يـوم أن غـيـره يـرد الــشــور لـفـلانـه ؟ لـي جـــد رأيــه يـغـار الـســيــف لاسـلـه

يابنت أنا من عــسـّـــف بالشعر شيطانه = مايوم رحت أشتكي للشعر من قله
أن كان ربي عطاكِ أوصاف فتانه = أنا عطاني شموخٍ يرفض الذله
أول أناديكِ ياأم عيون نعسانه = وأقول طــّول غيابك خافي من الله
واليوم أبجرحك جرحٍ صعب نسيانه = مدام قلتي تغــّـزل والفخر خله
مدام وصلت لساس العود وأغصانه = عزالله أني حجاجي منكِ لا فـله
جدي فخر عزوتي وأفخر على شأنه = وكل القصايد تموت ولاتوصل له
يوم أن غيره يرد الشور لفلانه = لي جد رأيه يغار السيف لاسله
ويوم أن غيره عقد للضيف حجانه = يابنت جدي يروح الضيف مامله
ينصاه منهو تلوعه كايد أحزانه = ويشفي غليله قبل لايشتكي غله
لو بس كلمة هلا لاقالها لسانه = تطفي لهيب الصدور اللي تقل مله
شيخٍ نهاية حدود الهم بيبانه = ماينعقد راس حـبـلٍ خـابـرٍ حـله
تجيه شمطان اللحى بالحمل بلشانه = وتنساه عنده على كتفٍ تزهل له
من الجود معطيه راعي الجود سبحانه = أكثر من اللي قسم بين البشر كله
سمعوا بذكره وجو للورث جدانه = ماقبله أموات تارث حي بالمله
الشمس تغضي حيا من زود ضيانه = وعن قيض بقعا يلوذ الظل في ظله
وصفه يعـجـّـز بحور الشعر وأوزانه = ومن نشوة القاف جت بأوزان مختله
حاولت وأعلن علّي الشعر عصيانه = عيا وأنا اللي عسفته دقه وجله
عذري لشيخٍ بدعت القاف من شأنه = أني نخيت القوافي وأزرت أتدله
وعذرك لقافٍ تبين أكمال نقصانه = أنك رجعتي وزدتي علته علْه
وأن كان مانتي بعد هالقول ندمانه = ماني ولد من يهاب الموت من ظله