بسم الله الرحمن الرحيم
السلام عليكم ورحمة الله وبركاته
جـرة ربــابـــه ان شاء الله تعجبكم
بصوت/ فرحان الظفيري
كلمات/ مبارك ابن عيينان الهاجــري
وإليكم القصيـــــــــــــــدة كامله :
ياوجودي وجـد طيـر وصقـاره فقيـر=تو ماخوى مع الشيخ من ضمن أخويـاه
حدته الايـام والديـن والوقـت العسيـر=ومن خلـق الله والطيـر ماعمـره قنـاه
مايميز طلـع طيـره ليـا تلـه أعصيـر=وكل ماهده على الطلع من دونـه دعـاه
والنداوي غلق أسبـوع مـاذاق النسيـر=عرضه برد الهبايـب وخطرالـه عشـاه
في حياتـه مابعـد شـل ولا هـد طيـر=وابتلا في الطير والطيـر فيـه الله بـلاه
مالقاله من ردى الحظ في الحمله شويـر=والمعـزب قـدم عينـه وديـانـه وراه
أتوجد وجـد طيـره وأنـا مانـي بخيـر=لو يفيد الوجد حولـت مـن راس العـلاه
منك ياللي تسكن القلب من عادك صغيـر=قبل تقرا سورة الحمد وتعـرف الصـلاه
عاد أهلكم في أول القيض تنزل جال بيـر=فوق عد منزله حد عـرق مـن حصـاه
وعاد ورد الطرش يومين والثالث صديـر=في آخر المصياف والقيض في أول مبتداه
وعاد أبوك الراي عنده وفي ربعه الأمير=والجماعه في ذرى الله ومن عقبـه ذراه
وعاد بيته في الرفاعه ومفروشه حصيـر=شاهق لاشافه الضيف مـن بعـد نصـاه
وعاد ضوه من سناها على العارض تنير=قبل يذن مـذن الفجـر وأوجـاره شعـاه
وعاد خيره عند ربعـه ويلقـاه القصيـر=ومايذوق الزاد من دون ربعه واقصـراه
وعاد مربط خيلكم حي والسيف الشطيـر=الصدا مانـاش حـده وقلـل مـن شبـاه
وعاد خطلان اليماني تشـار وتستشيـر=والرفيق ان زل يذخـر ويدمحلـه خطـاه
وعاد قلبك في المدينه مثل عين الضريـر=والقصر ماذقـت زاده ولا شربـت مـاه
وعاد تفكيرك ليـا جيـت للجـم الغزيـر=كيف أموتك عشق وارجع على قيد الحياه
كـل هـذا قبـل دورات بقعـا تستديـر=والسنين تمـر والوقـت ماتاقـف رحـاه
قبل صدك ميسمه يكوي الضلع القصيـر=يوم بير الغي تومي علـى جالـك رشـاه
كان عشقك غير والحين عشقك صار غير=لو تشوف الضامي الحنج ماتقطع ضمـاه
ولا أنا لادلبح النجم وجهـه فـي الغديـر=قمت أجر الصوت وأكتب على حيد النبـاه
بيت شعر ماكتبـه أصمعـي ولا جريـر=بس يبقا مـن جمالـه وترويـه الـرواه
أي ليـل مـاأرى ذالـك البـدر المنيـر=أي عشـق يقتـل العاشقينـا وأسـفـاه
وياصغير في عيوني وفـي قلبـي كبيـر=ليت قلبي برق غيرك ليـا شافـه رعـاه
كان ماضره فراقـك ولا الفرقـا تصيـر=والسهر يقطع نواصيه في سمـر الجبـاه
ومل قلب مابقا الا مـن ضلوعـه يطيـر=كل مادقه علـى الغالـي المقفـي غـلاه
السهـر جاعـد شـداده وونتـه البعيـر=والحزن ضلع المسامه ودمعاتـه عصـاه
ياقليل الشوق ماعاد مـن عقبـك كثيـر=الجفـا فـج الحنـايـا ومعلـوقـي زواه
يابلايه يادوايـه تـرى وضعـي خطيـر=والبـلا انـي عارفـك يابـلاه ويـادواه
والله اني عاقل بـس فـي حبـك غريـر=واشهد أن القلب مبطي ويبطي في عمـاه
لك علي اني أحبـك ولـو مانـي بخيـر=من غلاك اللي ذبحنـي ولا منـه غنـاه
تقبلوا تحياتي وتقديري
مغليكمـ ،، راعي الرايــ (فراج بن عون) ـــــه
آخر المواضيع
ربابه/ ياوجودي وجد طيرٍ وصقاره فقير 
