وحــــــــداني

الي بقى لي مع الأيـام ..وفٌيتـه=والضيق لو ينهمر تشربه وديانـي
ماهي كبيره علي والحزن غنيتـه=ولاهي غريبه اذا وقتـي تحدانـي
كم جرح خذته من الاحباب..ضميته=وجروح قلبي زكاه لحـب خلانـي
مطعون؟عادي ,جفا الاقارب؟داويته=تعبان؟ حدي ,ردي هالحظ؟ خاواني
صدمه؟بسيطه ,هوان الحال؟مريته=مقرود؟ أدري , واذا حرمان؟عداني
مافاح هم لك والله مـا تقهويتـه=و مامر حزن بغيري مـا تبلانـي
ياما وياما من الخـذلان ..عديتـه=إلا بصاحب ..بعد العشره تناساني
ازريت لأنسى غيابه ليـن ناديتـه=والموت لامن تجاهلني وجافانـي
وينه يجيني ..وكل عتـاب كنيتـه=ياليت يدري بعد فرقاه وش جانـي
من كنت طفل وانا أرجاه في بيتـه=شيبت..واثره على هالحال خلانـي
حتى جناح العتب لرضـاه ذليتـه=ماطرت بعده فرح من ذل جنحانـي
ياقلب صبرك..ترى كل شي سويته=ماكان افضل من اللي كان بإمكاني
لو بي قوه علـى الهجران؟خليتـه=لوبـي ذره مـن النكران؟يفدانـي
الجرح أرحم..اذا يرجع من أغليته=مجروح؟فدوه..ولكن صعب وحداني