أ- ألفت القوافي ونظمت الحروف=من بعد ترتيبها اطبعي يا مطبعه
ب- بديت القاف وإحنا على بابه وقوف=في هوى مدعوجة العين ابيها تسمعه
ت-تعلمت الهوى لين سبب لي ظروف=والهوى راعيه يبكي ويجري مدمعه
ث- ثلاثة ايام في بيت منبوز العدوف=ليت من يقضي حياته وهو عايش معه
ج- جد الجد والعين يا عيسى تشوف=ثم جرّد شيلته....لا رحم من برقعه
ح- حَمَار الورد في وجنته عند الكشوف=يا إله الكـــــون ما اجمـــله ما اروعـــه
خ- خدر جسمي وقلت اسعفيني يا هنوف=لا تروح الروح من مات ما احد ينفعــــــه
د- دار الراي وابدى لي اسباب وظروف=والعزيز النفس من جاب له عذر اقنعه
ذ- ذاك الشخص خلا المولع في نحوف=بالهوى والشوق واللي دفعني يدفعه
ر- رماني بالهوى قال فرصه ما تطوف=خل ذاك الشخص لاجيت راسي يقطعه
ز- زهمته قلت له يا بعد كل الخشوف=حبل حبك لو يطول الزمن ما اضيعــه
س- سيف الحب يقضي على كل السيوف=ما يـبــــــــالي صاحبه لو يلاقي مصرعه
ش- شعره يوم فله على امتان الصفوف=ابتلش به سيدي يـــــوم حاول يجمعه
ص- صدره جابني عندما شفت الكتوف=قلت قلبي في يدك لا تحاول تمزعه
ض- ضاع الحق بين المضيف والضيوف=ضاقت الدنيا علينا وارض الله سعه
ط- طواني طي قرطاس بأطراف الكفوف=قمت اشوف الواحد اثنين واثنين اربعه
ظ- ظمني بالوفاء يوم لاف القلب لوف=صار من حظي وعقد المحبه وقعه
ع- عش عيشه هنيه ترى الدنيا تحوف=كم فتى عمره على غير معنى ودعه
غ- غامر في حياتك وعش من غير خوف=والحذر ما يحول دون القدر أو يمنعه
ف- فعايل للهوى يشتكيها كل جوف=كم محب يشتكي من فراق مروعه
ق- قبل النفس من لذة الدنيا تعوف=دام نفسك في جمال الحياه مولعه
ك- كل العمر فرصه تقضى يالشفوف=ما اسرعه يمضي شباب الفتى ما اسرعه
ل- لو تشرى السعاده.. شروها اهل الالوف=والفقير يمـــــــوت ويقولون الله يقلـــــعه
م- من جرب دروب الهوى قلبه يروف=يذكر انه في زمان مضى قد لوعه
ن- نورك يا قمر ساطع ما به خسوف=عقب ما زلت من الشهر عشره واربعه
هـ- هوانا في البدايه مع ظبي الهفوف=الغزال اللي جماله علينا دلعــــــــــه
و- وايام مضت من قبل عام او ينوف=لا طرت لي هزت القلب واخشى تشلعه
ي- يقول من بدا بالقوافي والحروف=اكتمل ترتيبها واطبعي يا مطبعه
للشاعر الكبير علي القحطاني
منقوله
،،
آخر المواضيع
الألفيـــــــــــــــــــــــــــه . . . . علي القحطاني 
