المصرى اليوم
مش الجريدة مع انى بحبها
وكل يوم بشتريها واقراها كلها
معارضة بذوق وادب فوق الوصف
مع انى بقترح عليهم يغيروا الاسم
لان المصرى اليوم معدش فخر
المصرى اليوم حزين
المصرى اليوم متعاس طين
المصرىكل يوم بيموت مرتين
مرة فى طبور العيش الصبح
والمرة التانية من القهر
لما بيشوف البلد بتنهار
وناس عايشة فى الجنة
وبتعدى من تحت بيوتهم الانهار
لما بيشوف السواد فى عز النهار
لما مبيقاش عارف الحلال من الحرام
لما يبقى الظلم هو سيد القرار
لما يبقىحل مشاكل البلد بضرب النار
يارب الطف بمصر ياعالم الاسرار
خبر سمعتة فى صباح دريم
الخبر بيقول تجار خردة
سرقوا من المقابر حديد
ومتسالش دخلو الزاى ع المتين
كل دة علشان سخين
خبر لا يصدقة عقل ولا دين
وقيس على كدة وشوف الغلب وصل لحد فين
نفسى اقول كلام مش كلامى
نفسى اقول كلام سمعة البقال
وكل اما اسالة ازاى الحال
يقولى خصلت تربية رياضية
قاعد ف الدكان ايشى بريزة وايشى ريال
والحمد للة على كل حال
نفسى اقول كلام ابو ياسر الكمسرى
اللى عندة خمس عيال
اللى بيمشى يكلم نفسة
وبقى دايما فى حالة توهان
نفسى اقول كلام مسعد الجزمجى
وكل اما اسالة اية الاخبار وازاى الحال
يرد يقولى الحال مال
بس انعملوا اية نحمدوة على كل حال
وادينا عايشين وع الغلب صابرين
ومش عارفين البلد ريحة فين
واحلف على مصحف ما اعرف
اذا كنا احنا عايشين ولا مدفونين
نفسى اقول كلام الحاجة امينة
بياعة العسلية
اللى قاعدة قدام المدرسة الابتدائية
اللى كل راس مالها
ميكملش سندوتش طعمية
اقول اية هو دة المصرى اليوم
اللى شايل الطين وشايف الويل
وشارب الذل هو دة اللى عمرة متعملة حساب
لسبب بسيط علشان هو مخلوق للعذاب
وربنا يكون فى عون المسئولين
بيتعبوا علشان الناس بقت كتير
وكفاية عليهم يحطوا قوانين
ايشى فى المرور وايشى فى الضرايب
متقلش يعنى احنا كنا ناقصين
كل اما الحكومة تتذنق وعايزة قرشين تيجى عاملة الحبيتين
الدولة بتستلف من الشعب طب حد يقول الشعب ايستلف من منين
آخر المواضيع
المصرى اليوم 
