أذا ماجـابـنـي هـاجـس ولا ذكـرى ولا تحـنان .. ؟!

أحبك حب لو تعرف كم أحبك بلا حسبان = كرهت اللي يحبونك وجيت الحب من شأني
تخيل لا تذكرتك ذكرت البحر والطوفان = ولامن غبت عن شوفي لقيتك داخل أعياني
أحس الكون من بعدك متاهات وقهر وأحزان = أنا بعدك كذا عايش مابين الهم وأحزاني
عرفتك مرهفٍ حسـّـاس عطوفٍ تكرة الحرمان = أجل ماهي بمعقوله تصير أسباب حرماني
وأذا ماجابني هاجس ولا ذكرى ولا تحنان = يا أن الوقت متغــّير ؟ يا أنك واحدن ثاني
دخيلك كيف ماتذكر حنين الشوق والوجدان =عزف لك صادق أحساسي مشاعر نبض وجداني
دخيلك لصفا جوك تذكــّر لك بقايا أنسان = لعلك تذكر أجناني ليا من صرت وحداني
تذكرتك ؟ تذكرني ؟ تذكر وقتنا اللي كان = تذكر كيف أغني لك وحضورك يربك أوزاني
تبادلني هلا عيني .. هلابك ياقرب الخلان = وكل ماغبت عن عينيك تدوّر لين تلقاني
أقدم لك قصيدة حب عروس ولابسه فستان = ذهبها بعض من روحي فدتك حروف قيفاني
من أول لاكتبت أسمك أحس بنشوة الكسبان = ولاكنه غدا هالحين يذكـّـرني بخسراني
خسرت أرضاك بجنوني وأنا المخطي وأنا الغلطان = حشى لله ماتخطي ولالك ذنب بجناني
ورجعت أرتب أوراقي وضاع الرقم والعنوان = وعساه ليا قرأ شعري ذكر رقمي وعنواني