ياليت الهاتف اللي جاب صوتك مااتجيه قطوع

ياليت الهاتف اللي جاب صوتك مااتجيه قطوع=ياليتـك ماتفارقنـي ولاتـطـري توادعـنـي
أبيك تسلي الخاطر وأسلـي قلبـي المفجـوع=بعد فرقاك يـوم إن الليالـي منـك تقطعنـي
لو إنك شفتني بعدك وانا عينـي تهـل دمـوع=لو إنك شفتني يوم الفـراق الصعـب يفجعنـي
ترى حالي بعد فرقاك حال التايـه الموجـوع=غريب في ديـارك والـدواء ماعـاد ينفعنـي
ولاينفعني إلا شوفتـك او صوتـك المسمـوع=بعـد ماضاقـت الدنيـا بوجهـي لاتلوعنـي
أبا أسمعك صوتي وإنت كلمني بكـل أسبـوع=أمانه كل راس أسبـوع صوتـك لايقاطعنـي
تشوف الأرض لاجاها الحيا واستبشرت برجوع=تراني مثلها صوتـك علـى الدنيـا يرجعنـي
تجي مثل الحيا وسط الصحاري والحيا متبـوع=يبل القاع وإنـت تبـل ريقـي بـس تمنعنـي
وترى مافيه عيب إني عشقتك والهوى مشروع=لو إني خابر إنك منت حولـي بـس تسمعنـي
أنا لاغاب صوتك صرت من كل البشر مقطوع=ماشوف إلا انت مخلوقٍ على الدنيـا يمتعنـي
متاعي في حياتي والرجا في شوفتك ممنـوع=عسـى ربـي يمتعنـي بصبـرٍ مايضيعـنـي
أحبك والمحبه تختلـف مابيـن نـوع ونـوع=وحبك نوعه النـوع الشديـد اللـي يروعنـي
أحبك بالمسامع والمشاعر والضمـا والجـوع=وبكل احساس صدقٍ بالمحبـه فيـك يجمعنـي
واصعب من صعوبة حبة الرجال راس الكـوع=وانا ياما نهيـت القلـب عنـك ولايطاوعنـي
تغيب وتتبعك دقات قلبي بين غصـب وطـوع=وانا مابين بعـد وقـرب ويـن الله موزعنـي
أكيد انك بعيد ولايبي لـه بحـث هالموضـوع=لكن القلب لامنـه سمـع صوتـك يشجعنـي
يشجعني على التفكير فيك ويجـري الينبـوع=مثل مجرى العروق بدمها والشـوق يدفعنـي

رفْقة رديّ المعْرفه بعْتها دَيـن=على زبونٍ ضَمّها واحتضَنهـا
بغى يجيني بالثمن قلت : بعْدَين=أمسك فلوسك لين ننشدْك عَنْهـا
ما بعْتك الاّ سلعةٍ يا احْمر العين=أبيعهـا وأبيـع حتـى ثمنهـا
والله ما ابا فيها ثمن لوّ قرشين= بسّ المهم انِّي تخلّصْـت منهـا

للشاعر/ رشـيـد الـزلامــي