لو نسامح
شعر
د / آمال محمود كحيل
لو قلوب الناس بتصفى
وعمرها ما تشيل ضغينة
لو نفوسها تبقى عارفة
يعني إيه لين ومرونة ؟؟
يعني إيه تسامح وتنسى
بدل ما تجرَّح ، وتقسى
يعني إيه تهدي ابتسامة
موش عتاب وموش ملامة
لو تصافح كل إيد
ممدودالها بإيد حنونة
رغم أنات الجراح
تبقى قادرة بارتياح
تدي من جواها حب
ونظرة مدلولها السماح
ولما تسعد كل قلب
وتهاديه بنور الصباح
موش هاتندم ع اللي راح
ويبقى ده معنى السكينة
لو تقول كلمة رقيقة
صادقة وحروفها حقيقة
نبضها الخير اللي باقي
وعمره ما يغيب لو دقيقة
لو تخلي البسمة تزهر
فوق شفايف المحرومين
أو تخلي الفرحة تملا الكون
وتملا كل عين
لو بتقطف أحلى وردة
تهديها بإحساس مودة
للحيارى للي تايهين
في الدروب ومحتاجين
نقطة المية اللي تطفي
لوعة القلب الحزين
يبقى ده طعم السكينة
طول ما فيه غفران ورحمة
طول ما فيه عطف ومسامحة
المشاعر تبقى واضحة
وتختفي معها الظنون
لما همسة حب واحدة
ع القلوب الحايرة تنده
يشعر الإنسان براحة
تغمره بلحظة صراحة
ويا نفسه وجرحه يهدا
ويصالح حزنه ويرضى
باللي مكتوب له ويبدا
يحس إيه معنى السكينة
لو زمانَّا قاسي جارح
لو سرق منا الأمان
إحنا نقدر بالتسامح
نتصالح ويا الزمان
لما نعلا فوق جراحنا
لما ننسى كان وكنا
لما نحلم باللي جاي
ونطوي بالنسيان همومنا
الحياة لحظة وخسارة
نعيشها حاسين بالمرارة
ليه ما نفتح باب قلوبنا
ليها ونشوف الحقيقة؟
ف كلمة حلوة ،
ف نبض غنوة
ف نظرة أو ضحكة بريئة
دي الحياة بالود أجمل
مهما مشوارها هايطول
والتعايش معها أسهل
لما من جوانا نصفح
لما ليها نمد إيدنا
ونبتسم وقلوبنا تفرح
يبقى ده معنى السكينة
لو عيونا تشوف شعاع الفجر
لما
يشق ضلمة
أوتشوف ازاي بكلمة
دافية ممكن
نفس حالمة
يرسى بيها جناح سفينة
بقلب مينا
لو يكون جوَّانا مطرح
ليها
لونفرش إيدينا
لو بنزرع في الصدور
بذرة محبة ،
وحبة حبة
نرويها بالعطف تطرح
ألف حبة
والقلوب تفضل أحبة
واللي كان طول عمره يحلم
رغم حيرته ، رغم خوفه
حلمه يتحقق يشوفه
قصاد عينيه
يلمسه بكفوف إيديه
ويكتشف معنى السكينة
آخر المواضيع
لــــــو نســــامـح 
