جرحن يطيب وجرح ماهو بطايب
مبطي بقى ماطاب مبطي ولازال
من بعدها عيت تطيب العـــطايب
كني شربت الهم فنجال فنجال
كنا اصــغار ونلتهي باللعــــــايب
كانت لنا احلا طموحــات وامــال
كنا نقلــد دور كهلــه وشــايــب
انكبر انفسنا وحن تونا اطفــــال
بوجيهنا تلفح سمــوم الهبايــب
كنا نحط الرمث عن شمسنا اظلال
وكبرت وغطوها الاهل والقرايب
صارت مره وانا بعد صرت رجال
حطو لها برقع وشيلة ذوايب
اشوفها صعبه غدا شوفها محال
ومن بعد مده زوجوها بشايب
شايب ولكن يمتلك روس الاموال
وراحت وكن النار شبت شبايب
بين الضلوع من القهر تشعل اشعال
ومن بعد عشر اسنين جات بسبايب
صدفه ماجات بفزعت العم والخال
جات بشبح عز المنا والطلايب
ومعها بعد سايق وبيجر وجوال
قالت بدر قلت ايه قالت عجايب
باقي بدو قلت البداوه هي المال
ايه بدوي والبدو هم الحبايب
اللي بزين افعالهم تضرب امثال
نسيتي ايام الغنم والركايب
ياناسيه ماضيك لاطاب لك فال
قالت( بليز) وقلت ياحظ خايب
قالت (أيم سوري)وقلت مامن اشكال
غريب امرك يازمان العجايب
سبحان ربي بدل الحال في حال
الشاعر/بدر مزن الجعفري المطيري