الشـــــــــــارع العــــــــــــــام

عقبال ياماخذ فـؤادي ميـة عـام = ضيعتني منك وانـا مـا اهتديتـك
لا ..ما نسيتك كيف بانساك مـا دام = ذكرى الفراق تهزنـي لـو نسيتـك
حبك قدر وانا علـى ديـن الاسـلام = مكتوب في وجه الجبين ورضيتـك
لك في الضمير الود والحشمه اتوام = ولي في ضميرك مثل ما انا بغيتـك
ولك منزلٍ في نايف القلـب وخيـام = وذود الغـلا ترعـاه ولا شكيـتـك
يفطر عليك القلب وان فارقك صـام = والله لونـك شـوك سـدره كليتـك
القلب طيرٍ لادعـي للهـوى حـام = والا انت وكره من كثـر ماهويتـك
كن العيون من النظر عقبـك ايتـام = وكني ماريت الا انت من يوم ريتـك
وكنك معي وانا فقدتك مـن اعـوام = مـع الخيـال القـاك كنـي لقيتـك
من صعب وصلك ما تهنيتك احـلام = وان جابتك فزيت شـوق ومحيتـك
يعني وصالك صعب واهدافي اوهـام = يعنـي زرعتـك للقـدر ماجنيتـك
صبرك يقولون العرب كـل الايـام = يوم عليـك ويـوم لاجـاك جيتـك
ويا قلب ياللي ورثك اجـروح وآلام = بليتني ماهـو بانـا اللـي بليتـك
ولعتني من عادني في الهوى خـام = واسرفت بي وانا خطامـك عطيتـك
طعتك وزبدة طاعتـك هـم وهيـام = مالله كتب لي واستخرت وعصيتـك
لوللقلوب اسـواق بايـع وسـوام = لاابدلـك وان جيتنـي ماشريـتـك
والا انت ياللي جيش عينيك مقـدام = لا اقنعت منـك والرجـا مارجيتـك
كني سجين بين..افـراج ..واعـدام = وكنك سجن وانـا بنفسـي بنيتـك
تنبيك عن حالي محاصيـل الالهـام = وتخبرك نظراتـي نهـار التقيتـك
عقب الوصال اللي على عين من لام = قدهو يكفيني عن الوصـل صيتـك
وقدني الى مريت بالشـارع العـام = لديت من ما في الضميـر ودعيتـك
ادري ان صوتي ماقطع عشرة اقدام = وادري بي اعود الى مـن نصيتـك
ياشينهـا يامحنـيٍ راس الابهـام = ماقدر على شوفك وانا عنـد بيتـك
الاعمار ما تضمن وانا اخاف الاحكام = ارثيك خـاف اودعـك مـا رثيتـك