حبيبتي /عدي جروح الليالي
...........من كثرها/ ازريت لاحصي عددها
اشيلها /واظهر مع الناس خالي
................ الليل يسقيها / وقلبي حصدها
اول جروحك /صار صاحب معالي
................واخر جروحك /جرحً / امر وادهى
والهم يزرع / للسوابق / توالي
..................... امً ودود/ وكثر الله ولدها
مابين منطوق الجفا /واعتدالي
............... فقدت لي حاجه/ وغيري وجدها
حبيبتي / لا/ يا بعد كل غالي
.................قصيدتي ماكل شاعر/قصدها
يامٌلهمة / كل الطروق الجزالي
..............لو الجروح الحٌمر / يكثر عددها
احساسي اكبر من حروف المقالي
................. اليا تهيت شوفتك في وعدها
رسمت لك احلى الصور في خيالي
.............صوره يذوب الشمع في كف يدها
الشمس / تنشر لونها البرتقالي
................. على جبينك / كنّها في بلدها
وهـذي شفاهك /ملتقى كل حالي
............... يمطر مطرها / قبل يبرد بردها
تسافري / واصرخ تعالي / تعالي
.................. صرخه / تهز الغيم للي بعدها
استوطني بين الجدي والهلالي
.......... واستلهمي سر البروق / ورعدها
وتذكري / كل الليالي الخوالي
..................وقلبين / يبتل الكمد /في كمدها
ويبقى لعيني/ في عيونك /سؤالي
.............غمزة عيونك/ من هو اللي رصدها؟؟
حبيبتي / عِدي / جروح الليالي 
