول بشروا الأمة بالجيل الإبداعي والتفكيري والتطويري
معقوله تسحب الطالب ويقول لحظه لحظه بقرا معلومة
قاعد اقول لأحد الزملاء تخيل ان السنة كلها كذا .. موب بس الاختبارات
قال على طول نرتقي إلى المعالي والقمم
طبعا ً أنا ما اشيل اللوم عنا يالمدرّسين ,,
ياكم واحد ٍ منا يفتح الكمبيوتر بالفصل ويرقـّي سور القريه حقته إلى المستوى مدري كم
في لعبة ترافيان
" ترا فصولنا مزودة بأجهزة كمبيوتر وإنترنت "
موقف طريف ومحزن في نفس الوقت /
حصل اليوم وانا أراقب اختبار مادة الحاسب للثالث ثانوي
رفع طالب يده قال سؤال ..
قربت لمه قلت سم ..
أشر لي على سؤال .. يقول :
س/ عدد 3 من مساوئ الإنترنت
قال يااستااد مساوئ يعني الأشياء الشينه ولا الأشياء الزينة ... ؟ !!
وش اسوي به بالله ..
عموما ً مابي أطيل عليكم أكثر من كذا ..
فيه صور مصوّر بعضها بآخر شهر دراسي
وبعضها قبل كم يوم من الإجابات في الإختبار النهائي 1429 هـ
أول طالب .. واحد مهمل من جنبها
يعشق الحب ويكره الدراسه ..
طول وقته يحب ويكتب قصايد على كتبه ..
وهذي أمثله ..
طبعا ً صوّرت يده موب لأني مدرس وهو طالب
لكن من باب الميانه وافق اني اصور يده على طاولته
بعد الاختبار ارسل لي رسالة يقول فيها
طبعا ً بالآونة الأخيرة
الطلاب طايحين برموز .. وكل رمز يشير إلى قبيلة
على سبيل المثال
511 لقبيلة عتيبة العريقه
505 قبيلة قحطان العريقة
606 قبيلة شمر العريقة ..
فهذا مثال حي ّ على أحد كتب الدراسة لأحد الطلاب
يعني .. وصلنا لمرحلة .. أهم استخدامات الكتب الدراسية
كتابة القصائد والذكريات
والدليل /
الترجمة /
حلفت لاحشد جيوش الحب واحتلك ........... مسكين .. ربي بلاك بعاشق ارهابـي
دليل آخر ويتضح تأثير شاعر المليون وطقته على الطلاب /
في ورقة الإجابة " اختبار قصير "
وخفيف الدم هذا شوفوا وش يقول ..
طبعا ً ياجماعه ما أقدح في تربية الولد او اللي قبله
كلهم متربين عدل وعيال ناس ولا اقوله استهزئ
لكن واضح ان فيه خلل في التربية على الحرص
وشخصيا ً اعزي هالسبب لبعد الأب عن ابنائه فترة طويله
خاصة ان حنا في مدينة الجبيل الصناعية
واغلب الأولياء الأمور في المصانع
وأقل واحد دوامه 12 ساعه تقريبا ..
لذلك أهم شي عنده ان ولده مايجيب له مشاكل مع الجيران والمدرسه مايشتكون منه
لكن وين التوعيه في الاهتمام والحرص على المستقبل ...الخ
...
هههههههههههههههههههههههههه
انا احب الطلاب اللي من اهل الشرقيه
خاصه ان كانت لهجته شرقاوية بحته ..
طالب محترم جدا ً بس دلخ ..
شاف سؤال .. ولا عاد يدري وش يسوي
قال استاذ وش اكتب .. قلت اللي تعرف
قال " أبـّـيـه " هههههههههههههههههههه اثاريه كتبها الدلخ
والله ماشفتها الا بعد التصحيح
نجي عاد للإختبار النهائي اللي قبل كم يوم ..
اكره ماعلي إذا شفت طالب كاتب كذا ..
وفيه طلاب متعودين على المعاريض من الصغر
إمحق إملاء ياشيخ ..
ياجماعه قسم بالله اني في ثالث ابتدائي ومستحيل أخطي خطأ بسيط في الإملاء ..
ماقول انا احسن واحد لكن كلكم بتحكمون على املاء هالمصدع اللي فوق ..
...
طبعا ً السؤال الأول كان اختيارات ...
فيه ثلاث إجابات تحت بعض ( أ , أ , أ )
الأخ معصب ههههههههههههههههههه
وش دخلك ياخي ؟؟
أخيرا ً وليس آخرا ً ..
قدامي الآن معلمين الدين يصححون ..
وقلت لهم قاعد انزل موضوع في الإقلاع عن كذا كذا كذا ..
قال واحد قبل اسبوع وانا اصحح مادة التفسير
وكتبت الآية .. قول الله عز وجل " سنسمه على الخرطوم "
ما معنى كلمة الخرطوم ؟
يقول والله ان طالب كاتب لي " عاصمة دولة السودان "
وواحد من الشباب يقول شايف برنامج في قناة المجد
أيضا معلم تفسير سأل طالب عن كلمة " بنانه "
في قول الله عز وجل " بلى قادرين على أن نسوّي بنانه "
الطالب كتب / " هي الموزه الصغيره "
ايضا ً في مادة الرياضيات .. وأظن في المرحلة المتوسطة ..
س / أثبت أن س ص ينطبق على ج د ؟
طالب كتب / إذا كان ينطبق فهذا بقدرة الله عز وجل وإذا كان لا ينطبق فلا حول ولا قوة إلا بالله
الضحك كثير .. والدلوخ أكثر
والحال صعب .. والوضع خطير ..
وياربي تصلح عيالنا .. وتوعـّي آباءهم
واتمنى التوفيق لكل طالب وطالبه ...
بقلم وعدسة / عربجي مزيون
منقول
آخر المواضيع
بالصور اجابات بعض طلابي في الاختبار .. اجابات مؤلمة ومضحكه (منقول) 
رد : بالصور اجابات بعض طلابي في الاختبار .. اجابات مؤلمة ومضحكه (منقول) 
