قصيدة غزليه للشاعر شقير بن عقيل الجذع العتيبي

واصاحبي دونه من الشـط غبّـه =غبّات وأمـواج ٍ تكيـد السفينـه
دونه محيـطٍ كوّنـه حكـم ربـه =ما حدّدو طول المـدى غايصينـه
كم قـاربٍ هـاز العبـور وقلبـه =وكم ضاع به من صافيات المكينه
في نجد وأنا فـي ديـار المسبـه =دارٍ عجزت أعرف لهلهـا رطينـه
دارٍ عسـى صـم القنابـل تدبـه =تحرق علو أرضه وتظهـر دفينـه
دار الهنود اللـي مبـاه ولاحبـه =حيث الشريف اللي يجيهـا تهينـه
فيها يعيش اللي نسي خوف ربـه =خطو البهيم اللـي تهـاون بدينـه
نذل ٍ لقى الحوض الحرام وشربـه =قطع اليديـن ولا حيـاة الغبينـه
يمشي على راسه من العيب قبـه=تبّاع عبّـاد البقـر فـي عرينـه
متـى بـراي الله نـروح ونكبـه =وأشوف من عيني تبي شوف عينه
لو هو بعيد الـدار قلبـي يحبـه =وروحي عليه من المحبه حزينـه
خشفٍ سلب قلبي غـلاه ولعبـه =لعبة سلوك الوتر مـع لاعبينـه
زند الغـلا فيّـه قدحبـه وشبـه =وطحن ودقـق بالمحبـه طحينـه
بعده مرض قلبـي ولامـاه طبـه =وعليه قلبي بـاح خافـي كنينـه
وجدي عليهم وجد من ماه صبـه =علـى بـذور ٍ مشتراهـا بدينـه
في خانة المليـون سمـه وحبـه =غير النقود ومـا تحوشـه يدينـه
وبعد استتم الزرع وهـوه تعبـه =خيّل عليه اللـي حقـاقٍ غشينـه
وأخذ عليه السيـل ربعـه وغبـه =لين اختلط حبـه وتبنـه وطينـه
وعوّد وحظّه فالمجالـس يسبـه =يطـق كـف بكـف لمعذليـنـه
على الذي حـي ٍ وميـت بحبـه =الوصف كامل والمذاهب حصينـه
لا عاري ٍ عـوده ولاهـوب دبـه =معـزلٍ تزهـا البناجـر يديـنـه
مناحرة صـدر ومحاجـر ولبـه =وليا عرض خصر ٍ يهلّـك جنينـه
خشفٍ عذا نجـد العذيـه مربـه =غربٍ من الدمام شـرق المدينـه
فـي قريـةٍ مابيـن وادي وتَبَّـه =أربع حروف الاسم يـا عارفينـه
للي قـرا بـأي الكتـاب وكتبـه =اسمه بحرف من اسم هاك المدينه