بنتك لامنه عوى الذيب.............ذيبه!!!!

يابـوي جعلك للبقـــا والمكاسيـــب =عمـــري بدونك يالذّرا ويـــش أبي بـــه
يابوي تســأل عن شفــاك المراقــيب =طلعـة ســواتك للنــــوايف غريبــــــه
ليه المرض مايعرف الزّيـــن والعيب ؟ =مايدري انــك للمخاليــق هيبــــــه !!
أبســألك وش بـه غـزا وجهك الشيــب =والقـــلب لايـع والنـواظر شحيبــــــه
خــذ دلـّتك واركى على مسند الجيــب =وعطنــي شمـــاغك بلثمــه وأحتمـــي به
ونــروّح لأرض ٍ بهـا العشـب والطيــب =وتسمــــع كلام ٍ يالغــلا تحتفـــــي به
يابــوي بنتك لاانحكــى بالتــجاريب =كـــل ٍ يشق لهيبـــه الصـــّيت جيبـــه
يابـوي مـــاني من ســوات المخاريب =اللـــّي تجيب لعليـــَة القــوم خيــبــه
ومــاني من اللـي لامشت حفـّها الرّيب =أنا مـــن اللــّي مايـــدنــّس حليبـــه
مـرفوع شــاني عن غــرام المكاتيــب =وأكبـــر من انّني أرتضـــــي بالحبيبــه
أنــا غرامـــي لاابتـدوا بالـتّراحيب =نفوس الأوادم في وجــــودي رحيبـــــه
وان كان زينــي فتنـــة ٍ للمــصاويب =أحــــط وجهـــي بالحــــريق ولهيبـه
زينـــي أبيعــه وأشتـري سمعه الطّيب =اســــم ينــومس بالصــّروح الذهيـــبه
وان كــان عندي ( بالحــلا) شي ٍاصعيب =عندي جــــدود ٍ مارضــــت بالغليبـــه
دمـوع القبايل في لقـــانا مســاكيب =كــــن المقــــابر لاحضــرنا قريبـــه
خضـــّبت لك كفـــّـي من العــز تخضيب =ورفعــــت راسي للنــّجوم الصــّـــعيبه
واللــه لأســــدّك بالفـعول المصاليب =واللـــــه لأشيــلك بالرخــا والمصيبـه
طــلع المعالي ماانحكــــم للشـواريب =بنـــت ٍ وأنــــاطح فارس القــوم طيبـه
وياشيخـــي إبشــر لوتدور الدّواليــب =بنتـــك إلا منـــّه عــوى الذّيـب ( ذيـبه